શ્રી દેવ્યથર્વશીર્ષમ્

sri devi atharva sheersham in gujarati

ઓં સર્વે વૈ દેવા દેવીમુપતસ્થુઃ કાસિ ત્વં મહાદેવીતિ ॥ 1 ॥

સાઽબ્રવીદહં બ્રહ્મસ્વરૂપિણી ।
મત્તઃ પ્રકૃતિપુરુષાત્મકં જગત્ ।
શૂન્યં ચાશૂન્યં ચ ॥ 2 ॥

અહમાનંદાનાનંદૌ ।
અહં-વિઁજ્ઞાનાવિજ્ઞાને ।
અહં બ્રહ્માબ્રહ્મણિ વેદિતવ્યે ।
અહં પંચભૂતાન્યપંચભૂતાનિ ।
અહમખિલં જગત્ ॥ 3 ॥

વેદોઽહમવેદોઽહમ્ ।
વિદ્યાઽહમવિદ્યાઽહમ્ ।
અજાઽહમનજાઽહમ્ ।
અધશ્ચોર્ધ્વં ચ તિર્યક્ચાહમ્ ॥ 4 ॥

અહં રુદ્રેભિર્વસુભિશ્ચરામિ ।
અહમાદિત્યૈરુત વિશ્વદેવૈઃ ।
અહં મિત્રાવરુણાવુભૌ બિભર્મિ ।
અહમિંદ્રાગ્ની અહમશ્વિનાવુભૌ ॥ 5 ॥

અહં સોમં ત્વષ્ટારં પૂષણં ભગં દધામિ ।
અહં-વિઁષ્ણુમુરુક્રમં બ્રહ્માણમુત પ્રજાપતિં દધામિ ॥ 6 ॥

અ॒હં દ॑ધામિ॒ દ્રવિ॑ણં હ॒વિષ્મ॑તે સુપ્રા॒વ્યે॒3 યજ॑માનાય સુન્વ॒તે ।
અ॒હં રાષ્ટ્રી॑ સં॒ગમ॑ની॒ વસૂ॑નાં ચિકિ॒તુષી॑ પ્રથ॒મા ય॒જ્ઞિયા॑નામ્ ।
અ॒હં સુ॑વે પિ॒તર॑મસ્ય મૂ॒ર્ધન્મમ॒ યોનિ॑ર॒પ્સ્વંતઃ સ॑મુ॒દ્રે ।
ય એવં-વેઁદ । સ દેવીં સંપદમાપ્નોતિ ॥ 7 ॥

તે દેવા અબ્રુવન્
નમો દેવ્યૈ મહાદેવ્યૈ શિવાયૈ સતતં નમઃ ।
નમઃ પ્રકૃત્યૈ ભદ્રાયૈ નિયતાઃ પ્રણતાઃ સ્મ તામ્ ॥ 8 ॥

તામ॒ગ્નિવ॑ર્ણાં॒ તપ॑સા જ્વલં॒તીં-વૈઁ॑રોચ॒નીં ક॑ર્મફ॒લેષુ॒ જુષ્ટા᳚મ્ ।
દુ॒ર્ગાં દે॒વીં શર॑ણં પ્રપ॑દ્યામહેઽસુરાન્નાશયિત્ર્યૈ તે નમઃ ॥ 9 ॥

(ઋ.વે.8.100.11)
દે॒વીં-વાઁચ॑મજનયંત દે॒વાસ્તાં-વિઁ॒શ્વરૂ॑પાઃ પ॒શવો॑ વદંતિ ।
સા નો॑ મં॒દ્રેષ॒મૂર્જં॒ દુહા॑ના ધે॒નુર્વાગ॒સ્માનુપ॒ સુષ્ટુ॒તૈતુ॑ ॥ 10 ॥

કાલરાત્રીં બ્રહ્મસ્તુતાં-વૈઁષ્ણવીં સ્કંદમાતરમ્ ।
સરસ્વતીમદિતિં દક્ષદુહિતરં નમામઃ પાવનાં શિવામ્ ॥ 11 ॥

મહાલક્ષ્મ્યૈ ચ વિદ્મહે સર્વશક્ત્યૈ ચ ધીમહિ ।
તન્નો દેવી પ્રચોદયાત્ ॥ 12 ॥

અદિતિર્​હ્યજનિષ્ટ દક્ષ યા દુહિતા તવ ।
તાં દેવા અન્વજાયંત ભદ્રા અમૃતબંધવઃ ॥ 13 ॥

કામો યોનિઃ કમલા વજ્રપાણિ-
ર્ગુહા હસા માતરિશ્વાભ્રમિંદ્રઃ ।
પુનર્ગુહા સકલા માયયા ચ
પુરૂચ્યૈષા વિશ્વમાતાદિવિદ્યોમ્ ॥ 14 ॥

એષાઽઽત્મશક્તિઃ ।
એષા વિશ્વમોહિની ।
પાશાંકુશધનુર્બાણધરા ।
એષા શ્રીમહાવિદ્યા ।
ય એવં-વેઁદ સ શોકં તરતિ ॥ 15 ॥

નમસ્તે અસ્તુ ભગવતિ માતરસ્માન્પાહિ સર્વતઃ ॥ 16 ॥

સૈષાષ્ટૌ વસવઃ ।
સૈષૈકાદશ રુદ્રાઃ ।
સૈષા દ્વાદશાદિત્યાઃ ।
સૈષા વિશ્વેદેવાઃ સોમપા અસોમપાશ્ચ ।
સૈષા યાતુધાના અસુરા રક્ષાંસિ પિશાચા યક્ષા સિદ્ધાઃ ।
સૈષા સત્ત્વરજસ્તમાંસિ ।
સૈષા બ્રહ્મવિષ્ણુરુદ્રરૂપિણી ।
સૈષા પ્રજાપતીંદ્રમનવઃ ।
સૈષા ગ્રહનક્ષત્રજ્યોતીંષિ । કલાકાષ્ઠાદિકાલરૂપિણી ।
તામહં પ્રણૌમિ નિત્યમ્ ।
પાપાપહારિણીં દેવીં ભુક્તિમુક્તિપ્રદાયિનીમ્ ।
અનંતાં-વિઁજયાં શુદ્ધાં શરણ્યાં શિવદાં શિવામ્ ॥ 17 ॥

વિયદીકારસં​યુઁક્તં-વીઁતિહોત્રસમન્વિતમ્ ।
અર્ધેંદુલસિતં દેવ્યા બીજં સર્વાર્થસાધકમ્ ॥ 18 ॥

એવમેકાક્ષરં બ્રહ્મ યતયઃ શુદ્ધચેતસઃ ।
ધ્યાયંતિ પરમાનંદમયા જ્ઞાનાંબુરાશયઃ ॥ 19 ॥

વાઙ્માયા બ્રહ્મસૂસ્તસ્માત્ ષષ્ઠં-વઁક્ત્રસમન્વિતમ્ ।
સૂર્યોઽવામશ્રોત્રબિંદુસં​યુઁક્તષ્ટાત્તૃતીયકઃ ।
નારાયણેન સમ્મિશ્રો વાયુશ્ચાધરયુક્તતઃ ।
વિચ્ચે નવાર્ણકોઽર્ણઃ સ્યાન્મહદાનંદદાયકઃ ॥ 20 ॥

હૃત્પુંડરીકમધ્યસ્થાં પ્રાતઃસૂર્યસમપ્રભામ્ ।
પાશાંકુશધરાં સૌમ્યાં-વઁરદાભયહસ્તકામ્ ।
ત્રિનેત્રાં રક્તવસનાં ભક્તકામદુઘાં ભજે ॥ 21 ॥

નમામિ ત્વાં મહાદેવીં મહાભયવિનાશિનીમ્ ।
મહાદુર્ગપ્રશમનીં મહાકારુણ્યરૂપિણીમ્ ॥ 22 ॥

યસ્યાઃ સ્વરૂપં બ્રહ્માદયો ન જાનંતિ તસ્માદુચ્યતે અજ્ઞેયા ।
યસ્યા અંતો ન લભ્યતે તસ્માદુચ્યતે અનંતા ।
યસ્યા લક્ષ્યં નોપલક્ષ્યતે તસ્માદુચ્યતે અલક્ષ્યા ।
યસ્યા જનનં નોપલભ્યતે તસ્માદુચ્યતે અજા ।
એકૈવ સર્વત્ર વર્તતે તસ્માદુચ્યતે એકા ।
એકૈવ વિશ્વરૂપિણી તસ્માદુચ્યતે નૈકા ।
અત એવોચ્યતે અજ્ઞેયાનંતાલક્ષ્યાજૈકા નૈકેતિ ॥ 23 ॥

મંત્રાણાં માતૃકા દેવી શબ્દાનાં જ્ઞાનરૂપિણી ।
જ્ઞાનાનાં ચિન્મયાતીતા શૂન્યાનાં શૂન્યસાક્ષિણી ।
યસ્યાઃ પરતરં નાસ્તિ સૈષા દુર્ગા પ્રકીર્તિતા ॥ 24 ॥

તાં દુર્ગાં દુર્ગમાં દેવીં દુરાચારવિઘાતિનીમ્ ।
નમામિ ભવભીતોઽહં સંસારાર્ણવતારિણીમ્ ॥ 25 ॥

ઇદમથર્વશીર્​ષં-યોઁઽધીતે સ પંચાથર્વશીર્​ષજપફલમાપ્નોતિ ।
ઇદમથર્વશીર્​ષમજ્ઞાત્વા યોઽર્ચાં સ્થાપયતિ ।
શતલક્ષં પ્રજપ્ત્વાઽપિ સોઽર્ચાસિદ્ધિં ન વિંદતિ ।
શતમષ્ટોત્તરં ચાસ્ય પુરશ્ચર્યાવિધિઃ સ્મૃતઃ ।
દશવારં પઠેદ્યસ્તુ સદ્યઃ પાપૈઃ પ્રમુચ્યતે ।
મહાદુર્ગાણિ તરતિ મહાદેવ્યાઃ પ્રસાદતઃ । 26 ॥

સાયમધીયાનો દિવસકૃતં પાપં નાશયતિ ।
પ્રાતરધીયાનો રાત્રિકૃતં પાપં નાશયતિ ।
સાયં પ્રાતઃ પ્રયુંજાનો અપાપો ભવતિ ।
નિશીથે તુરીયસંધ્યાયાં જપ્ત્વા વાક્સિદ્ધિર્ભવતિ ।
નૂતનાયાં પ્રતિમાયાં જપ્ત્વા દેવતાસાન્નિધ્યં ભવતિ ।
પ્રાણપ્રતિષ્ઠાયાં જપ્ત્વા પ્રાણાનાં પ્રતિષ્ઠા ભવતિ ।
ભૌમાશ્વિન્યાં મહાદેવીસન્નિધૌ જપ્ત્વા મહામૃત્યું તરતિ ।
સ મહામૃત્યું તરતિ ।
ય એવં-વેઁદ ।
ઇત્યુપનિષત્ ॥ 27 ॥

ઇતિ દેવ્યથર્વશીર્​ષમ્ ।

sri devi atharva sheersham in gujarati