বিদুর নীতি – উদ্যোগ পর্বম্, অধ্যাযঃ 38

vidura neethi udyoga parvam chapter 38 in assamese

॥ ইতি শ্রীমহাভারতে উদ্যোগপর্বণি প্রজাগরপর্বণি
বিদুরবাক্যে অষ্টত্রিংশোঽধ্যাযঃ ॥

বিদুর উবাচ ।

ঊর্ধ্বং প্রাণা হ্যুত্ক্রামংতি যূনঃ স্থবির আযতি ।
প্রত্যুত্থানাভিবাদাভ্যাং পুনস্তান্পতিপদ্যতে ॥ 1॥

পীঠং দত্ত্বা সাধবেঽভ্যাগতায
আনীযাপঃ পরিনির্ণিজ্য পাদৌ ।
সুখং পৃষ্ট্বা প্রতিবেদ্যাত্ম সংস্থং
ততো দদ্যাদন্নমবেক্ষ্য ধীরঃ ॥ 2॥

যস্যোদকং মধুপর্কং চ গাং চ
ন মংত্রবিত্প্রতিগৃহ্ণাতি গেহে ।
লোভাদ্ভযাদর্থকার্পণ্যতো বা
তস্যানর্থং জীবিতমাহুরার্যাঃ ॥ 3॥

চিকিত্সকঃ শক্য কর্তাবকীর্ণী
স্তেনঃ ক্রূরো মদ্যপো ভ্রূণহা চ ।
সেনাজীবী শ্রুতিবিক্রাযকশ্ চ
ভৃশং প্রিযোঽপ্যতিথির্নোদকার্হঃ ॥ 4॥

অবিক্রেযং লবণং পক্বমন্নং দধি
ক্ষীরং মধু তৈলং ঘৃতং চ ।
তিলা মাংসং মূলফলানি শাকং
রক্তং বাসঃ সর্বগংধা গুডশ্ চ ॥ 5॥

অরোষণো যঃ সমলোষ্ট কাংচনঃ
প্রহীণ শোকো গতসংধি বিগ্রহঃ ।
নিংদা প্রশংসোপরতঃ প্রিযাপ্রিযে
চরন্নুদাসীনবদেষ ভিক্ষুকঃ ॥ 6॥

নীবার মূলেংগুদ শাকবৃত্তিঃ
সুসংযতাত্মাগ্নিকার্যেষ্বচোদ্যঃ ।
বনে বসন্নতিথিষ্বপ্রমত্তো
ধুরংধরঃ পুণ্যকৃদেষ তাপসঃ ॥ 7॥

অপকৃত্বা বুদ্ধিমতো দূরস্থোঽস্মীতি নাশ্বসেত্ ।
দীর্ঘৌ বুদ্ধিমতো বাহূ যাভ্যাং হিংসতি হিংসিতঃ ॥ 8॥

ন বিশ্বসেদবিশ্বস্তে বিশ্বস্তে নাতিবিশ্বসেত্ ।
বিশ্বাসাদ্ভযমুত্পন্নং মূলান্যপি নিকৃংততি ॥ 9॥

অনীর্ষ্যুর্গুপ্তদারঃ স্যাত্সংবিভাগী প্রিযংবদঃ ।
শ্লক্ষ্ণো মধুরবাক্স্ত্রীণাং ন চাসাং বশগো ভবেত্ ॥ 10॥

পূজনীযা মহাভাগাঃ পুণ্যাশ্চ গৃহদীপ্তযঃ ।
স্ত্রিযঃ শ্রিযো গৃহস্যোক্তাস্তস্মাদ্রক্ষ্যা বিশেষতঃ ॥ 11॥

পিতুরংতঃপুরং দদ্যান্মাতুর্দদ্যান্মহানসম্ ।
গোষু চাত্মসমং দদ্যাত্স্বযমেব কৃষিং ব্রজেত্ ।
ভৃত্যৈর্বণিজ্যাচারং চ পুত্রৈঃ সেবেত ব্রাহ্মণান্ ॥ 12॥

অদ্ভ্যোঽগ্নির্ব্রহ্মতঃ ক্ষত্রমশ্মনো লোহমুত্থিতম্ ।
তেষাং সর্বত্রগং তেজঃ স্বাসু যোনিষু শাম্যতি ॥ 13॥

নিত্যং সংতঃ কুলে জাতাঃ পাবকোপম তেজসঃ ।
ক্ষমাবংতো নিরাকারাঃ কাষ্ঠেঽগ্নিরিব শেরতে ॥ 14॥

যস্য মংত্রং ন জানংতি বাহ্যাশ্চাভ্যংতরাশ্ চ যে ।
স রাজা সর্বতশ্চক্ষুশ্চিরমৈশ্বর্যমশ্নুতে ॥ 15॥

করিষ্যন্ন প্রভাষেত কৃতান্যেব চ দর্শযেত্ ।
ধর্মকামার্থ কার্যাণি তথা মংত্রো ন ভিদ্যতে ॥ 16॥

গিরিপৃষ্ঠমুপারুহ্য প্রাসাদং বা রহোগতঃ ।
অরণ্যে নিঃশলাকে বা তত্র মংত্রো বিধীযতে ॥ 17॥

নাসুহৃত্পরমং মংত্রং ভারতার্হতি বেদিতুম্ ।
অপংডিতো বাপি সুহৃত্পংডিতো বাপ্যনাত্মবান্ ।
অমাত্যে হ্যর্থলিপ্সা চ মংত্ররক্ষণমেব চ ॥ 18॥

কৃতানি সর্বকার্যাণি যস্য বা পার্ষদা বিদুঃ ।
গূঢমংত্রস্য নৃপতেস্তস্য সিদ্ধিরসংশযম্ ॥ 19॥

অপ্রশস্তানি কর্মাণি যো মোহাদনুতিষ্ঠতি ।
স তেষাং বিপরিভ্রংশে ভ্রশ্যতে জীবিতাদপি ॥ 20॥

কর্মণাং তু প্রশস্তানামনুষ্ঠানং সুখাবহম্ ।
তেষামেবাননুষ্ঠানং পশ্চাত্তাপকরং মহত্ ॥ 21॥

স্থানবৃদ্ধ ক্ষযজ্ঞস্য ষাড্গুণ্য বিদিতাত্মনঃ ।
অনবজ্ঞাত শীলস্য স্বাধীনা পৃথিবী নৃপ ॥ 22॥

অমোঘক্রোধহর্ষস্য স্বযং কৃত্যান্ববেক্ষিণঃ ।
আত্মপ্রত্যয কোশস্য বসুধেযং বসুংধরা ॥ 23॥

নামমাত্রেণ তুষ্যেত ছত্রেণ চ মহীপতিঃ ।
ভৃত্যেভ্যো বিসৃজেদর্থান্নৈকঃ সর্বহরো ভবেত্ ॥ 24॥

ব্রাহ্মণো ব্রাহ্মণং বেদ ভর্তা বেদ স্ত্রিযং তথা ।
অমাত্যং নৃপতির্বেদ রাজা রাজানমেব চ ॥ 25॥

ন শত্রুরংকমাপন্নো মোক্তব্যো বধ্যতাং গতঃ ।
অহতাদ্ধি ভযং তস্মাজ্জাযতে নচিরাদিব ॥ 26॥

দৈবতেষু চ যত্নেন রাজসু ব্রাহ্মণেষু চ ।
নিযংতব্যঃ সদা ক্রোধো বৃদ্ধবালাতুরেষু চ ॥ 27॥

নিরর্থং কলহং প্রাজ্ঞো বর্জযেন্মূঢ সেবিতম্ ।
কীর্তিং চ লভতে লোকে ন চানর্থেন যুজ্যতে ॥ 28॥

প্রসাদো নিষ্ফলো যস্য ক্রোধশ্চাপি নিরর্থকঃ ।
ন তং ভর্তারমিচ্ছংতি ষংঢং পতিমিব স্ত্রিযঃ ॥ 29॥

ন বুদ্ধির্ধনলাভায ন জাড্যমসমৃদ্ধযে ।
লোকপর্যায বৃত্তাংতং প্রাজ্ঞো জানাতি নেতরঃ ॥ 30॥

বিদ্যা শীলবযোবৃদ্ধান্বুদ্ধিবৃদ্ধাংশ্চ ভারত ।
ধনাভিজন বৃদ্ধাংশ্চ নিত্যং মূঢোঽবমন্যতে ॥ 31॥

অনার্য বৃত্তমপ্রাজ্ঞমসূযকমধার্মিকম্ ।
অনর্থাঃ ক্ষিপ্রমাযাংতি বাগ্দুষ্টং ক্রোধনং তথা ॥ 32॥

অবিসংবাদনং দানং সমযস্যাব্যতিক্রমঃ ।
আবর্তযংতি ভূতানি সম্যক্প্রণিহিতা চ বাক্ ॥ 33॥

অবিসংবাদকো দক্ষঃ কৃতজ্ঞো মতিমানৃজুঃ ।
অপি সংক্ষীণ কোশোঽপি লভতে পরিবারণম্ ॥ 34॥

ধৃতিঃ শমো দমঃ শৌচং কারুণ্যং বাগনিষ্ঠুরা ।
মিত্রাণাং চানভিদ্রোহঃ সতৈতাঃ সমিধঃ শ্রিযঃ ॥ 35॥

অসংবিভাগী দুষ্টাত্মা কৃতঘ্নো নিরপত্রপঃ ।
তাদৃঙ্নরাধমো লোকে বর্জনীযো নরাধিপ ॥ 36॥

ন স রাত্রৌ সুখং শেতে স সর্প ইব বেশ্মনি ।
যঃ কোপযতি নির্দোষং স দোষোঽভ্যংতরং জনম্ ॥ 37॥

যেষু দুষ্টেষু দোষঃ স্যাদ্যোগক্ষেমস্য ভারত ।
সদা প্রসাদনং তেষাং দেবতানামিবাচরেত্ ॥ 38॥

যেঽর্থাঃ স্ত্রীষু সমাসক্তাঃ প্রথমোত্পতিতেষু চ ।
যে চানার্য সমাসক্তাঃ সর্বে তে সংশযং গতাঃ ॥ 39॥

যত্র স্ত্রী যত্র কিতবো যত্র বালোঽনুশাস্তি চ ।
মজ্জংতি তেঽবশা দেশা নদ্যামশ্মপ্লবা ইব ॥ 40॥

প্রযোজনেষু যে সক্তা ন বিশেষেষু ভারত ।
তানহং পংডিতান্মন্যে বিশেষা হি প্রসংগিনঃ ॥ 41॥

যং প্রশংসংতি কিতবা যং প্রশংসংতি চারণাঃ ।
যং প্রশংসংতি বংধক্যো ন স জীবতি মানবঃ ॥ 42॥

হিত্বা তান্পরমেষ্বাসান্পাংডবানমিতৌজসঃ ।
আহিতং ভারতৈশ্বর্যং ত্বযা দুর্যোধনে মহত্ ॥ 43॥

তং দ্রক্ষ্যসি পরিভ্রষ্টং তস্মাত্ত্বং নচিরাদিব ।
ঐশ্বর্যমদসম্মূঢং বলিং লোকত্রযাদিব ॥ 44॥

॥ ইতি শ্রীমহাভারতে উদ্যোগপর্বণি প্রজাগরপর্বণি
বিদুরবাক্যে অষ্টত্রিংশোঽধ্যাযঃ ॥ 38॥

vidura neethi udyoga parvam chapter 38 in assamese