surālayapradhāne tu devadevaṃ maheśvaram |
śailādhirājatanayā saṅgrahe tamuvāca ha || 1 ||
śrīdevyuvāca |
parameṣṭhin paraṃ dhāma pradhāna parameśvara |
nāmnāṃ sahasraṃ bagalāmukhyāyaṃ brūhi vallabha || 2 ||
īśvara uvāca |
śṛṇu devi pravakṣyāmi nāmadheyaṃ sahasrakam |
parabrahmāstravidyāyāścaturvargaphalapradam || 3 ||
guhyādguhyataraṃ devi sarvasiddhaikavanditam |
atiguptatarā vidyā sarvatantreṣu gopitā || 4 ||
viśeṣataḥ kaliyuge mahāsiddhyaughadāyinī |
gopanīyaṃ gopanīyaṃ gopanīyaṃ prayatnataḥ || 5 ||
aprakāśyamidaṃ satyaṃ svayoniriva suvrate |
rodhinī vighnasaṅghānāṃ mohinī parayoṣitām || 6 ||
stambhinī rājasainyānāṃ vādinī paravādinām |
purā caikārṇave ghore kāle paramabhairavaḥ || 7 ||
sundarīsahito devaḥ keśavaḥ kleśanāśanaḥ |
uragāsanamāsīno yoganidrāmupāgamat || 8 ||
nidrākāle ca te kāle mayā proktaḥ sanātanaḥ |
mahāstambhakaraṃ devi stotraṃ vā śatanāmakam || 9 ||
sahasranāma paramaṃ vada devasya kasyacit |
śrībhagavānuvāca |
śṛṇu śaṅkara deveśa paramātirahasyakam || 10 ||
ato’haṃ yatprasādena viṣṇuḥ sarveśvareśvaraḥ |
gopanīyaṃ prayatnena prakāśāt siddhihānikṛt || 11 ||
viniyogaḥ –
asya śrīpītāmbarī bagalāmukhī sahasranāmastotramantrasya bhagavān sadāśiva ṛṣiḥ anuṣṭup chandaḥ śrījagadvaśyakarī pītāmbarī bagalāmukhī devatā sarvābhīṣṭasiddhyarthe jape viniyogaḥ ||
dhyānam –
pītāmbaraparīdhānāṃ pīnonnatapayodharām |
jaṭāmukuṭaśobhāḍhyāṃ pītabhūmisukhāsanām || 12 ||
śatrorjihvāṃ mudgaraṃ ca bibhratīṃ paramāṃ kalām |
sarvāgamapurāṇeṣu vikhyātāṃ bhuvanatraye || 13 ||
sṛṣṭisthitivināśānāmādibhūtāṃ maheśvarīm |
gopyā sarvaprayatnena śṛṇu tāṃ kathayāmi te || 14 ||
jagadvidhvaṃsinīṃ devīmajarā’marakāriṇīm |
tāṃ namāmi mahāmāyāṃ mahadaiśvaryadāyinīm || 15 ||
mūlamantravyākhya –
praṇavaṃ pūrvamuddhṛtya sthiramāyāṃ tato vadet |
bagalāmukhī sarveti duṣṭānāṃ vācameva ca || 16 ||
mukhaṃ padaṃ stambhayeti jihvāṃ kīlaya buddhimat |
vināśayeti tāraṃ ca sthiramāyāṃ tato vadet || 17 ||
vahnipriyāṃ tato mantraścaturvargaphalapradaḥ |
stotram –
brahmāstraṃ brahmavidyā ca brahmamātā sanātanī || 18 ||
brahmeśī brahmakaivalyaṃ bagalā brahmacāriṇī |
nityānandā nityasiddhā nityarūpā nirāmayā || 19 ||
sandhāriṇī mahāmāyā kaṭākṣakṣemakāriṇī |
kamalā vimalā nīlaratnakāntiguṇāśritā || 20 ||
kāmapriyā kāmaratā kāmakāmasvarūpiṇī |
maṅgalā vijayā jāyā sarvamaṅgalakāriṇī || 21 ||
kāminī kāminīkāmyā kāmukā kāmacāriṇī |
kāmapriyā kāmaratā kāmākāmasvarūpiṇī || 22 ||
kāmākhyā kāmabījasthā kāmapīṭhanivāsinī |
kāmadā kāmahā kālī kapālī ca karālikā || 23 ||
kaṃsāriḥ kamalā kāmā kailāseśvaravallabhā |
kātyāyanī keśavā ca karuṇā kāmakelibhuk || 24 ||
kriyā kīrtiḥ kṛttikā ca kāśikā mathurā śivā |
kālākṣī kālikā kālī dhavalānanasundarī || 25 ||
khecarī ca khamūrtiśca kṣudrā’kṣudrakṣudhāvarā |
khaḍgahastā khaḍgaratā khaḍginī kharparapriyā || 26 ||
gaṅgā gaurī gāminī ca gītā gotravivardhinī |
godharā gokarā godhā gandharvapuravāsinī || 27 ||
gandharvā gandharvakalā gopanī garuḍāsanā |
govindabhāvā govindā gāndhārī gandhamādinī || 28 ||
gaurāṅgī gopikāmūrtirgopīgoṣṭhanivāsinī |
gandhā gajendragāmānyā gadādharapriyā grahā || 29 ||
ghoraghorā ghorarūpā ghanaśroṇī ghanaprabhā |
daityendraprabalā ghaṇṭāvādinī ghoranisvanā || 30 ||
ḍākinyumā upendrā ca urvaśī uragāsanā |
uttamā unnatā unnā uttamasthānavāsinī || 31 ||
cāmuṇḍā muṇḍikā caṇḍī caṇḍadarpahareti ca |
ugracaṇḍā caṇḍacaṇḍā caṇḍadaityavināśinī || 32 ||
caṇḍarūpā pracaṇḍā ca caṇḍācaṇḍaśarīriṇī |
caturbhujā pracaṇḍā ca carācaranivāsinī || 33 ||
kṣatraprāyaḥ śirovāhā chalāchalatarā chalī |
kṣatrarūpā kṣatradharā kṣatriyakṣayakāriṇī || 34 ||
jayā ca jayadurgā ca jayantī jayadā parā |
jāyinī jayinī jyotsnājaṭādharapriyā’jitā || 35 ||
jitendriyā jitakrodhā jayamānā janeśvarī |
jitamṛtyurjarātītā jāhnavī janakātmajā || 36 ||
jhaṅkārā jhañjharījhaṇṭā jhaṅkārījhakaśobhinī |
jhakhājhameśā jhaṅkārīyonikalyāṇadāyinī || 37 ||
jharjharā jhamurījhārā jharājharatarā parā |
jhañjhājhametā jhaṅkārījhaṇākalyāṇadāyinī || 38 ||
ṅamanāmānasīcintyā ṅamunāśaṅkarapriyā |
ṭaṅkārīṭiṭikā ṭīkāṭaṅkinī ca ṭavargagā || 39 ||
ṭāpāṭopā ṭaṭapatiṣṭamanī ṭamanapriyā |
ṭhakāradhāriṇī ṭhīkāṭhaṅkarī ṭhikarapriyā || 40 ||
ṭhekaṭhāsā ṭhakaratīṭhāminī ṭhamanapriyā |
ḍārahā ḍākinī ḍārāḍāmarā ḍāmarapriyā || 41 ||
ḍakhinīḍaḍayuktā ca ḍamarūkaravallabhā |
ḍhakkāḍhakkīḍhakkanādā ḍholaśabdaprabodhinī || 42 ||
ḍhāminī ḍhāmanaprītā ḍhagatantraprakāśinī |
anekarūpiṇī ambā aṇimāsiddhidāyinī || 43 ||
āmantriṇī aṇukarī aṇumadbhānusaṃsthitā |
tārātantravatī tantratattvarūpā tapasvinī || 44 ||
taraṅgiṇī tattvaparā tantrikā tantravigrahā |
taporūpā tattvadātrī tapaḥprītipradharṣiṇī || 45 ||
tantrayantrārcanaparā talātalanivāsinī |
talpadā tvalpadā kāmāsthirā sthiratarā sthitiḥ || 46 ||
sthāṇupriyā sthitiparā sthitāsthānapradāyinī |
digambarā dayārūpā dāvāgnidamanī damā || 47 ||
durgā durgaparādevī duṣṭadaityavināśinī |
damanapramadā daityadayādānaparāyaṇā || 48 ||
durgārtināśinī dāntā dambhinī dambhavarjitā |
digambarapriyā dambhā daityadambhavidāriṇī || 49 ||
damanāśanasaundaryā dānavendravināśinī |
dayādharā ca damanī darbhapatravilāsinī || 50 ||
dharaṇīdhāriṇī dhātrī dharādharadharapriyā |
dharādharasutā devī sudharmā dharmacāriṇī || 51 ||
dharmajñā dhavalā dhūlā dhanadā dhanavardhinī |
dhīrā’dhīrā dhīratarā dhīrasiddhipradāyinī || 52 ||
dhanvantaridharādhīrā dhyeyadhyānasvarūpiṇī |
nārāyaṇī nārasiṃhī nityānandā narottamā || 53 ||
naktā’naktavatī nityā nīlajīmūtasannibhā |
nīlāṅgī nīlavastrā ca nīlaparvatavāsinī || 54 ||
sunīlapuṣpakhacitā nīlajambūsamaprabhā |
nityākhyā ṣoḍaśī vidyā nityā’nityasukhāvahā || 55 ||
narmadā nandanānandā nandānandavivardhinī |
yaśodānandatanayā nandanodyānavāsinī || 56 ||
nāgāntakā nāgavṛddhā nāgapatnī ca nāginī |
namitāśeṣajanatā namaskāravatī namaḥ || 57 ||
pītāmbarā pārvatī ca pītāmbaravibhūṣitā |
pītamālyāmbaradharā pītābhā piṅgamūrdhajā || 58 ||
pītapuṣpārcanaratā pītapuṣpasamarcitā |
paraprabhā pitṛpatiḥ parasainyavināśinī || 59 ||
paramā paratantrā ca paramantrā parātparā |
parāvidyā parāsiddhiḥ parāsthānapradāyinī || 60 ||
puṣpā puṣpavatī nityā puṣpamālāvibhūṣitā |
purātanā pūrvaparā parasiddhipradāyinī || 61 ||
pītānitambinī pītā pīnonnatapayastanī |
premāpramadhyamāśeṣā padmapatravilāsinī || 62 ||
padmāvatī padmanetrā padmā padmamukhī parā |
padmāsanā padmapriyā padmarāgasvarūpiṇī || 63 ||
pāvanī pālikā pātrī paradā varadā śivā |
pretasaṃsthā parānandā parabrahmasvarūpiṇī || 64 ||
jineśvarapriyā devī paśuraktaratapriyā |
paśumāṃsapriyā’parṇā parāmṛtaparāyaṇā || 65 ||
pāśinī pāśikā cāpi paśughnī paśubhāṣiṇī |
phullāravindavadanī phullotpalaśarīriṇī || 66 ||
parānandapradā vīṇā paśupāśavināśinī |
phūtkārā phūtparā pheṇī phullendīvaralocanā || 67 ||
phaṭmantrā sphaṭikā svāhā sphoṭā ca phaṭsvarūpiṇī |
sphāṭikāghuṭikā ghorā sphaṭikādrisvarūpiṇī || 68 ||
varāṅganā varadharā vārāhī vāsukī varā |
bindusthā bindunīvāṇī binducakranivāsinī || 69 ||
vidyādharī viśālākṣī kāśīvāsijanapriyā |
vedavidyā virūpākṣī viśvayugbahurūpiṇī || 70 ||
brahmaśaktirviṣṇuśaktiḥ pañcavaktrā śivapriyā |
vaikuṇṭhavāsinī devī vaikuṇṭhapadadāyinī || 71 ||
brahmarūpā viṣṇurūpā parabrahmamaheśvarī |
bhavapriyā bhavodbhavā bhavarūpā bhavottamā || 72 ||
bhavapārā bhavādhārā bhāgyavatpriyakāriṇī |
bhadrā subhadrā bhavadā śumbhadaityavināśinī || 73 ||
bhavānī bhairavī bhīmā bhadrakālī subhadrikā |
bhaginī bhagarūpā ca bhagamānā bhagottamā || 74 ||
bhagapriyā bhagavatī bhagavāsā bhagākarā |
bhagasṛṣṭā bhāgyavatī bhagarūpā bhagāsinī || 75 ||
bhagaliṅgapriyā devī bhagaliṅgaparāyaṇā |
bhagaliṅgasvarūpā ca bhagaliṅgavinodinī || 76 ||
bhagaliṅgaratā devī bhagaliṅganivāsinī |
bhagamālā bhagakalā bhagādhārā bhagāmbarā || 77 ||
bhagavegā bhagābhūṣā bhagendrā bhāgyarūpiṇī |
bhagaliṅgāṅgasambhogā bhagaliṅgāsavāvahā || 78 ||
bhagaliṅgasamādhuryā bhagaliṅganiveśitā |
bhagaliṅgasupūjā ca bhagaliṅgasamanvitā || 79 ||
bhagaliṅgaviraktā ca bhagaliṅgasamāvṛtā |
mādhavī mādhavīmānyā madhurā madhumāninī || 80 ||
mandahāsā mahāmāyā mohinī mahaduttamā |
mahāmohā mahāvidyā mahāghorā mahāsmṛtiḥ || 81 ||
manasvinī mānavatī modinī madhurānanā |
menakā māninī mānyā maṇiratnavibhūṣaṇā || 82 ||
mallikāmaulikāmālā mālādharamadottamā |
madanāsundarī medhā madhumattā madhupriyā || 83 ||
mattahaṃsāsamonnāsā mattasiṃhamahāsanī |
mahendravallabhā bhīmā maulyaṃ ca mithunātmajā || 84 ||
mahākālyā mahākālī mahābuddhirmahotkaṭā |
māheśvarī mahāmāyā mahiṣāsuraghātinī || 85 ||
madhurākīrtimattā ca mattamātaṅgagāminī |
madapriyā māṃsaratā mattayukkāmakāriṇī || 86 ||
maithunyavallabhā devī mahānandā mahotsavā |
marīcirmāratirmāyā manobuddhipradāyinī || 87 ||
mohā mokṣā mahālakṣmīrmahatpadapradāyinī |
yamarūpā ca yamunā jayantī ca jayapradā || 88 ||
yāmyā yamavatī yuddhā yadoḥ kulavivardhinī |
ramā rāmā rāmapatnī ratnamālāratipriyā || 89 ||
ratnasiṃhāsanasthā ca ratnābharaṇamaṇḍitā |
ramaṇī ramaṇīyā ca ratyārasaparāyaṇā || 90 ||
ratānandā ratavatī raghūṇāṃ kulavardhinī |
ramaṇāriparibhrājyā raidhā rādhikaratnajā || 91 ||
rāvīrasasvarūpā ca rātrirājasukhāvahā |
ṛtujā ṛtudā ṛddhā ṛturūpā ṛtupriyā || 92 ||
raktapriyā raktavatī raṅgiṇī raktadantikā |
lakṣmīrlajjā latikā ca līlālagnānitākṣiṇī || 93 ||
līlā līlāvatī lomaharṣāhlādanapaṭṭikā |
brahmasthitā brahmarūpā brahmaṇā vedavanditā || 94 ||
brahmodbhavā brahmakalā brahmāṇī brahmabodhinī |
vedāṅganā vedarūpā vanitā vinatāvasā || 95 ||
bālā ca yuvatī vṛddhā brahmakarmaparāyaṇā |
vindhyasthā vindhyavāsī ca binduyugbindubhūṣaṇā || 96 ||
vidyāvatī vedadhārī vyāpikā barhiṇīkalā |
vāmācārapriyā vahnirvāmācāraparāyaṇā || 97 ||
vāmācāraratā devī vāmadevapriyottamā |
buddhendriyā vibuddhā ca buddhācaraṇamālinī || 98 ||
bandhamocanakartrī ca vāruṇā varuṇālayā |
śivā śivapriyā śuddhā śuddhāṅgī śuklavarṇikā || 99 ||
śuklapuṣpapriyā śuklā śivadharmaparāyaṇā |
śuklasthā śuklinī śuklarūpā śuklapaśupriyā || 100 ||
śukrasthā śukriṇī śukrā śukrarūpā ca śukrikā |
ṣaṇmukhī ca ṣaḍaṅgā ca ṣaṭcakravinivāsinī || 101 ||
ṣaḍgranthiyuktā ṣoḍhā ca ṣaṇmātā ca ṣaḍātmikā |
ṣaḍaṅgayuvatī devī ṣaḍaṅgaprakṛtirvaśī || 102 ||
ṣaḍānanā ṣaḍrasā ca ṣaṣṭhī ṣaṣṭheśvarīpriyā |
ṣaḍjavādā ṣoḍaśī ca ṣoḍhānyāsasvarūpiṇī || 103 ||
ṣaṭcakrabhedanakarī ṣaṭcakrasthasvarūpiṇī |
ṣoḍaśasvararūpā ca ṣaṇmukhī ṣaṭpadānvitā || 104 || [ṣaḍradānvitā]
sanakādisvarūpā ca śivadharmaparāyaṇā |
siddhasaptasvarī śuddhā suramātā surottamā || 105 || [svarottamā]
siddhavidyā siddhamātā siddhā’siddhasvarūpiṇī |
harā haripriyāhārā hariṇī hārayuk tathā || 106 ||
harirūpā haridharā hariṇākṣī haripriyā |
hetupriyā heturatā hitā’hitasvarūpiṇī || 107 ||
kṣamā kṣamāvatī kṣītā kṣudraghaṇṭāvibhūṣaṇā |
kṣayaṅkarī kṣitīśā ca kṣīṇamadhyasuśobhanā || 108 ||
ajānantā aparṇā ca ahalyā śeṣaśāyinī |
svāntargatā ca sādhūnāmantarānandarūpiṇī || 109 ||
arūpā amalā cārdhā anantaguṇaśālinī |
svavidyā vidyakāvidyā vidyā cārvīndulocanā || 110 ||
aparājitā jātavedā ajapā amarāvatī |
alpā svalpā analpādyā aṇimāsiddhidāyinī || 111 ||
aṣṭasiddhipradā devī rūpalakṣaṇasamyutā |
aravindamukhā devī bhogasaukhyapradāyinī || 112 ||
ādividyā ādibhūtā ādisiddhipradāyinī |
sītkārarūpiṇī devī sarvāsanavibhūṣitā || 113 ||
indrapriyā ca indrāṇī indraprasthanivāsinī |
indrākṣī indravajrā ca indramadyokṣaṇī tathā || 114 ||
īlākāmanivāsā ca īśvarīśvaravallabhā |
jananī ceśvarī dīnā bhedā ceśvarakarmakṛt || 115 ||
umā kātyāyanī ūrdhvā mīnā cottaravāsinī |
umāpatipriyā devī śivā coṅkārarūpiṇī || 116 ||
uragendraśiroratnā uragoragavallabhā |
udyānavāsinīmālā praśastamaṇibhūṣaṇā || 117 ||
ūrdhvadantottamāṅgī ca uttamā cordhvakeśinī |
umāsiddhipradā yā ca uragāsanasaṃsthitā || 118 ||
ṛṣiputrī ṛṣicchandā ṛṣisiddhipradāyinī |
utsavotsavasīmantā kāmikā ca guṇānvitā || 119 ||
elā ekāravidyā ca eṇīvidyādharā tathā |
oṅkāravalayopetā oṅkāraparamākalā || 120 ||
oṃvadavadavāṇī ca oṅkārākṣaramaṇḍitā |
aindrī kuliśahastā ca oṃlokaparavāsinī || 121 ||
oṅkāramadhyabījā ca oṃnamorūpadhāriṇī |
parabrahmasvarūpā ca aṃśukāṃśukavallabhā || 122 ||
oṅkārā aḥphaṭ mantrā ca akṣākṣaravibhūṣitā |
amantrā mantrarūpā ca padaśobhāsamanvitā || 123 ||
praṇavoṅkārarūpā ca praṇavoccārabhāk punaḥ |
hrīṅkārarūpā hrīṅkārī vāgbījākṣarabhūṣaṇā || 124 ||
hṛllekhā siddhiyogā ca hṛtpadmāsanasaṃsthitā |
bījākhyā netrahṛdayā hrīmbījā bhuvaneśvarī || 125 ||
klīṅkāmarājā klinnā ca caturvargaphalapradā |
klīṅklīṅklīṃrūpikā devī krīṅkrīṅkrīṃnāmadhāriṇī || 126 ||
kamalāśaktibījā ca pāśāṅkuśavibhūṣitā |
śrīṃśrīṅkārā mahāvidyā śraddhā śraddhāvatī tathā || 127 ||
oṃ aiṃ klīṃ hrīṃ śrīṃ parā ca klīṅkārī paramā kalā |
hrīṃ klīṃ śrīṅkārasvarūpā sarvakarmaphalapradā || 128 ||
sarvāḍhyā sarvadevī ca sarvasiddhipradā tathā |
sarvajñā sarvaśaktiśca vāgvibhūtipradāyinī || 129 ||
sarvamokṣapradā devī sarvabhogapradāyinī |
guṇendravallabhā vāmā sarvaśaktipradāyinī || 130 ||
sarvānandamayī caiva sarvasiddhipradāyinī |
sarvacakreśvarī devī sarvasiddheśvarī tathā || 131 ||
sarvapriyaṅkarī caiva sarvasaukhyapradāyinī |
sarvānandapradā devī brahmānandapradāyinī || 132 ||
manovāñchitadātrī ca manobuddhisamanvitā |
akārādikṣakārāntā durgā durgārtināśinī || 133 ||
padmanetrā sunetrā ca svadhā svāhā vaṣaṭkarī |
svavargā devavargā ca tavargā ca samanvitā || 134 ||
antasthā veśmarūpā ca navadurgā narottamā |
tattvasiddhipradā nīlā tathā nīlapatākinī || 135 ||
nityarūpā niśākārī stambhinī mohinīti ca |
vaśaṅkarī tathoccāṭī unmādī karṣiṇīti ca || 136 ||
mātaṅgī madhumattā ca aṇimā laghimā tathā |
siddhā mokṣapradā nityā nityānandapradāyinī || 137 ||
raktāṅgī raktanetrā ca raktacandanabhūṣitā |
svalpasiddhiḥ sukalpā ca divyacāraṇaśukrabhā || 138 ||
saṅkrāntiḥ sarvavidyā ca saptavāsarabhūṣitā | [sasyavāsara-]
prathamā ca dvitīyā ca tṛtīyā ca caturthikā || 139 ||
pañcamī caiva ṣaṣṭhī ca viśuddhā saptamī tathā |
aṣṭamī navamī caiva daśamyekādaśī tathā || 140 ||
dvādaśī trayodaśī ca caturdaśyatha pūrṇimā |
amāvāsyā tathā pūrvā uttarā paripūrṇimā || 141 ||
khaḍginī cakriṇī ghorā gadinī śūlinī tathā |
bhuśuṇḍī cāpinī bāṇā sarvāyudhavibhūṣaṇā || 142 ||
kuleśvarī kulavatī kulācāraparāyaṇā |
kulakarmasuraktā ca kulācārapravardhinī || 143 ||
kīrtiḥ śrīśca ramā rāmā dharmāyai satataṃ namaḥ |
kṣamā dhṛtiḥ smṛtirmedhā kalpavṛkṣanivāsinī || 144 ||
ugrā ugraprabhā gaurī vedavidyāvibodhinī |
sādhyā siddhā susiddhā ca viprarūpā tathaiva ca || 145 ||
kālī karālī kālyā ca kāladaityavināśinī |
kaulinī kālikī caiva kacaṭatapavargikā || 146 ||
jayinī jayayuktā ca jayadā jṛmbhiṇī tathā |
srāviṇī drāviṇī devī bheruṇḍā vindhyavāsinī || 147 || [bharuṇḍā]
jyotirbhūtā ca jayadā jvālāmālāsamākulā |
bhinnābhinnaprakāśā ca vibhinnā bhinnarūpiṇī || 148 ||
aśvinī bharaṇī caiva nakṣatrasambhavānilā |
kāśyapī vinatākhyātā ditijā ditireva ca || 149 ||
kīrtiḥ kāmapriyā devī kīrtyakīrtivivardhinī |
sadyomāṃsasamālabdhā sadyaśchinnāsiśaṅkarā || 150 ||
dakṣiṇā cottarā pūrvā paścimā dik tathaiva ca |
agninairṛtivāyavyā īśānyādik tathā smṛtā || 151 ||
ūrdhvāṅgādhogatā śvetā kṛṣṇā raktā ca pītakā |
caturvargā caturvarṇā caturmātrātmikākṣarā || 152 ||
caturmukhī caturvedā caturvidyā caturmukhā |
caturgaṇā caturmātā caturvargaphalapradā || 153 ||
dhātrīvidhātrīmithunā nārīnāyakavāsinī |
surāmudā mudavatī modinī menakātmajā || 154 ||
ūrdhvakālī siddhikālī dakṣiṇākālikā śivā |
nīlasarasvatī sā tvaṃ bagalā chinnamastakā || 155 ||
sarveśvarī siddhavidyā parā paramadevatā |
hiṅgulā hiṅgulāṅgī ca hiṅgulādharavāsinī || 156 ||
hiṅgulottamavarṇābhā hiṅgulābharaṇā ca sā |
jāgratī ca jaganmātā jagadīśvaravallabhā || 157 ||
janārdanapriyā devī jayayuktā jayapradā |
jagadānandakarī ca jagadāhlādakāriṇī || 158 ||
jñānadānakarī yajñā jānakī janakapriyā |
jayantī jayadā nityā jvaladagnisamaprabhā || 159 ||
vidyādharā ca bimboṣṭhī kailāsācalavāsinī |
vibhavā vaḍavāgniśca agnihotraphalapradā || 160 ||
mantrarūpā parā devī tathaiva gururūpiṇī |
gayā gaṅgā gomatī ca prabhāsā puṣkarā’pi ca || 161 ||
vindhyācalaratā devī vindhyācalanivāsinī |
bahū bahusundarī ca kaṃsāsuravināśinī || 162 ||
śūlinī śūlahastā ca vajrā vajraharā’pi ca |
durgā śivā śāntikarī brahmāṇī brāhmaṇapriyā || 163 ||
sarvalokapraṇetrī ca sarvarogaharā’pi ca |
maṅgalā śobhanā śuddhā niṣkalā paramā kalā || 164 ||
viśveśvarī viśvamātā lalitāvāsitānanā |
sadāśivā umā kṣemā caṇḍikā caṇḍavikramā || 165 ||
sarvadevamayī devī sarvāgamabhayāpahā |
brahmeśaviṣṇunamitā sarvakalyāṇakāriṇī || 166 ||
yoginī yogamātā ca yogīndrahṛdayasthitā |
yogijāyā yogavatī yogīndrānandayoginī || 167 ||
indrādinamitā devī īśvarī ceśvarapriyā |
viśuddhidā bhayaharā bhaktadveṣibhayaṅkarī || 168 ||
bhavaveṣā kāminī ca bheruṇḍā bhayakāriṇī |
balabhadrapriyākārā saṃsārārṇavatāriṇī || 169 ||
pañcabhūtā sarvabhūtā vibhūtirbhūtidhāriṇī |
siṃhavāhā mahāmohā mohapāśavināśinī || 170 ||
mandurā madirā mudrā’mudrā mudgaradhāriṇī |
sāvitrī ca mahādevī parapriyavināyikā || 171 ||
yamadūtī ca piṅgākṣī vaiṣṇavī śaṅkarī tathā |
candrapriyā candraratā candanāraṇyavāsinī || 172 ||
candanendrasamāyuktā caṇḍadaityavināśinī |
sarveśvarī yakṣiṇī ca kirātī rākṣasī tathā || 173 ||
mahābhogavatī devī mahāmokṣapradāyinī |
viśvahantrī viśvarūpā viśvasaṃhārakāriṇī || 174 ||
dhātrī ca sarvalokānāṃ hitakāraṇakāminī |
kamalā sūkṣmadā devī dhātrī haravināśinī || 175 ||
surendrapūjitā siddhā mahātejovatīti ca |
parārūpavatī devī trailokyākarṣakāriṇī || 176 ||
phalaśrutiḥ –
iti te kathitaṃ devi pītānāmasahasrakam |
paṭhedvā pāṭhayedvāpi sarvasiddhirbhavet priye || 177 ||
iti te viṣṇunā proktaṃ mahāstambhakaraṃ param |
prātaḥ kāle ca madhyāhne sandhyākāle ca pārvati || 178 ||
ekacittaḥ paṭhedetat sarvasiddhirbhaviṣyati |
ekavāraṃ paṭhedyastu sarvapāpakṣayo bhavet || 179 ||
dvivāraṃ prapaṭhedyastu vighneśvarasamo bhavet |
trivāraṃ paṭhanāddevi sarvaṃ siddhyati sarvathā || 180 ||
stavasyā’sya prabhāveṇa sākṣādbhavati suvrate |
mokṣārthī labhate mokṣaṃ dhanārthī labhate dhanam || 181 ||
vidyārthī labhate vidyāṃ tarkavyākaraṇānvitām |
mahitvaṃ vatsarāntācca śatruhāniḥ prajāyate || 182 ||
kṣoṇīpatirvaśastasya smaraṇe sadṛśo bhavet |
yaḥ paṭhet sarvadā bhaktyā śreyastu bhavati priye || 183 ||
gaṇādhyakṣapratinidhiḥ kavikāvyaparo varaḥ |
gopanīyaṃ prayatnena jananījāravatsadā || 184 ||
hetuyukto bhavennityaṃ śaktiyuktaḥ sadā bhavet |
ya idaṃ paṭhate nityaṃ śivena sadṛśo bhavet || 185 ||
jīvan dharmārthabhogī syānmṛto mokṣapatirbhavet |
satyaṃ satyaṃ mahādevi satyaṃ satyaṃ na saṃśayaḥ || 186 ||
stavasyāsya prabhāveṇa devena saha modate |
sucittāśca surāḥ sarve stavarājasya kīrtanāt || 187 ||
pītāmbaraparīdhānā pītagandhānulepanā |
paramodayakīrtiḥ syāt smarataḥ surasundari || 188 ||
iti śrīutkaṭaśambare nāgendraprayāṇatantre ṣoḍaśasahasre viṣṇuśaṅkarasaṃvāde śrī bagalāmukhī sahasranāma stotram ||
Leave a Comment