ଭୀଷ୍ମ କୃତ ଭଗଵତ୍ ସ୍ତୁତିଃ (ଶ୍ରୀ କୃଷ୍ଣ ସ୍ତୁତିଃ)

bhishma kruta sri krishna stuti in odia

ଭୀଷ୍ମ ଉଵାଚ ।
ଇତି ମତିରୁପକଲ୍ପିତା ଵିତୃଷ୍ଣା
ଭଗଵତି ସାତ୍ଵତପୁଂଗଵେ ଵିଭୂମ୍ନି ।
ସ୍ଵସୁଖମୁପଗତେ କ୍ଵଚିଦ୍ଵିହର୍ତୁଂ
ପ୍ରକୃତିମୁପେୟୁଷି ୟଦ୍ଭଵପ୍ରଵାହଃ ॥ 1 ॥

ତ୍ରିଭୁଵନକମନଂ ତମାଲଵର୍ଣଂ
ରଵିକରଗୌରଵରାଂବରଂ ଦଧାନେ ।
ଵପୁରଲକକୁଲାଵୃତାନନାବ୍ଜଂ
ଵିଜୟସଖେ ରତିରସ୍ତୁ ମେଽନଵଦ୍ୟା ॥ 2 ॥

ୟୁଧି ତୁରଗରଜୋଵିଧୂମ୍ରଵିଷ୍ଵକ୍
କଚଲୁଲିତଶ୍ରମଵାର୍ୟଲଂକୃତାସ୍ୟେ ।
ମମ ନିଶିତଶରୈର୍ଵିଭିଦ୍ୟମାନ
ତ୍ଵଚି ଵିଲସତ୍କଵଚେଽସ୍ତୁ କୃଷ୍ଣ ଆତ୍ମା ॥ 3 ॥

ସପଦି ସଖିଵଚୋ ନିଶମ୍ୟ ମଧ୍ୟେ
ନିଜପରୟୋର୍ବଲୟୋ ରଥଂ ନିଵେଶ୍ୟ ।
ସ୍ଥିତଵତି ପରସୈନିକାୟୁରକ୍ଷ୍ଣା
ହୃତଵତି ପାର୍ଥସଖେ ରତିର୍ମମାସ୍ତୁ ॥ 4 ॥

ଵ୍ୟଵହିତ ପୃଥନାମୁଖଂ ନିରୀକ୍ଷ୍ୟ
ସ୍ଵଜନଵଧାଦ୍ଵିମୁଖସ୍ୟ ଦୋଷବୁଦ୍ଧ୍ୟା ।
କୁମତିମହରଦାତ୍ମଵିଦ୍ୟୟା ୟ-
-ଶ୍ଚରଣରତିଃ ପରମସ୍ୟ ତସ୍ୟ ମେଽସ୍ତୁ ॥ 5 ॥

ସ୍ଵନିଗମମପହାୟ ମତ୍ପ୍ରତିଜ୍ଞାଂ
ଋତମଧିକର୍ତୁମଵପ୍ଲୁତୋ ରଥସ୍ଥଃ ।
ଧୃତରଥଚରଣୋଽଭ୍ୟୟାଚ୍ଚଲଦ୍ଗୁଃ
ହରିରିଵ ହଂତୁମିଭଂ ଗତୋତ୍ତରୀୟଃ ॥ 6 ॥

ଶିତଵିଶିଖହତୋ ଵିଶୀର୍ଣଦଂଶଃ
କ୍ଷତଜପରିପ୍ଲୁତ ଆତତାୟିନୋ ମେ ।
ପ୍ରସଭମଭିସସାର ମଦ୍ଵଧାର୍ଥଂ
ସ ଭଵତୁ ମେ ଭଗଵାନ୍ ଗତିର୍ମୁକୁଂଦଃ ॥ 7 ॥

ଵିଜୟରଥକୁଟୁଂବ ଆତ୍ତତୋତ୍ରେ
ଧୃତହୟରଶ୍ମିନି ତଚ୍ଛ୍ରିୟେକ୍ଷଣୀୟେ ।
ଭଗଵତି ରତିରସ୍ତୁ ମେ ମୁମୂର୍ଷୋଃ
ୟମିହ ନିରୀକ୍ଷ୍ୟ ହତାଃ ଗତାଃ ସରୂପମ୍ ॥ 8 ॥

ଲଲିତ ଗତି ଵିଲାସ ଵଲ୍ଗୁହାସ
ପ୍ରଣୟ ନିରୀକ୍ଷଣ କଲ୍ପିତୋରୁମାନାଃ ।
କୃତମନୁକୃତଵତ୍ୟ ଉନ୍ମଦାଂଧାଃ
ପ୍ରକୃତିମଗନ୍ କିଲ ୟସ୍ୟ ଗୋପଵଧ୍ଵଃ ॥ 9 ॥

ମୁନିଗଣନୃପଵର୍ୟସଂକୁଲେଽଂତଃ
ସଦସି ୟୁଧିଷ୍ଠିରରାଜସୂୟ ଏଷାମ୍ ।
ଅର୍ହଣମୁପପେଦ ଈକ୍ଷଣୀୟୋ
ମମ ଦୃଶିଗୋଚର ଏଷ ଆଵିରାତ୍ମା ॥ 10 ॥

ତମିମମହମଜଂ ଶରୀରଭାଜାଂ
ହୃଦି ହୃଦି ଧିଷ୍ଟିତମାତ୍ମକଲ୍ପିତାନାମ୍ ।
ପ୍ରତିଦୃଶମିଵ ନୈକଧାଽର୍କମେକଂ
ସମଧିଗତୋଽସ୍ମି ଵିଧୂତଭେଦମୋହଃ ॥ 11 ॥

ଇତି ଶ୍ରୀମଦ୍ଭାଗଵତେ ମହାପୁରାଣେ ପ୍ରଥମସ୍କଂଧେ ନଵମୋଽଧ୍ୟାୟେ ଭୀଷ୍ମକୃତ ଭଗଵତ୍ ସ୍ତୁତିଃ ।

bhishma kruta sri krishna stuti in odia