ശ്രീ വിഷ്ണു പംജര സ്തോത്രമ്

sri vishnu panjara stotram in malayalam

ഓം അസ്യ ശ്രീവിഷ്ണുപംജരസ്തോത്ര മഹാമംത്രസ്യ നാരദ ഋഷിഃ । അനുഷ്ടുപ് ഛംദഃ । ശ്രീവിഷ്ണുഃ പരമാത്മാ ദേവതാ । അഹം ബീജമ് । സോഹം ശക്തിഃ । ഓം ഹ്രീം കീലകമ് । മമ സർവദേഹരക്ഷണാര്ഥം ജപേ വിനിയോഗഃ ।

നാരദ ഋഷയേ നമഃ മുഖേ । ശ്രീവിഷ്ണുപരമാത്മദേവതായൈ നമഃ ഹൃദയേ । അഹം ബീജം ഗുഹ്യേ । സോഹം ശക്തിഃ പാദയോഃ । ഓം ഹ്രീം കീലകം പാദാഗ്രേ । ഓം ഹ്രാം ഹ്രീം ഹ്രൂം ഹ്രൈം ഹ്രൌം ഹ്രഃ ഇതി മംത്രഃ ।

ഓം ഹ്രാം അംഗുഷ്ഠാഭ്യാം നമഃ ।
ഓം ഹ്രീം തര്ജനീഭ്യാം നമഃ ।
ഓം ഹ്രൂം മധ്യമാഭ്യാം നമഃ ।
ഓം ഹ്രൈം അനാമികാഭ്യാം നമഃ ।
ഓം ഹ്രൌം കനിഷ്ഠികാഭ്യാം നമഃ ।
ഓം ഹ്രഃ കരതലകരപൃഷ്ഠാഭ്യാം നമഃ ।
ഇതി കരന്യാസഃ ।

ഓം ഹ്രാം ഹൃദയായ നമഃ ।
ഓം ഹ്രീം ശിരസേ സ്വാഹാ ।
ഓം ഹ്രൂം ശിഖായൈ വഷട് ।
ഓം ഹ്രൈം കവചായ ഹുമ് ।
ഓം ഹ്രൌം നേത്രത്രയായ വൌഷട് ।
ഓം ഹ്രഃ അസ്ത്രായ ഫട് ।
ഇതി അംഗന്യാസഃ ।

അഹം ബീജം പ്രാണായാമം മംത്രത്രയേണ കുര്യാത് ।

ധ്യാനമ് ।
പരം പരസ്മാത്പ്രകൃതേരനാദിമേകം നിവിഷ്ടം ബഹുധാ ഗുഹായാമ് ।
സർവാലയം സർവചരാചരസ്ഥം നമാമി വിഷ്ണും ജഗദേകനാഥമ് ॥ 1 ॥

ഓം വിഷ്ണുപംജരകം ദിവ്യം സർവദുഷ്ടനിവാരണമ് ।
ഉഗ്രതേജോ മഹാവീര്യം സർവശത്രുനികൃംതനമ് ॥ 2 ॥

ത്രിപുരം ദഹമാനസ്യ ഹരസ്യ ബ്രഹ്മണോ ഹിതമ് ।
തദഹം സംപ്രവക്ഷ്യാമി ആത്മരക്ഷാകരം നൃണാമ് ॥ 3 ॥

പാദൌ രക്ഷതു ഗോവിംദോ ജംഘേ ചൈവ ത്രിവിക്രമഃ ।
ഊരൂ മേ കേശവഃ പാതു കടിം ചൈവ ജനാര്ദനഃ ॥ 4 ॥

നാഭിം ചൈവാച്യുതഃ പാതു ഗുഹ്യം ചൈവ തു വാമനഃ ।
ഉദരം പദ്മനാഭശ്ച പൃഷ്ഠം ചൈവ തു മാധവഃ ॥ 5 ॥

വാമപാര്ശ്വം തഥാ വിഷ്ണുര്ദക്ഷിണം മധുസൂദനഃ ।
ബാഹൂ വൈ വാസുദേവശ്ച ഹൃദി ദാമോദരസ്തഥാ ॥ 6 ॥

കംഠം രക്ഷതു വാരാഹഃ കൃഷ്ണശ്ച മുഖമംഡലമ് ।
മാധവഃ കര്ണമൂലേ തു ഹൃഷീകേശശ്ച നാസികേ ॥ 7 ॥

നേത്രേ നാരായണോ രക്ഷേല്ലലാടം ഗരുഡധ്വജഃ ।
കപോലൌ കേശവോ രക്ഷേദ്വൈകുംഠഃ സർവതോദിശമ് ॥ 8 ॥

ശ്രീവത്സാംകശ്ച സർവേഷാമംഗാനാം രക്ഷകോ ഭവേത് ।
പൂർവസ്യാം പുംഡരീകാക്ഷ ആഗ്നേയ്യാം ശ്രീധരസ്തഥാ ॥ 9 ॥

ദക്ഷിണേ നാരസിംഹശ്ച നൈരൃത്യാം മാധവോഽവതു ।
പുരുഷോത്തമോ വാരുണ്യാം വായവ്യാം ച ജനാര്ദനഃ ॥ 10 ॥

ഗദാധരസ്തു കൌബേര്യാമീശാന്യാം പാതു കേശവഃ ।
ആകാശേ ച ഗദാ പാതു പാതാളേ ച സുദര്ശനമ് ॥ 11 ॥

സന്നദ്ധഃ സർവഗാത്രേഷു പ്രവിഷ്ടോ വിഷ്ണുപംജരഃ ।
വിഷ്ണുപംജരവിഷ്ടോഽഹം വിചരാമി മഹീതലേ ॥ 12 ॥

രാജദ്വാരേഽപഥേ ഘോരേ സംഗ്രാമേ ശത്രുസംകടേ ।
നദീഷു ച രണേ ചൈവ ചോരവ്യാഘ്രഭയേഷു ച ॥ 13 ॥

ഡാകിനീപ്രേതഭൂതേഷു ഭയം തസ്യ ന ജായതേ ।
രക്ഷ രക്ഷ മഹാദേവ രക്ഷ രക്ഷ ജനേശ്വര ॥ 14 ॥

രക്ഷംതു ദേവതാഃ സർവാ ബ്രഹ്മവിഷ്ണുമഹേശ്വരാഃ ।
ജലേ രക്ഷതു വാരാഹഃ സ്ഥലേ രക്ഷതു വാമനഃ ॥ 15 ॥

അടവ്യാം നാരസിംഹശ്ച സർവതഃ പാതു കേശവഃ ॥
ദിവാ രക്ഷതു മാം സൂര്യോ രാത്രൌ രക്ഷതു ചംദ്രമാഃ ॥ 16 ॥

പംഥാനം ദുര്ഗമം രക്ഷേത്സർവമേവ ജനാര്ദനഃ ।
രോഗവിഘ്നഹതശ്ചൈവ ബ്രഹ്മഹാ ഗുരുതല്പഗഃ ॥ 17 ॥

സ്ത്രീഹംതാ ബാലഘാതീ ച സുരാപോ വൃഷലീപതിഃ ।
മുച്യതേ സർവപാപേഭ്യോ യഃ പഠേന്നാത്ര സംശയഃ ॥ 18 ॥

അപുത്രോ ലഭതേ പുത്രം ധനാര്ഥീ ലഭതേ ധനമ് ।
വിദ്യാര്ഥീ ലഭതേ വിദ്യാം മോക്ഷാര്ഥീ ലഭതേ ഗതിമ് ॥ 19 ॥

ആപദോ ഹരതേ നിത്യം വിഷ്ണുസ്തോത്രാര്ഥസംപദാ ।
യസ്ത്വിദം പഠതേ സ്തോത്രം വിഷ്ണുപംജരമുത്തമമ് ॥ 20 ॥

മുച്യതേ സർവപാപേഭ്യോ വിഷ്ണുലോകം സ ഗച്ഛതി ।
ഗോസഹസ്രഫലം തസ്യ വാജപേയശതസ്യ ച ॥ 21 ॥

അശ്വമേധസഹസ്രസ്യ ഫലം പ്രാപ്നോതി മാനവഃ ।
സർവകാമം ലഭേദസ്യ പഠനാന്നാത്ര സംശയഃ ॥ 22 ॥

ജലേ വിഷ്ണുഃ സ്ഥലേ വിഷ്ണുർവിഷ്ണുഃ പർവതമസ്തകേ ।
ജ്വാലാമാലാകുലേ വിഷ്ണുഃ സർവം വിഷ്ണുമയം ജഗത് ॥ 23 ॥

ഇതി ശ്രീബ്രഹ്മാംഡപുരാണേ ഇംദ്രനാരദസംവാദേ ശ്രീവിഷ്ണുപംജരസ്തോത്രമ് ॥

sri vishnu panjara stotram in malayalam