Pitru Stotram 2 (Garuda Puranam)

Pitru Stotram 2 (Garuda Puranam)

ruchiruvācha ।
architānāmamūrtānāṃ pitṝṇāṃ dīptatējasām ।
namasyāmi sadā tēṣāṃ dhyānināṃ divyachakṣuṣām ॥ 1 ॥

indrādīnāṃ cha nētārō dakṣamārīchayōstathā ।
saptarṣīṇāṃ tathānyēṣāṃ tānnamasyāmi kāmadān ॥ 2 ॥

manvādīnāṃ cha nētāraḥ sūryāchandramasōstathā ।
tānnamasyāmyahaṃ sarvān pitṝnapyudadhāvapi ॥ 3 ॥

nakṣatrāṇāṃ grahāṇāṃ cha vāyvagnyōrnabhasastathā ।
dyāvāpṛthivyōścha tathā namasyāmi kṛtāñjaliḥ ॥ 4 ॥

dēvarṣīṇāṃ janitṝṃścha sarvalōka namaskṛtān ।
akṣayyasya sadā dātṝn namasyēhaṃ kṛtāñjaliḥ ॥ 5 ॥

prajāpatēḥ kaśyapāya sōmāya varuṇāya cha ।
yōgēśvarēbhyaścha sadā namasyāmi kṛtāñjaliḥ ॥ 6 ॥

namō gaṇēbhyaḥ saptabhyastathā lōkēṣu saptasu ।
svayambhuvē namasyāmi brahmaṇē yōgachakṣuṣē ॥ 7 ॥

sōmādhārān pitṛgaṇān yōgamūrtidharāṃstathā ।
namasyāmi tathā sōmaṃ pitaraṃ jagatāmaham ॥ 8 ॥

agnirūpāṃstathaivānyān namasyāmi pitṝnaham ।
agnisōmamayaṃ viśvaṃ yata ētadaśēṣataḥ ॥ 9 ॥

yē cha tējasi yē chaitē sōmasūryāgnimūrtayaḥ ।
jagatsvarūpiṇaśchaiva tathā brahmasvarūpiṇaḥ ॥ 10 ॥

tēbhyō’khilēbhyō yōgibhyaḥ pitṛbhyō yatamānasaḥ ।
namō namō namastē’stu prasīdantu svadhābhujaḥ ॥ 11 ॥

iti śrī garuḍapurāṇē ūnanavatitamō’dhyāyē ruchikṛta dvitīya pitṛ stōtram ।

Pitru Stotram 2 (Garuda Puranam)