ଶ୍ରୀ କାମାକ୍ଷୀ ସ୍ତୋତ୍ରମ୍

sri kamakshi stotram in odia

କଲ୍ପାନୋକହପୁଷ୍ପଜାଲଵିଲସନ୍ନୀଲାଲକାଂ ମାତୃକାଂ
କାଂତାଂ କଂଜଦଳେକ୍ଷଣାଂ କଲିମଲପ୍ରଧ୍ଵଂସିନୀଂ କାଳିକାମ୍ ।
କାଂଚୀନୂପୁରହାରଦାମସୁଭଗାଂ କାଂଚୀପୁରୀନାୟିକାଂ
କାମାକ୍ଷୀଂ କରିକୁଂଭସନ୍ନିଭକୁଚାଂ ଵଂଦେ ମହେଶପ୍ରିୟାମ୍ ॥ 1 ॥

କାଶାଭାଂ ଶୁକଭାସୁରାଂ ପ୍ରଵିଲସତ୍କୋଶାତକୀ ସନ୍ନିଭାଂ
ଚଂଦ୍ରାର୍କାନଲଲୋଚନାଂ ସୁରୁଚିରାଲଂକାରଭୂଷୋଜ୍ଜ୍ଵଲାମ୍ ।
ବ୍ରହ୍ମଶ୍ରୀପତିଵାସଵାଦିମୁନିଭିଃ ସଂସେଵିତାଂଘ୍ରିଦ୍ଵୟାଂ
କାମାକ୍ଷୀଂ ଗଜରାଜମଂଦଗମନାଂ ଵଂଦେ ମହେଶପ୍ରିୟାମ୍ ॥ 2 ॥

ଐଂ କ୍ଲୀଂ ସୌରିତି ୟାଂ ଵଦଂତି ମୁନୟସ୍ତତ୍ତ୍ଵାର୍ଥରୂପାଂ ପରାଂ
ଵାଚାମାଦିମକାରଣଂ ହୃଦି ସଦା ଧ୍ୟାୟଂତି ୟାଂ ୟୋଗିନଃ ।
ବାଲାଂ ଫାଲଵିଲୋଚନାଂ ନଵଜପାଵର୍ଣାଂ ସୁଷୁମ୍ନାଶ୍ରିତାଂ
କାମାକ୍ଷୀଂ କଲିତାଵତଂସସୁଭଗାଂ ଵଂଦେ ମହେଶପ୍ରିୟାମ୍ ॥ 3 ॥

ୟତ୍ପାଦାଂବୁଜରେଣୁଲେଶମନିଶଂ ଲବ୍ଧ୍ଵା ଵିଧତ୍ତେ ଵିଧି-
-ର୍ଵିଶ୍ଵଂ ତତ୍ପରିପାତି ଵିଷ୍ଣୁରଖିଲଂ ୟସ୍ୟାଃ ପ୍ରସାଦାଚ୍ଚିରମ୍ ।
ରୁଦ୍ରଃ ସଂହରତି କ୍ଷଣାତ୍ତଦଖିଲଂ ୟନ୍ମାୟୟା ମୋହିତଃ
କାମାକ୍ଷୀମତିଚିତ୍ରଚାରୁଚରିତାଂ ଵଂଦେ ମହେଶପ୍ରିୟାମ୍ ॥ 4 ॥

ସୂକ୍ଷ୍ମାତ୍ସୂକ୍ଷ୍ମତରାଂ ସୁଲକ୍ଷିତତନୁଂ କ୍ଷାଂତାକ୍ଷରୈର୍ଲକ୍ଷିତାଂ
ଵୀକ୍ଷାଶିକ୍ଷିତରାକ୍ଷସାଂ ତ୍ରିଭୁଵନକ୍ଷେମଂକରୀମକ୍ଷୟାମ୍ ।
ସାକ୍ଷାଲ୍ଲକ୍ଷଣଲକ୍ଷିତାକ୍ଷରମୟୀଂ ଦାକ୍ଷାୟଣୀଂ ସାକ୍ଷିଣୀଂ
କାମାକ୍ଷୀଂ ଶୁଭଲକ୍ଷଣୈଃ ସୁଲଲିତାଂ ଵଂଦେ ମହେଶପ୍ରିୟାମ୍ ॥ 5 ॥

ଓଂକାରାଂଗଣଦୀପିକାମୁପନିଷତ୍ପ୍ରାସାଦପାରାଵତୀଂ
ଆମ୍ନାୟାଂବୁଧିଚଂଦ୍ରିକାମଘତମଃପ୍ରଧ୍ଵଂସହଂସପ୍ରଭାମ୍ ।
କାଂଚୀପଟ୍ଟଣପଂଜରାଂତରଶୁକୀଂ କାରୁଣ୍ୟକଲ୍ଲୋଲିନୀଂ
କାମାକ୍ଷୀଂ ଶିଵକାମରାଜମହିଷୀଂ ଵଂଦେ ମହେଶପ୍ରିୟାମ୍ ॥ 6 ॥

ହ୍ରୀଂକାରାତ୍ମକଵର୍ଣମାତ୍ରପଠନାଦୈଂଦ୍ରୀଂ ଶ୍ରିୟଂ ତନ୍ଵତୀଂ
ଚିନ୍ମାତ୍ରାଂ ଭୁଵନେଶ୍ଵରୀମନୁଦିନଂ ଭିକ୍ଷାପ୍ରଦାନକ୍ଷମାମ୍ ।
ଵିଶ୍ଵାଘୌଘନିଵାରିଣୀଂ ଵିମଲିନୀଂ ଵିଶ୍ଵଂଭରାଂ ମାତୃକାଂ
କାମାକ୍ଷୀଂ ପରିପୂର୍ଣଚଂଦ୍ରଵଦନାଂ ଵଂଦେ ମହେଶପ୍ରିୟାମ୍ ॥ 7 ॥

ଵାଗ୍ଦେଵୀତି ଚ ୟାଂ ଵଦଂତି ମୁନୟଃ କ୍ଷୀରାବ୍ଧିକନ୍ୟେତି ଚ
କ୍ଷୋଣୀଭୃତ୍ତନୟେତି ଚ ଶ୍ରୁତିଗିରୋ ୟାଂ ଆମନଂତି ସ୍ଫୁଟମ୍ ।
ଏକାନେକଫଲପ୍ରଦାଂ ବହୁଵିଧାଽଽକାରାସ୍ତନୂସ୍ତନ୍ଵତୀଂ
କାମାକ୍ଷୀଂ ସକଲାର୍ତିଭଂଜନପରାଂ ଵଂଦେ ମହେଶପ୍ରିୟାମ୍ ॥ 8 ॥

ମାୟାମାଦିମକାରଣଂ ତ୍ରିଜଗତାମାରାଧିତାଂଘ୍ରିଦ୍ଵୟାଂ
ଆନଂଦାମୃତଵାରିରାଶିନିଲୟାଂ ଵିଦ୍ୟାଂ ଵିପଶ୍ଚିଦ୍ଧିୟାମ୍ ।
ମାୟାମାନୁଷରୂପିଣୀଂ ମଣିଲସନ୍ମଧ୍ୟାଂ ମହାମାତୃକାଂ
କାମାକ୍ଷୀଂ କରିରାଜମଂଦଗମନାଂ ଵଂଦେ ମହେଶପ୍ରିୟାମ୍ ॥ 9 ॥

କାଂତା କାମଦୁଘା କରୀଂଦ୍ରଗମନା କାମାରିଵାମାଂକଗା
କଲ୍ୟାଣୀ କଲିତାଵତାରସୁଭଗା କସ୍ତୂରିକାଚର୍ଚିତା
କଂପାତୀରରସାଲମୂଲନିଲୟା କାରୁଣ୍ୟକଲ୍ଲୋଲିନୀ
କଲ୍ୟାଣାନି କରୋତୁ ମେ ଭଗଵତୀ କାଂଚୀପୁରୀଦେଵତା ॥ 10 ॥

ଇତି ଶ୍ରୀ କାମାକ୍ଷୀ ସ୍ତୋତ୍ରମ୍ ।

sri kamakshi stotram in odia