೪ (ತ್ರೈಲೋಕ್ಯವಿಜಯಂ)

ಶ್ರೀಭೈರವ ಉವಾಚ |
ಶೃಣು ದೇವಿ ಪ್ರವಕ್ಷ್ಯಾಮಿ ಸ್ವರಹಸ್ಯಂ ಚ ಕಾಮದಮ್ |
ಶ್ರುತ್ವಾ ಗೋಪ್ಯಂ ಗುಪ್ತತಮಂ ಕುರು ಗುಪ್ತಂ ಸುರೇಶ್ವರಿ || ೧ ||

ಕವಚಂ ಬಗಳಾಮುಖ್ಯಾಃ ಸಕಲೇಷ್ಟಪ್ರದಂ ಕಲೌ |
ತತ್ಸರ್ವಸ್ವಂ ಪರಂ ಗುಹ್ಯಂ ಗುಪ್ತಂ ಚ ಶರಜನ್ಮನಾ || ೨ ||

ತ್ರೈಲೋಕ್ಯವಿಜಯಂ ನಾಮ ಕವಚೇಶಂ ಮನೋರಮಮ್ |
ಮಂತ್ರಗರ್ಭಂ ಬ್ರಹ್ಮಮಯಂ ಸರ್ವವಿದ್ಯಾವಿನಾಯಕಮ್ || ೩ ||

ರಹಸ್ಯಂ ಪರಮಂ ಜ್ಞೇಯಂ ಸಾಕ್ಷಾದಮೃತರೂಪಕಮ್ |
ಬ್ರಹ್ಮವಿದ್ಯಾಮಯಂ ವರ್ಮ ದುರ್ಲಭಂ ಪ್ರಾಣಿನಾಂ ಕಲೌ || ೪ ||

ಪೂರ್ಣಮೇಕೋನಪಂಚಾಶದ್ವರ್ಣೈರುಕ್ತಂ ಮಹೇಶ್ವರಿ |
ತ್ವದ್ಭಕ್ತ್ಯಾ ವಚ್ಮಿ ದೇವೇಶಿ ಗೋಪನೀಯಂ ಸ್ವಯೋನಿವತ್ || ೫ ||

ಶ್ರೀದೇವ್ಯುವಾಚ |
ಭಗವನ್ ಕರುಣಾಸಾರ ವಿಶ್ವನಾಥ ಸುರೇಶ್ವರ |
ಕರ್ಮಣಾ ಮನಸಾ ವಾಚಾ ನ ವದಾಮಿ ಕದಾಚನ || ೧ ||

ಶ್ರೀಭೈರವ ಉವಾಚ |
ತ್ರೈಲೋಕ್ಯವಿಜಯಾಖ್ಯಸ್ಯ ಕವಚಾಸ್ಯಾಸ್ಯ ಪಾರ್ವತಿ |
ಮನುಗರ್ಭಸ್ಯ ಗುಪ್ತಸ್ಯ ಋಷಿರ್ದೇವೋಽಸ್ಯ ಭೈರವಃ || ೧ ||

ಉಷ್ಣಿಕ್ಛಂದಃ ಸಮಾಖ್ಯಾತಂ ದೇವೀ ಶ್ರೀಬಗಳಾಮುಖೀ |
ಬೀಜಂ ಹ್ಲೀಂ ಓಂ ಶಕ್ತಿಃ ಸ್ಯಾತ್ ಸ್ವಾಹಾ ಕೀಲಕಮುಚ್ಯತೇ || ೨ ||

ವಿನಿಯೋಗಃ ಸಮಾಖ್ಯಾತಃ ತ್ರಿವರ್ಗಫಲಪ್ರಾಪ್ತಯೇ |
ದೇವಿ ತ್ವಂ ಪಠ ವರ್ಮೈತನ್ಮಂತ್ರಗರ್ಭಂ ಸುರೇಶ್ವರಿ || ೩ ||

ವಿನಾ ಧ್ಯಾನಂ ಕುತಃ ಸಿದ್ಧಿಃ ಸತ್ಯಮೇತಚ್ಚ ಪಾರ್ವತಿ |
ಚಂದ್ರೋದ್ಭಾಸಿತಮೂರ್ಧಜಾಂ ರಿಪುರಸಾಂ ಮುಂಡಾಕ್ಷಮಾಲಾಕರಾಮ್ || ೪ ||

ಬಾಲಾಂಸತ್ಸ್ರಕಚಂಚಲಾಂ ಮಧುಮದಾಂ ರಕ್ತಾಂ ಜಟಾಜೂಟಿನೀಮ್ |
ಶತ್ರುಸ್ತಂಭನಕಾರಿಣೀಂ ಶಶಿಮುಖೀಂ ಪೀತಾಂಬರೋದ್ಭಾಸಿನೀಮ್ || ೫ ||

ಪ್ರೇತಸ್ಥಾಂ ಬಗಳಾಮುಖೀಂ ಭಗವತೀಂ ಕಾರುಣ್ಯರೂಪಾಂ ಭಜೇ |
ಓಂ ಹ್ಲೀಂ ಮಮ ಶಿರಃ ಪಾತು ದೇವೀ ಶ್ರೀಬಗಳಾಮುಖೀ || ೬ ||

ಓಂ ಐಂ ಕ್ಲೀಂ ಪಾತು ಮೇ ಫಾಲಂ ದೇವೀ ಸ್ತಂಭನಕಾರಿಣೀ |
ಓಂ ಅಂ ಇಂ ಹಂ ಭ್ರುವೋರ್ದೇಶಂ ಪಾತು ಮೇ ಕ್ಲೇಶಹಾರಿಣೀ || ೭ ||

ಓಂ ಹಂ ಪಾತು ಮೇ ನೇತ್ರೇ ನಾರಸಿಂಹೀ ಶುಭಂಕರೀ |
ಓಂ ಹ್ಲೀಂ ಶ್ರೀಂ ಪಾತು ಮೇ ಗಂಡೌ ಅಂ ಆಂ ಇಂ ಭುವನೇಶ್ವರೀ || ೮ ||

ಓಂ ಐಂ ಕ್ಲೀಂ ಸೌಃ ಶ್ರುತೌ ಪಾತು ಈಂ ಉಂ ಊಂ ಚ ಪರೇಶ್ವರೀ |
ಓಂ ಹ್ಲೀಂ ಹ್ಲೂಂ ಹ್ಲೀಂ ಸದಾವ್ಯಾನ್ಮೇ ನಾಸಾಂ ಋಂ ೠಂ ಸರಸ್ವತೀ || ೯ ||

ಓಂ ಹ್ರಾಂ ಹ್ರೀಂ ಮೇ ಮುಖಂ ಪಾತು ಲುಂ ಏಂ ಐಂ ಛಿನ್ನಮಸ್ತಿಕಾ |
ಓಂ ಶ್ರೀಂ ವಂ ಮೇಽಧರೌ ಪಾತು ಓಂ ಔಂ ದಕ್ಷಿಣಕಾಳಿಕಾ || ೧೦ ||

ಓಂ ಕ್ಲೀಂ ಶ್ರೀಂ ಶಿರಸಃ ಪಾತು ಅಂ ಅಃ ಕಂ ಖಂ ಚ ಸಾರಿಕಾ |
ಓಂ ಹ್ರೀಂ ಹ್ರೂಂ ಭೈರವೀ ಪಾತು ಗಂ ಘಂ ಙಂ ತ್ರಿಪುರೇಶ್ವರೀ || ೧೧ ||

ಓಂ ಐಂ ಸೌಃ ಮೇ ಹನುಂ ಪಾತು ಚಂ ಛಂ ಜಂ ಚ ಮನೋನ್ಮನೀ |
ಓಂ ಶ್ರೀಂ ಶ್ರೀಂ ಮೇ ಗಳಂ ಪಾತು ಝಂ ಞಂ ಟಂ ಠಂ ಗಣೇಶ್ವರೀ || ೧೨ ||

ಓಂ ಸ್ಕಂಧೌ ಮೇಽವ್ಯಾದ್ ಡಂ ಢಂ ಣಂ ಹೂಂ ಹೂಂ ಚೈವ ತು ತೋತಲಾ |
ಓಂ ಹ್ರೀಂ ಶ್ರೀಂ ಮೇ ಭುಜೌ ಪಾತು ತಂ ಥಂ ದಂ ವರವರ್ಣಿನೀ || ೧೩ ||

ಓಂ ಐಂ ಕ್ಲೀಂ ಸೌಃ ಸ್ತನೌ ಪಾತು ಧಂ ನಂ ಪಂ ಪರಮೇಶ್ವರೀ |
ಕ್ರೋಂ ಕ್ರೋಂ ಮೇ ರಕ್ಷಯೇದ್ ವಕ್ಷಃ ಫಂ ಬಂ ಭಂ ಭಗವಾಸಿನೀ || ೧೪ ||

ಓಂ ಹ್ರೀಂ ರಾಂ ಪಾತು ಕಕ್ಷಿ ಮೇ ಮಂ ಯಂ ರಂ ವಹ್ನಿವಲ್ಲಭಾ |
ಓಂ ಶ್ರೀಂ ಹ್ರೂಂ ಪಾತು ಮೇ ಪಾರ್ಶ್ವೌ ಲಂ ಬಂ ಲಂಬೋದರ ಪ್ರಸೂಃ || ೧೫ ||

ಓಂ ಶ್ರೀಂ ಹ್ರೀಂ ಪಾತು ಮೇ ನಾಭಿಂ ಶಂ ಷಂ ಷಣ್ಮುಖಪಾಲಿನೀ |
ಓಂ ಐಂ ಸೌಃ ಪಾತು ಮೇ ಪೃಷ್ಠಂ ಸಂ ಹಂ ಹಾಟಕರೂಪಿಣೀ || ೧೬ ||

ಓಂ ಕ್ಲೀಂ ಐಂ ಕಟಿ ಪಾತು ಪಂಚಾಶದ್ವರ್ಣಮಾಲಿಕಾ |
ಓಂ ಐಂ ಕ್ಲೀಂ ಪಾತು ಮೇ ಗುಹ್ಯಂ ಅಂ ಆಂ ಕಂ ಗುಹ್ಯಕೇಶ್ವರೀ || ೧೭ ||

ಓಂ ಶ್ರೀಂ ಊಂ ಋಂ ಸದಾವ್ಯಾನ್ಮೇ ಇಂ ಈಂ ಖಂ ಖಾಂ ಸ್ವರೂಪಿಣೀ |
ಓಂ ಜೂಂ ಸಃ ಪಾತು ಮೇ ಜಂಘೇ ರುಂ ರೂಂ ಧಂ ಅಘಹಾರಿಣೀ || ೧೮ ||

ಓಂ ಶ್ರೀಂ ಹ್ರೀಂ ಪಾತು ಮೇ ಜಾನೂ ಉಂ ಊಂ ಣಂ ಗಣವಲ್ಲಭಾ |
ಓಂ ಶ್ರೀಂ ಸಃ ಪಾತು ಮೇ ಗುಲ್ಫೌ ಲಿಂ ಲೀಂ ಊಂ ಚಂ ಚ ಚಂಡಿಕಾ || ೧೯ ||

ಓಂ ಐಂ ಹ್ರೀಂ ಪಾತು ಮೇ ವಾಣೀ ಏಂ ಐಂ ಛಂ ಜಂ ಜಗತ್ಪ್ರಿಯಾ |
ಓಂ ಶ್ರೀಂ ಕ್ಲೀಂ ಪಾತು ಪಾದೌ ಮೇ ಝಂ ಞಂ ಟಂ ಠಂ ಭಗೋದರೀ || ೨೦ ||

ಓಂ ಹ್ರೀಂ ಸರ್ವಂ ವಪುಃ ಪಾತು ಅಂ ಅಃ ತ್ರಿಪುರಮಾಲಿನೀ |
ಓಂ ಹ್ರೀಂ ಪೂರ್ವೇ ಸದಾಽವ್ಯಾನ್ಮೇ ಝಂ ಝಾಂ ಡಂ ಢಂ ಶಿಖಾಮುಖೀ || ೨೧ ||

ಓಂ ಸೌಃ ಯಾಮ್ಯಂ ಸದಾವ್ಯಾನ್ಮೇ ಇಂ ಈಂ ಣಂ ತಂ ಚ ತಾರಿಣೀ |
ಓಂ ವಾರುಣ್ಯಾಂ ಚ ವಾರಾಹೀ ಉಂ ಥಂ ದಂ ಧಂ ಚ ಕಂಪಿಲಾ || ೨೨ ||

ಓಂ ಶ್ರೀಂ ಮಾಂ ಪಾತು ಚೈಶಾನ್ಯಾಂ ಪಾತು ಓಂ ನಂ ಜನೇಶ್ವರೀ |
ಓಂ ಶ್ರೀಂ ಮಾಂ ಪಾತು ಚಾಗ್ನೇಯಾಂ ಋಂ ಭಂ ಮಂ ಧಂ ಚ ಯೋಗಿನೀ || ೨೩ ||

ಓಂ ಐಂ ಮಾಂ ಪಾತು ನೈರೃತ್ಯಾಂ ಲುಂ ಲಂ ರಾಜೇಶ್ವರೀ ತಥಾ |
ಓಂ ಶ್ರೀಂ ಮಾಂ ಪಾತು ವಾಯವ್ಯಾಂ ಲೂಂ ಲಂ ಚ ವೀತಕೇಶಿನೀ || ೨೪ ||

ಓಂ ಪ್ರಭಾತೇ ಚ ಮಾಂ ಪಾತು ಲೀಂ ಲಂ ವಾಗೀಶ್ವರೀ ಸದಾ |
ಓಂ ಮಧ್ಯಾಹ್ನೇ ಚ ಮಾಂ ಪಾತು ಐಂ ಕ್ಷಂ ಶಂಕರವಲ್ಲಭಾ || ೨೫ ||

ಓಂ ಶ್ರೀಂ ಹ್ರೀಂ ಕ್ಲೀಂ ಪಾತು ಸಾಯಂ ಐಂ ಆಂ ಶಾಕಂಬರೀ ಸದಾ |
ಓಂ ಹ್ರೀಂ ನಿಶಾದೌ ಮಾಂ ಪಾತು ಓಂ ಸಂ ಸಾಗರವಾಸಿನೀ || ೨೬ ||

ಕ್ಲೀಂ ನಿಶೀಥೇ ಚ ಮಾಂ ಪಾತು ಓಂ ಹಂ ಹರಿಹರೇಶ್ವರೀ |
ಓಂ ಕ್ಲೀಂ ಬ್ರಾಹ್ಮೇ ಮುಹೂರ್ತೇಽವ್ಯಾದ್ ಲಂ ಲಾಂ ತ್ರಿಪುರಸುಂದರೀ || ೨೭ ||

ವಿಸರ್ಗಾ ತು ಯತ್ ಸ್ಥಾನಂ ವರ್ಜಿತಂ ಕವಚೇನ ತು |
ಕ್ಲೀಂ ತನ್ಮೇ ಸಕಲಂ ಪಾತು ಅಂ ಕ್ಷಂ ಹ್ರೀಂ ಬಗಳಾಮುಖೀ || ೨೮ ||

ಫಲಶ್ರುತಿಃ –
ಇತೀದಂ ಕವಚಂ ದಿವ್ಯಂ ಮಂತ್ರಾಕ್ಷರಮಯಂ ಪರಮ್ |
ತ್ರೈಲೋಕ್ಯವಿಜಯಂ ನಾಮ ಸರ್ವವರ್ಣಮಯಂ ಸ್ಮೃತಮ್ || ೨೯ ||

ಅಪ್ರಕಾಶ್ಯಂ ಸದಾ ದೇವಿ ಶ್ರೋತವ್ಯಂ ವಾ ಚ ವಾಚಿಕಮ್ |
ದುರ್ಜನಾಯಾಕುಲೀನಾಯ ದೀಕ್ಷಾಹೀನಾಯ ಪಾರ್ವತಿ || ೩೦ ||

ನ ದಾತವ್ಯಂ ನ ದಾತವ್ಯಮಿತ್ಯಾಜ್ಞಾ ಪರಮೇಶ್ವರೀ |
ದೀಕ್ಷಾಕಾರ್ಯವಿಹೀನಾಯ ಶಕ್ತಿಭಕ್ತಿವಿರೋಧಿನೇ || ೩೧ ||

ಕವಚಸ್ಯಾಸ್ಯ ಪಠನಾತ್ ಸಾಧಕೋ ದೀಕ್ಷಿತೋ ಭವೇತ್ |
ಕವಚೇಶಮಿದಂ ಗೋಪ್ಯಂ ಸಿದ್ಧವಿದ್ಯಾಮಯಂ ಪರಮ್ || ೩೨ ||

ಬ್ರಹ್ಮವಿದ್ಯಾಮಯಂ ಗೋಪ್ಯಂ ಯಥೇಷ್ಟಫಲದಂ ಶಿವೇ |
ನ ಕಸ್ಯ ಕಥಿತಂ ಚೈತದ್ ತ್ರೈಲೋಕ್ಯವಿಜಯೇಶ್ವರಮ್ || ೩೩ ||

ಅಸ್ಯ ಸ್ಮರಣಮಾತ್ರೇಣ ದೇವೀ ಸದ್ಯೋ ವಶೀ ಭವೇತ್ |
ಪಠನಾದ್ಧಾರಣಾದಸ್ಯ ಕವಚೇಶಸ್ಯ ಸಾಧಕಃ || ೩೪ ||

ಕಲೌ ವಿಚರತೇ ವೀರೋ ಯಥಾ ಶ್ರೀಬಗಳಾಮುಖೀ |
ಇದಂ ವರ್ಮ ಸ್ಮರೇನ್ಮಂತ್ರೀ ಸಂಗ್ರಾಮೇ ಪ್ರವಿಶೇದ್ಯದಾ || ೩೫ ||

ಯುಯುತ್ಸುಃ ಪಠನ್ ಕವಚಂ ಸಾಧಕೋ ವಿಜಯೀ ಭವೇತ್ |
ಶತ್ರುಂ ಕಾಲಸಮಾನಂ ತು ಜಿತ್ವಾ ಸ್ವಗೃಹಮೇತಿ ಸಃ || ೩೬ ||

ಮೂರ್ಧ್ನಿ ಧೃತ್ವಾ ಯಃ ಕವಚಂ ಮಂತ್ರಗರ್ಭಂ ಸುಸಾಧಕಃ |
ಬ್ರಹ್ಮಾದ್ಯಮರಾನ್ ಸರ್ವಾನ್ ಸಹಸಾ ವಶಮಾನಯೇತ್ || ೩೭ ||

ಧೃತ್ವಾ ಗಳೇ ತು ಕವಚಂ ಸಾಧಕಸ್ಯ ಮಹೇಶ್ವರಿ |
ವಶಮಾಯಾಂತಿ ಸಹಸಾ ರಂಭಾದ್ಯಪ್ಸರಸಾಂ ಗಣಾಃ || ೩೮ ||

ಉತ್ಪಾತೇಷು ಚ ಘೋರೇಷು ಭಯೇಷು ವಿವಿಧೇಷು ಚ |
ರೋಗೇಷು ಚ ಕವಚೇಶಂ ಮಂತ್ರಗರ್ಭಂ ಪಠೇನ್ನರಃ || ೩೯ ||

ಕರ್ಮಣಾ ಮನಸಾ ವಾಚಾ ತದ್ಭಯಂ ಶಾಂತಿಮೇಷ್ಯತಿ |
ಶ್ರೀದೇವ್ಯಾ ಬಗಳಾಮುಖ್ಯಾಃ ಕವಚೇಶಂ ಮಯೋದಿತಮ್ || ೪೦ ||

ತ್ರೈಲೋಕ್ಯವಿಜಯಂ ನಾಮ ಪುತ್ರಪೌತ್ರಧನಪ್ರದಮ್ |
ಋಣಂ ಚ ಹರತೇ ಸಮ್ಯಕ್ ಲಕ್ಷ್ಮೀರ್ಭೋಗವಿವರ್ಧಿನೀ || ೪೧ ||

ವಂಧ್ಯಾ ಜನಯತೇ ಕುಕ್ಷೌ ಪುತ್ರರತ್ನಂ ನ ಚಾನ್ಯಥಾ |
ಮೃತವತ್ಸಾ ಚ ವಿಭೂಯಾತ್ ಕವಚಂ ಚ ಗಳೇ ಸದಾ || ೪೨ ||

ದೀರ್ಘಾಯುರ್ವ್ಯಾಧಿಹೀನಶ್ಚ ತತ್ಪುತ್ರೋ ವರ್ಧತೇಽನಿಶಮ್ |
ಇತೀದಂ ಬಗಳಾಮುಖ್ಯಾಃ ಕವಚೇಶಂ ಸುದುರ್ಲಭಮ್ || ೪೩ ||

ತ್ರೈಲೋಕ್ಯವಿಜಯಂ ನಾಮ ನ ದೇಯಂ ಯಸ್ಯಕಸ್ಯಚಿತ್ |
ಅಕುಲೀನಾಯ ಮೂಢಾಯ ಭಕ್ತಿಹೀನಾಯ ದಂಭಿನೇ || ೪೪ ||

ಲೋಭಯುಕ್ತಾಯ ದೇವೇಶಿ ನ ದಾತವ್ಯಂ ಕದಾಚನ |
ಲೋಭದಂಭವಿಹೀನಾಯ ಕವಚೇಶಂ ಪ್ರದೀಯತಾಮ್ || ೪೫ ||

ಅಭಕ್ತೇಭ್ಯೋ ಅಪುತ್ರೇಭ್ಯೋ ದತ್ತ್ವಾ ಕುಷ್ಠೀ ಭವೇನ್ನರಃ |
ರವೌ ರಾತ್ರೌ ಚ ಸುಸ್ನಾತಃ ಪೂಜಾಗೃಹಗತಃ ಸುಧೀಃ || ೪೬ ||

ದೀಪಮುಜ್ಜ್ವಾಲ್ಯ ಮೂಲೇನ ಪಠೇದ್ಧರ್ಮೇದಮುತ್ತಮಮ್ |
ಪ್ರಾಪ್ತೌ ಸತ್ಯಾಂ ತ್ರಿರಾತ್ರೌ ಹಿ ರಾಜಾ ತದ್ಗೃಹಮೇಷ್ಯತಿ |
ಮಂಡಲೇಶೋ ಮಹೇಶಾನಿ ದೇವಿ ಸತ್ಯಂ ನ ಸಂಶಯಃ || ೪೭ ||

ಇದಂ ತು ಕವಚೇಶಂ ತು ಮಯಾ ಪ್ರೋಕ್ತಂ ನಗಾತ್ಮಜೇ |
ಗೋಪ್ಯಂ ಗುಹ್ಯತರಂ ದೇವಿ ಗೋಪನೀಯಂ ಸ್ವಯೋನಿವತ್ || ೪೮ ||

ಇತಿ ಶ್ರೀವಿಶ್ವಯಾಮಲೇ ತ್ರೈಲೋಕ್ಯವಿಜಯಂ ನಾಮ ಶ್ರೀ ಬಗಳಾಮುಖೀ ಕವಚಮ್ ||