ಶ್ರೀ ಬಗಳಾಮುಖೀ ಪಂಜರ ಸ್ತೋತ್ರಂ

ಸೂತ ಉವಾಚ |
ಸಹಸ್ರಾದಿತ್ಯಸಂಕಾಶಂ ಶಿವಂ ಸಾಂಬಂ ಸನಾತನಮ್ |
ಪ್ರಣಮ್ಯ ನಾರದಃ ಪ್ರಾಹ ವಿನಮ್ರೋ ನತಕಂಧರಃ || ೧ ||

ಶ್ರೀನಾರದ ಉವಾಚ |
ಭಗವನ್ ಸಾಂಬ ತತ್ತ್ವಜ್ಞ ಸರ್ವದುಃಖಾಪಹಾರಕ |
ಶ್ರೀಮತ್ಪೀತಾಂಬರಾದೇವ್ಯಾಃ ಪಂಜರಂ ಪುಣ್ಯದಂ ಸತಾಮ್ || ೨ ||

ಪ್ರಕಾಶಯ ವಿಭೋ ನಾಥ ಕೃಪಾಂ ಕೃತ್ವಾ ಮಮೋಪರಿ |
ಯದ್ಯಹಂ ತವ ಪಾದಾಬ್ಜಧೂಳಿಧೂಸರಿತೋಽಭವತ್ || ೩ ||

ವಿನಿಯೋಗಃ –
ಅಸ್ಯ ಶ್ರೀಮದ್ಬಗಳಾಮುಖೀ ಪೀತಾಂಬರಾ ಪಂಜರರೂಪಸ್ತೋತ್ರಮಂತ್ರಸ್ಯ ಭಗವಾನ್ ನಾರದ ಋಷಿಃ ಅನುಷ್ಟುಪ್ ಛಂದಃ ಜಗದ್ವಶ್ಯಕರೀ ಶ್ರೀಪೀತಾಂಬರಾಬಗಳಾಮುಖೀ ದೇವತಾ ಹ್ಲೀಂ ಬೀಜಂ ಸ್ವಾಹಾ ಶಕ್ತಿಃ ಕ್ಲೀಂ ಕೀಲಕಂ ಮಮ ಪರಸೈನ್ಯ ಮಂತ್ರ ತಂತ್ರ ಯಂತ್ರಾದಿ ಕೃತ್ಯಕ್ಷಯಾರ್ಥಂ ಶ್ರೀಮತ್ಪೀತಾಂಬರಾಬಗಳಾಮುಖೀ ದೇವತಾ ಪ್ರೀತ್ಯರ್ಥೇ ಜಪೇ ವಿನಿಯೋಗಃ ||

ಋಷ್ಯಾದಿ ನ್ಯಾಸಃ –
ಭಗವಾನ್ ನಾರದ ಋಷಯೇ ನಮಃ ಶಿರಸಿ |
ಅನುಷ್ಟುಪ್ ಛಂದಸೇ ನಮಃ ಮುಖೇ |
ಜಗದ್ವಶ್ಯಕರೀ ಶ್ರೀಪೀತಾಂಬರಾ ಬಗಳಾಮುಖೀ ದೇವತಾಯೈ ನಮಃ ಹೃದಯೇ |
ಹ್ಲೀಂ ಬೀಜಾಯ ನಮಃ ದಕ್ಷಿಣಸ್ತನೇ |
ಸ್ವಾಹಾ ಶಕ್ತಯೇ ನಮೋ ವಾಮಸ್ತನೇ |
ಕ್ಲೀಂ ಕೀಲಕಾಯ ನಮೋ ನಾಭೌ |
ಮಮ ಪರಸೈನ್ಯ ಮಂತ್ರ ತಂತ್ರ ಯಂತ್ರಾದಿ ಕೃತ್ಯಕ್ಷಯಾರ್ಥಂ ಶ್ರೀಮತ್ಪೀತಾಂಬರಾಬಗಳಾಮುಖೀ ದೇವತಾ ಪ್ರೀತ್ಯರ್ಥೇ ಜಪೇ ವಿನಿಯೋಗಃ ನಮಃ ಸರ್ವಾಂಗೇ |

ಕರನ್ಯಾಸಃ –
ಹ್ಲಾಂ ಅಂಗುಷ್ಠಾಭ್ಯಾಂ ನಮಃ |
ಹ್ಲೀಂ ತರ್ಜನೀಭ್ಯಾಂ ನಮಃ |
ಹ್ಲೂಂ ಮಧ್ಯಮಾಭ್ಯಾಂ ನಮಃ |
ಹ್ಲೈಂ ಅನಾಮಿಕಾಭ್ಯಾಂ ನಮಃ |
ಹ್ಲೌಂ ಕನಿಷ್ಠಿಕಾಭ್ಯಾಂ ನಮಃ |
ಹ್ಲಃ ಕರತಲಕರಪೃಷ್ಠಾಭ್ಯಾಂ ನಮಃ |

ಅಂಗನ್ಯಾಸಃ –
ಹ್ಲಾಂ ಹೃದಯಾಯ ನಮಃ |
ಹ್ಲೀಂ ಶಿರಸೇ ಸ್ವಾಹಾ |
ಹ್ಲೂಂ ಶಿಖಾಯೈ ವಷಟ್ |
ಹ್ಲೈಂ ಕವಚಾಯ ಹುಮ್ |
ಹ್ಲೌಂ ನೇತ್ರತ್ರಯಾಯ ವೌಷಟ್ |
ಹ್ಲಃ ಅಸ್ತ್ರಾಯ ಫಟ್ |

ಮೂಲಮಂತ್ರೇಣ ಕರನ್ಯಾಸಃ –
ಓಂ ಹ್ಲೀಂ ಅಂಗುಷ್ಠಾಭ್ಯಾಂ ನಮಃ |
ಓಂ ಬಗಳಾಮುಖಿ ತರ್ಜನೀಭ್ಯಾಂ ನಮಃ |
ಓಂ ಸರ್ವದುಷ್ಟಾನಾಂ ಮಧ್ಯಮಾಭ್ಯಾಂ ನಮಃ |
ಓಂ ವಾಚಂ ಮುಖಂ ಪದಂ ಸ್ತಂಭಯ ಅನಾಮಿಕಾಭ್ಯಾಂ ನಮಃ |
ಓಂ ಜಿಹ್ವಾಂ ಕೀಲಯ ಕನಿಷ್ಠಿಕಾಭ್ಯಾಂ ನಮಃ |
ಓಂ ಬುದ್ಧಿಂ ವಿನಾಶಯ ಹ್ಲೀಂ ಓಂ ಸ್ವಾಹಾ ಕರತಲಕರಪೃಷ್ಠಾಭ್ಯಾಂ ನಮಃ ||

ಮೂಲಮಂತ್ರೇಣ ಅಂಗನ್ಯಾಸಃ –
ಓಂ ಹ್ಲೀಂ ಹೃದಯಾಯ ನಮಃ |
ಓಂ ಬಗಳಾಮುಖಿ ಶಿರಸೇ ಸ್ವಾಹಾ |
ಓಂ ಸರ್ವದುಷ್ಟಾನಾಂ ಶಿಖಾಯೈ ವಷಟ್ |
ಓಂ ವಾಚಂ ಮುಖಂ ಪದಂ ಸ್ತಂಭಯ ಕವಚಾಯ ಹುಮ್ |
ಓಂ ಜಿಹ್ವಾಂ ಕೀಲಯ ನೇತ್ರತ್ರಯಾಯ ವೌಷಟ್ |
ಓಂ ಬುದ್ಧಿಂ ವಿನಾಶಯ ಹ್ಲೀಂ ಓಂ ಸ್ವಾಹಾ ಅಸ್ತ್ರಾಯ ಫಟ್ ||

ಧ್ಯಾನಮ್ –
ಮಧ್ಯೇ ಸುಧಾಬ್ಧಿಮಣಿಮಂಡಪರತ್ನವೇದ್ಯಾಂ
ಸಿಂಹಾಸನೋಪರಿಗತಾಂ ಪರಿಪೀತವರ್ಣಾಮ್ |
ಪೀತಾಂಬರಾಭರಣಮಾಲ್ಯವಿಭೂಷಿತಾಂಗೀಂ
ದೇವೀಂ ಸ್ಮರಾಮಿ ಧೃತಮುದ್ಗರವೈರಿಜಿಹ್ವಾಮ್ ||

ಮಾನಸೋಪಚಾರಪೂಜಾ –
ಶ್ರೀಪೀತಾಂಬರಾಯೈ ನಮಃ ಲಂ ಪೃಥಿವ್ಯಾತ್ಮಕಂ ಗಂಧಂ ಪರಿಕಲ್ಪಯಾಮಿ |
ಶ್ರೀಪೀತಾಂಬರಾಯೈ ನಮಃ ಹಂ ಆಕಾಶಾತ್ಮಕಂ ಪುಷ್ಪಂ ಪರಿಕಲ್ಪಯಾಮಿ |
ಶ್ರೀಪೀತಾಂಬರಾಯೈ ನಮಃ ಯಂ ವಾಯ್ವಾತ್ಮಕಂ ಧೂಪಂ ಪರಿಕಲ್ಪಯಾಮಿ |
ಶ್ರೀಪೀತಾಂಬರಾಯೈ ನಮಃ ರಂ ವಹ್ನ್ಯಾತ್ಮಕಂ ದೀಪಂ ಪರಿಕಲ್ಪಯಾಮಿ |
ಶ್ರೀಪೀತಾಂಬರಾಯೈ ನಮಃ ವಂ ಅಮೃತಾತ್ಮಕಂ ನೈವೇದ್ಯಂ ಪರಿಕಲ್ಪಯಾಮಿ ||

ಇತಿ ಸಂಪೂಜ್ಯ ಯೋನಿಮುದ್ರಾಂ ಏವಂ ಮುದ್ಗರಮುದ್ರಾಂ ಪ್ರದರ್ಶ್ಯ ಪಂಜರಂ ನ್ಯಸೇತ್ ||

ಪಂಜರ ಸ್ತೋತ್ರಮ್-

ಶ್ರೀಶಿವ ಉವಾಚ |
ಪಂಜರಂ ತತ್ ಪ್ರವಕ್ಷ್ಯಾಮಿ ದೇವ್ಯಾಃ ಪಾಪಪ್ರಣಾಶನಮ್ |
ಯಂ ಪ್ರವಿಶ್ಯ ಚ ಬಾಧಂತೇ ಬಾಣೈರಪಿ ನರಾಃ ಕ್ವಚಿತ್ || ೧ ||

ಓಂ ಐಂ ಹ್ಲೀಂ ಶ್ರೀಂ ಶ್ರೀಮತ್ ಪೀತಾಂಬರಾದೇವೀ ಬಗಳಾ ಬುದ್ಧಿವರ್ಧಿನೀ |
ಪಾತು ಮಾಮನಿಶಂ ಸಾಕ್ಷಾತ್ ಸಹಸ್ರಾರ್ಕಸಮದ್ಯುತಿಃ || ೨ ||

ಓಂ ಐಂ ಹ್ಲೀಂ ಶ್ರೀಂ ಶಿಖಾದಿಪಾದಪರ್ಯಂತಂ ವಜ್ರಪಂಜರಧಾರಿಣೀ |
ಬ್ರಹ್ಮಾಸ್ತ್ರಸಂಜ್ಞಾ ಯಾ ದೇವೀ ಪೀತಾಂಬರವಿಭೂಷಿತಾ || ೩ ||

ಓಂ ಐಂ ಹ್ಲೀಂ ಶ್ರೀಂ ಬಗಳಾ ಮಾಮವತ್ಯತ್ರ ಮೂರ್ಧಭಾಗಂ ಮಹೇಶ್ವರೀ |
ಕಾಮಾಂಕುಶಕಳಾ ಪಾತು ಬಗಳಾ ಶಾಸ್ತ್ರಬೋಧಿನೀ || ೪ ||

ಓಂ ಐಂ ಹ್ಲೀಂ ಶ್ರೀಂ ಪೀತಾಂಬರಾ ಸಹಸ್ರಾಕ್ಷಾ ಲಲಾಟಂ ಕಾಮಿತಾರ್ಥದಾ |
ಪಾತು ಮಾಂ ಬಗಳಾ ನಿತ್ಯಂ ಪೀತಾಂಬರಸುಧಾರಿಣೀ || ೫ ||

ಓಂ ಐಂ ಹ್ಲೀಂ ಶ್ರೀಂ ಕರ್ಣಯೋಶ್ಚೈವ ಯುಗಪದ್ ಅತಿರತ್ನಪ್ರಪೂಜಿತಾ |
ಪಾತು ಮಾಂ ಬಗಳಾದೇವೀ ನಾಸಿಕಾಂ ಮೇ ಗುಣಾಕರಾ || ೬ ||

ಓಂ ಐಂ ಹ್ಲೀಂ ಶ್ರೀಂ ಪೀತಪುಷ್ಪೈಃ ಪೀತವಸ್ತ್ರೈಃ ಪೂಜಿತಾ ವೇದದಾಯಿನೀ |
ಪಾತು ಮಾಂ ಬಗಳಾ ನಿತ್ಯಂ ಬ್ರಹ್ಮವಿಷ್ಣ್ವಾದಿಸೇವಿತಾ || ೭ ||

ಓಂ ಐಂ ಹ್ಲೀಂ ಶ್ರೀಂ ಪೀತಾಂಬರಾ ಪ್ರಸನ್ನಾಸ್ಯಾ ನೇತ್ರಯೋರ್ಯುಗಪದ್ ಭ್ರುವೌ |
ಪಾತು ಮಾಂ ಬಗಳಾ ನಿತ್ಯಂ ಬಲದಾ ಪೀತವಸ್ತ್ರಧೃಕ್ || ೮ ||

ಓಂ ಐಂ ಹ್ಲೀಂ ಶ್ರೀಂ ಅಧರೋಷ್ಠೌ ತಥಾ ದಂತಾನ್ ಜಿಹ್ವಾಂ ಚ ಮುಖಗಾಂ ಮಮ |
ಪಾತು ಮಾಂ ಬಗಳಾದೇವೀ ಪೀತಾಂಬರಸುಧಾರಿಣೀ || ೯ ||

ಓಂ ಐಂ ಹ್ಲೀಂ ಶ್ರೀಂ ಗಲೇ ಹಸ್ತೇ ತಥಾ ಬಾಹ್ವೋಃ ಯುಗಪದ್ ಬುದ್ಧಿದಾ ಸತಾಮ್ |
ಪಾತು ಮಾಂ ಬಗಳಾದೇವೀ ದಿವ್ಯಸ್ರಗನುಲೇಪನಾ || ೧೦ ||

ಓಂ ಐಂ ಹ್ಲೀಂ ಶ್ರೀಂ ಹೃದಯೇ ಚ ಸ್ತನೌ ನಾಭೌ ಕರಾವಪಿ ಕೃಶೋದರೀ |
ಪಾತು ಮಾಂ ಬಗಳಾ ನಿತ್ಯಂ ಪೀತವಸ್ತ್ರಘನಾವೃತಾ || ೧೧ ||

ಜಂಘಾಯಾಂ ಚ ತಥಾ ಚೋರ್ವೋರ್ಗುಲ್ಫಯೋಶ್ಚಾತಿವೇಗಿನೀ |
ಅನುಕ್ತಮಪಿ ಯತ್ ಸ್ಥಾನಂ ತ್ವಕ್ ಕೇಶ ನಖ ಲೋಮಕಮ್ || ೧೨ ||

ಅಸೃಙ್ ಮಾಂಸಂ ತಥಾಽಸ್ಥೀನಿ ಸಂಧಯಶ್ಚಾಪಿ ಮೇ ಪರಾ |
ತಾಃ ಸರ್ವಾ ಬಗಳಾದೇವೀ ರಕ್ಷೇನ್ಮೇ ಚ ಮನೋಹರಾ || ೧೩ ||

ಫಲಶ್ರುತಿಃ –
ಇತ್ಯೇತದ್ವರದಂ ಗೋಪ್ಯಂ ಕಲಾವಪಿ ವಿಶೇಷತಃ |
ಪಂಜರಂ ಬಗಲಾದೇವ್ಯಾಃ ಘೋರದಾರಿದ್ರ್ಯನಾಶನಮ್ |
ಪಂಜರಂ ಯಃ ಪಠೇದ್ಭಕ್ತ್ಯಾ ಸ ವಿಘ್ನೈರ್ನಾಭಿಭೂತಯೇ || ೧೪ ||

ಅವ್ಯಾಹತಗತಿಶ್ಚಾಸ್ಯ ಬ್ರಹ್ಮವಿಷ್ಣ್ವಾದಿಸತ್ಪುರೇ |
ಸ್ವರ್ಗೇ ಮರ್ತ್ಯೇ ಚ ಪಾತಾಲೇ ನಾಽರಯಸ್ತಂ ಕದಾಚನ || ೧೫ ||

ನ ಬಾಧಂತೇ ನರವ್ಯಾಘ್ರಂ ಪಂಜರಸ್ಥಂ ಕದಾಚನ |
ಅತೋ ಭಕ್ತೈಃ ಕೌಲಿಕೈಶ್ಚ ಸ್ವರಕ್ಷಾರ್ಥಂ ಸದೈವ ಹಿ || ೧೬ ||

ಪಠನೀಯಂ ಪ್ರಯತ್ನೇನ ಸರ್ವಾಽನರ್ಥವಿನಾಶನಮ್ |
ಮಹಾದಾರಿದ್ರ್ಯಶಮನಂ ಸರ್ವಮಾಂಗಳ್ಯವರ್ಧನಮ್ || ೧೭ ||

ವಿದ್ಯಾವಿನಯಸತ್ಸೌಖ್ಯಂ ಮಹಾಸಿದ್ಧಿಕರಂ ಪರಮ್ |
ಇದಂ ಬ್ರಹ್ಮಾಸ್ತ್ರವಿದ್ಯಾಯಾಃ ಪಂಜರಂ ಸಾಧು ಗೋಪಿತಮ್ || ೧೮ ||

ಪಠೇತ್ ಸ್ಮರೇದ್ಧ್ಯಾನಸಂಸ್ಥಃ ಸ ಜಯೇನ್ಮರಣಂ ನರಃ |
ಯಃ ಪಂಜರಂ ಪ್ರವಿಶ್ಯೈವ ಮಂತ್ರಂ ಜಪತಿ ವೈ ಭುವಿ || ೧೯ ||

ಕೌಲಿಕೋಽಕೌಲಿಕೋ ವಾಽಪಿ ವ್ಯಾಸವದ್ವಿಚರೇದ್ಭುವಿ |
ಚಂದ್ರಸೂರ್ಯಸಮೋ ಭೂತ್ವಾ ವಸೇತ್ಕಲ್ಪಾಯುತಂ ದಿವಿ || ೨೦ ||

ಶ್ರೀಸೂತ ಉವಾಚ |
ಇತಿ ಕಥಿತಮಶೇಷಂ ಶ್ರೇಯಸಾಮಾದಿಬೀಜಂ
ಭವಶತದುರಿತಘ್ನಂ ಧ್ವಸ್ತಮೋಹಾಂಧಕಾರಮ್ |
ಸ್ಮರಣಮತಿಶಯೇನ ಪ್ರಾಪ್ತಿರೇವಾತ್ರ ಮರ್ತ್ಯಃ
ಯದಿ ವಿಶತಿ ಸದಾ ವೈ ಪಂಜರಂ ಪಂಡಿತಃ ಸ್ಯಾತ್ || ೨೧ ||

ಇತಿ ಶ್ರೀ ಪೀತಾಂಬರಾ ಪಂಜರ ಸ್ತೋತ್ರಮ್ ||