નારાયણીયં દશક 39 – યોગમાયા પ્રાદુર્ભાવં તથા ગોકુલે કૃષ્ણજન્મોત્સવમ્

narayaniyam dashaka 39 in gujarati

ભવંતમયમુદ્વહન્ યદુકુલોદ્વહો નિસ્સરન્
દદર્શ ગગનોચ્ચલજ્જલભરાં કલિંદાત્મજામ્ ।
અહો સલિલસંચયઃ સ પુનરૈંદ્રજાલોદિતો
જલૌઘ ઇવ તત્ક્ષણાત્ પ્રપદમેયતામાયયૌ ॥1॥

પ્રસુપ્તપશુપાલિકાં નિભૃતમારુદદ્બાલિકા-
મપાવૃતકવાટિકાં પશુપવાટિકામાવિશન્ ।
ભવંતમયમર્પયન્ પ્રસવતલ્પકે તત્પદા-
દ્વહન્ કપટકન્યકાં સ્વપુરમાગતો વેગતઃ ॥2॥

તતસ્ત્વદનુજારવક્ષપિતનિદ્રવેગદ્રવદ્-
ભટોત્કરનિવેદિતપ્રસવવાર્તયૈવાર્તિમાન્ ।
વિમુક્તચિકુરોત્કરસ્ત્વરિતમાપતન્ ભોજરા-
ડતુષ્ટ ઇવ દૃષ્ટવાન્ ભગિનિકાકરે કન્યકામ્ ॥3॥

ધ્રુવં કપટશાલિનો મધુહરસ્ય માયા ભવે-
દસાવિતિ કિશોરિકાં ભગિનિકાકરાલિંગિતામ્ ।
દ્વિપો નલિનિકાંતરાદિવ મૃણાલિકામાક્ષિપ-
ન્નયં ત્વદનુજામજામુપલપટ્ટકે પિષ્ટવાન્ ॥4॥

તતઃ ભવદુપાસકો ઝટિતિ મૃત્યુપાશાદિવ
પ્રમુચ્ય તરસૈવ સા સમધિરૂઢરૂપાંતરા ।
અધસ્તલમજગ્મુષી વિકસદષ્ટબાહુસ્ફુર-
ન્મહાયુધમહો ગતા કિલ વિહાયસા દિદ્યુતે ॥5॥

નૃશંસતર કંસ તે કિમુ મયા વિનિષ્પિષ્ટયા
બભૂવ ભવદંતકઃ ક્વચન ચિંત્યતાં તે હિતમ્ ।
ઇતિ ત્વદનુજા વિભો ખલમુદીર્ય તં જગ્મુષી
મરુદ્ગણપણાયિતા ભુવિ ચ મંદિરાણ્યેયુષી ॥6॥

પ્રગે પુનરગાત્મજાવચનમીરિતા ભૂભુજા
પ્રલંબબકપૂતનાપ્રમુખદાનવા માનિનઃ ।
ભવન્નિધનકામ્યયા જગતિ બભ્રમુર્નિર્ભયાઃ
કુમારકવિમારકાઃ કિમિવ દુષ્કરં નિષ્કૃપૈઃ ॥7॥

તતઃ પશુપમંદિરે ત્વયિ મુકુંદ નંદપ્રિયા-
પ્રસૂતિશયનેશયે રુદતિ કિંચિદંચત્પદે ।
વિબુધ્ય વનિતાજનૈસ્તનયસંભવે ઘોષિતે
મુદા કિમુ વદામ્યહો સકલમાકુલં ગોકુલમ્ ॥8॥

અહો ખલુ યશોદયા નવકલાયચેતોહરં
ભવંતમલમંતિકે પ્રથમમાપિબંત્યા દૃશા ।
પુનઃ સ્તનભરં નિજં સપદિ પાયયંત્યા મુદા
મનોહરતનુસ્પૃશા જગતિ પુણ્યવંતો જિતાઃ ॥9॥

ભવત્કુશલકામ્યયા સ ખલુ નંદગોપસ્તદા
પ્રમોદભરસંકુલો દ્વિજકુલાય કિન્નાદદાત્ ।
તથૈવ પશુપાલકાઃ કિમુ ન મંગલં તેનિરે
જગત્ત્રિતયમંગલ ત્વમિહ પાહિ મામામયાત્ ॥10॥

narayaniyam dashaka 39 in gujarati