ଆନଂଦ ଲହରି

ananda lahari in odia

ଭଵାନି ସ୍ତୋତୁଂ ତ୍ଵାଂ ପ୍ରଭଵତି ଚତୁର୍ଭିର୍ନ ଵଦନୈଃ
ପ୍ରଜାନାମୀଶାନସ୍ତ୍ରିପୁରମଥନଃ ପଂଚଭିରପି ।
ନ ଷଡ୍ଭିଃ ସେନାନୀର୍ଦଶଶତମୁଖୈରପ୍ୟହିପତିଃ
ତଦାନ୍ୟେଷାଂ କେଷାଂ କଥୟ କଥମସ୍ମିନ୍ନଵସରଃ ॥ 1॥

ଘୃତକ୍ଷୀରଦ୍ରାକ୍ଷାମଧୁମଧୁରିମା କୈରପି ପଦୈଃ
ଵିଶିଷ୍ୟାନାଖ୍ୟେୟୋ ଭଵତି ରସନାମାତ୍ର ଵିଷୟଃ ।
ତଥା ତେ ସୌଂଦର୍ୟଂ ପରମଶିଵଦୃଙ୍ମାତ୍ରଵିଷୟଃ
କଥଂକାରଂ ବ୍ରୂମଃ ସକଲନିଗମାଗୋଚରଗୁଣେ ॥ 2॥

ମୁଖେ ତେ ତାଂବୂଲଂ ନୟନୟୁଗଳେ କଜ୍ଜଲକଲା
ଲଲାଟେ କାଶ୍ମୀରଂ ଵିଲସତି ଗଳେ ମୌକ୍ତିକଲତା ।
ସ୍ଫୁରତ୍କାଂଚୀ ଶାଟୀ ପୃଥୁକଟିତଟେ ହାଟକମୟୀ
ଭଜାମି ତ୍ଵାଂ ଗୌରୀଂ ନଗପତିକିଶୋରୀମଵିରତମ୍ ॥ 3॥

ଵିରାଜନ୍ମଂଦାରଦ୍ରୁମକୁସୁମହାରସ୍ତନତଟୀ
ନଦଦ୍ଵୀଣାନାଦଶ୍ରଵଣଵିଲସତ୍କୁଂଡଲଗୁଣା
ନତାଂଗୀ ମାତଂଗୀ ରୁଚିରଗତିଭଂଗୀ ଭଗଵତୀ
ସତୀ ଶଂଭୋରଂଭୋରୁହଚଟୁଲଚକ୍ଷୁର୍ଵିଜୟତେ ॥ 4॥

ନଵୀନାର୍କଭ୍ରାଜନ୍ମଣିକନକଭୂଷଣପରିକରୈଃ
ଵୃତାଂଗୀ ସାରଂଗୀରୁଚିରନୟନାଂଗୀକୃତଶିଵା ।
ତଡିତ୍ପୀତା ପୀତାଂବରଲଲିତମଂଜୀରସୁଭଗା
ମମାପର୍ଣା ପୂର୍ଣା ନିରଵଧିସୁଖୈରସ୍ତୁ ସୁମୁଖୀ ॥ 5॥

ହିମାଦ୍ରେଃ ସଂଭୂତା ସୁଲଲିତକରୈଃ ପଲ୍ଲଵୟୁତା
ସୁପୁଷ୍ପା ମୁକ୍ତାଭିର୍ଭ୍ରମରକଲିତା ଚାଲକଭରୈଃ ।
କୃତସ୍ଥାଣୁସ୍ଥାନା କୁଚଫଲନତା ସୂକ୍ତିସରସା
ରୁଜାଂ ହଂତ୍ରୀ ଗଂତ୍ରୀ ଵିଲସତି ଚିଦାନଂଦଲତିକା ॥ 6॥

ସପର୍ଣାମାକୀର୍ଣାଂ କତିପୟଗୁଣୈଃ ସାଦରମିହ
ଶ୍ରୟଂତ୍ୟନ୍ୟେ ଵଲ୍ଲୀଂ ମମ ତୁ ମତିରେଵଂ ଵିଲସତି ।
ଅପର୍ଣୈକା ସେଵ୍ୟା ଜଗତି ସକଲୈର୍ୟତ୍ପରିଵୃତଃ
ପୁରାଣୋଽପି ସ୍ଥାଣୁଃ ଫଲତି କିଲ କୈଵଲ୍ୟପଦଵୀମ୍ ॥ 7॥

ଵିଧାତ୍ରୀ ଧର୍ମାଣାଂ ତ୍ଵମସି ସକଲାମ୍ନାୟଜନନୀ
ତ୍ଵମର୍ଥାନାଂ ମୂଲଂ ଧନଦନମନୀୟାଂଘ୍ରିକମଲେ ।
ତ୍ଵମାଦିଃ କାମାନାଂ ଜନନି କୃତକଂଦର୍ପଵିଜୟେ
ସତାଂ ମୁକ୍ତେର୍ବୀଜଂ ତ୍ଵମସି ପରମବ୍ରହ୍ମମହିଷୀ ॥ 8॥

ପ୍ରଭୂତା ଭକ୍ତିସ୍ତେ ୟଦପି ନ ମମାଲୋଲମନସଃ
ତ୍ଵୟା ତୁ ଶ୍ରୀମତ୍ୟା ସଦୟମଵଲୋକ୍ୟୋଽହମଧୁନା ।
ପୟୋଦଃ ପାନୀୟଂ ଦିଶତି ମଧୁରଂ ଚାତକମୁଖେ
ଭୃଶଂ ଶଂକେ କୈର୍ଵା ଵିଧିଭିରନୁନୀତା ମମ ମତିଃ ॥ 9॥

କୃପାପାଂଗାଲୋକଂ ଵିତର ତରସା ସାଧୁଚରିତେ
ନ ତେ ୟୁକ୍ତୋପେକ୍ଷା ମୟି ଶରଣଦୀକ୍ଷାମୁପଗତେ ।
ନ ଚେଦିଷ୍ଟଂ ଦଦ୍ୟାଦନୁପଦମହୋ କଲ୍ପଲତିକା
ଵିଶେଷଃ ସାମାନ୍ୟୈଃ କଥମିତରଵଲ୍ଲୀପରିକରୈଃ ॥ 10॥

ମହାଂତଂ ଵିଶ୍ଵାସଂ ତଵ ଚରଣପଂକେରୁହୟୁଗେ
ନିଧାୟାନ୍ୟନ୍ନୈଵାଶ୍ରିତମିହ ମୟା ଦୈଵତମୁମେ ।
ତଥାପି ତ୍ଵଚ୍ଚେତୋ ୟଦି ମୟି ନ ଜାୟେତ ସଦୟଂ
ନିରାଲଂବୋ ଲଂବୋଦରଜନନି କଂ ୟାମି ଶରଣମ୍ ॥ 11॥

ଅୟଃ ସ୍ପର୍ଶେ ଲଗ୍ନଂ ସପଦି ଲଭତେ ହେମପଦଵୀଂ
ୟଥା ରଥ୍ୟାପାଥଃ ଶୁଚି ଭଵତି ଗଂଗୌଘମିଲିତମ୍ ।
ତଥା ତତ୍ତତ୍ପାପୈରତିମଲିନମଂତର୍ମମ ୟଦି
ତ୍ଵୟି ପ୍ରେମ୍ଣାସକ୍ତଂ କଥମିଵ ନ ଜାୟେତ ଵିମଲମ୍ ॥ 12॥

ତ୍ଵଦନ୍ୟସ୍ମାଦିଚ୍ଛାଵିଷୟଫଲଲାଭେ ନ ନିୟମଃ
ତ୍ଵମର୍ଥାନାମିଚ୍ଛାଧିକମପି ସମର୍ଥା ଵିତରଣେ ।
ଇତି ପ୍ରାହୁଃ ପ୍ରାଂଚଃ କମଲଭଵନାଦ୍ୟାସ୍ତ୍ଵୟି ମନଃ
ତ୍ଵଦାସକ୍ତଂ ନକ୍ତଂ ଦିଵମୁଚିତମୀଶାନି କୁରୁ ତତ୍ ॥ 13॥

ସ୍ଫୁରନ୍ନାନାରତ୍ନସ୍ଫଟିକମୟଭିତ୍ତିପ୍ରତିଫଲ
ତ୍ତ୍ଵଦାକାରଂ ଚଂଚଚ୍ଛଶଧରକଲାସୌଧଶିଖରମ୍ ।
ମୁକୁଂଦବ୍ରହ୍ମେଂଦ୍ରପ୍ରଭୃତିପରିଵାରଂ ଵିଜୟତେ
ତଵାଗାରଂ ରମ୍ୟଂ ତ୍ରିଭୁଵନମହାରାଜଗୃହିଣି ॥ 14॥

ନିଵାସଃ କୈଲାସେ ଵିଧିଶତମଖାଦ୍ୟାଃ ସ୍ତୁତିକରାଃ
କୁଟୁଂବଂ ତ୍ରୈଲୋକ୍ୟଂ କୃତକରପୁଟଃ ସିଦ୍ଧିନିକରଃ ।
ମହେଶଃ ପ୍ରାଣେଶସ୍ତଦଵନିଧରାଧୀଶତନୟେ
ନ ତେ ସୌଭାଗ୍ୟସ୍ୟ କ୍ଵଚିଦପି ମନାଗସ୍ତି ତୁଲନା ॥ 15॥

ଵୃଷୋ ଵୃଦ୍ଧୋ ୟାନଂ ଵିଷମଶନମାଶା ନିଵସନଂ
ଶ୍ମଶାନଂ କ୍ରୀଡାଭୂର୍ଭୁଜଗନିଵହୋ ଭୂଷଣଵିଧିଃ
ସମଗ୍ରା ସାମଗ୍ରୀ ଜଗତି ଵିଦିତୈଵ ସ୍ମରରିପୋଃ
ୟଦେତସ୍ୟୈଶ୍ଵର୍ୟଂ ତଵ ଜନନି ସୌଭାଗ୍ୟମହିମା ॥ 16॥

ଅଶେଷବ୍ରହ୍ମାଂଡପ୍ରଲୟଵିଧିନୈସର୍ଗିକମତିଃ
ଶ୍ମଶାନେଷ୍ଵାସୀନଃ କୃତଭସିତଲେପଃ ପଶୁପତିଃ ।
ଦଧୌ କଂଠେ ହାଲାହଲମଖିଲଭୂଗୋଲକୃପୟା
ଭଵତ୍ୟାଃ ସଂଗତ୍ୟାଃ ଫଲମିତି ଚ କଲ୍ୟାଣି କଲୟେ ॥ 17॥

ତ୍ଵଦୀୟଂ ସୌଂଦର୍ୟଂ ନିରତିଶୟମାଲୋକ୍ୟ ପରୟା
ଭିୟୈଵାସୀଦ୍ଗଂଗା ଜଲମୟତନୁଃ ଶୈଲତନୟେ ।
ତଦେତସ୍ୟାସ୍ତସ୍ମାଦ୍ଵଦନକମଲଂ ଵୀକ୍ଷ୍ୟ କୃପୟା
ପ୍ରତିଷ୍ଠାମାତନ୍ଵନ୍ନିଜଶିରସିଵାସେନ ଗିରିଶଃ ॥ 18॥

ଵିଶାଲଶ୍ରୀଖଂଡଦ୍ରଵମୃଗମଦାକୀର୍ଣଘୁସୃଣ
ପ୍ରସୂନଵ୍ୟାମିଶ୍ରଂ ଭଗଵତି ତଵାଭ୍ୟଂଗସଲିଲମ୍ ।
ସମାଦାୟ ସ୍ରଷ୍ଟା ଚଲିତପଦପାଂସୂନ୍ନିଜକରୈଃ
ସମାଧତ୍ତେ ସୃଷ୍ଟିଂ ଵିବୁଧପୁରପଂକେରୁହଦୃଶାମ୍ ॥ 19॥

ଵସଂତେ ସାନଂଦେ କୁସୁମିତଲତାଭିଃ ପରିଵୃତେ
ସ୍ଫୁରନ୍ନାନାପଦ୍ମେ ସରସି କଲହଂସାଲିସୁଭଗେ ।
ସଖୀଭିଃ ଖେଲଂତୀଂ ମଲୟପଵନାଂଦୋଲିତଜଲେ
ସ୍ମରେଦ୍ୟସ୍ତ୍ଵାଂ ତସ୍ୟ ଜ୍ଵରଜନିତପୀଡାପସରତି ॥ 20॥

॥ ଇତି ଶ୍ରୀମଚ୍ଛଂକରାଚାର୍ୟଵିରଚିତା ଆନଂଦଲହରୀ ସଂପୂର୍ଣା ॥

ananda lahari in odia