ଶ୍ରୀମଦ୍ଭଗଵଦ୍ଗୀତା ପାରାୟଣ – ଦଶମୋଽଧ୍ୟାୟଃ

bhagavadgita parayana chapter 10 in odia

ଓଂ ଶ୍ରୀପରମାତ୍ମନେ ନମଃ
ଅଥ ଦଶମୋଽଧ୍ୟାୟଃ
ଵିଭୂତିୟୋଗଃ

ଶ୍ରୀ ଭଗଵାନୁଵାଚ
ଭୂୟ ଏଵ ମହାବାହୋ ଶୃଣୁ ମେ ପରମଂ ଵଚଃ ।
ୟତ୍ତେଽହଂ ପ୍ରୀୟମାଣାୟ ଵକ୍ଷ୍ୟାମି ହିତକାମ୍ୟୟା ॥1॥

ନ ମେ ଵିଦୁଃ ସୁରଗଣାଃ ପ୍ରଭଵଂ ନ ମହର୍ଷୟଃ ।
ଅହମାଦିର୍ହି ଦେଵାନାଂ ମହର୍ଷୀଣାଂ ଚ ସର୍ଵଶଃ ॥2॥

ୟୋ ମାମଜମନାଦିଂ ଚ ଵେତ୍ତି ଲୋକମହେଶ୍ଵରମ୍ ।
ଅସମ୍ମୂଢଃ ସ ମର୍ତ୍ୟେଷୁ ସର୍ଵପାପୈଃ ପ୍ରମୁଚ୍ୟତେ ॥3॥

ବୁଦ୍ଧିର୍ଜ୍ଞାନମସମ୍ମୋହଃ କ୍ଷମା ସତ୍ୟଂ ଦମଃ ଶମଃ ।
ସୁଖଂ ଦୁଃଖଂ ଭଵୋଽଭାଵଃ ଭୟଂ ଚାଭୟମେଵ ଚ ॥4॥

ଅହିଂସା ସମତା ତୁଷ୍ଟିଃ ତପୋ ଦାନଂ ୟଶୋଽୟଶଃ ।
ଭଵଂତି ଭାଵା ଭୂତାନାଂ ମତ୍ତ ଏଵ ପୃଥଗ୍ଵିଧାଃ ॥5॥

ମହର୍ଷୟଃ ସପ୍ତ ପୂର୍ଵେ ଚତ୍ଵାରୋ ମନଵସ୍ତଥା ।
ମଦ୍ଭାଵା ମାନସା ଜାତାଃ ୟେଷାଂ ଲୋକ ଇମାଃ ପ୍ରଜାଃ ॥6॥

ଏତାଂ ଵିଭୂତିଂ ୟୋଗଂ ଚ ମମ ୟୋ ଵେତ୍ତି ତତ୍ତ୍ଵତଃ ।
ସୋଽଵିକଂପେନ ୟୋଗେନ ୟୁଜ୍ୟତେ ନାତ୍ର ସଂଶୟଃ ॥7॥

ଅହଂ ସର୍ଵସ୍ୟ ପ୍ରଭଵଃ ମତ୍ତଃ ସର୍ଵଂ ପ୍ରଵର୍ତତେ ।
ଇତି ମତ୍ଵା ଭଜଂତେ ମାଂ ବୁଧା ଭାଵସମନ୍ଵିତାଃ ॥8॥

ମଚ୍ଚିତ୍ତା ମଦ୍ଗତପ୍ରାଣାଃ ବୋଧୟଂତଃ ପରସ୍ପରମ୍ ।
କଥୟଂତଶ୍ଚ ମାଂ ନିତ୍ୟଂ ତୁଷ୍ୟଂତି ଚ ରମଂତି ଚ ॥9॥

ତେଷାଂ ସତତୟୁକ୍ତାନାଂ ଭଜତାଂ ପ୍ରୀତିପୂର୍ଵକମ୍ ।
ଦଦାମି ବୁଦ୍ଧିୟୋଗଂ ତଂ ୟେନ ମାମୁପୟାଂତି ତେ ॥10॥

ତେଷାମେଵାନୁକଂପାର୍ଥମ୍ ଅହମଜ୍ଞାନଜଂ ତମଃ ।
ନାଶୟାମ୍ୟାତ୍ମଭାଵସ୍ଥଃ ଜ୍ଞାନଦୀପେନ ଭାସ୍ଵତା ॥11॥

ଅର୍ଜୁନ ଉଵାଚ –
ପରଂ ବ୍ରହ୍ମ ପରଂ ଧାମ ପଵିତ୍ରଂ ପରମଂ ଭଵାନ୍ ।
ପୁରୁଷଂ ଶାଶ୍ଵତଂ ଦିଵ୍ୟମ୍ ଆଦିଦେଵମଜଂ ଵିଭୁମ୍ ॥12॥

ଆହୁସ୍ତ୍ଵାମୃଷୟଃ ସର୍ଵେ ଦେଵର୍ଷିର୍ନାରଦସ୍ତଥା ।
ଅସିତୋ ଦେଵଲୋ ଵ୍ୟାସଃ ସ୍ଵୟଂ ଚୈଵ ବ୍ରଵୀଷି ମେ ॥13॥

ସର୍ଵମେତଦୃତଂ ମନ୍ୟେ ୟନ୍ମାଂ ଵଦସି କେଶଵ ।
ନ ହି ତେ ଭଗଵନ୍ଵ୍ୟକ୍ତିଂ ଵିଦୁର୍ଦେଵା ନ ଦାନଵାଃ ॥14॥

ସ୍ଵୟମେଵାତ୍ମନାଽଽତ୍ମାନଂ ଵେତ୍ଥ ତ୍ଵଂ ପୁରୁଷୋତ୍ତମ ।
ଭୂତଭାଵନ ଭୂତେଶ ଦେଵଦେଵ ଜଗତ୍ପତେ ॥15॥

ଵକ୍ତୁମର୍ହସ୍ୟଶେଷେଣ ଦିଵ୍ୟା ହ୍ୟାତ୍ମଵିଭୂତୟଃ ।
ୟାଭିର୍ଵିଭୂତିଭିର୍ଲୋକାନ୍ ଇମାଂସ୍ତ୍ଵଂ ଵ୍ୟାପ୍ୟ ତିଷ୍ଠସି ॥16॥

କଥଂ ଵିଦ୍ୟାମହଂ ୟୋଗିନ୍ ତ୍ଵାଂ ସଦା ପରିଚିଂତୟନ୍ ।
କେଷୁ କେଷୁ ଚ ଭାଵେଷୁ ଚିଂତ୍ୟୋଽସି ଭଗଵନ୍ମୟା ॥17॥

ଵିସ୍ତରେଣାତ୍ମନୋ ୟୋଗଂ ଵିଭୂତିଂ ଚ ଜନାର୍ଦନ ।
ଭୂୟଃ କଥୟ ତୃପ୍ତିର୍ହି ଶୃଣ୍ଵତୋ ନାସ୍ତି ମେଽମୃତମ୍ ॥18॥

ଶ୍ରୀ ଭଗଵାନୁଵାଚ –
ହଂତ ତେ କଥୟିଷ୍ୟାମି ଦିଵ୍ୟା ହ୍ୟାତ୍ମଵିଭୂତୟଃ ।
ପ୍ରାଧାନ୍ୟତଃ କୁରୁଶ୍ରେଷ୍ଠ ନାସ୍ତ୍ୟଂତୋ ଵିସ୍ତରସ୍ୟ ମେ ॥19॥

ଅହମାତ୍ମା ଗୁଡାକେଶ ସର୍ଵଭୂତାଶୟସ୍ଥିତଃ ।
ଅହମାଦିଶ୍ଚ ମଧ୍ୟଂ ଚ ଭୂତାନାମଂତ ଏଵ ଚ ॥20॥

ଆଦିତ୍ୟାନାମହଂ ଵିଷ୍ଣୁଃ ଜ୍ୟୋତିଷାଂ ରଵିରଂଶୁମାନ୍ ।
ମରୀଚିର୍ମରୁତାମସ୍ମି ନକ୍ଷତ୍ରାଣାମହଂ ଶଶୀ ॥21॥

ଵେଦାନାଂ ସାମଵେଦୋଽସ୍ମି ଦେଵାନାମସ୍ମି ଵାସଵଃ ।
ଇଂଦ୍ରିୟାଣାଂ ମନଶ୍ଚାସ୍ମି ଭୂତାନାମସ୍ମି ଚେତନା ॥22॥

ରୁଦ୍ରାଣାଂ ଶଂକରଶ୍ଚାସ୍ମି ଵିତ୍ତେଶୋ ୟକ୍ଷରକ୍ଷସାମ୍ ।
ଵସୂନାଂ ପାଵକଶ୍ଚାସ୍ମି ମେରୁଃ ଶିଖରିଣାମହମ୍ ॥23॥

ପୁରୋଧସାଂ ଚ ମୁଖ୍ୟଂ ମାଂ ଵିଦ୍ଧି ପାର୍ଥ ବୃହସ୍ପତିମ୍ ।
ସେନାନୀନାମହଂ ସ୍କଂଦଃ ସରସାମସ୍ମି ସାଗରଃ ॥24॥

ମହର୍ଷୀଣାଂ ଭୃଗୁରହଂ ଗିରାମସ୍ମ୍ୟେକମକ୍ଷରମ୍ ।
ୟଜ୍ଞାନାଂ ଜପୟଜ୍ଞୋଽସ୍ମି ସ୍ଥାଵରାଣାଂ ହିମାଲୟଃ ॥25॥

ଅଶ୍ଵତ୍ଥଃ ସର୍ଵଵୃକ୍ଷାଣାଂ ଦେଵର୍ଷୀଣାଂ ଚ ନାରଦଃ ।
ଗଂଧର୍ଵାଣାଂ ଚିତ୍ରରଥଃ ସିଦ୍ଧାନାଂ କପିଲୋ ମୁନିଃ ॥26॥

ଉଚ୍ଚୈଃ ଶ୍ରଵସମଶ୍ଵାନାଂ ଵିଦ୍ଧି ମାମମୃତୋଦ୍ଭଵମ୍ ।
ଐରାଵତଂ ଗଜେଂଦ୍ରାଣାଂ ନରାଣାଂ ଚ ନରାଧିପମ୍ ॥27॥

ଆୟୁଧାନାଂ ଅହଂ ଵଜ୍ରଂ ଧେନୂନାମସ୍ମି କାମଧୁକ୍ ।
ପ୍ରଜନଶ୍ଚାସ୍ମି କଂଦର୍ପଃ ସର୍ପାଣାମସ୍ମି ଵାସୁକିଃ ॥28॥

ଅନଂତଶ୍ଚାସ୍ମି ନାଗାନାଂ ଵରୁଣୋ ୟାଦସାମହମ୍ ।
ପିତୄଣାମର୍ୟମା ଚାସ୍ମି ୟମଃ ସଂୟମତାମହମ୍ ॥29॥

ପ୍ରହ୍ଲାଦଶ୍ଚାସ୍ମି ଦୈତ୍ୟାନାଂ କାଲଃ କଲୟତାମହମ୍ ।
ମୃଗାଣାଂ ଚ ମୃଗେଂଦ୍ରୋଽହଂ ଵୈନତେୟଶ୍ଚ ପକ୍ଷିଣାମ୍ ॥30॥

ପଵନଃ ପଵତାମସ୍ମି ରାମଃ ଶସ୍ତ୍ରଭୃତାମହମ୍ ।
ଝଷାଣାଂ ମକରଶ୍ଚାସ୍ମି ସ୍ରୋତସାମସ୍ମି ଜାହ୍ନଵୀ ॥31॥

ସର୍ଗାଣାମାଦିରଂତଶ୍ଚ ମଧ୍ୟଂ ଚୈଵାହମର୍ଜୁନ ।
ଅଧ୍ୟାତ୍ମଵିଦ୍ୟା ଵିଦ୍ୟାନାଂ ଵାଦଃ ପ୍ରଵଦତାମହମ୍ ॥32॥

ଅକ୍ଷରାଣାମକାରୋଽସ୍ମି ଦ୍ଵଂଦ୍ଵଃ ସାମାସିକସ୍ୟ ଚ ।
ଅହମେଵାକ୍ଷୟଃ କାଲଃ ଧାତାଽହଂ ଵିଶ୍ଵତୋମୁଖଃ ॥33॥

ମୃତ୍ୟୁଃ ସର୍ଵହରଶ୍ଚାହମ୍ ଉଦ୍ଭଵଶ୍ଚ ଭଵିଷ୍ୟତାମ୍ ।
କୀର୍ତିଃ ଶ୍ରୀର୍ଵାକ୍ଚ ନାରୀଣାଂ ସ୍ମୃତିର୍ମେଧା ଧୃତିଃ କ୍ଷମା ॥34॥

ବୃହତ୍ସାମ ତଥା ସାମ୍ନାଂ ଗାୟତ୍ରୀ ଛଂଦସାମହମ୍ ।
ମାସାନାଂ ମାର୍ଗଶୀର୍ଷୋଽହମ୍ ଋତୂନାଂ କୁସୁମାକରଃ ॥35॥

ଦ୍ୟୂତଂ ଛଲୟତାମସ୍ମି ତେଜସ୍ତେଜସ୍ଵିନାମହମ୍ ।
ଜୟୋଽସ୍ମି ଵ୍ୟଵସାୟୋଽସ୍ମି ସତ୍ତ୍ଵଂ ସତ୍ତ୍ଵଵତାମହମ୍ ॥36॥

ଵୃଷ୍ଣୀନାଂ ଵାସୁଦେଵୋଽସ୍ମି ପାଂଡଵାନାଂ ଧନଂଜୟଃ ।
ମୁନୀନାମପ୍ୟହଂ ଵ୍ୟାସଃ କଵୀନାମୁଶନା କଵିଃ ॥37॥

ଦଂଡୋ ଦମୟତାମସ୍ମି ନୀତିରସ୍ମି ଜିଗୀଷତାମ୍ ।
ମୌନଂ ଚୈଵାସ୍ମି ଗୁହ୍ୟାନାଂ ଜ୍ଞାନଂ ଜ୍ଞାନଵତାମହମ୍ ॥38॥

ୟଚ୍ଚାପି ସର୍ଵଭୂତାନାଂ ବୀଜଂ ତଦହମର୍ଜୁନ ।
ନ ତଦସ୍ତି ଵିନା ୟତ୍ସ୍ୟାତ୍ ମୟା ଭୂତଂ ଚରାଚରମ୍ ॥39॥

ନାଂତୋଽସ୍ତି ମମ ଦିଵ୍ୟାନାଂ ଵିଭୂତୀନାଂ ପରଂତପ ।
ଏଷ ତୂଦ୍ଦେଶତଃ ପ୍ରୋକ୍ତଃ ଵିଭୂତେର୍ଵିସ୍ତରୋ ମୟା ॥40॥

ୟଦ୍ୟଦ୍ଵିଭୂତିମତ୍ସତ୍ତ୍ଵଂ ଶ୍ରୀମଦୂର୍ଜିତମେଵ ଵା ।
ତତ୍ତଦେଵାଵଗଚ୍ଛ ତ୍ଵଂ ମମ ତେଜୋଽମ୍ଶସଂଭଵମ୍ ॥41॥

ଅଥଵା ବହୁନୈତେନ କିଂ ଜ୍ଞାତେନ ତଵାର୍ଜୁନ ।
ଵିଷ୍ଟଭ୍ୟାହମିଦଂ କୃତ୍ସ୍ନମ୍ ଏକାଂଶେନ ସ୍ଥିତୋ ଜଗତ୍ ॥42॥

॥ ଓଂ ତତ୍ସଦିତି ଶ୍ରୀମଦ୍ଭଗଵଦ୍ଗୀତାସୁ ଉପନିଷତ୍ସୁ ବ୍ରହ୍ମଵିଦ୍ୟାୟାଂ
ୟୋଗଶାସ୍ତ୍ରେ ଶ୍ରୀକୃଷ୍ଣାର୍ଜୁନସଂଵାଦେ ଵିଭୂତିୟୋଗୋ ନାମ ଦଶମୋଽଧ୍ୟାୟଃ ॥

bhagavadgita parayana chapter 10 in odia