ଶ୍ରୀ ଲକ୍ଷ୍ମୀ ନାରାୟଣ ହୃଦୟ ସ୍ତୋତ୍ରମ୍

sri lakshmi narayana hrudaya stotram in odia

ଅଥ ନାରାୟନ ହୃଦୟ ସ୍ତୋତ୍ରମ୍

ଅସ୍ୟ ଶ୍ରୀନାରାୟଣହୃଦୟସ୍ତୋତ୍ରମଂତ୍ରସ୍ୟ ଭାର୍ଗଵ ଋଷିଃ, ଅନୁଷ୍ଟୁପ୍ଛଂଦଃ, ଶ୍ରୀଲକ୍ଷ୍ମୀନାରାୟଣୋ ଦେଵତା, ଓଂ ବୀଜଂ, ନମଶ୍ଶକ୍ତିଃ, ନାରାୟଣାୟେତି କୀଲକଂ, ଶ୍ରୀଲକ୍ଷ୍ମୀନାରାୟଣ ପ୍ରୀତ୍ୟର୍ଥେ ଜପେ ଵିନିୟୋଗଃ ।

କରନ୍ୟାସଃ ।
ଓଂ ନାରାୟଣଃ ପରଂ ଜ୍ୟୋତିରିତି ଅଂଗୁଷ୍ଠାଭ୍ୟାଂ ନମଃ ।
ନାରାୟଣଃ ପରଂ ବ୍ରହ୍ମେତି ତର୍ଜନୀଭ୍ୟାଂ ନମଃ ।
ନାରାୟଣଃ ପରୋ ଦେଵ ଇତି ମଧ୍ୟମାଭ୍ୟାଂ ନମଃ ।
ନାରାୟଣଃ ପରଂ ଧାମେତି ଅନାମିକାଭ୍ୟାଂ ନମଃ ।
ନାରାୟଣଃ ପରୋ ଧର୍ମ ଇତି କନିଷ୍ଠିକାଭ୍ୟାଂ ନମଃ ।
ଵିଶ୍ଵଂ ନାରାୟଣ ଇତି କରତଲକରପୃଷ୍ଠାଭ୍ୟାଂ ନମଃ ।
ଅଂଗନ୍ୟାସଃ ।
ନାରାୟଣଃ ପରଂ ଜ୍ୟୋତିରିତି ହୃଦୟାୟ ନମଃ ।
ନାରାୟଣଃ ପରଂ ବ୍ରହ୍ମେତି ଶିରସେ ସ୍ଵାହା ।
ନାରାୟଣଃ ପରୋ ଦେଵ ଇତି ଶିଖାୟୈ ଵୌଷଟ୍ ।
ନାରାୟଣଃ ପରଂ ଧାମେତି କଵଚାୟ ହୁମ୍ ।
ନାରାୟଣଃ ପରୋ ଧର୍ମ ଇତି ନେତ୍ରାଭ୍ୟାଂ ଵୌଷଟ୍ ।
ଵିଶ୍ଵଂ ନାରାୟଣ ଇତି ଅସ୍ତ୍ରାୟ ଫଟ୍ ।
ଦିଗ୍ବଂଧଃ ।
ଓଂ ଐଂଦ୍ର୍ୟାଦିଦଶଦିଶଂ ଓଂ ନମଃ ସୁଦର୍ଶନାୟ ସହସ୍ରାରାୟ ହୁଂ ଫଟ୍ ବଧ୍ନାମି ନମଶ୍ଚକ୍ରାୟ ସ୍ଵାହା । ଇତି ପ୍ରତିଦିଶଂ ୟୋଜ୍ୟମ୍ ।

ଅଥ ଧ୍ୟାନମ୍ ।
ଉଦ୍ୟାଦାଦିତ୍ୟସଂକାଶଂ ପୀତଵାସଂ ଚତୁର୍ଭୁଜମ୍ ।
ଶଂଖଚକ୍ରଗଦାପାଣିଂ ଧ୍ୟାୟେଲ୍ଲକ୍ଷ୍ମୀପତିଂ ହରିମ୍ ॥ 1 ॥

ତ୍ରୈଲୋକ୍ୟାଧାରଚକ୍ରଂ ତଦୁପରି କମଠଂ ତତ୍ର ଚାନଂତଭୋଗୀ
ତନ୍ମଧ୍ୟେ ଭୂମିପଦ୍ମାଂକୁଶଶିଖରଦଳଂ କର୍ଣିକାଭୂତମେରୁମ୍ ।
ତତ୍ରସ୍ଥଂ ଶାଂତମୂର୍ତିଂ ମଣିମୟମକୁଟଂ କୁଂଡଲୋଦ୍ଭାସିତାଂଗଂ
ଲକ୍ଷ୍ମୀନାରାୟଣାଖ୍ୟଂ ସରସିଜନୟନଂ ସଂତତଂ ଚିଂତୟାମି ॥ 2 ॥

ଅଥ ମୂଲାଷ୍ଟକମ୍ ।
ଓମ୍ ॥ ନାରାୟଣଃ ପରଂ ଜ୍ୟୋତିରାତ୍ମା ନାରାୟଣଃ ପରଃ ।
ନାରାୟଣଃ ପରଂ ବ୍ରହ୍ମ ନାରାୟଣ ନମୋଽସ୍ତୁ ତେ ॥ 1 ॥

ନାରାୟଣଃ ପରୋ ଦେଵୋ ଧାତା ନାରାୟଣଃ ପରଃ ।
ନାରାୟଣଃ ପରୋ ଧାତା ନାରାୟଣ ନମୋଽସ୍ତୁ ତେ ॥ 2 ॥

ନାରାୟଣଃ ପରଂ ଧାମ ଧ୍ୟାନଂ ନାରାୟଣଃ ପରଃ ।
ନାରାୟଣ ପରୋ ଧର୍ମୋ ନାରାୟଣ ନମୋଽସ୍ତୁ ତେ ॥ 3 ॥

ନାରାୟଣଃ ପରୋଵେଦ୍ୟଃ ଵିଦ୍ୟା ନାରାୟଣଃ ପରଃ ।
ଵିଶ୍ଵଂ ନାରାୟଣଃ ସାକ୍ଷାନ୍ନାରାୟଣ ନମୋଽସ୍ତୁ ତେ ॥ 4 ॥

ନାରାୟଣାଦ୍ଵିଧିର୍ଜାତୋ ଜାତୋ ନାରାୟଣାଦ୍ଭଵଃ ।
ଜାତୋ ନାରାୟଣାଦିଂଦ୍ରୋ ନାରାୟଣ ନମୋଽସ୍ତୁ ତେ ॥ 5 ॥

ରଵିର୍ନାରାୟଣସ୍ତେଜଃ ଚଂଦ୍ରୋ ନାରାୟଣୋ ମହଃ ।
ଵହ୍ନିର୍ନାରାୟଣଃ ସାକ୍ଷାନ୍ନାରାୟଣ ନମୋଽସ୍ତୁ ତେ ॥ 6 ॥

ନାରାୟଣ ଉପାସ୍ୟଃ ସ୍ୟାଦ୍ଗୁରୁର୍ନାରାୟଣଃ ପରଃ ।
ନାରାୟଣଃ ପରୋ ବୋଧୋ ନାରାୟଣ ନମୋଽସ୍ତୁ ତେ ॥ 7 ॥

ନାରାୟଣଃ ଫଲଂ ମୁଖ୍ୟଂ ସିଦ୍ଧିର୍ନାରାୟଣଃ ସୁଖମ୍ ।
ସେଵ୍ୟୋନାରାୟଣଃ ଶୁଦ୍ଧୋ ନାରାୟଣ ନମୋଽସ୍ତୁ ତେ ॥ 8 ॥ [ହରି]

ଅଥ ପ୍ରାର୍ଥନାଦଶକମ୍ ।
ନାରାୟଣ ତ୍ଵମେଵାସି ଦହରାଖ୍ୟେ ହୃଦି ସ୍ଥିତଃ ।
ପ୍ରେରକଃ ପ୍ରେର୍ୟମାଣାନାଂ ତ୍ଵୟା ପ୍ରେରିତମାନସଃ ॥ 9 ॥

ତ୍ଵଦାଜ୍ଞାଂ ଶିରସା ଧୃତ୍ଵା ଜପାମି ଜନପାଵନମ୍ ।
ନାନୋପାସନମାର୍ଗାଣାଂ ଭଵକୃଦ୍ଭାଵବୋଧକଃ ॥ 10 ॥

ଭାଵାର୍ଥକୃଦ୍ଭଵାତୀତୋ ଭଵ ସୌଖ୍ୟପ୍ରଦୋ ମମ ।
ତ୍ଵନ୍ମାୟାମୋହିତଂ ଵିଶ୍ଵଂ ତ୍ଵୟୈଵ ପରିକଲ୍ପିତମ୍ ॥ 11 ॥

ତ୍ଵଦଧିଷ୍ଠାନମାତ୍ରେଣ ସା ଵୈ ସର୍ଵାର୍ଥକାରିଣୀ ।
ତ୍ଵମେତାଂ ଚ ପୁରସ୍କୃତ୍ୟ ସର୍ଵକାମାନ୍ପ୍ରଦର୍ଶୟ ॥ 12 ॥

ନ ମେ ତ୍ଵଦନ୍ୟସ୍ତ୍ରାତାସ୍ତି ତ୍ଵଦନ୍ୟନ୍ନ ହି ଦୈଵତମ୍ ।
ତ୍ଵଦନ୍ୟଂ ନ ହି ଜାନାମି ପାଲକଂ ପୁଣ୍ୟଵର୍ଧନମ୍ ॥ 13 ॥

ୟାଵତ୍ସାଂସାରିକୋ ଭାଵୋ ମନସ୍ସ୍ଥୋ ଭାଵନାତ୍ମକଃ ।
ତାଵତ୍ସିଦ୍ଧିର୍ଭଵେତ୍ସାଧ୍ୟା ସର୍ଵଥା ସର୍ଵଦା ଵିଭୋ ॥ 14 ॥

ପାପିନାମହମେଵାଗ୍ର୍ୟୋ ଦୟାଳୂନାଂ ତ୍ଵମଗ୍ରଣୀଃ ।
ଦୟନୀୟୋ ମଦନ୍ୟୋଽସ୍ତି ତଵ କୋଽତ୍ର ଜଗତ୍ତ୍ରୟେ ॥ 15 ॥

ତ୍ଵୟାହଂ ନୈଵ ସୃଷ୍ଟଶ୍ଚେନ୍ନ ସ୍ୟାତ୍ତଵ ଦୟାଳୁତା ।
ଆମୟୋ ଵା ନ ସୃଷ୍ଟଶ୍ଚେଦୌଷଧସ୍ୟ ଵୃଥୋଦୟଃ ॥ 16 ॥

ପାପସଂଘପରିଶ୍ରାଂତଃ ପାପାତ୍ମା ପାପରୂପଧୃତ୍ ।
ତ୍ଵଦନ୍ୟଃ କୋଽତ୍ର ପାପେଭ୍ୟସ୍ତ୍ରାତାସ୍ତି ଜଗତୀତଲେ ॥ 17 ॥

ତ୍ଵମେଵ ମାତା ଚ ପିତା ତ୍ଵମେଵ
ତ୍ଵମେଵ ବଂଧୁଶ୍ଚ ସଖା ତ୍ଵମେଵ ।
ତ୍ଵମେଵ ସେଵ୍ୟଶ୍ଚ ଗୁରୁସ୍ତ୍ଵମେଵ
ତ୍ଵମେଵ ସର୍ଵଂ ମମ ଦେଵ ଦେଵ ॥ 18 ॥

ପ୍ରାର୍ଥନାଦଶକଂ ଚୈଵ ମୂଲାଷ୍ଟକମତଃ ପରମ୍ ।
ୟଃ ପଠେଚ୍ଛୃଣୁୟାନ୍ନିତ୍ୟଂ ତସ୍ୟ ଲକ୍ଷ୍ମୀଃ ସ୍ଥିରା ଭଵେତ୍ ॥ 19 ॥

ନାରାୟଣସ୍ୟ ହୃଦୟଂ ସର୍ଵାଭୀଷ୍ଟଫଲପ୍ରଦମ୍ ।
ଲକ୍ଷ୍ମୀହୃଦୟକଂ ସ୍ତୋତ୍ରଂ ୟଦି ଚେତ୍ତଦ୍ଵିନାକୃତମ୍ ॥ 20 ॥

ତତ୍ସର୍ଵଂ ନିଷ୍ଫଲଂ ପ୍ରୋକ୍ତଂ ଲକ୍ଷ୍ମୀଃ କ୍ରୁଦ୍ଧ୍ୟତି ସର୍ଵଦା ।
ଏତତ୍ସଂକଲିତଂ ସ୍ତୋତ୍ରଂ ସର୍ଵକାମଫଲପ୍ରଦମ୍ ॥ 21 ॥

ଲକ୍ଷ୍ମୀହୃଦୟକଂ ଚୈଵ ତଥା ନାରାୟଣାତ୍ମକମ୍ ।
ଜପେଦ୍ୟଃ ସଂକଲୀକୃତ୍ୟ ସର୍ଵାଭୀଷ୍ଟମଵାପ୍ନୁୟାତ୍ ॥ 22 ॥

ନାରାୟଣସ୍ୟ ହୃଦୟମାଦୌ ଜପ୍ତ୍ଵା ତତଃ ପରମ୍ ।
ଲକ୍ଷ୍ମୀହୃଦୟକଂ ସ୍ତୋତ୍ରଂ ଜପେନ୍ନାରାୟଣଂ ପୁନଃ ॥ 23 ॥

ପୁନର୍ନାରାୟଣଂ ଜପ୍ତ୍ଵା ପୁନର୍ଲକ୍ଷ୍ମୀନୁତିଂ ଜପେତ୍ ।
ପୁନର୍ନାରାୟଣଂ ଜାପ୍ୟଂ ସଂକଲୀକରଣଂ ଭଵେତ୍ ॥ 24 ॥

ଏଵଂ ମଧ୍ୟେ ଦ୍ଵିଵାରେଣ ଜପେତ୍ସଂକଲିତଂ ତୁ ତତ୍ ।
ଲକ୍ଷ୍ମୀହୃଦୟକଂ ସ୍ତୋତ୍ରଂ ସର୍ଵକାମପ୍ରକାଶିତମ୍ ॥ 25 ॥

ତଦ୍ଵଜ୍ଜପାଦିକଂ କୁର୍ୟାଦେତତ୍ସଂକଲିତଂ ଶୁଭମ୍ ।
ସର୍ଵାନ୍କାମାନଵାପ୍ନୋତି ଆଧିଵ୍ୟାଧିଭୟଂ ହରେତ୍ ॥ 26 ॥

ଗୋପ୍ୟମେତତ୍ସଦା କୁର୍ୟାନ୍ନ ସର୍ଵତ୍ର ପ୍ରକାଶୟେତ୍ ।
ଇତି ଗୁହ୍ୟତମଂ ଶାସ୍ତ୍ରଂ ପ୍ରାପ୍ତଂ ବ୍ରହ୍ମାଦିକୈଃ ପୁରା ॥ 27 ॥

ତସ୍ମାତ୍ସର୍ଵପ୍ରୟତ୍ନେନ ଗୋପୟେତ୍ସାଧୟେସୁଧୀଃ ।
ୟତ୍ରୈତତ୍ପୁସ୍ତକଂ ତିଷ୍ଠେଲ୍ଲକ୍ଷ୍ମୀନାରାୟଣାତ୍ମକମ୍ ॥ 28 ॥

ଭୂତପୈଶାଚଵେତାଳ ଭୟଂ ନୈଵ ତୁ ସର୍ଵଦା ।
ଲକ୍ଷ୍ମୀହୃଦୟକଂ ପ୍ରୋକ୍ତଂ ଵିଧିନା ସାଧୟେତ୍ସୁଧୀଃ ॥ 29 ॥

ଭୃଗୁଵାରେ ଚ ରାତ୍ରୌ ଚ ପୂଜୟେତ୍ପୁସ୍ତକଦ୍ଵୟମ୍ ।
ସର୍ଵଥା ସର୍ଵଦା ସତ୍ୟଂ ଗୋପୟେତ୍ସାଧୟେତ୍ସୁଧୀଃ ।
ଗୋପନାତ୍ସାଧନାଲ୍ଲୋକେ ଧନ୍ୟୋ ଭଵତି ତତ୍ତ୍ଵତଃ ॥ 30 ॥

ଇତ୍ୟଥର୍ଵରହସ୍ୟେ ଉତ୍ତରଭାଗେ ନାରାୟଣହୃଦୟଂ ସଂପୂର୍ଣମ୍ ।

ଅଥ ଲକ୍ଷ୍ମୀ ହୃଦୟ ସ୍ତୋତ୍ରମ୍

ଅସ୍ୟ ଶ୍ରୀ ମହାଲକ୍ଷ୍ମୀହୃଦୟସ୍ତୋତ୍ର ମହାମଂତ୍ରସ୍ୟ ଭାର୍ଗଵ ଋଷିଃ, ଅନୁଷ୍ଟୁପାଦୀନି ନାନାଛଂଦାଂସି, ଆଦ୍ୟାଦି ଶ୍ରୀମହାଲକ୍ଷ୍ମୀର୍ଦେଵତା, ଶ୍ରୀଂ ବୀଜଂ, ହ୍ରୀଂ ଶକ୍ତିଃ, ଐଂ କୀଲକଂ, ଆଦ୍ୟାଦିମହାଲକ୍ଷ୍ମୀ ପ୍ରସାଦସିଦ୍ଧ୍ୟର୍ଥଂ ଜପେ ଵିନିୟୋଗଃ ॥

ଋଷ୍ୟାଦିନ୍ୟାସଃ –
ଓଂ ଭାର୍ଗଵୃଷୟେ ନମଃ ଶିରସି ।
ଓଂ ଅନୁଷ୍ଟୁପାଦିନାନାଛଂଦୋଭ୍ୟୋ ନମୋ ମୁଖେ ।
ଓଂ ଆଦ୍ୟାଦିଶ୍ରୀମହାଲକ୍ଷ୍ମୀ ଦେଵତାୟୈ ନମୋ ହୃଦୟେ ।
ଓଂ ଶ୍ରୀଂ ବୀଜାୟ ନମୋ ଗୁହ୍ୟେ ।
ଓଂ ହ୍ରୀଂ ଶକ୍ତୟେ ନମଃ ପାଦୟୋଃ ।
ଓଂ ଐଂ କୀଲକାୟ ନମୋ ନାଭୌ ।
ଓଂ ଵିନିୟୋଗାୟ ନମଃ ସର୍ଵାଂଗେ ।

କରନ୍ୟାସଃ –
ଓଂ ଶ୍ରୀଂ ଅଂଗୁଷ୍ଠାଭ୍ୟାଂ ନମଃ ।
ଓଂ ହ୍ରୀଂ ତର୍ଜନୀଭ୍ୟାଂ ନମଃ ।
ଓଂ ଐଂ ମଧ୍ୟମାଭ୍ୟାଂ ନମଃ ।
ଓଂ ଶ୍ରୀଂ ଅନାମିକାଭ୍ୟାଂ ନମଃ ।
ଓଂ ହ୍ରୀଂ କନିଷ୍ଠିକାଭ୍ୟାଂ ନମଃ ।
ଓଂ ଐଂ କରତଲ କରପୃଷ୍ଠାଭ୍ୟାଂ ନମଃ ।

ଅଂଗନ୍ୟାସଃ –
ଓଂ ଶ୍ରୀଂ ହୃଦୟାୟ ନମଃ ।
ଓଂ ହ୍ରୀଂ ଶିରସେ ସ୍ଵାହା ।
ଓଂ ଐଂ ଶିଖାୟୈ ଵଷଟ୍ ।
ଓଂ ଶ୍ରୀଂ କଵଚାୟ ହୁମ୍ ।
ଓଂ ହ୍ରୀଂ ନେତ୍ରତ୍ରୟାୟ ଵୌଷଟ୍ ।
ଓଂ ଐଂ ଅସ୍ତ୍ରାୟ ଫଟ୍ ।
ଓଂ ଶ୍ରୀଂ ହ୍ରୀଂ ଐଂ ଇତି ଦିଗ୍ବଂଧଃ ।

ଅଥ ଧ୍ୟାନମ୍ ।
ହସ୍ତଦ୍ଵୟେନ କମଲେ ଧାରୟଂତୀଂ ସ୍ଵଲୀଲୟା ।
ହାରନୂପୁରସଂୟୁକ୍ତାଂ ଲକ୍ଷ୍ମୀଂ ଦେଵୀଂ ଵିଚିଂତୟେ ॥

କୌଶେୟପୀତଵସନାମରଵିଂଦନେତ୍ରାଂ
ପଦ୍ମଦ୍ଵୟାଭୟଵରୋଦ୍ୟତପଦ୍ମହସ୍ତାମ୍ ।
ଉଦ୍ୟଚ୍ଛତାର୍କସଦୃଶୀଂ ପରମାଂକସଂସ୍ଥାଂ
ଧ୍ୟାୟେଦ୍ଵିଧୀଶନତପାଦୟୁଗାଂ ଜନିତ୍ରୀମ୍ ॥

ପୀତଵସ୍ତ୍ରାଂ ସୁଵର୍ଣାଂଗୀଂ ପଦ୍ମହସ୍ତଦ୍ଵାୟାନ୍ଵିତାମ୍ ।
ଲକ୍ଷ୍ମୀଂ ଧ୍ୟାତ୍ଵେତି ମଂତ୍ରେଣ ସ ଭଵେତ୍ପୃଥିଵୀପତିଃ ॥
ମାତୁଲୁଂଗଂ ଗଦାଂ ଖେଟଂ ପାଣୌ ପାତ୍ରଂ ଚ ବିଭ୍ରତୀ ।
ନାଗଂ ଲିଂଗଂ ଚ ୟୋନିଂ ଚ ବିଭ୍ରତୀଂ ଚୈଵ ମୂର୍ଧନି ॥

[ ଇତି ଧ୍ୟାତ୍ଵା ମାନସୋପଚାରୈଃ ସଂପୂଜ୍ୟ ।
ଶଂଖଚକ୍ରଗଦାହସ୍ତେ ଶୁଭ୍ରଵର୍ଣେ ସୁଵାସିନୀ ।
ମମ ଦେହି ଵରଂ ଲକ୍ଷ୍ମୀଃ ସର୍ଵସିଦ୍ଧିପ୍ରଦାୟିନୀ ।
ଇତି ସଂପ୍ରାର୍ଥ୍ୟ ଓଂ ଶ୍ରୀଂ ହ୍ରୀଂ ଐଂ ମହାଲକ୍ଷ୍ମ୍ୟୈ କମଲଧାରିଣ୍ୟୈ ସିଂହଵାହିନ୍ୟୈ ସ୍ଵାହା ଇତି ମଂତ୍ରଂ ଜପ୍ତ୍ଵା ପୁନଃ ପୂର୍ଵଵଦ୍ଧୃଦୟାଦି ଷଡଂଗନ୍ୟାସଂ କୃତ୍ଵା ସ୍ତୋତ୍ରଂ ପଠେତ୍ । ]

ସ୍ତୋତ୍ରମ୍ ।
ଵଂଦେ ଲକ୍ଷ୍ମୀଂ ପରମଶିଵମୟୀଂ ଶୁଦ୍ଧଜାଂବୂନଦାଭାଂ
ତେଜୋରୂପାଂ କନକଵସନାଂ ସର୍ଵଭୂଷୋଜ୍ଜ୍ଵଲାଂଗୀମ୍ ।
ବୀଜାପୂରଂ କନକକଲଶଂ ହେମପଦ୍ମଂ ଦଧାନା-
-ମାଦ୍ୟାଂ ଶକ୍ତିଂ ସକଲଜନନୀଂ ଵିଷ୍ଣୁଵାମାଂକସଂସ୍ଥାମ୍ ॥ 1 ॥

ଶ୍ରୀମତ୍ସୌଭାଗ୍ୟଜନନୀଂ ସ୍ତୌମି ଲକ୍ଷ୍ମୀଂ ସନାତନୀମ୍ ।
ସର୍ଵକାମଫଲାଵାପ୍ତିସାଧନୈକସୁଖାଵହାମ୍ ॥ 2 ॥

ସ୍ମରାମି ନିତ୍ୟଂ ଦେଵେଶି ତ୍ଵୟା ପ୍ରେରିତମାନସଃ ।
ତ୍ଵଦାଜ୍ଞାଂ ଶିରସା ଧୃତ୍ଵା ଭଜାମି ପରମେଶ୍ଵରୀମ୍ ॥ 3 ॥

ସମସ୍ତସଂପତ୍ସୁଖଦାଂ ମହାଶ୍ରିୟଂ
ସମସ୍ତସୌଭାଗ୍ୟକରୀଂ ମହାଶ୍ରିୟମ୍ ।
ସମସ୍ତକଳ୍ୟାଣକରୀଂ ମହାଶ୍ରିୟଂ
ଭଜାମ୍ୟହଂ ଜ୍ଞାନକରୀଂ ମହାଶ୍ରିୟମ୍ ॥ 4 ॥

ଵିଜ୍ଞାନସଂପତ୍ସୁଖଦାଂ ସନାତନୀଂ
ଵିଚିତ୍ରଵାଗ୍ଭୂତିକରୀଂ ମନୋହରାମ୍ ।
ଅନଂତସଂମୋଦସୁଖପ୍ରଦାୟିନୀଂ
ନମାମ୍ୟହଂ ଭୂତିକରୀଂ ହରିପ୍ରିୟାମ୍ ॥ 5 ॥

ସମସ୍ତଭୂତାଂତରସଂସ୍ଥିତା ତ୍ଵଂ
ସମସ୍ତଭୋକ୍ତ୍ରୀଶ୍ଵରି ଵିଶ୍ଵରୂପେ ।
ତନ୍ନାସ୍ତି ୟତ୍ତ୍ଵଦ୍ଵ୍ୟତିରିକ୍ତଵସ୍ତୁ
ତ୍ଵତ୍ପାଦପଦ୍ମଂ ପ୍ରଣମାମ୍ୟହଂ ଶ୍ରୀଃ ॥ 6 ॥

ଦାରିଦ୍ର୍ୟ ଦୁଃଖୌଘତମୋପହଂତ୍ରୀ
ତ୍ଵତ୍ପାଦପଦ୍ମଂ ମୟି ସନ୍ନିଧତ୍ସ୍ଵ ।
ଦୀନାର୍ତିଵିଚ୍ଛେଦନହେତୁଭୂତୈଃ
କୃପାକଟାକ୍ଷୈରଭିଷିଂଚ ମାଂ ଶ୍ରୀଃ ॥ 7 ॥

ଅଂବ ପ୍ରସୀଦ କରୁଣାସୁଧୟାର୍ଦ୍ରଦୃଷ୍ଟ୍ୟା
ମାଂ ତ୍ଵତ୍କୃପାଦ୍ରଵିଣଗେହମିମଂ କୁରୁଷ୍ଵ ।
ଆଲୋକୟ ପ୍ରଣତହୃଦ୍ଗତଶୋକହଂତ୍ରୀ
ତ୍ଵତ୍ପାଦପଦ୍ମୟୁଗଳଂ ପ୍ରଣମାମ୍ୟହଂ ଶ୍ରୀଃ ॥ 8 ॥

ଶାଂତ୍ୟୈ ନମୋଽସ୍ତୁ ଶରଣାଗତରକ୍ଷଣାୟୈ
କାଂତ୍ୟୈ ନମୋଽସ୍ତୁ କମନୀୟଗୁଣାଶ୍ରୟାୟୈ ।
କ୍ଷାଂତ୍ୟୈ ନମୋଽସ୍ତୁ ଦୁରିତକ୍ଷୟକାରଣାୟୈ
ଦାତ୍ର୍ୟୈ ନମୋଽସ୍ତୁ ଧନଧାନ୍ୟସମୃଦ୍ଧିଦାୟୈ ॥ 9 ॥

ଶକ୍ତ୍ୟୈ ନମୋଽସ୍ତୁ ଶଶିଶେଖରସଂସ୍ତୁତାୟୈ
ରତ୍ୟୈ ନମୋଽସ୍ତୁ ରଜନୀକରସୋଦରାୟୈ ।
ଭକ୍ତ୍ୟୈ ନମୋଽସ୍ତୁ ଭଵସାଗରତାରକାୟୈ
ମତ୍ୟୈ ନମୋଽସ୍ତୁ ମଧୁସୂଦନଵଲ୍ଲଭାୟୈ ॥ 10 ॥

ଲକ୍ଷ୍ମ୍ୟୈ ନମୋଽସ୍ତୁ ଶୁଭଲକ୍ଷଣଲକ୍ଷିତାୟୈ
ସିଦ୍ଧ୍ୟୈ ନମୋଽସ୍ତୁ ଶିଵସିଦ୍ଧସୁପୂଜିତାୟୈ ।
ଧୃତ୍ୟୈ ନମୋଽସ୍ତ୍ଵମିତଦୁର୍ଗତିଭଂଜନାୟୈ
ଗତ୍ୟୈ ନମୋଽସ୍ତୁ ଵରସଦ୍ଗତିଦାୟିକାୟୈ ॥ 11 ॥

ଦେଵ୍ୟୈ ନମୋଽସ୍ତୁ ଦିଵି ଦେଵଗଣାର୍ଚିତାୟୈ
ଭୂତ୍ୟୈ ନମୋଽସ୍ତୁ ଭୁଵନାର୍ତିଵିନାଶନାୟୈ ।
ଧାତ୍ର୍ୟୈ ନମୋଽସ୍ତୁ ଧରଣୀଧରଵଲ୍ଲଭାୟୈ
ପୁଷ୍ଟ୍ୟୈ ନମୋଽସ୍ତୁ ପୁରୁଷୋତ୍ତମଵଲ୍ଲଭାୟୈ ॥ 12 ॥

ସୁତୀଵ୍ରଦାରିଦ୍ର୍ୟଵିଦୁଃଖହଂତ୍ର୍ୟୈ
ନମୋଽସ୍ତୁ ତେ ସର୍ଵଭୟାପହଂତ୍ର୍ୟୈ ।
ଶ୍ରୀଵିଷ୍ଣୁଵକ୍ଷଃସ୍ଥଲସଂସ୍ଥିତାୟୈ
ନମୋ ନମଃ ସର୍ଵଵିଭୂତିଦାୟୈ ॥ 13 ॥

ଜୟତୁ ଜୟତୁ ଲକ୍ଷ୍ମୀର୍ଲକ୍ଷଣାଲଂକୃତାଂଗୀ
ଜୟତୁ ଜୟତୁ ପଦ୍ମା ପଦ୍ମସଦ୍ମାଭିଵଂଦ୍ୟା ।
ଜୟତୁ ଜୟତୁ ଵିଦ୍ୟା ଵିଷ୍ଣୁଵାମାଂକସଂସ୍ଥା
ଜୟତୁ ଜୟତୁ ସମ୍ୟକ୍ସର୍ଵସଂପତ୍କରୀ ଶ୍ରୀଃ ॥ 14 ॥

ଜୟତୁ ଜୟତୁ ଦେଵୀ ଦେଵସଂଘାଭିପୂଜ୍ୟା
ଜୟତୁ ଜୟତୁ ଭଦ୍ରା ଭାର୍ଗଵୀ ଭାଗ୍ୟରୂପା ।
ଜୟତୁ ଜୟତୁ ନିତ୍ୟା ନିର୍ମଲଜ୍ଞାନଵେଦ୍ୟା
ଜୟତୁ ଜୟତୁ ସତ୍ୟା ସର୍ଵଭୂତାଂତରସ୍ଥା ॥ 15 ॥

ଜୟତୁ ଜୟତୁ ରମ୍ୟା ରତ୍ନଗର୍ଭାଂତରସ୍ଥା
ଜୟତୁ ଜୟତୁ ଶୁଦ୍ଧା ଶୁଦ୍ଧଜାଂବୂନଦାଭା ।
ଜୟତୁ ଜୟତୁ କାଂତା କାଂତିମଦ୍ଭାସିତାଂଗୀ
ଜୟତୁ ଜୟତୁ ଶାଂତା ଶୀଘ୍ରମାଗଚ୍ଛ ସୌମ୍ୟେ ॥ 16 ॥

ୟସ୍ୟାଃ କଲାୟାଃ କମଲୋଦ୍ଭଵାଦ୍ୟା
ରୁଦ୍ରାଶ୍ଚ ଶକ୍ର ପ୍ରମୁଖାଶ୍ଚ ଦେଵାଃ ।
ଜୀଵଂତି ସର୍ଵେଽପି ସଶକ୍ତୟସ୍ତେ
ପ୍ରଭୁତ୍ଵମାପ୍ତାଃ ପରମାୟୁଷସ୍ତେ ॥ 17 ॥

ଲିଲେଖ ନିଟିଲେ ଵିଧିର୍ମମ ଲିପିଂ ଵିସୃଜ୍ୟାଂତରଂ
ତ୍ଵୟା ଵିଲିଖିତଵ୍ୟମେତଦିତି ତତ୍ଫଲପ୍ରାପ୍ତୟେ ।
ତଦଂତରଫଲେସ୍ଫୁଟଂ କମଲଵାସିନୀ ଶ୍ରୀରିମାଂ
ସମର୍ପୟ ସମୁଦ୍ରିକାଂ ସକଲଭାଗ୍ୟସଂସୂଚିକାମ୍ ॥ 18 ॥

କଲୟା ତେ ୟଥା ଦେଵି ଜୀଵଂତି ସଚରାଚରାଃ ।
ତଥା ସଂପତ୍କରେ ଲକ୍ଷ୍ମି ସର୍ଵଦା ସଂପ୍ରସୀଦ ମେ ॥ 19 ॥

ୟଥା ଵିଷ୍ଣୁର୍ଧ୍ରୁଵେ ନିତ୍ୟଂ ସ୍ଵକଲାଂ ସଂନ୍ୟଵେଶୟତ୍ ।
ତଥୈଵ ସ୍ଵକଲାଂ ଲକ୍ଷ୍ମି ମୟି ସମ୍ୟକ୍ ସମର୍ପୟ ॥ 20 ॥

ସର୍ଵସୌଖ୍ୟପ୍ରଦେ ଦେଵି ଭକ୍ତାନାମଭୟପ୍ରଦେ ।
ଅଚଲାଂ କୁରୁ ୟତ୍ନେନ କଲାଂ ମୟି ନିଵେଶିତାମ୍ ॥ 21 ॥

ମୁଦାସ୍ତାଂ ମତ୍ଫାଲେ ପରମପଦଲକ୍ଷ୍ମୀଃ ସ୍ଫୁଟକଲା
ସଦା ଵୈକୁଂଠଶ୍ରୀର୍ନିଵସତୁ କଲା ମେ ନୟନୟୋଃ ।
ଵସେତ୍ସତ୍ୟେ ଲୋକେ ମମ ଵଚସି ଲକ୍ଷ୍ମୀର୍ଵରକଲା
ଶ୍ରିୟଃ ଶ୍ଵେତଦ୍ଵୀପେ ନିଵସତୁ କଲା ମେ ସ୍ଵକରୟୋଃ ॥ 22 ॥

ତାଵନ୍ନିତ୍ୟଂ ମମାଂଗେଷୁ କ୍ଷୀରାବ୍ଧୌ ଶ୍ରୀକଲା ଵସେତ୍ ।
ସୂର୍ୟାଚଂଦ୍ରମସୌ ୟାଵଦ୍ୟାଵଲ୍ଲକ୍ଷ୍ମୀପତିଃ ଶ୍ରିୟାଃ ॥ 23 ॥

ସର୍ଵମଂଗଳସଂପୂର୍ଣା ସର୍ଵୈଶ୍ଵର୍ୟସମନ୍ଵିତା ।
ଆଦ୍ୟାଦି ଶ୍ରୀର୍ମହାଲକ୍ଷ୍ମୀ ତ୍ଵତ୍କଲା ମୟି ତିଷ୍ଠତୁ ॥ 24 ॥

ଅଜ୍ଞାନତିମିରଂ ହଂତୁଂ ଶୁଦ୍ଧଜ୍ଞାନପ୍ରକାଶିକା ।
ସର୍ଵୈଶ୍ଵର୍ୟପ୍ରଦା ମେଽସ୍ତୁ ତ୍ଵତ୍କଲା ମୟି ସଂସ୍ଥିତା ॥ 25 ॥

ଅଲକ୍ଷ୍ମୀଂ ହରତୁ କ୍ଷିପ୍ରଂ ତମଃ ସୂର୍ୟପ୍ରଭା ୟଥା ।
ଵିତନୋତୁ ମମ ଶ୍ରେୟସ୍ତ୍ଵତ୍କଳା ମୟି ସଂସ୍ଥିତା ॥ 26 ॥

ଐଶ୍ଵର୍ୟମଂଗଳୋତ୍ପତ୍ତିସ୍ତ୍ଵତ୍କଲାୟାଂ ନିଧୀୟତେ ।
ମୟି ତସ୍ମାତ୍କୃତାର୍ଥୋଽସ୍ମି ପାତ୍ରମସ୍ମି ସ୍ଥିତେସ୍ତଵ ॥ 27 ॥

ଭଵଦାଵେଶଭାଗ୍ୟାର୍ହୋ ଭାଗ୍ୟଵାନସ୍ମି ଭାର୍ଗଵି ।
ତ୍ଵତ୍ପ୍ରସାଦାତ୍ପଵିତ୍ରୋଽହଂ ଲୋକମାତର୍ନମୋଽସ୍ତୁ ତେ ॥ 28 ॥

ପୁନାସି ମାଂ ତ୍ଵତ୍କଲୟୈଵ ୟସ୍ମା-
-ଦତଃ ସମାଗଚ୍ଛ ମମାଗ୍ରତସ୍ତ୍ଵମ୍ ।
ପରଂ ପଦଂ ଶ୍ରୀର୍ଭଵ ସୁପ୍ରସନ୍ନା
ମୟ୍ୟଚ୍ୟୁତେନ ପ୍ରଵିଶାଦିଲକ୍ଷ୍ମୀଃ ॥ 29 ॥

ଶ୍ରୀଵୈକୁଂଠସ୍ଥିତେ ଲକ୍ଷ୍ମି ସମାଗଚ୍ଛ ମମାଗ୍ରତଃ ।
ନାରାୟଣେନ ସହ ମାଂ କୃପାଦୃଷ୍ଟ୍ୟାଽଵଲୋକୟ ॥ 30 ॥

ସତ୍ୟଲୋକସ୍ଥିତେ ଲକ୍ଷ୍ମି ତ୍ଵଂ ମମାଗଚ୍ଛ ସନ୍ନିଧିମ୍ ।
ଵାସୁଦେଵେନ ସହିତା ପ୍ରସୀଦ ଵରଦା ଭଵ ॥ 31 ॥

ଶ୍ଵେତଦ୍ଵୀପସ୍ଥିତେ ଲକ୍ଷ୍ମି ଶୀଘ୍ରମାଗଚ୍ଛ ସୁଵ୍ରତେ ।
ଵିଷ୍ଣୁନା ସହିତେ ଦେଵି ଜଗନ୍ମାତଃ ପ୍ରସୀଦ ମେ ॥ 32 ॥

କ୍ଷୀରାଂବୁଧିସ୍ଥିତେ ଲକ୍ଷ୍ମି ସମାଗଚ୍ଛ ସମାଧଵା ।
ତ୍ଵତ୍କୃପାଦୃଷ୍ଟିସୁଧୟା ସତତଂ ମାଂ ଵିଲୋକୟ ॥ 33 ॥

ରତ୍ନଗର୍ଭସ୍ଥିତେ ଲକ୍ଷ୍ମି ପରିପୂର୍ଣେ ହିରଣ୍ମୟେ ।
ସମାଗଚ୍ଛ ସମାଗଚ୍ଛ ସ୍ଥିତ୍ଵାଽଽଶୁ ପୁରତୋ ମମ ॥ 34 ॥

ସ୍ଥିରା ଭଵ ମହାଲକ୍ଷ୍ମି ନିଶ୍ଚଲା ଭଵ ନିର୍ମଲେ ।
ପ୍ରସନ୍ନେ କମଲେ ଦେଵି ପ୍ରସନ୍ନହୃଦୟା ଭଵ ॥ 35 ॥

ଶ୍ରୀଧରେ ଶ୍ରୀମହାଭୂତେ ତ୍ଵଦଂତଃସ୍ଥଂ ମହାନିଧିମ୍ ।
ଶୀଘ୍ରମୁଦ୍ଧୃତ୍ୟ ପୁରତଃ ପ୍ରଦର୍ଶୟ ସମର୍ପୟ ॥ 36 ॥

ଵସୁଂଧରେ ଶ୍ରୀଵସୁଧେ ଵସୁଦୋଗ୍ଧ୍ରି କୃପାମୟେ ।
ତ୍ଵତ୍କୁକ୍ଷିଗତସର୍ଵସ୍ଵଂ ଶୀଘ୍ରଂ ମେ ସଂପ୍ରଦର୍ଶୟ ॥ 37 ॥

ଵିଷ୍ଣୁପ୍ରିୟେ ରତ୍ନଗର୍ଭେ ସମସ୍ତଫଲଦେ ଶିଵେ ।
ତ୍ଵଦ୍ଗର୍ଭଗତହେମାଦୀନ୍ ସଂପ୍ରଦର୍ଶୟ ଦର୍ଶୟ ॥ 38 ॥

ରସାତଲଗତେ ଲକ୍ଷ୍ମି ଶୀଘ୍ରମାଗଚ୍ଛ ମେ ପୁରଃ ।
ନ ଜାନେ ପରମଂ ରୂପଂ ମାତର୍ମେ ସଂପ୍ରଦର୍ଶୟ ॥ 39 ॥

ଆଵିର୍ଭଵ ମନୋଵେଗାଚ୍ଛୀଘ୍ରମାଗଚ୍ଛ ମେ ପୁରଃ ।
ମା ଵତ୍ସ ଭୈରିହେତ୍ୟୁକ୍ତ୍ଵା କାମଂ ଗୌରିଵ ରକ୍ଷ ମାମ୍ ॥ 40 ॥

ଦେଵି ଶୀଘ୍ରଂ ସମାଗଚ୍ଛ ଧରଣୀଗର୍ଭସଂସ୍ଥିତେ ।
ମାତସ୍ତ୍ଵଦ୍ଭୃତ୍ୟଭୃତ୍ୟୋଽହଂ ମୃଗୟେ ତ୍ଵାଂ କୁତୂହଲାତ୍ ॥ 41 ॥

ଉତ୍ତିଷ୍ଠ ଜାଗୃହି ତ୍ଵଂ ମେ ସମୁତ୍ତିଷ୍ଠ ସୁଜାଗୃହି ।
ଅକ୍ଷୟାନ୍ ହେମକଲଶାନ୍ ସୁଵର୍ଣେନ ସୁପୂରିତାନ୍ ॥ 42 ॥

ନିକ୍ଷେପାନ୍ମେ ସମାକୃଷ୍ୟ ସମୁଦ୍ଧୃତ୍ୟ ମମାଗ୍ରତଃ ।
ସମୁନ୍ନତାନନା ଭୂତ୍ଵା ସମାଧେହି ଧରାଂତରାତ୍ ॥ 43 ॥

ମତ୍ସନ୍ନିଧିଂ ସମାଗଚ୍ଛ ମଦାହିତକୃପାରସାତ୍ ।
ପ୍ରସୀଦ ଶ୍ରେୟସାଂ ଦୋଗ୍ଧ୍ରୀ ଲକ୍ଷ୍ମୀର୍ମେ ନୟନାଗ୍ରତଃ ॥ 44 ॥

ଅତ୍ରୋପଵିଶ ଲକ୍ଷ୍ମି ତ୍ଵଂ ସ୍ଥିରା ଭଵ ହିରଣ୍ମୟେ ।
ସୁସ୍ଥିରା ଭଵ ସଂପ୍ରୀତ୍ୟା ପ୍ରସୀଦ ଵରଦା ଭଵ ॥ 45 ॥

ଆନୀତାଂସ୍ତୁ ତଥା ଦେଵି ନିଧୀନ୍ମେ ସଂପ୍ରଦର୍ଶୟ ।
ଅଦ୍ୟ କ୍ଷଣେନ ସହସା ଦତ୍ତ୍ଵା ସଂରକ୍ଷ ମାଂ ସଦା ॥ 46 ॥

ମୟି ତିଷ୍ଠ ତଥା ନିତ୍ୟଂ ୟଥେଂଦ୍ରାଦିଷୁ ତିଷ୍ଠସି ।
ଅଭୟଂ କୁରୁ ମେ ଦେଵି ମହାଲକ୍ଷ୍ମୀର୍ନମୋଽସ୍ତୁ ତେ ॥ 47 ॥

ସମାଗଚ୍ଛ ମହାଲକ୍ଷ୍ମି ଶୁଦ୍ଧଜାଂବୂନଦପ୍ରଭେ ।
ପ୍ରସୀଦ ପୁରତଃ ସ୍ଥିତ୍ଵା ପ୍ରଣତଂ ମାଂ ଵିଲୋକୟ ॥ 48 ॥

ଲକ୍ଷ୍ମୀର୍ଭୁଵଂ ଗତା ଭାସି ୟତ୍ର ୟତ୍ର ହିରଣ୍ମୟୀ ।
ତତ୍ର ତତ୍ର ସ୍ଥିତା ତ୍ଵଂ ମେ ତଵ ରୂପଂ ପ୍ରଦର୍ଶୟ ॥ 49 ॥

କ୍ରୀଡଂତୀ ବହୁଧା ଭୂମୌ ପରିପୂର୍ଣକୃପାମୟି ।
ମମ ମୂର୍ଧନି ତେ ହସ୍ତମଵିଲଂବିତମର୍ପୟ ॥ 50 ॥

ଫଲଦ୍ଭାଗ୍ୟୋଦୟେ ଲକ୍ଷ୍ମି ସମସ୍ତପୁରଵାସିନୀ ।
ପ୍ରସୀଦ ମେ ମହାଲକ୍ଷ୍ମି ପରିପୂର୍ଣମନୋରଥେ ॥ 51 ॥

ଅୟୋଧ୍ୟାଦିଷୁ ସର୍ଵେଷୁ ନଗରେଷୁ ସମାସ୍ଥିତେ ।
ଵୈଭଵୈର୍ଵିଵିଧୈର୍ୟୁକ୍ତୈଃ ସମାଗଚ୍ଛ ମୁଦାନ୍ଵିତେ ॥ 52 ॥

ସମାଗଚ୍ଛ ସମାଗଚ୍ଛ ମମାଗ୍ରେ ଭଵ ସୁସ୍ଥିରା ।
କରୁଣାରସନିଷ୍ୟଂଦନେତ୍ରଦ୍ଵୟ ଵିଲାସିନୀ ॥ 53 ॥ [ନିଷ୍ପନ୍ନ]

ସନ୍ନିଧତ୍ସ୍ଵ ମହାଲକ୍ଷ୍ମି ତ୍ଵତ୍ପାଣିଂ ମମ ମସ୍ତକେ ।
କରୁଣାସୁଧୟା ମାଂ ତ୍ଵମଭିଷିଂଚ୍ୟ ସ୍ଥିରଂ କୁରୁ ॥ 54 ॥

ସର୍ଵରାଜଗୃହେ ଲକ୍ଷ୍ମି ସମାଗଚ୍ଛ ବଲାନ୍ଵିତେ । [ମୁଦାନ୍ଵିତେ]
ସ୍ଥିତ୍ଵାଽଽଶୁ ପୁରତୋ ମେଽଦ୍ୟ ପ୍ରସାଦେନାଽଭୟଂ କୁରୁ ॥ 55 ॥

ସାଦରଂ ମସ୍ତକେ ହସ୍ତଂ ମମ ତ୍ଵଂ କୃପୟାର୍ପୟ ।
ସର୍ଵରାଜଗୃହେ ଲକ୍ଷ୍ମି ତ୍ଵତ୍କଲା ମୟି ତିଷ୍ଠତୁ ॥ 56 ॥

ଆଦ୍ୟାଦି ଶ୍ରୀମହାଲକ୍ଷ୍ମି ଵିଷ୍ଣୁଵାମାଂକସଂସ୍ଥିତେ ।
ପ୍ରତ୍ୟକ୍ଷଂ କୁରୁ ମେ ରୂପଂ ରକ୍ଷ ମାଂ ଶରଣାଗତମ୍ ॥ 57 ॥

ପ୍ରସୀଦ ମେ ମହାଲକ୍ଷ୍ମି ସୁପ୍ରସୀଦ ମହାଶିଵେ ।
ଅଚଲା ଭଵ ସଂପ୍ରୀତ୍ୟା ସୁସ୍ଥିରା ଭଵ ମଦ୍ଗୃହେ ॥ 58 ॥

ୟାଵତ୍ତିଷ୍ଠଂତି ଵେଦାଶ୍ଚ ୟାଵଚ୍ଚଂଦ୍ରଦିଵାକରୌ ।
ୟାଵଦ୍ଵିଷ୍ଣୁଶ୍ଚ ୟାଵତ୍ତ୍ଵଂ ତାଵତ୍କୁରୁ କୃପାଂ ମୟି ॥ 59 ॥

ଚାଂଦ୍ରୀକଲା ୟଥା ଶୁକ୍ଲେ ଵର୍ଧତେ ସା ଦିନେ ଦିନେ ।
ତଥା ଦୟା ତେ ମୟ୍ୟେଵ ଵର୍ଧତାମଭିଵର୍ଧତାମ୍ ॥ 60 ॥

ୟଥା ଵୈକୁଂଠନଗରେ ୟଥା ଵୈ କ୍ଷୀରସାଗରେ ।
ତଥା ମଦ୍ଭଵନେ ତିଷ୍ଠ ସ୍ଥିରଂ ଶ୍ରୀଵିଷ୍ଣୁନା ସହ ॥ 61 ॥

ୟୋଗିନାଂ ହୃଦୟେ ନିତ୍ୟଂ ୟଥା ତିଷ୍ଠସି ଵିଷ୍ଣୁନା ।
ତଥା ମଦ୍ଭଵନେ ତିଷ୍ଠ ସ୍ଥିରଂ ଶ୍ରୀଵିଷ୍ଣୁନା ସହ ॥ 62 ॥

ନାରାୟଣସ୍ୟ ହୃଦୟେ ଭଵତୀ ୟଥାସ୍ତେ
ନାରାୟଣୋଽପି ତଵ ହୃତ୍କମଲେ ୟଥାସ୍ତେ ।
ନାରାୟଣସ୍ତ୍ଵମପି ନିତ୍ୟମୁଭୌ ତଥୈଵ
ତୌ ତିଷ୍ଠତାଂ ହୃଦି ମମାପି ଦୟାନ୍ଵିତୌ ଶ୍ରୀଃ ॥ 63 ॥

ଵିଜ୍ଞାନଵୃଦ୍ଧିଂ ହୃଦୟେ କୁରୁ ଶ୍ରୀଃ
ସୌଭାଗ୍ୟଵୃଦ୍ଧିଂ କୁରୁ ମେ ଗୃହେ ଶ୍ରୀଃ ।
ଦୟାସୁଵୃଦ୍ଧିଂ କୁରୁତାଂ ମୟି ଶ୍ରୀଃ
ସୁଵର୍ଣଵୃଦ୍ଧିଂ କୁରୁ ମେ ଗୃହେ ଶ୍ରୀଃ ॥ 64 ॥

ନ ମାଂ ତ୍ୟଜେଥାଃ ଶ୍ରିତକଲ୍ପଵଲ୍ଲି
ସଦ୍ଭକ୍ତଚିଂତାମଣିକାମଧେନୋ ।
ଵିଶ୍ଵସ୍ୟ ମାତର୍ଭଵ ସୁପ୍ରସନ୍ନା
ଗୃହେ କଲତ୍ରେଷୁ ଚ ପୁତ୍ରଵର୍ଗେ ॥ 65 ॥

ଆଦ୍ୟାଦିମାୟେ ତ୍ଵମଜାଂଡବୀଜଂ
ତ୍ଵମେଵ ସାକାରନିରାକୃତିସ୍ତ୍ଵମ୍ ।
ତ୍ଵୟା ଧୃତାଶ୍ଚାବ୍ଜଭଵାଂଡସଂଘା-
-ଶ୍ଚିତ୍ରଂ ଚରିତ୍ରଂ ତଵ ଦେଵି ଵିଷ୍ଣୋଃ ॥ 66 ॥

ବ୍ରହ୍ମରୁଦ୍ରାଦୟୋ ଦେଵା ଵେଦାଶ୍ଚାପି ନ ଶକ୍ନୁୟୁଃ ।
ମହିମାନଂ ତଵ ସ୍ତୋତୁଂ ମଂଦୋଽହଂ ଶକ୍ନୁୟାଂ କଥମ୍ ॥ 67 ॥

ଅଂବ ତ୍ଵଦ୍ଵତ୍ସଵାକ୍ୟାନି ସୂକ୍ତାସୂକ୍ତାନି ୟାନି ଚ ।
ତାନି ସ୍ଵୀକୁରୁ ସର୍ଵଜ୍ଞେ ଦୟାଲୁତ୍ଵେନ ସାଦରମ୍ ॥ 68 ॥

ଭଵତୀଂ ଶରଣଂ ଗତ୍ଵା କୃତାର୍ଥାଃ ସ୍ୟୁଃ ପୁରାତନାଃ ।
ଇତି ସଂଚିଂତ୍ୟ ମନସା ତ୍ଵାମହଂ ଶରଣଂ ଵ୍ରଜେ ॥ 69 ॥

ଅନଂତା ନିତ୍ୟସୁଖିନସ୍ତ୍ଵଦ୍ଭକ୍ତାସ୍ତ୍ଵତ୍ପରାୟଣାଃ ।
ଇତି ଵେଦପ୍ରମାଣାଦ୍ଧି ଦେଵି ତ୍ଵାଂ ଶରଣଂ ଵ୍ରଜେ ॥ 70 ॥

ତଵ ପ୍ରତିଜ୍ଞା ମଦ୍ଭକ୍ତା ନ ନଶ୍ୟଂତୀତ୍ୟପି କ୍ଵଚିତ୍ ।
ଇତି ସଂଚିଂତ୍ୟ ସଂଚିଂତ୍ୟ ପ୍ରାଣାନ୍ ସଂଧାରୟାମ୍ୟହମ୍ ॥ 71 ॥

ତ୍ଵଦଧୀନସ୍ତ୍ଵହଂ ମାତସ୍ତ୍ଵତ୍କୃପା ମୟି ଵିଦ୍ୟତେ ।
ୟାଵତ୍ସଂପୂର୍ଣକାମଃ ସ୍ୟାତ୍ତାଵଦ୍ଦେହି ଦୟାନିଧେ ॥ 72 ॥

କ୍ଷଣମାତ୍ରଂ ନ ଶକ୍ନୋମି ଜୀଵିତୁଂ ତ୍ଵତ୍କୃପାଂ ଵିନା ।
ନ ଜୀଵଂତୀହ ଜଲଜା ଜଲଂ ତ୍ୟକ୍ତ୍ଵା ଜଲଗ୍ରହାଃ ॥ 73 ॥

ୟଥା ହି ପୁତ୍ରଵାତ୍ସଲ୍ୟାଜ୍ଜନନୀ ପ୍ରସ୍ନୁତସ୍ତନୀ ।
ଵତ୍ସଂ ତ୍ଵରିତମାଗତ୍ୟ ସଂପ୍ରୀଣୟତି ଵତ୍ସଲା ॥ 74 ॥

ୟଦି ସ୍ୟାଂ ତଵ ପୁତ୍ରୋଽହଂ ମାତା ତ୍ଵଂ ୟଦି ମାମକୀ ।
ଦୟାପୟୋଧରସ୍ତନ୍ୟସୁଧାଭିରଭିଷିଂଚ ମାମ୍ ॥ 75 ॥

ମୃଗ୍ୟୋ ନ ଗୁଣଲେଶୋଽପି ମୟି ଦୋଷୈକମଂଦିରେ ।
ପାଂସୂନାଂ ଵୃଷ୍ଟିବିଂଦୂନାଂ ଦୋଷାଣାଂ ଚ ନ ମେ ମତିଃ ॥ 76 ॥

ପାପିନାମହମେଵାଗ୍ର୍ୟୋ ଦୟାଲୂନାଂ ତ୍ଵମଗ୍ରଣୀଃ ।
ଦୟନୀୟୋ ମଦନ୍ୟୋଽସ୍ତି ତଵ କୋଽତ୍ର ଜଗତ୍ତ୍ରୟେ ॥ 77 ॥

ଵିଧିନାହଂ ନ ସୃଷ୍ଟଶ୍ଚେନ୍ନ ସ୍ୟାତ୍ତଵ ଦୟାଲୁତା ।
ଆମୟୋ ଵା ନ ସୃଷ୍ଟଶ୍ଚେଦୌଷଧସ୍ୟ ଵୃଥୋଦୟଃ ॥ 78 ॥

କୃପା ମଦଗ୍ରଜା କିଂ ତେ ଅହଂ କିଂ ଵା ତଦଗ୍ରଜଃ ।
ଵିଚାର୍ୟ ଦେହି ମେ ଵିତ୍ତଂ ତଵ ଦେଵି ଦୟାନିଧେ ॥ 79 ॥

ମାତା ପିତା ତ୍ଵଂ ଗୁରୁସଦ୍ଗତିଃ ଶ୍ରୀ-
-ସ୍ତ୍ଵମେଵ ସଂଜୀଵନହେତୁଭୂତା ।
ଅନ୍ୟଂ ନ ମନ୍ୟେ ଜଗଦେକନାଥେ
ତ୍ଵମେଵ ସର୍ଵଂ ମମ ଦେଵି ସତ୍ୟେ ॥ 80 ॥

ଆଦ୍ୟାଦିଲକ୍ଷ୍ମୀର୍ଭଵ ସୁପ୍ରସନ୍ନା
ଵିଶୁଦ୍ଧଵିଜ୍ଞାନସୁଖୈକଦୋଗ୍ଧ୍ରୀ ।
ଅଜ୍ଞାନହଂତ୍ରୀ ତ୍ରିଗୁଣାତିରିକ୍ତା
ପ୍ରଜ୍ଞାନନେତ୍ରୀ ଭଵ ସୁପ୍ରସନ୍ନା ॥ 81 ॥

ଅଶେଷଵାଗ୍ଜାଡ୍ୟମଲାପହଂତ୍ରୀ
ନଵଂ ନଵଂ ସ୍ପଷ୍ଟସୁଵାକ୍ପ୍ରଦାୟିନୀ ।
ମମେହ ଜିହ୍ଵାଗ୍ର ସୁରଂଗନର୍ତକୀ [ନର୍ତିନୀ]
ଭଵ ପ୍ରସନ୍ନା ଵଦନେ ଚ ମେ ଶ୍ରୀଃ ॥ 82 ॥

ସମସ୍ତସଂପତ୍ସୁଵିରାଜମାନା
ସମସ୍ତତେଜଶ୍ଚୟଭାସମାନା ।
ଵିଷ୍ଣୁପ୍ରିୟେ ତ୍ଵଂ ଭଵ ଦୀପ୍ୟମାନା
ଵାଗ୍ଦେଵତା ମେ ନୟନେ ପ୍ରସନ୍ନା ॥ 83 ॥

ସର୍ଵପ୍ରଦର୍ଶେ ସକଲାର୍ଥଦେ ତ୍ଵଂ
ପ୍ରଭାସୁଲାଵଣ୍ୟଦୟାପ୍ରଦୋଗ୍ଧ୍ରୀ ।
ସୁଵର୍ଣଦେ ତ୍ଵଂ ସୁମୁଖୀ ଭଵ ଶ୍ରୀ-
-ର୍ହିରଣ୍ମୟୀ ମେ ନୟନେ ପ୍ରସନ୍ନା ॥ 84 ॥

ସର୍ଵାର୍ଥଦା ସର୍ଵଜଗତ୍ପ୍ରସୂତିଃ
ସର୍ଵେଶ୍ଵରୀ ସର୍ଵଭୟାପହଂତ୍ରୀ ।
ସର୍ଵୋନ୍ନତା ତ୍ଵଂ ସୁମୁଖୀ ଭଵ ଶ୍ରୀ-
-ର୍ହିରଣ୍ମୟୀ ମେ ନୟନେ ପ୍ରସନ୍ନା ॥ 85 ॥

ସମସ୍ତଵିଘ୍ନୌଘଵିନାଶକାରିଣୀ
ସମସ୍ତଭକ୍ତୋଦ୍ଧରଣେ ଵିଚକ୍ଷଣା ।
ଅନଂତସୌଭାଗ୍ୟସୁଖପ୍ରଦାୟିନୀ
ହିରଣ୍ମୟୀ ମେ ନୟନେ ପ୍ରସନ୍ନା ॥ 86 ॥

ଦେଵି ପ୍ରସୀଦ ଦୟନୀୟତମାୟ ମହ୍ୟଂ
ଦେଵାଧିନାଥଭଵଦେଵଗଣାଭିଵଂଦ୍ୟେ ।
ମାତସ୍ତଥୈଵ ଭଵ ସନ୍ନିହିତା ଦୃଶୋର୍ମେ
ପତ୍ୟା ସମଂ ମମ ମୁଖେ ଭଵ ସୁପ୍ରସନ୍ନା ॥ 87 ॥

ମା ଵତ୍ସ ଭୈରଭୟଦାନକରୋଽର୍ପିତସ୍ତେ
ମୌଲୌ ମମେତି ମୟି ଦୀନଦୟାନୁକଂପେ ।
ମାତଃ ସମର୍ପୟ ମୁଦା କରୁଣାକଟାକ୍ଷଂ
ମାଂଗଳ୍ୟବୀଜମିହ ନଃ ସୃଜ ଜନ୍ମ ମାତଃ ॥ 88 ॥

କଟାକ୍ଷ ଇହ କାମଧୁକ୍ତଵ ମନସ୍ତୁ ଚିଂତାମଣିଃ
କରଃ ସୁରତରୁଃ ସଦା ନଵନିଧିସ୍ତ୍ଵମେଵେଂଦିରେ ।
ଭଵେ ତଵ ଦୟାରସୋ ମମ ରସାୟନଂ ଚାନ୍ଵହଂ
ମୁଖଂ ତଵ କଲାନିଧିର୍ଵିଵିଧଵାଂଛିତାର୍ଥପ୍ରଦମ୍ ॥ 89 ॥

ୟଥା ରସସ୍ପର୍ଶନତୋଽୟସୋଽପି
ସୁଵର୍ଣତା ସ୍ୟାତ୍କମଲେ ତଥା ତେ ।
କଟାକ୍ଷସଂସ୍ପର୍ଶନତୋ ଜନାନା-
-ମମଂଗଳାନାମପି ମଂଗଳତ୍ଵମ୍ ॥ 90 ॥

ଦେହୀତି ନାସ୍ତୀତି ଵଚଃ ପ୍ରଵେଶା-
-ଦ୍ଭୀତୋ ରମେ ତ୍ଵାଂ ଶରଣଂ ପ୍ରପଦ୍ୟେ ।
ଅତଃ ସଦାଽସ୍ମିନ୍ନଭୟପ୍ରଦା ତ୍ଵଂ
ସହୈଵ ପତ୍ୟା ମୟି ସନ୍ନିଧେହି ॥ 91 ॥

କଲ୍ପଦ୍ରୁମେଣ ମଣିନା ସହିତା ସୁରମ୍ୟା
ଶ୍ରୀସ୍ତେ କଲା ମୟି ରସେନ ରସାୟନେନ ।
ଆସ୍ତାଂ ୟତୋ ମମ ଶିରଃକରଦୃଷ୍ଟିପାଦ-
-ସ୍ପୃଷ୍ଟାଃ ସୁଵର୍ଣଵପୁଷଃ ସ୍ଥିରଜଂଗମାଃ ସ୍ୟୁଃ ॥ 92 ॥

ଆଦ୍ୟାଦିଵିଷ୍ଣୋଃ ସ୍ଥିରଧର୍ମପତ୍ନୀ
ତ୍ଵମେଵ ପତ୍ୟା ମୟି ସନ୍ନିଧେହି ।
ଆଦ୍ୟାଦିଲକ୍ଷ୍ମି ତ୍ଵଦନୁଗ୍ରହେଣ
ପଦେ ପଦେ ମେ ନିଧିଦର୍ଶନଂ ସ୍ୟାତ୍ ॥ 93 ॥

ଆଦ୍ୟାଦିଲକ୍ଷ୍ମୀହୃଦୟଂ ପଠେଦ୍ୟଃ
ସ ରାଜ୍ୟଲକ୍ଷ୍ମୀମଚଲାଂ ତନୋତି ।
ମହାଦରିଦ୍ରୋଽପି ଭଵେଦ୍ଧନାଢ୍ୟ-
-ସ୍ତଦନ୍ଵୟେ ଶ୍ରୀଃ ସ୍ଥିରତାଂ ପ୍ରୟାତି ॥ 94 ॥

ୟସ୍ୟ ସ୍ମରଣମାତ୍ରେଣ ତୁଷ୍ଟା ସ୍ୟାଦ୍ଵିଷ୍ଣୁଵଲ୍ଲଭା ।
ତସ୍ୟାଭୀଷ୍ଟଂ ଦଦତ୍ୟାଶୁ ତଂ ପାଲୟତି ପୁତ୍ରଵତ୍ ॥ 95 ॥

ଇଦଂ ରହସ୍ୟଂ ହୃଦୟଂ ସର୍ଵକାମଫଲପ୍ରଦମ୍ ।
ଜପଃ ପଂଚସହସ୍ରଂ ତୁ ପୁରଶ୍ଚରଣମୁଚ୍ୟତେ ॥ 96 ॥

ତ୍ରିକାଲମେକକାଲଂ ଵା ନରୋ ଭକ୍ତିସମନ୍ଵିତଃ ।
ୟଃ ପଠେଚ୍ଛୃଣୁୟାଦ୍ଵାପି ସ ୟାତି ପରମାଂ ଶ୍ରିୟମ୍ ॥ 97 ॥

ମହାଲକ୍ଷ୍ମୀଂ ସମୁଦ୍ଦିଶ୍ୟ ନିଶି ଭାର୍ଗଵଵାସରେ ।
ଇଦଂ ଶ୍ରୀହୃଦୟଂ ଜପ୍ତ୍ଵା ପଂଚଵାରଂ ଧନୀ ଭଵେତ୍ ॥ 98 ॥

ଅନେନ ହୃଦୟେନାନ୍ନଂ ଗର୍ଭିଣ୍ୟା ଅଭିମଂତ୍ରିତମ୍ ।
ଦଦାତି ତତ୍କୁଲେ ପୁତ୍ରୋ ଜାୟତେ ଶ୍ରୀପତିଃ ସ୍ଵୟମ୍ ॥ 99 ॥

ନରେଣ ଵାଽଥଵା ନାର୍ୟା ଲକ୍ଷ୍ମୀହୃଦୟମଂତ୍ରିତେ ।
ଜଲେ ପୀତେ ଚ ତଦ୍ଵଂଶେ ମଂଦଭାଗ୍ୟୋ ନ ଜାୟତେ ॥ 100 ॥

ୟ ଆଶ୍ଵିନେ ମାସି ଚ ଶୁକ୍ଲପକ୍ଷେ
ରମୋତ୍ସଵେ ସନ୍ନିହିତେ ସୁଭକ୍ତ୍ୟା ।
ପଠେତ୍ତଥୈକୋତ୍ତରଵାରଵୃଦ୍ଧ୍ୟା
ଲଭେତ୍ସ ସୌଵର୍ଣମୟୀଂ ସୁଵୃଷ୍ଟିମ୍ ॥ 101 ॥

ୟ ଏକଭକ୍ତୋଽନ୍ଵହମେକଵର୍ଷଂ
ଵିଶୁଦ୍ଧଧୀଃ ସପ୍ତତିଵାରଜାପୀ ।
ସ ମଂଦଭାଗ୍ୟୋଽପି ରମାକଟାକ୍ଷା-
-ଦ୍ଭଵେତ୍ସହସ୍ରାକ୍ଷଶତାଧିକଶ୍ରୀଃ ॥ 102 ॥

ଶ୍ରୀଶାଂଘ୍ରିଭକ୍ତିଂ ହରିଦାସଦାସ୍ୟଂ
ପ୍ରସନ୍ନମଂତ୍ରାର୍ଥଦୃଢୈକନିଷ୍ଠାମ୍ ।
ଗୁରୋଃ ସ୍ମୃତିଂ ନିର୍ମଲବୋଧବୁଦ୍ଧିଂ
ପ୍ରଦେହି ମାତଃ ପରମଂ ପଦଂ ଶ୍ରୀଃ ॥ 103 ॥

ପୃଥ୍ଵୀପତିତ୍ଵଂ ପୁରୁଷୋତ୍ତମତ୍ଵଂ
ଵିଭୂତିଵାସଂ ଵିଵିଧାର୍ଥସିଦ୍ଧିମ୍ ।
ସଂପୂର୍ଣକୀର୍ତିଂ ବହୁଵର୍ଷଭୋଗଂ
ପ୍ରଦେହି ମେ ଲକ୍ଷ୍ମି ପୁନଃ ପୁନସ୍ତ୍ଵମ୍ ॥ 104 ॥

ଵାଦାର୍ଥସିଦ୍ଧିଂ ବହୁଲୋକଵଶ୍ୟଂ
ଵୟଃ ସ୍ଥିରତ୍ଵଂ ଲଲନାସୁଭୋଗମ୍ ।
ପୌତ୍ରାଦିଲବ୍ଧିଂ ସକଲାର୍ଥସିଦ୍ଧିଂ
ପ୍ରଦେହି ମେ ଭାର୍ଗଵି ଜନ୍ମଜନ୍ମନି ॥ 105 ॥

ସୁଵର୍ଣଵୃଦ୍ଧିଂ କୁରୁ ମେ ଗୃହେ ଶ୍ରୀଃ
ସୁଧାନ୍ୟଵୃଦ୍ଧିଂ କୁରୂ ମେ ଗୃହେ ଶ୍ରୀଃ ।
କଲ୍ୟାଣଵୃଦ୍ଧିଂ କୁରୁ ମେ ଗୃହେ ଶ୍ରୀଃ
ଵିଭୂତିଵୃଦ୍ଧିଂ କୁରୁ ମେ ଗୃହେ ଶ୍ରୀଃ ॥ 106 ॥

ଧ୍ୟାୟେଲ୍ଲକ୍ଷ୍ମୀଂ ପ୍ରହସିତମୁଖୀଂ କୋଟିବାଲାର୍କଭାସାଂ
ଵିଦ୍ୟୁଦ୍ଵର୍ଣାଂବରଵରଧରାଂ ଭୂଷଣାଢ୍ୟାଂ ସୁଶୋଭାମ୍ ।
ବୀଜାପୂରଂ ସରସିଜୟୁଗଂ ବିଭ୍ରତୀଂ ସ୍ଵର୍ଣପାତ୍ରଂ
ଭର୍ତ୍ରାୟୁକ୍ତାଂ ମୁହୁରଭୟଦାଂ ମହ୍ୟମପ୍ୟଚ୍ୟୁତଶ୍ରୀଃ ॥ 107 ॥

ଗୁହ୍ୟାତିଗୁହ୍ୟଗୋପ୍ତ୍ରୀ ତ୍ଵଂ ଗୃହାଣାସ୍ମତ୍କୃତଂ ଜପମ୍ ।
ସିଦ୍ଧିର୍ଭଵତୁ ମେ ଦେଵି ତ୍ଵତ୍ପ୍ରସାଦାନ୍ମୟି ସ୍ଥିତା ॥ 108 ॥

ଇତି ଶ୍ରୀଅଥର୍ଵଣରହସ୍ୟେ ଶ୍ରୀଲକ୍ଷ୍ମୀହୃଦୟସ୍ତୋତ୍ରଂ ସଂପୂର୍ଣମ୍ ॥

sri lakshmi narayana hrudaya stotram in odia