શિવ પાદાદિ કેશાંત વર્ણન સ્તોત્રં

shiva padadi keshanta varnana stotram in gujarati

કળ્યાણં નો વિધત્તાં કટકતટલસત્કલ્પવાટીનિકુંજ-
-ક્રીડાસંસક્તવિદ્યાધરનિકરવધૂગીતરુદ્રાપદાનઃ ।
તારૈર્હેરંબનાદૈસ્તરળિતનિનદત્તારકારાતિકેકી
કૈલાસઃ શર્વનિર્વૃત્યભિજનકપદઃ સર્વદા પર્વતેંદ્રઃ ॥ 1 ॥

યસ્ય પ્રાહુઃ સ્વરૂપં સકલદિવિષદાં સારસર્વસ્વયોગં
યસ્યેષુઃ શાર્‍ંગધન્વા સમજનિ જગતાં રક્ષણે જાગરૂકઃ ।
મૌર્વી દર્વીકરાણામપિ ચ પરિબૃઢઃ પૂસ્ત્રયી સા ચ લક્ષ્યં
સોઽવ્યાદવ્યાજમસ્માનશિવભિદનિશં નાકિનાં શ્રીપિનાકઃ ॥ 2 ॥

આતંકાવેગહારી સકલદિવિષદામંઘ્રિપદ્માશ્રયાણાં
માતંગાદ્યુગ્રદૈત્યપ્રકરતનુગલદ્રક્તધારાક્તધારઃ ।
ક્રૂરઃ સૂરાયુતાનામપિ ચ પરિભવં સ્વીયભાસા વિતન્વ-
-ન્ઘોરાકારઃ કુઠારો દૃઢતરદુરિતાખ્યાટવીં પાટયેન્નઃ ॥ 3 ॥

કાલારાતેઃ કરાગ્રે કૃતવસતિરુરઃશાણશાતો રિપૂણાં
કાલે કાલે કુલાદ્રિપ્રવરતનયયા કલ્પિતસ્નેહલેપઃ ।
પાયાન્નઃ પાવકાર્ચિઃપ્રસરસખમુખઃ પાપહંતા નિતાંતં
શૂલઃ શ્રીપાદસેવાભજનરસજુષાં પાલનૈકાંતશીલઃ ॥ 4 ॥

દેવસ્યાંકાશ્રયાયાઃ કુલગિરિદુહિતુર્નેત્રકોણપ્રચાર-
-પ્રસ્તારાનત્યુદારાન્પિપઠિષુરિવ યો નિત્યમત્યાદરેણ ।
આધત્તે ભંગિતુંગૈરનિશમવયવૈરંતરંગં સમોદં
સોમાપીડસ્ય સોઽયં પ્રદિશતુ કુશલં પાણિરંગઃ કુરંગઃ ॥ 5 ॥

કંઠપ્રાંતાવસજ્જત્કનકમયમહાઘંટિકાઘોરઘોષૈઃ
કંઠારાવૈરકુંઠૈરપિ ભરિતજગચ્ચક્રવાલાંતરાળઃ ।
ચંડઃ પ્રોદ્દંડશૃંગઃ કકુદકબલિતોત્તુંગકૈલાસશૃંગઃ
કંઠેકાલસ્ય વાહઃ શમયતુ શમલં શાશ્વતઃ શાક્વરેંદ્રઃ ॥ 6 ॥

નિર્યદ્દાનાંબુધારાપરિમલતરલીભૂતરોલંબપાલી-
-ઝંકારૈઃ શંકરાદ્રેઃ શિખરશતદરીઃ પૂરયન્ભૂરિઘોષૈઃ ।
શાર્વઃ સૌવર્ણશૈલપ્રતિમપૃથુવપુઃ સર્વવિઘ્નાપહર્તા
શર્વાણ્યાઃ પૂર્વસૂનુઃ સ ભવતુ ભવતાં સ્વસ્તિદો હસ્તિવક્ત્રઃ ॥ 7 ॥

યઃ પુણ્યૈર્દેવતાનાં સમજનિ શિવયોઃ શ્લાઘ્યવીર્યૈકમત્યા-
-દ્યન્નામ્નિ શ્રૂયમાણે દિતિજભટઘટા ભીતિભારં ભજંતે ।
ભૂયાત્સોઽયં વિભૂત્યૈ નિશિતશરશિખાપાટિતક્રૌંચશૈલઃ
સંસારાગાધકૂપોદરપતિતસમુત્તારકસ્તારકારિઃ ॥ 8 ॥

આરૂઢઃ પ્રૌઢવેગપ્રવિજિતપવનં તુંગતુંગં તુરંગં
ચેલં નીલં વસાનઃ કરતલવિલસત્કાંડકોદંડદંડઃ ।
રાગદ્વેષાદિનાનાવિધમૃગપટલીભીતિકૃદ્ભૂતભર્તા
કુર્વન્નાખેટલીલાં પરિલસતુ મનઃકાનને મામકીને ॥ 9 ॥

અંભોજાભ્યાં ચ રંભારથચરણલતાદ્વંદ્વકુંભીંદ્રકુંભૈ-
-ર્બિંબેનેંદોશ્ચ કંબોરુપરિ વિલસતા વિદ્રુમેણોત્પલાભ્યામ્ ।
અંભોદેનાપિ સંભાવિતમુપજનિતાડંબરં શંબરારેઃ
શંભોઃ સંભોગયોગ્યં કિમપિ ધનમિદં સંભવેત્સંપદે નઃ ॥ 10 ॥

વેણીસૌભાગ્યવિસ્માપિતતપનસુતાચારુવેણીવિલાસા-
-ન્વાણીનિર્ધૂતવાણીકરતલવિધૃતોદારવીણાવિરાવાન્ ।
એણીનેત્રાંતભંગીનિરસનનિપુણાપાંગકોણાનુપાસે
શોણાન્પ્રાણાનુદૂઢપ્રતિનવસુષમાકંદલાનિંદુમૌળેઃ ॥ 11 ॥

નૃત્તારંભેષુ હસ્તાહતમુરજધિમિદ્ધિંકૃતૈરત્યુદારૈ-
-શ્ચિત્તાનંદં વિધત્તે સદસિ ભગવતઃ સંતતં યઃ સ નંદી ।
ચંડીશાદ્યાસ્તથાન્યે ચતુરગુણગણપ્રીણિતસ્વામિસત્કા-
-રોત્કર્ષોદ્યત્પ્રસાદાઃ પ્રમથપરિબૃઢાઃ પાંતુ સંતોષિણો નઃ ॥ 12 ॥

મુક્તામાણિક્યજાલૈઃ પરિકલિતમહાસાલમાલોકનીયં
પ્રત્યુપ્તાનર્ઘરત્નૈર્દિશિ દિશિ ભવનૈઃ કલ્પિતૈર્દિક્પતીનામ્ ।
ઉદ્યાનૈરદ્રિકન્યાપરિજનવનિતામાનનીયૈઃ પરીતં
હૃદ્યં હૃદ્યસ્તુ નિત્યં મમ ભુવનપતેર્ધામ સોમાર્ધમૌળેઃ ॥ 13 ॥

સ્તંભૈર્જંભારિરત્નપ્રવરવિરચિતૈઃ સંભૃતોપાંતભાગં
શુંભત્સોપાનમાર્ગં શુચિમણિનિચયૈર્ગુંભિતાનલ્પશિલ્પમ્ ।
કુંભૈઃ સંપૂર્ણશોભં શિરસિ સુઘટિતૈઃ શાતકુંભૈરપંકૈઃ
શંભોઃ સંભાવનીયં સકલમુનિજનૈઃ સ્વસ્તિદં સ્યાત્સદો નઃ ॥ 14 ॥

ન્યસ્તો મધ્યે સભાયાઃ પરિસરવિલસત્પાદપીઠાભિરામો
હૃદ્યઃ પાદૈશ્ચતુર્ભિઃ કનકમણિમયૈરુચ્ચકૈરુજ્જ્વલાત્મા ॥
વાસોરત્નેન કેનાપ્યધિકમૃદુતરેણાસ્તૃતો વિસ્તૃતશ્રીઃ
પીઠઃ પીડાભરં નઃ શમયતુ શિવયોઃ સ્વૈરસંવાસયોગ્યઃ ॥ 15 ॥

આસીનસ્યાધિપીઠં ત્રિજગદધિપતેરંઘ્રિપીઠાનુષક્તૌ
પાથોજાભોગભાજૌ પરિમૃદુલતલોલ્લાસિપદ્માદિરેખૌ ।
પાતાં પાદાવુભૌ તૌ નમદમરકિરીટોલ્લસચ્ચારુહીર-
-શ્રેણીશોણાયમાનોન્નતનખદશકોદ્ભાસમાનૌ સમાનૌ ॥ 16 ॥

યન્નાદો વેદવાચાં નિગદતિ નિખિલં લક્ષણં પક્ષિકેતુ-
-ર્લક્ષ્મીસંભોગસૌખ્યં વિરચયતિ યયોશ્ચાપરે રૂપભેદે ।
શંભોઃ સંભાવનીયે પદકમલસમાસંગતસ્તુંગશોભે
માંગળ્યં નઃ સમગ્રં સકલસુખકરે નૂપુરે પૂરયેતામ્ ॥ 17 ॥

અંગે શૃંગારયોનેઃ સપદિ શલભતાં નેત્રવહ્નૌ પ્રયાતે
શત્રોરુદ્ધૃત્ય તસ્માદિષુધિયુગમધો ન્યસ્તમગ્રે કિમેતત્ ।
શંકામિત્થં નતાનામમરપરિષદામંતરંકૂરયત્ત-
-ત્સંઘાતં ચારુ જંઘાયુગમખિલપતેરંહસાં સંહરેન્નઃ ॥ 18 ॥

જાનુદ્વંદ્વેન મીનધ્વજનૃવરસમુદ્રોપમાનેન સાકં
રાજંતૌ રાજરંભાકરિકરકનકસ્તંભસંભાવનીયૌ ।
ઊરૂ ગૌરીકરાંભોરુહસરસસમામર્દનાનંદભાજૌ
ચારૂ દૂરીક્રિયાસ્તાં દુરિતમુપચિતં જન્મજન્માંતરે નઃ ॥ 19 ॥

આમુક્તાનર્ઘરત્નપ્રકરકરપરિષ્વક્તકળ્યાણકાંચી-
-દામ્ના બદ્દેન દુગ્ધદ્યુતિનિચયમુષા ચીનપટ્ટાંબરેણ ।
સંવીતે શૈલકન્યાસુચરિતપરિપાકાયમાણે નિતંબે
નિત્યં નર્નર્તુ ચિત્તં મમ નિખિલજગત્સ્વામિનઃ સોમમૌળેઃ ॥ 20 ॥

સંધ્યાકાલાનુરજ્યદ્દિનકરસરુચા કાલધૌતેન ગાઢં
વ્યાનદ્ધઃ સ્નિગ્ધમુગ્ધઃ સરસમુદરબંધેન વીતોપમેન ।
ઉદ્દીપ્તૈઃ સ્વપ્રકાશૈરુપચિતમહિમા મન્મથારેરુદારો
મધ્યો મિથ્યાર્થસધ્ર્યઙ્મમ દિશતુ સદા સંગતિં મંગળાનામ્ ॥ 21 ॥

નાભીચક્રાલવાલાન્નવનવસુષમાદોહદશ્રીપરીતા-
-દુદ્ગચ્છંતી પુરસ્તાદુદરપથમતિક્રમ્ય વક્ષઃ પ્રયાંતિ ।
શ્યામા કામાગમાર્થપ્રકથનલિપિવદ્ભાસતે યા નિકામં
સા મા સોમાર્ધમૌળેઃ સુખયતુ સતતં રોમવલ્લીમતલ્લી ॥ 22 ॥

આશ્લેષેષ્વદ્રિજાયાઃ કઠિનકુચતટીલિપ્તકાશ્મીરપંક-
-વ્યાસંગાદુદ્યદર્કદ્યુતિભિરુપચિતસ્પર્ધમુદ્દામહૃદ્યમ્ ।
દક્ષારાતેરુદૂઢપ્રતિનવમણિમાલાવલીભાસમાનં
વક્ષો વિક્ષોભિતાઘં સતતનતિજુષાં રક્ષતાદક્ષતં નઃ ॥ 23 ॥

વામાંકે વિસ્ફુરંત્યાઃ કરતલવિલસચ્ચારુરક્તોત્પલાયાઃ
કાંતાયા વામવક્ષોરુહભરશિખરોન્મર્દનવ્યગ્રમેકમ્ ।
અન્યાંસ્ત્રીનપ્યુદારાન્વરપરશુમૃગાલંકૃતાનિંદુમૌળે-
-ર્બાહૂનાબદ્ધહેમાંગદમણિકટકાનંતરાલોકયામઃ ॥ 24 ॥

સંભ્રાંતાયાઃ શિવાયાઃ પતિવિલયભિયા સર્વલોકોપતાપા-
-ત્સંવિગ્નસ્યાપિ વિષ્ણોઃ સરભસમુભયોર્વારણપ્રેરણાભ્યામ્ ।
મધ્યે ત્રૈશંકવીયામનુભવતિ દશાં યત્ર હાલાહલોષ્મા
સોઽયં સર્વાપદાં નઃ શમયતુ નિચયં નીલકંઠસ્ય કંઠઃ ॥ 25 ॥

હૃદ્યૈરદ્રીંદ્રકન્યામૃદુદશનપદૈર્મુદ્રિતો વિદ્રુમશ્રી-
-રુદ્દ્યોતંત્યા નિતાંતં ધવલધવલયા મિશ્રિતો દંતકાંત્યા ।
મુક્તામાણિક્યજાલવ્યતિકરસદૃશા તેજસા ભાસમાનઃ
સદ્યોજાતસ્ય દદ્યાદધરમણિરસૌ સંપદાં સંચયં નઃ ॥ 26 ॥

કર્ણાલંકારનાનામણિનિકરરુચાં સંચયૈરંચિતાયાં
વર્ણ્યાયાં સ્વર્ણપદ્મોદરપરિવિલસત્કર્ણિકાસંનિભાયામ્ ।
પદ્ધત્યાં પ્રાણવાયોઃ પ્રણતજનહૃદંભોજવાસસ્ય શંભો-
-ર્નિત્યં નશ્ચિત્તમેતદ્વિરચયતુ સુખેનાસિકાં નાસિકાયામ્ ॥ 27 ॥

અત્યંતં ભાસમાને રુચિરતરરુચાં સંગમાત્સન્મણીના-
-મુદ્યચ્ચંડાંશુધામપ્રસરનિરસનસ્પષ્ટદૃષ્ટાપદાને ।
ભૂયાસ્તાં ભૂતયે નઃ કરિવરજયિનઃ કર્ણપાશાવલંબે
ભક્તાલીભાલસજ્જજ્જનિમરણલિપેઃ કુંડલે કુંડલે તે ॥ 28 ॥

યાભ્યાં કાલવ્યવસ્થા ભવતિ તનુમતાં યો મુખં દેવતાનાં
યેષામાહુઃ સ્વરૂપં જગતિ મુનિવરા દેવતાનાં ત્રયીં તામ્ ।
રુદ્રાણીવક્ત્રપંકેરુહસતતવિહારોત્સુકેંદિંદિરેભ્ય-
-સ્તેભ્યસ્ત્રિભ્યઃ પ્રણામાંજલિમુપરચયે ત્રીક્ષણસ્યેક્ષણેભ્યઃ ॥ 29 ॥

વામં વામાંકગાયા વદનસરસિજે વ્યાવલદ્વલ્લભાયા
વ્યાનમ્રેષ્વન્યદન્યત્પુનરલિકભવં વીતનિઃશેષરૌક્ષ્યમ્ ।
ભૂયો ભૂયોપિ મોદાન્નિપતદતિદયાશીતલં ચૂતબાણે
દક્ષારેરીક્ષણાનાં ત્રયમપહરતાદાશુ તાપત્રયં નઃ ॥ 30 ॥

યસ્મિન્નર્ધેંદુમુગ્ધદ્યુતિનિચયતિરસ્કારનિસ્તંદ્રકાંતૌ
કાશ્મીરક્ષોદસંકલ્પતમિવ રુચિરં ચિત્રકં ભાતિ નેત્રમ્ ।
તસ્મિન્નુલ્લીલચિલ્લીનટવરતરુણીલાસ્યરંગાયમાણે
કાલારેઃ ફાલદેશે વિહરતુ હૃદયં વીતચિંતાંતરં નઃ ॥ 31 ॥

સ્વામિન્ગંગામિવાંગીકુરુ તવ શિરસા મામપીત્યર્થયંતીં
ધન્યાં કન્યાં ખરાંશોઃ શિરસિ વહતિ કિં ન્વેષ કારુણ્યશાલી ।
ઇત્થં શંકાં જનાનાં જનયદતિઘનં કૈશિકં કાલમેઘ-
-ચ્છાયં ભૂયાદુદારં ત્રિપુરવિજયિનઃ શ્રેયસે ભૂયસે નઃ ॥ 32 ॥

શૃંગારાકલ્પયોગ્યૈઃ શિખરિવરસુતાસત્સખીહસ્તલૂનૈઃ
સૂનૈરાબદ્ધમાલાવલિપરિવિલસત્સૌરભાકૃષ્ટભૃંગમ્ ।
તુંગં માણિક્યકાંત્યા પરિહસિતસુરાવાસશૈલેંદ્રશૃંગં
સંઘં નઃ સંકટાનાં વિઘટયતુ સદા કાંકટીકં કિરીટમ્ ॥ 33 ॥

વક્રાકારઃ કલંકી જડતનુરહમપ્યંઘ્રિસેવાનુભાવા-
-દુત્તંસત્વં પ્રયાતઃ સુલભતરઘૃણાસ્યંદિનશ્ચંદ્રમૌળેઃ ।
તત્સેવંતાં જનૌઘાઃ શિવમિતિ નિજયાવસ્થયૈવ બ્રુવાણં
વંદે દેવસ્ય શંભોર્મુકુટસુઘટિતં મુગ્ધપીયૂષભાનુમ્ ॥ 34 ॥

કાંત્યા સંફુલ્લમલ્લીકુસુમધવળયા વ્યાપ્ય વિશ્વં વિરાજ-
-ન્વૃત્તાકારો વિતન્વન્મુહુરપિ ચ પરાં નિર્વૃતિં પાદભાજામ્ ।
સાનંદં નંદિદોષ્ણા મણિકટકવતા વાહ્યમાનઃ પુરારેઃ
શ્વેતચ્છત્રાખ્યશીતદ્યુતિરપહરતાદાપદસ્તાપદા નઃ ॥ 35 ॥

દિવ્યાકલ્પોજ્જ્વલાનાં શિવગિરિસુતયોઃ પાર્શ્વયોરાશ્રિતાનાં
રુદ્રાણીસત્સખીનાં મદતરલકટાક્ષાંચલૈરંચિતાનામ્ ।
ઉદ્વેલ્લદ્બાહુવલ્લીવિલસનસમયે ચામરાંદોલનીના-
-મુદ્ભૂતઃ કંકણાલીવલયકલકલો વારયેદાપદો નઃ ॥ 36 ॥

સ્વર્ગૌકઃસુંદરીણાં સુલલિતવપુષાં સ્વામિસેવાપરાણાં
વલ્ગદ્ભૂષાણિ વક્રાંબુજપરિવિગલન્મુગ્ધગીતામૃતાનિ ।
નિત્યં નૃત્તાન્યુપાસે ભુજવિધુતિપદન્યાસભાવાવલોક-
-પ્રત્યુદ્યત્પ્રીતિમાદ્યત્પ્રમથનટનટીદત્તસંભાવનાનિ ॥ 37 ॥

સ્થાનપ્રાપ્ત્યા સ્વરાણાં કિમપિ વિશદતાં વ્યંજયન્મંજુવીણા-
-સ્વાનાવચ્છિન્નતાલક્રમમમૃતમિવાસ્વાદ્યમાનં શિવાભ્યામ્ ।
નાનારાગાતિહૃદ્યં નવરસમધુરસ્તોત્રજાતાનુવિદ્ધં
ગાનં વીણામહર્ષેઃ કલમતિલલિતં કર્ણપૂરયતાં નઃ ॥ 38 ॥

ચેતો જાતપ્રમોદં સપદિ વિદધતી પ્રાણિનાં વાણિનીનાં
પાણિદ્વંદ્વાગ્રજાગ્રત્સુલલિતરણિતસ્વર્ણતાલાનુકૂલા ।
સ્વીયારાવેણ પાથોધરરવપટુના નાદયંતી મયૂરીં
માયૂરી મંદભાવં મણિમુરજભવા માર્જના માર્જયેન્નઃ ॥ 39 ॥

દેવેભ્યો દાનવેભ્યઃ પિતૃમુનિપરિષત્સિદ્ધવિદ્યાધરેભ્યઃ
સાધ્યેભ્યશ્ચારણેભ્યો મનુજપશુપતજ્જાતિકીટાદિકેભ્યઃ ।
શ્રીકૈલાસપ્રરૂઢાસ્તૃણવિટપિમુખાશ્ચાપિ યે સંતિ તેભ્યઃ
સર્વેભ્યો નિર્વિચારં નતિમુપરચયે શર્વપાદાશ્રયેભ્યઃ ॥ 40 ॥

ધ્યાયન્નિત્થં પ્રભાતે પ્રતિદિવસમિદં સ્તોત્રરત્નં પઠેદ્યઃ
કિં વા બ્રૂમસ્તદીયં સુચરિતમથવા કીર્તયામઃ સમાસાત્ ।
સંપજ્જાતં સમગ્રં સદસિ બહુમતિં સર્વલોકપ્રિયત્વં
સંપ્રાપ્યાયુઃશતાંતે પદમયતિ પરબ્રહ્મણો મન્મથારેઃ ॥ 41 ॥

ઇતિ શ્રીમત્પરમહંસપરિવ્રાજકાચાર્યસ્ય શ્રીગોવિંદભગવત્પૂજ્યપાદશિષ્યસ્ય શ્રીમચ્છંકરભગવતઃ કૃતૌ શ્રી શિવ પાદાદિકેશાંતવર્ણન સ્તોત્રમ્ ॥

shiva padadi keshanta varnana stotram in gujarati