મંત્ર માતૃકા પુષ્પ માલા સ્તવ

mantra matruka pushpa mala stava in gujarati

કલ્લોલોલ્લસિતામૃતાબ્ધિલહરીમધ્યે વિરાજન્મણિ-
-દ્વીપે કલ્પકવાટિકાપરિવૃતે કાદંબવાટ્યુજ્જ્વલે ।
રત્નસ્તંભસહસ્રનિર્મિતસભામધ્યે વિમાનોત્તમે
ચિંતારત્નવિનિર્મિતં જનનિ તે સિંહાસનં ભાવયે ॥ 1 ॥

એણાંકાનલભાનુમંડલલસચ્છ્રીચક્રમધ્યે સ્થિતાં
બાલાર્કદ્યુતિભાસુરાં કરતલૈઃ પાશાંકુશૌ બિભ્રતીમ્ ।
ચાપં બાણમપિ પ્રસન્નવદનાં કૌસુંભવસ્ત્રાન્વિતાં
તાં ત્વાં ચંદ્રકળાવતંસમકુટાં ચારુસ્મિતાં ભાવયે ॥ 2 ॥

ઈશાનાદિપદં શિવૈકફલદં રત્નાસનં તે શુભં
પાદ્યં કુંકુમચંદનાદિભરિતૈરર્ઘ્યં સરત્નાક્ષતૈઃ ।
શુદ્ધૈરાચમનીયકં તવ જલૈર્ભક્ત્યા મયા કલ્પિતં
કારુણ્યામૃતવારિધે તદખિલં સંતુષ્ટયે કલ્પતામ્ ॥ 3 ॥

લક્ષ્યે યોગિજનસ્ય રક્ષિતજગજ્જાલે વિશાલેક્ષણે
પ્રાલેયાંબુપટીરકુંકુમલસત્કર્પૂરમિશ્રોદકૈઃ ।
ગોક્ષીરૈરપિ નારિકેલસલિલૈઃ શુદ્ધોદકૈર્મંત્રિતૈઃ
સ્નાનં દેવિ ધિયા મયૈતદખિલં સંતુષ્ટયે કલ્પતામ્ ॥ 4 ॥

હ્રીં‍કારાંકિતમંત્રલક્ષિતતનો હેમાચલાત્સંચિતૈઃ
રત્નૈરુજ્જ્વલમુત્તરીયસહિતં કૌસુંભવર્ણાંશુકમ્ ।
મુક્તાસંતતિયજ્ઞસૂત્રમમલં સૌવર્ણતંતૂદ્ભવં
દત્તં દેવિ ધિયા મયૈતદખિલં સંતુષ્ટયે કલ્પતામ્ ॥ 5 ॥

હંસૈરપ્યતિલોભનીયગમને હારાવલીમુજ્જ્વલાં
હિંદોલદ્યુતિહીરપૂરિતતરે હેમાંગદે કંકણે ।
મંજીરૌ મણિકુંડલે મકુટમપ્યર્ધેંદુચૂડામણિં
નાસામૌક્તિકમંગુલીયકટકૌ કાંચીમપિ સ્વીકુરુ ॥ 6 ॥

સર્વાંગે ઘનસારકુંકુમઘનશ્રીગંધપંકાંકિતં
કસ્તૂરીતિલકં ચ ફાલફલકે ગોરોચનાપત્રકમ્ ।
ગંડાદર્શનમંડલે નયનયોર્દિવ્યાંજનં તેઽંચિતં
કંઠાબ્જે મૃગનાભિપંકમમલં ત્વત્પ્રીતયે કલ્પતામ્ ॥ 7 ॥

કહ્લારોત્પલમલ્લિકામરુવકૈઃ સૌવર્ણપંકેરુહૈ-
-ર્જાતીચંપકમાલતીવકુલકૈર્મંદારકુંદાદિભિઃ ।
કેતક્યા કરવીરકૈર્બહુવિધૈઃ ક્લુપ્તાઃ સ્રજો માલિકાઃ
સંકલ્પેન સમર્પયામિ વરદે સંતુષ્ટયે ગૃહ્યતામ્ ॥ 8 ॥

હંતારં મદનસ્ય નંદયસિ યૈરંગૈરનંગોજ્જ્વલૈ-
-ર્યૈર્ભૃંગાવલિનીલકુંતલભરૈર્બધ્નાસિ તસ્યાશયમ્ ।
તાનીમાનિ તવાંબ કોમલતરાણ્યામોદલીલાગૃહા-
-ણ્યામોદાય દશાંગગુગ્ગુલુઘૃતૈર્ધૂપૈરહં ધૂપયે ॥ 9 ॥

લક્ષ્મીમુજ્જ્વલયામિ રત્નનિવહોદ્ભાસ્વત્તરે મંદિરે
માલારૂપવિલંબિતૈર્મણિમયસ્તંભેષુ સંભાવિતૈઃ ।
ચિત્રૈર્હાટકપુત્રિકાકરધૃતૈર્ગવ્યૈર્ઘૃતૈર્વર્ધિતૈ-
-ર્દિવ્યૈર્દીપગણૈર્ધિયા ગિરિસુતે સંતુષ્ટયે કલ્પતામ્ ॥ 10 ॥

હ્રીં‍કારેશ્વરિ તપ્તહાટકકૃતૈઃ સ્થાલીસહસ્રૈર્ભૃતં
દિવ્યાન્નં ઘૃતસૂપશાકભરિતં ચિત્રાન્નભેદં તથા ।
દુગ્ધાન્નં મધુશર્કરાદધિયુતં માણિક્યપાત્રે સ્થિતં
માષાપૂપસહસ્રમંબ સફલં નૈવેદ્યમાવેદયે ॥ 11 ॥

સચ્છાયૈર્વરકેતકીદલરુચા તાંબૂલવલ્લીદલૈઃ
પૂગૈર્ભૂરિગુણૈઃ સુગંધિમધુરૈઃ કર્પૂરખંડોજ્જ્વલૈઃ ।
મુક્તાચૂર્ણવિરાજિતૈર્બહુવિધૈર્વક્ત્રાંબુજામોદનૈઃ
પૂર્ણા રત્નકલાચિકા તવ મુદે ન્યસ્તા પુરસ્તાદુમે ॥ 12 ॥

કન્યાભિઃ કમનીયકાંતિભિરલંકારામલારાર્તિકા
પાત્રે મૌક્તિકચિત્રપંક્તિવિલસત્કર્પૂરદીપાલિભિઃ ।
તત્તત્તાલમૃદંગગીતસહિતં નૃત્યત્પદાંભોરુહં
મંત્રારાધનપૂર્વકં સુવિહિતં નીરાજનં ગૃહ્યતામ્ ॥ 13 ॥

લક્ષ્મીર્મૌક્તિકલક્ષકલ્પિતસિતચ્છત્ત્રં તુ ધત્તે રસા-
-દિંદ્રાણી ચ રતિશ્ચ ચામરવરે ધત્તે સ્વયં ભારતી ।
વીણામેણવિલોચનાઃ સુમનસાં નૃત્યંતિ તદ્રાગવ-
-દ્ભાવૈરાંગિકસાત્ત્વિકૈઃ સ્ફુટરસં માતસ્તદાકર્ણ્યતામ્ ॥ 14 ॥

હ્રીં‍કારત્રયસંપુટેન મનુનોપાસ્યે ત્રયીમૌલિભિ-
-ર્વાક્યૈર્લક્ષ્યતનો તવ સ્તુતિવિધૌ કો વા ક્ષમેતાંબિકે ।
સલ્લાપાઃ સ્તુતયઃ પ્રદક્ષિણશતં સંચાર એવાસ્તુ તે
સંવેશો નમસઃ સહસ્રમખિલં ત્વત્પ્રીતયે કલ્પતામ્ ॥ 15 ॥

શ્રીમંત્રાક્ષરમાલયા ગિરિસુતાં યઃ પૂજયેચ્ચેતસા
સંધ્યાસુ પ્રતિવાસરં સુનિયતસ્તસ્યામલં સ્યાન્મનઃ ।
ચિત્તાંભોરુહમંટપે ગિરિસુતા નૃત્તં વિધત્તે રસા-
-દ્વાણી વક્ત્રસરોરુહે જલધિજા ગેહે જગન્મંગળા ॥ 16 ॥

ઇતિ ગિરિવરપુત્રીપાદરાજીવભૂષા
ભુવનમમલયંતી સૂક્તિસૌરભ્યસારૈઃ ।
શિવપદમકરંદસ્યંદિનીયં નિબદ્ધા
મદયતુ કવિભૃંગાન્માતૃકાપુષ્પમાલા ॥ 17 ॥

ઇતિ શ્રીમત્પરમહંસપરિવ્રાજકાચાર્યસ્ય શ્રીગોવિંદભગવત્પૂજ્યપાદશિષ્યસ્ય શ્રીમચ્છંકરભગવતઃ કૃતૌ મંત્રમાતૃકાપુષ્પમાલા સ્તવઃ ।

mantra matruka pushpa mala stava in gujarati