ගෝපිකා ගීතා (භාගවත පුරාණ)

gopika geetha bhagavatha purana in sinhala

ගෝප්ය ඌචුඃ ।
ජයති තේऽධිකං ජන්මනා ව්රජඃ
ශ්රයත ඉංදිරා ශශ්වදත්ර හි ।
දයිත දෘශ්යතාං දික්ෂු තාවකා-
ස්ත්වයි ධෘතාසවස්ත්වාං විචින්වතේ ॥ 1॥

ශරදුදාශයේ සාධුජාතස-
ත්සරසිජෝදරශ්රීමුෂා දෘශා ।
සුරතනාථ තේऽශුල්කදාසිකා
වරද නිඝ්නතෝ නේහ කිං වධඃ ॥ 2॥

විෂජලාප්යයාද්ව්යාලරාක්ෂසා-
ද්වර්ෂමාරුතාද්වෛද්යුතානලාත් ।
වෘෂමයාත්මජාද්විශ්වතෝභයා-
දෘෂභ තේ වයං රක්ෂිතා මුහුඃ ॥ 3॥

න ඛලු ගෝපිකානංදනෝ භවා-
නඛිලදේහිනාමංතරාත්මදෘක් ।
විඛනසාර්ථිතෝ විශ්වගුප්තයේ
සඛ උදේයිවාන්සාත්වතාං කුලේ ॥ 4॥

විරචිතාභයං වෘෂ්ණිධුර්ය තේ
චරණමීයුෂාං සංසෘතේර්භයාත් ।
කරසරෝරුහං කාංත කාමදං
ශිරසි ධේහි නඃ ශ්රීකරග්රහම් ॥ 5॥

ව්රජජනාර්තිහන්වීර යෝෂිතාං
නිජජනස්මයධ්වංසනස්මිත ।
භජ සඛේ භවත්කිංකරීඃ ස්ම නෝ
ජලරුහානනං චාරු දර්ශය ॥ 6॥

ප්රණතදේහිනාං පාපකර්ශනං
තෘණචරානුගං ශ්රීනිකේතනම් ।
ඵණිඵණාර්පිතං තේ පදාංබුජං
කෘණු කුචේෂු නඃ කෘංධි හෘච්ඡයම් ॥ 7॥

මධුරයා ගිරා වල්ගුවාක්යයා
බුධමනෝජ්ඤයා පුෂ්කරේක්ෂණ ।
විධිකරීරිමා වීර මුහ්යතී-
රධරසීධුනාऽऽප්යායයස්ව නඃ ॥ 8॥

තව කථාමෘතං තප්තජීවනං
කවිභිරීඩිතං කල්මෂාපහම් ।
ශ්රවණමංගලං ශ්රීමදාතතං
භුවි ගෘණංති තේ භූරිදා ජනාඃ ॥ 9॥

ප්රහසිතං ප්රිය ප්රේමවීක්ෂණං
විහරණං ච තේ ධ්යානමංගලම් ।
රහසි සංවිදෝ යා හෘදිස්පෘශඃ
කුහක නෝ මනඃ ක්ෂෝභයංති හි ॥ 10॥

චලසි යද්ව්රජාච්චාරයන්පශූන්
නලිනසුංදරං නාථ තේ පදම් ।
ශිලතෘණාංකුරෛඃ සීදතීති නඃ
කලිලතාං මනඃ කාංත ගච්ඡති ॥ 11॥

දිනපරික්ෂයේ නීලකුංතලෛ-
ර්වනරුහානනං බිභ්රදාවෘතම් ।
ඝනරජස්වලං දර්ශයන්මුහු-
ර්මනසි නඃ ස්මරං වීර යච්ඡසි ॥ 12॥

ප්රණතකාමදං පද්මජාර්චිතං
ධරණිමංඩනං ධ්යේයමාපදි ।
චරණපංකජං ශංතමං ච තේ
රමණ නඃ ස්තනේෂ්වර්පයාධිහන් ॥ 13॥

සුරතවර්ධනං ශෝකනාශනං
ස්වරිතවේණුනා සුෂ්ඨු චුංබිතම් ।
ඉතරරාගවිස්මාරණං නෘණාං
විතර වීර නස්තේऽධරාමෘතම් ॥ 14॥

අටති යද්භවානහ්නි කානනං
ත්රුටිර්යුගායතේ ත්වාමපශ්යතාම් ।
කුටිලකුංතලං ශ්රීමුඛං ච තේ
ජඩ උදීක්ෂතාං පක්ෂ්මකෘද්දෘශාම් ॥ 15॥

පතිසුතාන්වයභ්රාතෘබාංධවා-
නතිවිලංඝ්ය තේऽංත්යච්යුතාගතාඃ ।
ගතිවිදස්තවෝද්ගීතමෝහිතාඃ
කිතව යෝෂිතඃ කස්ත්යජේන්නිශි ॥ 16॥

රහසි සංවිදං හෘච්ඡයෝදයං
ප්රහසිතානනං ප්රේමවීක්ෂණම් ।
බෘහදුරඃ ශ්රියෝ වීක්ෂ්ය ධාම තේ
මුහුරතිස්පෘහා මුහ්යතේ මනඃ ॥ 17॥

ව්රජවනෞකසාං ව්යක්තිරංග තේ
වෘජිනහංත්ර්යලං විශ්වමංගලම් ।
ත්යජ මනාක් ච නස්ත්වත්ස්පෘහාත්මනාං
ස්වජනහෘද්රුජාං යන්නිෂූදනම් ॥ 18॥

යත්තේ සුජාතචරණාංබුරුහං ස්තනේෂ
භීතාඃ ශනෛඃ ප්රිය දධීමහි කර්කශේෂු ।
තේනාටවීමටසි තද්ව්යථතේ න කිංස්විත්
කූර්පාදිභිර්භ්රමති ධීර්භවදායුෂාං නඃ ॥ 19॥

ඉති ශ්රීමද්භාගවත මහාපුරාණේ පාරමහංස්යාං සංහිතායාං
දශමස්කංධේ පූර්වාර්ධේ රාසක්රීඩායාං ගෝපීගීතං නාමෛකත්රිංශෝऽධ්යායඃ ॥

gopika geetha bhagavatha purana in sinhala