මංත්ර මාතෘකා පුෂ්ප මාලා ස්තව

mantra matruka pushpa mala stava in sinhala

කල්ලෝලෝල්ලසිතාමෘතාබ්ධිලහරීමධ්යේ විරාජන්මණි-
-ද්වීපේ කල්පකවාටිකාපරිවෘතේ කාදංබවාට්යුජ්ජ්වලේ ।
රත්නස්තංභසහස්රනිර්මිතසභාමධ්යේ විමානෝත්තමේ
චිංතාරත්නවිනිර්මිතං ජනනි තේ සිංහාසනං භාවයේ ॥ 1 ॥

ඒණාංකානලභානුමංඩලලසච්ඡ්රීචක්රමධ්යේ ස්ථිතාං
බාලාර්කද්යුතිභාසුරාං කරතලෛඃ පාශාංකුශෞ බිභ්රතීම් ।
චාපං බාණමපි ප්රසන්නවදනාං කෞසුංභවස්ත්රාන්විතාං
තාං ත්වාං චංද්රකළාවතංසමකුටාං චාරුස්මිතාං භාවයේ ॥ 2 ॥

ඊශානාදිපදං ශිවෛකඵලදං රත්නාසනං තේ ශුභං
පාද්යං කුංකුමචංදනාදිභරිතෛරර්ඝ්යං සරත්නාක්ෂතෛඃ ।
ශුද්ධෛරාචමනීයකං තව ජලෛර්භක්ත්යා මයා කල්පිතං
කාරුණ්යාමෘතවාරිධේ තදඛිලං සංතුෂ්ටයේ කල්පතාම් ॥ 3 ॥

ලක්ෂ්යේ යෝගිජනස්ය රක්ෂිතජගජ්ජාලේ විශාලේක්ෂණේ
ප්රාලේයාංබුපටීරකුංකුමලසත්කර්පූරමිශ්රෝදකෛඃ ।
ගෝක්ෂීරෛරපි නාරිකේලසලිලෛඃ ශුද්ධෝදකෛර්මංත්රිතෛඃ
ස්නානං දේවි ධියා මයෛතදඛිලං සංතුෂ්ටයේ කල්පතාම් ॥ 4 ॥

හ්රීං‍කාරාංකිතමංත්රලක්ෂිතතනෝ හේමාචලාත්සංචිතෛඃ
රත්නෛරුජ්ජ්වලමුත්තරීයසහිතං කෞසුංභවර්ණාංශුකම් ।
මුක්තාසංතතියජ්ඤසූත්රමමලං සෞවර්ණතංතූද්භවං
දත්තං දේවි ධියා මයෛතදඛිලං සංතුෂ්ටයේ කල්පතාම් ॥ 5 ॥

හංසෛරප්යතිලෝභනීයගමනේ හාරාවලීමුජ්ජ්වලාං
හිංදෝලද්යුතිහීරපූරිතතරේ හේමාංගදේ කංකණේ ।
මංජීරෞ මණිකුංඩලේ මකුටමප්යර්ධේංදුචූඩාමණිං
නාසාමෞක්තිකමංගුලීයකටකෞ කාංචීමපි ස්වීකුරු ॥ 6 ॥

සර්වාංගේ ඝනසාරකුංකුමඝනශ්රීගංධපංකාංකිතං
කස්තූරීතිලකං ච ඵාලඵලකේ ගෝරෝචනාපත්රකම් ।
ගංඩාදර්ශනමංඩලේ නයනයෝර්දිව්යාංජනං තේऽංචිතං
කංඨාබ්ජේ මෘගනාභිපංකමමලං ත්වත්ප්රීතයේ කල්පතාම් ॥ 7 ॥

කහ්ලාරෝත්පලමල්ලිකාමරුවකෛඃ සෞවර්ණපංකේරුහෛ-
-ර්ජාතීචංපකමාලතීවකුලකෛර්මංදාරකුංදාදිභිඃ ।
කේතක්යා කරවීරකෛර්බහුවිධෛඃ ක්ලුප්තාඃ ස්රජෝ මාලිකාඃ
සංකල්පේන සමර්පයාමි වරදේ සංතුෂ්ටයේ ගෘහ්යතාම් ॥ 8 ॥

හංතාරං මදනස්ය නංදයසි යෛරංගෛරනංගෝජ්ජ්වලෛ-
-ර්යෛර්භෘංගාවලිනීලකුංතලභරෛර්බධ්නාසි තස්යාශයම් ।
තානීමානි තවාංබ කෝමලතරාණ්යාමෝදලීලාගෘහා-
-ණ්යාමෝදාය දශාංගගුග්ගුලුඝෘතෛර්ධූපෛරහං ධූපයේ ॥ 9 ॥

ලක්ෂ්මීමුජ්ජ්වලයාමි රත්නනිවහෝද්භාස්වත්තරේ මංදිරේ
මාලාරූපවිලංබිතෛර්මණිමයස්තංභේෂු සංභාවිතෛඃ ।
චිත්රෛර්හාටකපුත්රිකාකරධෘතෛර්ගව්යෛර්ඝෘතෛර්වර්ධිතෛ-
-ර්දිව්යෛර්දීපගණෛර්ධියා ගිරිසුතේ සංතුෂ්ටයේ කල්පතාම් ॥ 10 ॥

හ්රීං‍කාරේශ්වරි තප්තහාටකකෘතෛඃ ස්ථාලීසහස්රෛර්භෘතං
දිව්යාන්නං ඝෘතසූපශාකභරිතං චිත්රාන්නභේදං තථා ।
දුග්ධාන්නං මධුශර්කරාදධියුතං මාණික්යපාත්රේ ස්ථිතං
මාෂාපූපසහස්රමංබ සඵලං නෛවේද්යමාවේදයේ ॥ 11 ॥

සච්ඡායෛර්වරකේතකීදලරුචා තාංබූලවල්ලීදලෛඃ
පූගෛර්භූරිගුණෛඃ සුගංධිමධුරෛඃ කර්පූරඛංඩෝජ්ජ්වලෛඃ ।
මුක්තාචූර්ණවිරාජිතෛර්බහුවිධෛර්වක්ත්රාංබුජාමෝදනෛඃ
පූර්ණා රත්නකලාචිකා තව මුදේ න්යස්තා පුරස්තාදුමේ ॥ 12 ॥

කන්යාභිඃ කමනීයකාංතිභිරලංකාරාමලාරාර්තිකා
පාත්රේ මෞක්තිකචිත්රපංක්තිවිලසත්කර්පූරදීපාලිභිඃ ।
තත්තත්තාලමෘදංගගීතසහිතං නෘත්යත්පදාංභෝරුහං
මංත්රාරාධනපූර්වකං සුවිහිතං නීරාජනං ගෘහ්යතාම් ॥ 13 ॥

ලක්ෂ්මීර්මෞක්තිකලක්ෂකල්පිතසිතච්ඡත්ත්රං තු ධත්තේ රසා-
-දිංද්රාණී ච රතිශ්ච චාමරවරේ ධත්තේ ස්වයං භාරතී ।
වීණාමේණවිලෝචනාඃ සුමනසාං නෘත්යංති තද්රාගව-
-ද්භාවෛරාංගිකසාත්ත්විකෛඃ ස්ඵුටරසං මාතස්තදාකර්ණ්යතාම් ॥ 14 ॥

හ්රීං‍කාරත්රයසංපුටේන මනුනෝපාස්යේ ත්රයීමෞලිභි-
-ර්වාක්යෛර්ලක්ෂ්යතනෝ තව ස්තුතිවිධෞ කෝ වා ක්ෂමේතාංබිකේ ।
සල්ලාපාඃ ස්තුතයඃ ප්රදක්ෂිණශතං සංචාර ඒවාස්තු තේ
සංවේශෝ නමසඃ සහස්රමඛිලං ත්වත්ප්රීතයේ කල්පතාම් ॥ 15 ॥

ශ්රීමංත්රාක්ෂරමාලයා ගිරිසුතාං යඃ පූජයේච්චේතසා
සංධ්යාසු ප්රතිවාසරං සුනියතස්තස්යාමලං ස්යාන්මනඃ ।
චිත්තාංභෝරුහමංටපේ ගිරිසුතා නෘත්තං විධත්තේ රසා-
-ද්වාණී වක්ත්රසරෝරුහේ ජලධිජා ගේහේ ජගන්මංගළා ॥ 16 ॥

ඉති ගිරිවරපුත්රීපාදරාජීවභූෂා
භුවනමමලයංතී සූක්තිසෞරභ්යසාරෛඃ ।
ශිවපදමකරංදස්යංදිනීයං නිබද්ධා
මදයතු කවිභෘංගාන්මාතෘකාපුෂ්පමාලා ॥ 17 ॥

ඉති ශ්රීමත්පරමහංසපරිව්රාජකාචාර්යස්ය ශ්රීගෝවිංදභගවත්පූජ්යපාදශිෂ්යස්ය ශ්රීමච්ඡංකරභගවතඃ කෘතෞ මංත්රමාතෘකාපුෂ්පමාලා ස්තවඃ ।

mantra matruka pushpa mala stava in sinhala