ଶ୍ରୀ ଲକ୍ଷ୍ମୀ ସହସ୍ରନାମ ସ୍ତୋତ୍ରଂ

sri lakshmi sahasra nama stotram in odia

ନାମ୍ନାଂ ସାଷ୍ଟସହସ୍ରଂଚ ବ୍ରୂହି ଗାର୍ଗ୍ୟ ମହାମତେ ।
ମହାଲକ୍ଷ୍ମ୍ୟା ମହାଦେଵ୍ୟା ଭୁକ୍ତିମୁକ୍ତ୍ୟର୍ଥସିଦ୍ଧୟେ ॥ 1 ॥

ଗାର୍ଗ୍ୟ ଉଵାଚ
ସନତ୍କୁମାରମାସୀନଂ ଦ୍ଵାଦଶାଦିତ୍ୟସନ୍ନିଭମ୍ ।
ଅପୃଚ୍ଛନ୍ୟୋଗିନୋ ଭକ୍ତ୍ୟା ୟୋଗିନାମର୍ଥସିଦ୍ଧୟେ ॥ 2 ॥

ସର୍ଵଲୌକିକକର୍ମଭ୍ୟୋ ଵିମୁକ୍ତାନାଂ ହିତାୟ ଵୈ ।
ଭୁକ୍ତିମୁକ୍ତିପ୍ରଦଂ ଜପ୍ୟମନୁବ୍ରୂହି ଦୟାନିଧେ ॥ 3 ॥

ସନତ୍କୁମାର ଭଗଵନ୍ସର୍ଵଜ୍ଞୋଽସି ଵିଶେଷତଃ ।
ଆସ୍ତିକ୍ୟସିଦ୍ଧୟେ ନୄଣାଂ କ୍ଷିପ୍ରଧର୍ମାର୍ଥସାଧନମ୍ ॥ 4 ॥

ଖିଦ୍ୟଂତି ମାନଵାସ୍ସର୍ଵେ ଧନାଭାଵେନ କେଵଲମ୍ ।
ସିଦ୍ଧ୍ୟଂତି ଧନିନୋଽନ୍ୟସ୍ୟ ନୈଵ ଧର୍ମାର୍ଥକାମନାଃ ॥ 5 ॥

ଦାରିଦ୍ର୍ୟଧ୍ଵଂସିନୀ ନାମ କେନ ଵିଦ୍ୟା ପ୍ରକୀର୍ତିତା ।
କେନ ଵା ବ୍ରହ୍ମଵିଦ୍ୟାଽପି କେନ ମୃତ୍ୟୁଵିନାଶିନୀ ॥ 6 ॥

ସର୍ଵାସାଂ ସାରଭୂତୈକା ଵିଦ୍ୟାନାଂ କେନ କୀର୍ତିତା ।
ପ୍ରତ୍ୟକ୍ଷସିଦ୍ଧିଦା ବ୍ରହ୍ମନ୍ ତାମାଚକ୍ଷ୍ଵ ଦୟାନିଧେ ॥ 7 ॥

ସନତ୍କୁମାର ଉଵାଚ
ସାଧୁ ପୃଷ୍ଟଂ ମହାଭାଗାସ୍ସର୍ଵଲୋକହିତୈଷିଣଃ ।
ମହତାମେଷ ଧର୍ମଶ୍ଚ ନାନ୍ୟେଷାମିତି ମେ ମତିଃ ॥ 8 ॥

ବ୍ରହ୍ମଵିଷ୍ଣୁମହାଦେଵମହେଂଦ୍ରାଦିମହାତ୍ମଭିଃ ।
ସଂପ୍ରୋକ୍ତଂ କଥୟାମ୍ୟଦ୍ୟ ଲକ୍ଷ୍ମୀନାମସହସ୍ରକମ୍ ॥ 9 ॥

ୟସ୍ୟୋଚ୍ଚାରଣମାତ୍ରେଣ ଦାରିଦ୍ର୍ୟାନ୍ମୁଚ୍ୟତେ ନରଃ ।
କିଂ ପୁନସ୍ତଜ୍ଜପାଜ୍ଜାପୀ ସର୍ଵେଷ୍ଟାର୍ଥାନଵାପ୍ନୁୟାତ୍ ॥ 10 ॥

ଅସ୍ୟ ଶ୍ରୀଲକ୍ଷ୍ମୀଦିଵ୍ୟସହସ୍ରନାମସ୍ତୋତ୍ରମହାମଂତ୍ରସ୍ୟ ଆନଂଦକର୍ଦମଚିକ୍ଲୀତେଂଦିରାସୁତାଦୟୋ ମହାତ୍ମାନୋ ମହର୍ଷୟଃ ଅନୁଷ୍ଟୁପ୍ଛଂଦଃ ଵିଷ୍ଣୁମାୟା ଶକ୍ତିଃ ମହାଲକ୍ଷ୍ମୀଃ ପରାଦେଵତା ଶ୍ରୀମହାଲକ୍ଷ୍ମୀପ୍ରସାଦଦ୍ଵାରା ସର୍ଵେଷ୍ଟାର୍ଥସିଦ୍ଧ୍ୟର୍ଥେ ଜପେ ଵିନିୟୋଗଃ ।

ଧ୍ୟାନମ୍
ପଦ୍ମନାଭପ୍ରିୟାଂ ଦେଵୀଂ ପଦ୍ମାକ୍ଷୀଂ ପଦ୍ମଵାସିନୀମ୍ ।
ପଦ୍ମଵକ୍ତ୍ରାଂ ପଦ୍ମହସ୍ତାଂ ଵଂଦେ ପଦ୍ମାମହର୍ନିଶମ୍ ॥ 1 ॥

ପୂର୍ଣେଂଦୁଵଦନାଂ ଦିଵ୍ୟରତ୍ନାଭରଣଭୂଷିତାମ୍ ।
ଵରଦାଭୟହସ୍ତାଢ୍ୟାଂ ଧ୍ୟାୟେଚ୍ଚଂଦ୍ରସହୋଦରୀମ୍ ॥ 2 ॥

ଇଚ୍ଛାରୂପାଂ ଭଗଵତସ୍ସଚ୍ଚିଦାନଂଦରୂପିଣୀମ୍ ।
ସର୍ଵଜ୍ଞାଂ ସର୍ଵଜନନୀଂ ଵିଷ୍ଣୁଵକ୍ଷସ୍ସ୍ଥଲାଲୟାମ୍ ।
ଦୟାଲୁମନିଶଂ ଧ୍ୟାୟେତ୍ସୁଖସିଦ୍ଧିସ୍ଵରୂପିଣୀମ୍ ॥ 3 ॥

ସ୍ତୋତ୍ରମ୍
ନିତ୍ୟାଗତାନଂତନିତ୍ୟା ନଂଦିନୀ ଜନରଂଜନୀ ।
ନିତ୍ୟପ୍ରକାଶିନୀ ଚୈଵ ସ୍ଵପ୍ରକାଶସ୍ଵରୂପିଣୀ ॥ 1 ॥

ମହାଲକ୍ଷ୍ମୀର୍ମହାକାଲୀ ମହାକନ୍ୟା ସରସ୍ଵତୀ ।
ଭୋଗଵୈଭଵସଂଧାତ୍ରୀ ଭକ୍ତାନୁଗ୍ରହକାରିଣୀ ॥ 2 ॥

ଈଶାଵାସ୍ୟା ମହାମାୟା ମହାଦେଵୀ ମହେଶ୍ଵରୀ ।
ହୃଲ୍ଲେଖା ପରମା ଶକ୍ତିର୍ମାତୃକାବୀଜରୂପିଣୀ ॥ 3 ॥

ନିତ୍ୟାନଂଦା ନିତ୍ୟବୋଧା ନାଦିନୀ ଜନମୋଦିନୀ ।
ସତ୍ୟପ୍ରତ୍ୟୟନୀ ଚୈଵ ସ୍ଵପ୍ରକାଶାତ୍ମରୂପିଣୀ ॥ 4 ॥

ତ୍ରିପୁରା ଭୈରଵୀ ଵିଦ୍ୟା ହଂସା ଵାଗୀଶ୍ଵରୀ ଶିଵା ।
ଵାଗ୍ଦେଵୀ ଚ ମହାରାତ୍ରିଃ କାଲରାତ୍ରିସ୍ତ୍ରିଲୋଚନା ॥ 5 ॥

ଭଦ୍ରକାଳୀ କରାଳୀ ଚ ମହାକାଳୀ ତିଲୋତ୍ତମା ।
କାଳୀ କରାଳଵକ୍ତ୍ରାଂତା କାମାକ୍ଷୀ କାମଦା ଶୁଭା ॥ 6 ॥

ଚଂଡିକା ଚଂଡରୂପେଶା ଚାମୁଂଡା ଚକ୍ରଧାରିଣୀ ।
ତ୍ରୈଲୋକ୍ୟଜୟିନୀ ଦେଵୀ ତ୍ରୈଲୋକ୍ୟଵିଜୟୋତ୍ତମା ॥ 7 ॥

ସିଦ୍ଧଲକ୍ଷ୍ମୀଃ କ୍ରିୟାଲକ୍ଷ୍ମୀର୍ମୋକ୍ଷଲକ୍ଷ୍ମୀଃ ପ୍ରସାଦିନୀ ।
ଉମା ଭଗଵତୀ ଦୁର୍ଗା ଚାଂଦ୍ରୀ ଦାକ୍ଷାୟଣୀ ଶିଵା ॥ 8 ॥

ପ୍ରତ୍ୟଂଗିରା ଧରାଵେଲା ଲୋକମାତା ହରିପ୍ରିୟା ।
ପାର୍ଵତୀ ପରମା ଦେଵୀ ବ୍ରହ୍ମଵିଦ୍ୟାପ୍ରଦାୟିନୀ ॥ 9 ॥

ଅରୂପା ବହୁରୂପା ଚ ଵିରୂପା ଵିଶ୍ଵରୂପିଣୀ ।
ପଂଚଭୂତାତ୍ମିକା ଵାଣୀ ପଂଚଭୂତାତ୍ମିକା ପରା ॥ 10 ॥

କାଳୀ ମା ପଂଚିକା ଵାଗ୍ମୀ ହଵିଃପ୍ରତ୍ୟଧିଦେଵତା ।
ଦେଵମାତା ସୁରେଶାନା ଦେଵଗର୍ଭାଽଂବିକା ଧୃତିଃ ॥ 11 ॥

ସଂଖ୍ୟା ଜାତିଃ କ୍ରିୟାଶକ୍ତିଃ ପ୍ରକୃତିର୍ମୋହିନୀ ମହୀ ।
ୟଜ୍ଞଵିଦ୍ୟା ମହାଵିଦ୍ୟା ଗୁହ୍ୟଵିଦ୍ୟା ଵିଭାଵରୀ ॥ 12 ॥

ଜ୍ୟୋତିଷ୍ମତୀ ମହାମାତା ସର୍ଵମଂତ୍ରଫଲପ୍ରଦା ।
ଦାରିଦ୍ର୍ୟଧ୍ଵଂସିନୀ ଦେଵୀ ହୃଦୟଗ୍ରଂଥିଭେଦିନୀ ॥ 13 ॥

ସହସ୍ରାଦିତ୍ୟସଂକାଶା ଚଂଦ୍ରିକା ଚଂଦ୍ରରୂପିଣୀ ।
ଗାୟତ୍ରୀ ସୋମସଂଭୂତିସ୍ସାଵିତ୍ରୀ ପ୍ରଣଵାତ୍ମିକା ॥ 14 ॥

ଶାଂକରୀ ଵୈଷ୍ଣଵୀ ବ୍ରାହ୍ମୀ ସର୍ଵଦେଵନମସ୍କୃତା ।
ସେଵ୍ୟଦୁର୍ଗା କୁବେରାକ୍ଷୀ କରଵୀରନିଵାସିନୀ ॥ 15 ॥

ଜୟା ଚ ଵିଜୟା ଚୈଵ ଜୟଂତୀ ଚାଽପରାଜିତା ।
କୁବ୍ଜିକା କାଲିକା ଶାସ୍ତ୍ରୀ ଵୀଣାପୁସ୍ତକଧାରିଣୀ ॥ 16 ॥

ସର୍ଵଜ୍ଞଶକ୍ତିଶ୍ଶ୍ରୀଶକ୍ତିର୍ବ୍ରହ୍ମଵିଷ୍ଣୁଶିଵାତ୍ମିକା ।
ଇଡାପିଂଗଲିକାମଧ୍ୟମୃଣାଲୀତଂତୁରୂପିଣୀ ॥ 17 ॥

ୟଜ୍ଞେଶାନୀ ପ୍ରଥା ଦୀକ୍ଷା ଦକ୍ଷିଣା ସର୍ଵମୋହିନୀ ।
ଅଷ୍ଟାଂଗୟୋଗିନୀ ଦେଵୀ ନିର୍ବୀଜଧ୍ୟାନଗୋଚରା ॥ 18 ॥

ସର୍ଵତୀର୍ଥସ୍ଥିତା ଶୁଦ୍ଧା ସର୍ଵପର୍ଵତଵାସିନୀ ।
ଵେଦଶାସ୍ତ୍ରପ୍ରଭା ଦେଵୀ ଷଡଂଗାଦିପଦକ୍ରମା ॥ 19 ॥

ଶିଵା ଧାତ୍ରୀ ଶୁଭାନଂଦା ୟଜ୍ଞକର୍ମସ୍ଵରୂପିଣୀ ।
ଵ୍ରତିନୀ ମେନକା ଦେଵୀ ବ୍ରହ୍ମାଣୀ ବ୍ରହ୍ମଚାରିଣୀ ॥ 20 ॥

ଏକାକ୍ଷରପରା ତାରା ଭଵବଂଧଵିନାଶିନୀ ।
ଵିଶ୍ଵଂଭରା ଧରାଧାରା ନିରାଧାରାଽଧିକସ୍ଵରା ॥ 21 ॥

ରାକା କୁହୂରମାଵାସ୍ୟା ପୂର୍ଣିମାଽନୁମତିର୍ଦ୍ୟୁତିଃ ।
ସିନୀଵାଲୀ ଶିଵାଽଵଶ୍ୟା ଵୈଶ୍ଵଦେଵୀ ପିଶଂଗିଲା ॥ 22 ॥

ପିପ୍ପଲା ଚ ଵିଶାଲାକ୍ଷୀ ରକ୍ଷୋଘ୍ନୀ ଵୃଷ୍ଟିକାରିଣୀ ।
ଦୁଷ୍ଟଵିଦ୍ରାଵିଣୀ ଦେଵୀ ସର୍ଵୋପଦ୍ରଵନାଶିନୀ ॥ 23 ॥

ଶାରଦା ଶରସଂଧାନା ସର୍ଵଶସ୍ତ୍ରସ୍ଵରୂପିଣୀ ।
ୟୁଦ୍ଧମଧ୍ୟସ୍ଥିତା ଦେଵୀ ସର୍ଵଭୂତପ୍ରଭଂଜନୀ ॥ 24 ॥

ଅୟୁଦ୍ଧା ୟୁଦ୍ଧରୂପା ଚ ଶାଂତା ଶାଂତିସ୍ଵରୂପିଣୀ ।
ଗଂଗା ସରସ୍ଵତୀଵେଣୀୟମୁନାନର୍ମଦାପଗା ॥ 25 ॥

ସମୁଦ୍ରଵସନାଵାସା ବ୍ରହ୍ମାଂଡଶ୍ରୋଣିମେଖଲା ।
ପଂଚଵକ୍ତ୍ରା ଦଶଭୁଜା ଶୁଦ୍ଧସ୍ଫଟିକସନ୍ନିଭା ॥ 26 ॥

ରକ୍ତା କୃଷ୍ଣା ସିତା ପୀତା ସର୍ଵଵର୍ଣା ନିରୀଶ୍ଵରୀ ।
କାଳିକା ଚକ୍ରିକା ଦେଵୀ ସତ୍ୟା ତୁ ଵଟୁକାସ୍ଥିତା ॥ 27 ॥

ତରୁଣୀ ଵାରୁଣୀ ନାରୀ ଜ୍ୟେଷ୍ଠାଦେଵୀ ସୁରେଶ୍ଵରୀ ।
ଵିଶ୍ଵଂଭରାଧରା କର୍ତ୍ରୀ ଗଳାର୍ଗଳଵିଭଂଜନୀ ॥ 28 ॥

ସଂଧ୍ୟାରାତ୍ରିର୍ଦିଵାଜ୍ୟୋତ୍ସ୍ନା କଲାକାଷ୍ଠା ନିମେଷିକା ।
ଉର୍ଵୀ କାତ୍ୟାୟନୀ ଶୁଭ୍ରା ସଂସାରାର୍ଣଵତାରିଣୀ ॥ 29 ॥

କପିଲା କୀଲିକାଽଶୋକା ମଲ୍ଲିକାନଵମଲ୍ଲିକା । [ ମଲ୍ଲିକାନଵମାଲିକା ]
ଦେଵିକା ନଂଦିକା ଶାଂତା ଭଂଜିକା ଭୟଭଂଜିକା ॥ 30 ॥

କୌଶିକୀ ଵୈଦିକୀ ଦେଵୀ ସୌରୀ ରୂପାଧିକାଽତିଭା ।
ଦିଗ୍ଵସ୍ତ୍ରା ନଵଵସ୍ତ୍ରା ଚ କନ୍ୟକା କମଲୋଦ୍ଭଵା ॥ 31 ॥

ଶ୍ରୀସ୍ସୌମ୍ୟଲକ୍ଷଣାଽତୀତଦୁର୍ଗା ସୂତ୍ରପ୍ରବୋଧିକା ।
ଶ୍ରଦ୍ଧା ମେଧା କୃତିଃ ପ୍ରଜ୍ଞା ଧାରଣା କାଂତିରେଵ ଚ ॥ 32 ॥

ଶ୍ରୁତିଃ ସ୍ମୃତିର୍ଧୃତିର୍ଧନ୍ୟା ଭୂତିରିଷ୍ଟିର୍ମନୀଷିଣୀ ।
ଵିରକ୍ତିର୍ଵ୍ୟାପିନୀ ମାୟା ସର୍ଵମାୟାପ୍ରଭଂଜନୀ ॥ 33 ॥

ମାହେଂଦ୍ରୀ ମଂତ୍ରିଣୀ ସିଂହୀ ଚେଂଦ୍ରଜାଲସ୍ଵରୂପିଣୀ ।
ଅଵସ୍ଥାତ୍ରୟନିର୍ମୁକ୍ତା ଗୁଣତ୍ରୟଵିଵର୍ଜିତା ॥ 34 ॥

ଈଷଣାତ୍ରୟନିର୍ମୁକ୍ତା ସର୍ଵରୋଗଵିଵର୍ଜିତା ।
ୟୋଗିଧ୍ୟାନାଂତଗମ୍ୟା ଚ ୟୋଗଧ୍ୟାନପରାୟଣା ॥ 35 ॥

ତ୍ରୟୀଶିଖା ଵିଶେଷଜ୍ଞା ଵେଦାଂତଜ୍ଞାନରୂପିଣୀ ।
ଭାରତୀ କମଲା ଭାଷା ପଦ୍ମା ପଦ୍ମଵତୀ କୃତିଃ ॥ 36 ॥

ଗୌତମୀ ଗୋମତୀ ଗୌରୀ ଈଶାନା ହଂସଵାହିନୀ ।
ନାରାୟଣୀ ପ୍ରଭାଧାରା ଜାହ୍ନଵୀ ଶଂକରାତ୍ମଜା ॥ 37 ॥

ଚିତ୍ରଘଂଟା ସୁନଂଦା ଶ୍ରୀର୍ମାନଵୀ ମନୁସଂଭଵା ।
ସ୍ତଂଭିନୀ କ୍ଷୋଭିଣୀ ମାରୀ ଭ୍ରାମିଣୀ ଶତ୍ରୁମାରିଣୀ ॥ 38 ॥

ମୋହିନୀ ଦ୍ଵେଷିଣୀ ଵୀରା ଅଘୋରା ରୁଦ୍ରରୂପିଣୀ ।
ରୁଦ୍ରୈକାଦଶିନୀ ପୁଣ୍ୟା କଲ୍ୟାଣୀ ଲାଭକାରିଣୀ ॥ 39 ॥

ଦେଵଦୁର୍ଗା ମହାଦୁର୍ଗା ସ୍ଵପ୍ନଦୁର୍ଗାଽଷ୍ଟଭୈରଵୀ ।
ସୂର୍ୟଚଂଦ୍ରାଗ୍ନିରୂପା ଚ ଗ୍ରହନକ୍ଷତ୍ରରୂପିଣୀ ॥ 40 ॥

ବିଂଦୁନାଦକଳାତୀତା ବିଂଦୁନାଦକଳାତ୍ମିକା ।
ଦଶଵାୟୁଜୟାକାରା କଳାଷୋଡଶସଂୟୁତା ॥ 41 ॥

କାଶ୍ୟପୀ କମଲାଦେଵୀ ନାଦଚକ୍ରନିଵାସିନୀ ।
ମୃଡାଧାରା ସ୍ଥିରା ଗୁହ୍ୟା ଦେଵିକା ଚକ୍ରରୂପିଣୀ ॥ 42 ॥

ଅଵିଦ୍ୟା ଶାର୍ଵରୀ ଭୁଂଜା ଜଂଭାସୁରନିବର୍ହିଣୀ ।
ଶ୍ରୀକାୟା ଶ୍ରୀକଲା ଶୁଭ୍ରା କର୍ମନିର୍ମୂଲକାରିଣୀ ॥ 43 ॥

ଆଦିଲକ୍ଷ୍ମୀର୍ଗୁଣାଧାରା ପଂଚବ୍ରହ୍ମାତ୍ମିକା ପରା ।
ଶ୍ରୁତିର୍ବ୍ରହ୍ମମୁଖାଵାସା ସର୍ଵସଂପତ୍ତିରୂପିଣୀ ॥ 44 ॥

ମୃତସଂଜୀଵନୀ ମୈତ୍ରୀ କାମିନୀ କାମଵର୍ଜିତା ।
ନିର୍ଵାଣମାର୍ଗଦା ଦେଵୀ ହଂସିନୀ କାଶିକା କ୍ଷମା ॥ 45 ॥

ସପର୍ୟା ଗୁଣିନୀ ଭିନ୍ନା ନିର୍ଗୁଣା ଖଂଡିତାଶୁଭା ।
ସ୍ଵାମିନୀ ଵେଦିନୀ ଶକ୍ୟା ଶାଂବରୀ ଚକ୍ରଧାରିଣୀ ॥ 46 ॥

ଦଂଡିନୀ ମୁଂଡିନୀ ଵ୍ୟାଘ୍ରୀ ଶିଖିନୀ ସୋମସଂହତିଃ ।
ଚିଂତାମଣିଶ୍ଚିଦାନଂଦା ପଂଚବାଣପ୍ରବୋଧିନୀ ॥ 47 ॥

ବାଣଶ୍ରେଣିସ୍ସହସ୍ରାକ୍ଷୀ ସହସ୍ରଭୁଜପାଦୁକା ।
ସଂଧ୍ୟାଵଲିସ୍ତ୍ରିସଂଧ୍ୟାଖ୍ୟା ବ୍ରହ୍ମାଂଡମଣିଭୂଷଣା ॥ 48 ॥

ଵାସଵୀ ଵାରୁଣୀସେନା କୁଳିକା ମଂତ୍ରରଂଜନୀ ।
ଜିତପ୍ରାଣସ୍ଵରୂପା ଚ କାଂତା କାମ୍ୟଵରପ୍ରଦା ॥ 49 ॥

ମଂତ୍ରବ୍ରାହ୍ମଣଵିଦ୍ୟାର୍ଥା ନାଦରୂପା ହଵିଷ୍ମତୀ ।
ଆଥର୍ଵଣିଃ ଶ୍ରୁତିଃ ଶୂନ୍ୟା କଲ୍ପନାଵର୍ଜିତା ସତୀ ॥ 50 ॥

ସତ୍ତାଜାତିଃ ପ୍ରମାଽମେୟାଽପ୍ରମିତିଃ ପ୍ରାଣଦା ଗତିଃ ।
ଅଵର୍ଣା ପଂଚଵର୍ଣା ଚ ସର୍ଵଦା ଭୁଵନେଶ୍ଵରୀ ॥ 51 ॥

ତ୍ରୈଲୋକ୍ୟମୋହିନୀ ଵିଦ୍ୟା ସର୍ଵଭର୍ତ୍ରୀ କ୍ଷରାଽକ୍ଷରା ।
ହିରଣ୍ୟଵର୍ଣା ହରିଣୀ ସର୍ଵୋପଦ୍ରଵନାଶିନୀ ॥ 52 ॥

କୈଵଲ୍ୟପଦଵୀରେଖା ସୂର୍ୟମଂଡଲସଂସ୍ଥିତା ।
ସୋମମଂଡଲମଧ୍ୟସ୍ଥା ଵହ୍ନିମଂଡଲସଂସ୍ଥିତା ॥ 53 ॥

ଵାୟୁମଂଡଲମଧ୍ୟସ୍ଥା ଵ୍ୟୋମମଂଡଲସଂସ୍ଥିତା ।
ଚକ୍ରିକା ଚକ୍ରମଧ୍ୟସ୍ଥା ଚକ୍ରମାର୍ଗପ୍ରଵର୍ତିନୀ ॥ 54 ॥

କୋକିଲାକୁଲଚକ୍ରେଶା ପକ୍ଷତିଃ ପଂକ୍ତିପାଵନୀ ।
ସର୍ଵସିଦ୍ଧାଂତମାର୍ଗସ୍ଥା ଷଡ୍ଵର୍ଣାଵରଵର୍ଜିତା ॥ 55 ॥

ଶରରୁଦ୍ରହରା ହଂତ୍ରୀ ସର୍ଵସଂହାରକାରିଣୀ ।
ପୁରୁଷା ପୌରୁଷୀ ତୁଷ୍ଟିସ୍ସର୍ଵତଂତ୍ରପ୍ରସୂତିକା ॥ 56 ॥

ଅର୍ଧନାରୀଶ୍ଵରୀ ଦେଵୀ ସର୍ଵଵିଦ୍ୟାପ୍ରଦାୟିନୀ ।
ଭାର୍ଗଵୀ ୟାଜୁଷୀଵିଦ୍ୟା ସର୍ଵୋପନିଷଦାସ୍ଥିତା ॥ 57 ॥ [ ଭୁଜୁଷୀଵିଦ୍ୟା ]
ଵ୍ୟୋମକେଶାଖିଲପ୍ରାଣା ପଂଚକୋଶଵିଲକ୍ଷଣା ।
ପଂଚକୋଶାତ୍ମିକା ପ୍ରତ୍ୟକ୍ପଂଚବ୍ରହ୍ମାତ୍ମିକା ଶିଵା ॥ 58 ॥

ଜଗଜ୍ଜରାଜନିତ୍ରୀ ଚ ପଂଚକର୍ମପ୍ରସୂତିକା ।
ଵାଗ୍ଦେଵ୍ୟାଭରଣାକାରା ସର୍ଵକାମ୍ୟସ୍ଥିତାସ୍ଥିତିଃ ॥ 59 ॥

ଅଷ୍ଟାଦଶଚତୁଷ୍ଷଷ୍ଠିପୀଠିକା ଵିଦ୍ୟୟା ୟୁତା ।
କାଳିକାକର୍ଷଣଶ୍ୟାମା ୟକ୍ଷିଣୀ କିନ୍ନରେଶ୍ଵରୀ ॥ 60 ॥

କେତକୀ ମଲ୍ଲିକାଽଶୋକା ଵାରାହୀ ଧରଣୀ ଧ୍ରୁଵା ।
ନାରସିଂହୀ ମହୋଗ୍ରାସ୍ୟା ଭକ୍ତାନାମାର୍ତିନାଶିନୀ ॥ 61 ॥

ଅଂତର୍ବଲା ସ୍ଥିରା ଲକ୍ଷ୍ମୀର୍ଜରାମରଣନାଶିନୀ ।
ଶ୍ରୀରଂଜିତା ମହାକାୟା ସୋମସୂର୍ୟାଗ୍ନିଲୋଚନା ॥ 62 ॥

ଅଦିତିର୍ଦେଵମାତା ଚ ଅଷ୍ଟପୁତ୍ରାଽଷ୍ଟୟୋଗିନୀ ।
ଅଷ୍ଟପ୍ରକୃତିରଷ୍ଟାଷ୍ଟଵିଭ୍ରାଜଦ୍ଵିକୃତାକୃତିଃ ॥ 63 ॥

ଦୁର୍ଭିକ୍ଷଧ୍ଵଂସିନୀ ଦେଵୀ ସୀତା ସତ୍ୟା ଚ ରୁକ୍ମିଣୀ ।
ଖ୍ୟାତିଜା ଭାର୍ଗଵୀ ଦେଵୀ ଦେଵୟୋନିସ୍ତପସ୍ଵିନୀ ॥ 64 ॥

ଶାକଂଭରୀ ମହାଶୋଣା ଗରୁଡୋପରିସଂସ୍ଥିତା ।
ସିଂହଗା ଵ୍ୟାଘ୍ରଗା ଦେଵୀ ଵାୟୁଗା ଚ ମହାଦ୍ରିଗା ॥ 65 ॥

ଅକାରାଦିକ୍ଷକାରାଂତା ସର୍ଵଵିଦ୍ୟାଧିଦେଵତା ।
ମଂତ୍ରଵ୍ୟାଖ୍ୟାନନିପୁଣା ଜ୍ୟୋତିଶ୍ଶାସ୍ତ୍ରୈକଲୋଚନା ॥ 66 ॥

ଇଡାପିଂଗଳିକାମଧ୍ୟାସୁଷୁମ୍ନା ଗ୍ରଂଥିଭେଦିନୀ ।
କାଲଚକ୍ରାଶ୍ରୟୋପେତା କାଲଚକ୍ରସ୍ଵରୂପିଣୀ ॥ 67 ॥

ଵୈଶାରଦୀ ମତିଶ୍ଶ୍ରେଷ୍ଠା ଵରିଷ୍ଠା ସର୍ଵଦୀପିକା ।
ଵୈନାୟକୀ ଵରାରୋହା ଶ୍ରୋଣିଵେଲା ବହିର୍ଵଲିଃ ॥ 68 ॥

ଜଂଭିନୀ ଜୃଂଭିଣୀ ଜଂଭକାରିଣୀ ଗଣକାରିକା ।
ଶରଣୀ ଚକ୍ରିକାଽନଂତା ସର୍ଵଵ୍ୟାଧିଚିକିତ୍ସକୀ ॥ 69 ॥

ଦେଵକୀ ଦେଵସଂକାଶା ଵାରିଧିଃ କରୁଣାକରା ।
ଶର୍ଵରୀ ସର୍ଵସଂପନ୍ନା ସର୍ଵପାପପ୍ରଭଂଜନୀ ॥ 70 ॥

ଏକମାତ୍ରା ଦ୍ଵିମାତ୍ରା ଚ ତ୍ରିମାତ୍ରା ଚ ତଥାଽପରା ।
ଅର୍ଧମାତ୍ରା ପରା ସୂକ୍ଷ୍ମା ସୂକ୍ଷ୍ମାର୍ଥାଽର୍ଥପରାଽପରା ॥ 71 ॥

ଏକଵୀରା ଵିଶେଷାଖ୍ୟା ଷଷ୍ଠୀଦେଵୀ ମନସ୍ଵିନୀ ।
ନୈଷ୍କର୍ମ୍ୟା ନିଷ୍କଲାଲୋକା ଜ୍ଞାନକର୍ମାଧିକା ଗୁଣା ॥ 72 ॥

ସବଂଧ୍ଵାନଂଦସଂଦୋହା ଵ୍ୟୋମାକାରାଽନିରୂପିତା ।
ଗଦ୍ୟପଦ୍ୟାତ୍ମିକା ଵାଣୀ ସର୍ଵାଲଂକାରସଂୟୁତା ॥ 73 ॥

ସାଧୁବଂଧପଦନ୍ୟାସା ସର୍ଵୌକୋ ଘଟିକାଵଲିଃ ।
ଷଟ୍କର୍ମା କର୍କଶାକାରା ସର୍ଵକର୍ମଵିଵର୍ଜିତା ॥ 74 ॥

ଆଦିତ୍ୟଵର୍ଣା ଚାପର୍ଣା କାମିନୀ ଵରରୂପିଣୀ ।
ବ୍ରହ୍ମାଣୀ ବ୍ରହ୍ମସଂତାନା ଵେଦଵାଗୀଶ୍ଵରୀ ଶିଵା ॥ 75 ॥

ପୁରାଣନ୍ୟାୟମୀମାଂସାଧର୍ମଶାସ୍ତ୍ରାଗମଶ୍ରୁତା ।
ସଦ୍ୟୋଵେଦଵତୀ ସର୍ଵା ହଂସୀ ଵିଦ୍ୟାଧିଦେଵତା ॥ 76 ॥

ଵିଶ୍ଵେଶ୍ଵରୀ ଜଗଦ୍ଧାତ୍ରୀ ଵିଶ୍ଵନିର୍ମାଣକାରିଣୀ ।
ଵୈଦିକୀ ଵେଦରୂପା ଚ କାଲିକା କାଲରୂପିଣୀ ॥ 77 ॥

ନାରାୟଣୀ ମହାଦେଵୀ ସର୍ଵତତ୍ତ୍ଵପ୍ରଵର୍ତିନୀ ।
ହିରଣ୍ୟଵର୍ଣରୂପା ଚ ହିରଣ୍ୟପଦସଂଭଵା ॥ 78 ॥

କୈଵଲ୍ୟପଦଵୀ ପୁଣ୍ୟା କୈଵଲ୍ୟଜ୍ଞାନଲକ୍ଷିତା ।
ବ୍ରହ୍ମସଂପତ୍ତିରୂପା ଚ ବ୍ରହ୍ମସଂପତ୍ତିକାରିଣୀ ॥ 79 ॥

ଵାରୁଣୀ ଵାରୁଣାରାଧ୍ୟା ସର୍ଵକର୍ମପ୍ରଵର୍ତିନୀ ।
ଏକାକ୍ଷରପରାଽଽୟୁକ୍ତା ସର୍ଵଦାରିଦ୍ର୍ୟଭଂଜିନୀ ॥ 80 ॥

ପାଶାଂକୁଶାନ୍ଵିତା ଦିଵ୍ୟା ଵୀଣାଵ୍ୟାଖ୍ୟାକ୍ଷସୂତ୍ରଭୃତ୍ ।
ଏକମୂର୍ତିସ୍ତ୍ରୟୀମୂର୍ତିର୍ମଧୁକୈଟଭଭଂଜିନୀ ॥ 81 ॥

ସାଂଖ୍ୟା ସାଂଖ୍ୟଵତୀ ଜ୍ଵାଲା ଜ୍ଵଲଂତୀ କାମରୂପିଣୀ ।
ଜାଗ୍ରତୀ ସର୍ଵସଂପତ୍ତିସ୍ସୁଷୁପ୍ତା ସ୍ଵେଷ୍ଟଦାୟିନୀ ॥ 82 ॥

କପାଲିନୀ ମହାଦଂଷ୍ଟ୍ରା ଭ୍ରୁକୁଟୀ କୁଟିଲାନନା ।
ସର୍ଵାଵାସା ସୁଵାସା ଚ ବୃହତ୍ୟଷ୍ଟିଶ୍ଚ ଶକ୍ଵରୀ ॥ 83 ॥

ଛଂଦୋଗଣପ୍ରତିଷ୍ଠା ଚ କଲ୍ମାଷୀ କରୁଣାତ୍ମିକା ।
ଚକ୍ଷୁଷ୍ମତୀ ମହାଘୋଷା ଖଡ୍ଗଚର୍ମଧରାଽଶନିଃ ॥ 84 ॥

ଶିଲ୍ପଵୈଚିତ୍ର୍ୟଵିଦ୍ୟୋତା ସର୍ଵତୋଭଦ୍ରଵାସିନୀ ।
ଅଚିଂତ୍ୟଲକ୍ଷଣାକାରା ସୂତ୍ରଭାଷ୍ୟନିବଂଧନା ॥ 85 ॥

ସର୍ଵଵେଦାର୍ଥସଂପତ୍ତିସ୍ସର୍ଵଶାସ୍ତ୍ରାର୍ଥମାତୃକା ।
ଅକାରାଦିକ୍ଷକାରାଂତସର୍ଵଵର୍ଣକୃତସ୍ଥଲା ॥ 86 ॥

ସର୍ଵଲକ୍ଷ୍ମୀସ୍ସଦାନଂଦା ସାରଵିଦ୍ୟା ସଦାଶିଵା ।
ସର୍ଵଜ୍ଞା ସର୍ଵଶକ୍ତିଶ୍ଚ ଖେଚରୀରୂପଗୋଚ୍ଛ୍ରିତା ॥ 87 ॥

ଅଣିମାଦିଗୁଣୋପେତା ପରା କାଷ୍ଠା ପରା ଗତିଃ ।
ହଂସୟୁକ୍ତଵିମାନସ୍ଥା ହଂସାରୂଢା ଶଶିପ୍ରଭା ॥ 88 ॥

ଭଵାନୀ ଵାସନାଶକ୍ତିରାକୃତିସ୍ଥାଖିଲାଽଖିଲା ।
ତଂତ୍ରହେତୁର୍ଵିଚିତ୍ରାଂଗୀ ଵ୍ୟୋମଗଂଗାଵିନୋଦିନୀ ॥ 89 ॥

ଵର୍ଷା ଚ ଵାର୍ଷିକା ଚୈଵ ଋଗ୍ୟଜୁସ୍ସାମରୂପିଣୀ ।
ମହାନଦୀନଦୀପୁଣ୍ୟାଽଗଣ୍ୟପୁଣ୍ୟଗୁଣକ୍ରିୟା ॥ 90 ॥

ସମାଧିଗତଲଭ୍ୟାର୍ଥା ଶ୍ରୋତଵ୍ୟା ସ୍ଵପ୍ରିୟା ଘୃଣା ।
ନାମାକ୍ଷରପରା ଦେଵୀ ଉପସର୍ଗନଖାଂଚିତା ॥ 91 ॥

ନିପାତୋରୁଦ୍ଵୟୀଜଂଘା ମାତୃକା ମଂତ୍ରରୂପିଣୀ ।
ଆସୀନା ଚ ଶୟାନା ଚ ତିଷ୍ଠଂତୀ ଧାଵନାଧିକା ॥ 92 ॥

ଲକ୍ଷ୍ୟଲକ୍ଷଣୟୋଗାଢ୍ୟା ତାଦ୍ରୂପ୍ୟଗଣନାକୃତିଃ ।
ସୈକରୂପା ନୈକରୂପା ସେଂଦୁରୂପା ତଦାକୃତିଃ ॥ 93 ॥

ସମାସତଦ୍ଧିତାକାରା ଵିଭକ୍ତିଵଚନାତ୍ମିକା ।
ସ୍ଵାହାକାରା ସ୍ଵଧାକାରା ଶ୍ରୀପତ୍ୟର୍ଧାଂଗନଂଦିନୀ ॥ 94 ॥

ଗଂଭୀରା ଗହନା ଗୁହ୍ୟା ୟୋନିଲିଂଗାର୍ଧଧାରିଣୀ ।
ଶେଷଵାସୁକିସଂସେଵ୍ୟା ଚପଲା ଵରଵର୍ଣିନୀ ॥ 95 ॥

କାରୁଣ୍ୟାକାରସଂପତ୍ତିଃ କୀଲକୃନ୍ମଂତ୍ରକୀଲିକା ।
ଶକ୍ତିବୀଜାତ୍ମିକା ସର୍ଵମଂତ୍ରେଷ୍ଟାକ୍ଷୟକାମନା ॥ 96 ॥

ଆଗ୍ନେୟୀ ପାର୍ଥିଵା ଆପ୍ୟା ଵାୟଵ୍ୟା ଵ୍ୟୋମକେତନା ।
ସତ୍ୟଜ୍ଞାନାତ୍ମିକାଽଽନଂଦା ବ୍ରାହ୍ମୀ ବ୍ରହ୍ମ ସନାତନୀ ॥ 97 ॥

ଅଵିଦ୍ୟାଵାସନା ମାୟାପ୍ରକୃତିସ୍ସର୍ଵମୋହିନୀ ।
ଶକ୍ତିର୍ଧାରଣଶକ୍ତିଶ୍ଚ ଚିଦଚିଚ୍ଛକ୍ତିୟୋଗିନୀ ॥ 98 ॥

ଵକ୍ତ୍ରାରୁଣା ମହାମାୟା ମରୀଚିର୍ମଦମର୍ଦିନୀ ।
ଵିରାଟ୍ ସ୍ଵାହା ସ୍ଵଧା ଶୁଦ୍ଧା ନୀରୂପାସ୍ତିସ୍ସୁଭକ୍ତିଗା ॥ 99 ॥

ନିରୂପିତାଦ୍ଵୟୀଵିଦ୍ୟା ନିତ୍ୟାନିତ୍ୟସ୍ଵରୂପିଣୀ ।
ଵୈରାଜମାର୍ଗସଂଚାରା ସର୍ଵସତ୍ପଥଦର୍ଶିନୀ ॥ 100 ॥

ଜାଲଂଧରୀ ମୃଡାନୀ ଚ ଭଵାନୀ ଭଵଭଂଜନୀ ।
ତ୍ରୈକାଲିକଜ୍ଞାନତଂତୁସ୍ତ୍ରିକାଲଜ୍ଞାନଦାୟିନୀ ॥ 101 ॥

ନାଦାତୀତା ସ୍ମୃତିଃ ପ୍ରଜ୍ଞା ଧାତ୍ରୀରୂପା ତ୍ରିପୁଷ୍କରା ।
ପରାଜିତାଵିଧାନଜ୍ଞା ଵିଶେଷିତଗୁଣାତ୍ମିକା ॥ 102 ॥

ହିରଣ୍ୟକେଶିନୀ ହେମବ୍ରହ୍ମସୂତ୍ରଵିଚକ୍ଷଣା ।
ଅସଂଖ୍ୟେୟପରାର୍ଧାଂତସ୍ଵରଵ୍ୟଂଜନଵୈଖରୀ ॥ 103 ॥

ମଧୁଜିହ୍ଵା ମଧୁମତୀ ମଧୁମାସୋଦୟା ମଧୁଃ ।
ମାଧଵୀ ଚ ମହାଭାଗା ମେଘଗଂଭୀରନିସ୍ଵନା ॥ 104 ॥

ବ୍ରହ୍ମଵିଷ୍ଣୁମହେଶାଦିଜ୍ଞାତଵ୍ୟାର୍ଥଵିଶେଷଗା ।
ନାଭୌ ଵହ୍ନିଶିଖାକାରା ଲଲାଟେ ଚଂଦ୍ରସନ୍ନିଭା ॥ 105 ॥

ଭ୍ରୂମଧ୍ୟେ ଭାସ୍କରାକାରା ସର୍ଵତାରାକୃତିର୍ହୃଦି ।
କୃତ୍ତିକାଦିଭରଣ୍ୟଂତନକ୍ଷତ୍ରେଷ୍ଟ୍ୟାର୍ଚିତୋଦୟା ॥ 106 ॥

ଗ୍ରହଵିଦ୍ୟାତ୍ମିକା ଜ୍ୟୋତିର୍ଜ୍ୟୋତିର୍ଵିନ୍ମତିଜୀଵିକା ।
ବ୍ରହ୍ମାଂଡଗର୍ଭିଣୀ ବାଲା ସପ୍ତାଵରଣଦେଵତା ॥ 107 ॥

ଵୈରାଜୋତ୍ତମସାମ୍ରାଜ୍ୟା କୁମାରକୁଶଲୋଦୟା ।
ବଗଳା ଭ୍ରମରାଂବା ଚ ଶିଵଦୂତୀ ଶିଵାତ୍ମିକା ॥ 108 ॥

ମେରୁଵିଂଧ୍ୟାଦିସଂସ୍ଥାନା କାଶ୍ମୀରପୁରଵାସିନୀ ।
ୟୋଗନିଦ୍ରା ମହାନିଦ୍ରା ଵିନିଦ୍ରା ରାକ୍ଷସାଶ୍ରିତା ॥ 109 ॥

ସୁଵର୍ଣଦା ମହାଗଂଗା ପଂଚାଖ୍ୟା ପଂଚସଂହତିଃ ।
ସୁପ୍ରଜାତା ସୁଵୀରା ଚ ସୁପୋଷା ସୁପତିଶ୍ଶିଵା ॥ 110 ॥

ସୁଗୃହା ରକ୍ତବୀଜାଂତା ହତକଂଦର୍ପଜୀଵିକା ।
ସମୁଦ୍ରଵ୍ୟୋମମଧ୍ୟସ୍ଥା ସମବିଂଦୁସମାଶ୍ରୟା ॥ 111 ॥

ସୌଭାଗ୍ୟରସଜୀଵାତୁସ୍ସାରାସାରଵିଵେକଦୃକ୍ ।
ତ୍ରିଵଲ୍ୟାଦିସୁପୁଷ୍ଟାଂଗା ଭାରତୀ ଭରତାଶ୍ରିତା ॥ 112 ॥

ନାଦବ୍ରହ୍ମମୟୀଵିଦ୍ୟା ଜ୍ଞାନବ୍ରହ୍ମମୟୀପରା ।
ବ୍ରହ୍ମନାଡୀ ନିରୁକ୍ତିଶ୍ଚ ବ୍ରହ୍ମକୈଵଲ୍ୟସାଧନମ୍ ॥ 113 ॥

କାଲିକେୟମହୋଦାରଵୀର୍ୟଵିକ୍ରମରୂପିଣୀ ।
ଵଡଵାଗ୍ନିଶିଖାଵକ୍ତ୍ରା ମହାକଵଲତର୍ପଣା ॥ 114 ॥

ମହାଭୂତା ମହାଦର୍ପା ମହାସାରା ମହାକ୍ରତୁଃ ।
ପଂଜଭୂତମହାଗ୍ରାସା ପଂଚଭୂତାଧିଦେଵତା ॥ 115 ॥

ସର୍ଵପ୍ରମାଣା ସଂପତ୍ତିସ୍ସର୍ଵରୋଗପ୍ରତିକ୍ରିୟା ।
ବ୍ରହ୍ମାଂଡାଂତର୍ବହିର୍ଵ୍ୟାପ୍ତା ଵିଷ୍ଣୁଵକ୍ଷୋଵିଭୂଷିଣୀ ॥ 116 ॥

ଶାଂକରୀ ଵିଧିଵକ୍ତ୍ରସ୍ଥା ପ୍ରଵରା ଵରହେତୁକୀ ।
ହେମମାଲା ଶିଖାମାଲା ତ୍ରିଶିଖା ପଂଚଲୋଚନା ॥ 117 ॥ [ ପଂଚମୋଚନା ]
ସର୍ଵାଗମସଦାଚାରମର୍ୟାଦା ୟାତୁଭଂଜନୀ ।
ପୁଣ୍ୟଶ୍ଲୋକପ୍ରବଂଧାଢ୍ୟା ସର୍ଵାଂତର୍ୟାମିରୂପିଣୀ ॥ 118 ॥

ସାମଗାନସମାରାଧ୍ୟା ଶ୍ରୋତ୍ରକର୍ଣରସାୟନମ୍ ।
ଜୀଵଲୋକୈକଜୀଵାତୁର୍ଭଦ୍ରୋଦାରଵିଲୋକନା ॥ 119 ॥

ତଟିତ୍କୋଟିଲସତ୍କାଂତିସ୍ତରୁଣୀ ହରିସୁଂଦରୀ ।
ମୀନନେତ୍ରା ଚ ସେଂଦ୍ରାକ୍ଷୀ ଵିଶାଲାକ୍ଷୀ ସୁମଂଗଳା ॥ 120 ॥

ସର୍ଵମଂଗଳସଂପନ୍ନା ସାକ୍ଷାନ୍ମଂଗଳଦେଵତା ।
ଦେହହୃଦ୍ଦୀପିକା ଦୀପ୍ତିର୍ଜିହ୍ଵପାପପ୍ରଣାଶିନୀ ॥ 121 ॥

ଅର୍ଧଚଂଦ୍ରୋଲ୍ଲସଦ୍ଦଂଷ୍ଟ୍ରା ୟଜ୍ଞଵାଟୀଵିଲାସିନୀ ।
ମହାଦୁର୍ଗା ମହୋତ୍ସାହା ମହାଦେଵବଲୋଦୟା ॥ 122 ॥

ଡାକିନୀଡ୍ୟା ଶାକିନୀଡ୍ୟା ସାକିନୀଡ୍ୟା ସମସ୍ତଜୁଟ୍ ।
ନିରଂକୁଶା ନାକିଵଂଦ୍ୟା ଷଡାଧାରାଧିଦେଵତା ॥ 123 ॥

ଭୁଵନଜ୍ଞାନିନିଶ୍ଶ୍ରେଣୀ ଭୁଵନାକାରଵଲ୍ଲରୀ ।
ଶାଶ୍ଵତୀ ଶାଶ୍ଵତାକାରା ଲୋକାନୁଗ୍ରହକାରିଣୀ ॥ 124 ॥

ସାରସୀ ମାନସୀ ହଂସୀ ହଂସଲୋକପ୍ରଦାୟିନୀ ।
ଚିନ୍ମୁଦ୍ରାଲଂକୃତକରା କୋଟିସୂର୍ୟସମପ୍ରଭା ॥ 125 ॥

ସୁଖପ୍ରାଣିଶିରୋରେଖା ସଦଦୃଷ୍ଟପ୍ରଦାୟିନୀ ।
ସର୍ଵସାଂକର୍ୟଦୋଷଘ୍ନୀ ଗ୍ରହୋପଦ୍ରଵନାଶିନୀ ॥ 126 ॥

କ୍ଷୁଦ୍ରଜଂତୁଭୟଘ୍ନୀ ଚ ଵିଷରୋଗାଦିଭଂଜନୀ ।
ସଦାଶାଂତା ସଦାଶୁଦ୍ଧା ଗୃହଚ୍ଛିଦ୍ରନିଵାରିଣୀ ॥ 127 ॥

କଲିଦୋଷପ୍ରଶମନୀ କୋଲାହଲପୁରସ୍ଥିତା ।
ଗୌରୀ ଲାକ୍ଷଣିକୀ ମୁଖ୍ୟା ଜଘନ୍ୟାକୃତିଵର୍ଜିତା ॥ 128 ॥

ମାୟା ଵିଦ୍ୟା ମୂଲଭୂତା ଵାସଵୀ ଵିଷ୍ଣୁଚେତନା ।
ଵାଦିନୀ ଵସୁରୂପା ଚ ଵସୁରତ୍ନପରିଚ୍ଛଦା ॥ 129 ॥

ଛାଂଦସୀ ଚଂଦ୍ରହୃଦୟା ମଂତ୍ରସ୍ଵଚ୍ଛଂଦଭୈରଵୀ ।
ଵନମାଲା ଵୈଜୟଂତୀ ପଂଚଦିଵ୍ୟାୟୁଧାତ୍ମିକା ॥ 130 ॥

ପୀତାଂବରମୟୀ ଚଂଚତ୍କୌସ୍ତୁଭା ହରିକାମିନୀ ।
ନିତ୍ୟା ତଥ୍ୟା ରମା ରାମା ରମଣୀ ମୃତ୍ୟୁଭଂଜନୀ ॥ 131 ॥

ଜ୍ୟେଷ୍ଠା କାଷ୍ଠା ଧନିଷ୍ଠାଂତା ଶରାଂଗୀ ନିର୍ଗୁଣପ୍ରିୟା ।
ମୈତ୍ରେୟା ମିତ୍ରଵିଂଦା ଚ ଶେଷ୍ୟଶେଷକଲାଶୟା ॥ 132 ॥

ଵାରାଣସୀଵାସଲଭ୍ୟା ଚାର୍ୟାଵର୍ତଜନସ୍ତୁତା । [ ଵାରାଣସୀଵାସରତା ]
ଜଗଦୁତ୍ପତ୍ତିସଂସ୍ଥାନସଂହାରତ୍ରୟକାରଣମ୍ ॥ 133 ॥

ତ୍ଵମଂବ ଵିଷ୍ଣୁସର୍ଵସ୍ଵଂ ନମସ୍ତେଽସ୍ତୁ ମହେଶ୍ଵରି ।
ନମସ୍ତେ ସର୍ଵଲୋକାନାଂ ଜନନ୍ୟୈ ପୁଣ୍ୟମୂର୍ତୟେ ॥ 134 ॥

ସିଦ୍ଧଲକ୍ଷ୍ମୀର୍ମହାକାଳି ମହଲକ୍ଷ୍ମି ନମୋଽସ୍ତୁ ତେ ।
ସଦ୍ୟୋଜାତାଦିପଂଚାଗ୍ନିରୂପା ପଂଚକପଂଚକମ୍ ॥ 135 ॥

ୟଂତ୍ରଲକ୍ଷ୍ମୀର୍ଭଵତ୍ୟାଦିରାଦ୍ୟାଦ୍ୟେ ତେ ନମୋ ନମଃ ।
ସୃଷ୍ଟ୍ୟାଦିକାରଣାକାରଵିତତେ ଦୋଷଵର୍ଜିତେ ॥ 136 ॥

ଜଗଲ୍ଲକ୍ଷ୍ମୀର୍ଜଗନ୍ମାତର୍ଵିଷ୍ଣୁପତ୍ନି ନମୋଽସ୍ତୁ ତେ ।
ନଵକୋଟିମହାଶକ୍ତିସମୁପାସ୍ୟପଦାଂବୁଜେ ॥ 137 ॥

କନତ୍ସୌଵର୍ଣରତ୍ନାଢ୍ୟ ସର୍ଵାଭରଣଭୂଷିତେ ।
ଅନଂତାନିତ୍ୟମହିଷୀପ୍ରପଂଚେଶ୍ଵରନାୟକି ॥ 138 ॥

ଅତ୍ୟୁଚ୍ଛ୍ରିତପଦାଂତସ୍ଥେ ପରମଵ୍ୟୋମନାୟକି ।
ନାକପୃଷ୍ଠଗତାରାଧ୍ୟେ ଵିଷ୍ଣୁଲୋକଵିଲାସିନି ॥ 139 ॥

ଵୈକୁଂଠରାଜମହିଷି ଶ୍ରୀରଂଗନଗରାଶ୍ରିତେ ।
ରଂଗନାୟକି ଭୂପୁତ୍ରି କୃଷ୍ଣେ ଵରଦଵଲ୍ଲଭେ ॥ 140 ॥

କୋଟିବ୍ରହ୍ମାଦିସଂସେଵ୍ୟେ କୋଟିରୁଦ୍ରାଦିକୀର୍ତିତେ ।
ମାତୁଲୁଂଗମୟଂ ଖେଟଂ ସୌଵର୍ଣଚଷକଂ ତଥା ॥ 141 ॥

ପଦ୍ମଦ୍ଵୟଂ ପୂର୍ଣକୁଂଭଂ କୀରଂଚ ଵରଦାଭୟେ ।
ପାଶମଂକୁଶକଂ ଶଂଖଂ ଚକ୍ରଂ ଶୂଲଂ କୃପାଣିକାମ୍ ॥ 142 ॥

ଧନୁର୍ବାଣୌ ଚାକ୍ଷମାଲାଂ ଚିନ୍ମୁଦ୍ରାମପି ବିଭ୍ରତୀ ।
ଅଷ୍ଟାଦଶଭୁଜେ ଲକ୍ଷ୍ମୀର୍ମହାଷ୍ଟାଦଶପୀଠଗେ ॥ 143 ॥

ଭୂମିନୀଲାଦିସଂସେଵ୍ୟେ ସ୍ଵାମିଚିତ୍ତାନୁଵର୍ତିନି ।
ପଦ୍ମେ ପଦ୍ମାଲୟେ ପଦ୍ମି ପୂର୍ଣକୁଂଭାଭିଷେଚିତେ ॥ 144 ॥

ଇଂଦିରେଂଦିଂଦିରାଭାକ୍ଷି କ୍ଷୀରସାଗରକନ୍ୟକେ ।
ଭାର୍ଗଵି ତ୍ଵଂ ସ୍ଵତଂତ୍ରେଚ୍ଛା ଵଶୀକୃତଜଗତ୍ପତିଃ ॥ 145 ॥

ମଂଗଳଂ ମଂଗଳାନାଂ ତ୍ଵଂ ଦେଵତାନାଂ ଚ ଦେଵତା ।
ତ୍ଵମୁତ୍ତମୋତ୍ତମାନାଂ ଚ ତ୍ଵଂ ଶ୍ରେୟଃ ପରମାମୃତମ୍ ॥ 146 ॥

ଧନଧାନ୍ୟାଭିଵୃଦ୍ଧିଶ୍ଚ ସାର୍ଵଭୌମସୁଖୋଚ୍ଛ୍ରୟା ।
ଆଂଦୋଳିକାଦିସୌଭାଗ୍ୟଂ ମତ୍ତେଭାଦିମହୋଦୟଃ ॥ 147 ॥

ପୁତ୍ରପୌତ୍ରାଭିଵୃଦ୍ଧିଶ୍ଚ ଵିଦ୍ୟାଭୋଗବଲାଦିକମ୍ ।
ଆୟୁରାରୋଗ୍ୟସଂପତ୍ତିରଷ୍ଟୈଶ୍ଵର୍ୟଂ ତ୍ଵମେଵ ହି ॥ 148 ॥

ପରମେଶଵିଭୂତିଶ୍ଚ ସୂକ୍ଷ୍ମାତ୍ସୂକ୍ଷ୍ମତରାଗତିଃ ।
ସଦୟାପାଂଗସଂଦତ୍ତବ୍ରହ୍ମେଂଦ୍ରାଦିପଦସ୍ଥିତିଃ ॥ 149 ॥

ଅଵ୍ୟାହତମହାଭାଗ୍ୟଂ ତ୍ଵମେଵାକ୍ଷୋଭ୍ୟଵିକ୍ରମଃ ।
ସମନ୍ଵୟଶ୍ଚ ଵେଦାନାମଵିରୋଧସ୍ତ୍ଵମେଵ ହି ॥ 150 ॥

ନିଃଶ୍ରେୟସପଦପ୍ରାପ୍ତିସାଧନଂ ଫଲମେଵ ଚ ।
ଶ୍ରୀମଂତ୍ରରାଜରାଜ୍ଞୀ ଚ ଶ୍ରୀଵିଦ୍ୟା କ୍ଷେମକାରିଣୀ ॥ 151 ॥

ଶ୍ରୀଂବୀଜଜପସଂତୁଷ୍ଟା ଐଂ ହ୍ରୀଂ ଶ୍ରୀଂ ବୀଜପାଲିକା ।
ପ୍ରପତ୍ତିମାର୍ଗସୁଲଭା ଵିଷ୍ଣୁପ୍ରଥମକିଂକରୀ ॥ 152 ॥

କ୍ଲୀଂକାରାର୍ଥସଵିତ୍ରୀ ଚ ସୌମଂଗଳ୍ୟାଧିଦେଵତା ।
ଶ୍ରୀଷୋଡଶାକ୍ଷରୀଵିଦ୍ୟା ଶ୍ରୀୟଂତ୍ରପୁରଵାସିନୀ ॥ 153 ॥

ସର୍ଵମଂଗଳମାଂଗଳ୍ୟେ ଶିଵେ ସର୍ଵାର୍ଥସାଧିକେ ।
ଶରଣ୍ୟେ ତ୍ର୍ୟଂବକେ ଗୌରୀ ନାରାୟଣି ନମୋଽସ୍ତୁ ତେ ॥ 154 ॥

ପୁନଃ ପୁନର୍ନମସ୍ତେଽସ୍ତୁ ସାଷ୍ଟାଂଗମୟୁତଂ ପୁନଃ ।
ସନତ୍କୁମାର ଉଵାଚ-
ଏଵଂ ସ୍ତୁତା ମହାଲକ୍ଷ୍ମୀର୍ବ୍ରହ୍ମରୁଦ୍ରାଦିଭିସ୍ସୁରୈଃ ।
ନମଦ୍ଭିରାର୍ତୈର୍ଦୀନୈଶ୍ଚ ନିସ୍ସ୍ଵତ୍ଵୈର୍ଭୋଗଵର୍ଜିତୈଃ ॥ 1 ॥

ଜ୍ୟେଷ୍ଠା ଜୁଷ୍ଟୈଶ୍ଚ ନିଶ୍ଶ୍ରୀକୈସ୍ସଂସାରାତ୍ସ୍ଵପରାୟଣୈଃ ।
ଵିଷ୍ଣୁପତ୍ନୀ ଦଦୌ ତେଷାଂ ଦର୍ଶନଂ ଦୃଷ୍ଟିତର୍ପଣମ୍ ॥ 2 ॥

ଶରତ୍ପୂର୍ଣେଂଦୁକୋଟ୍ୟାଭଧଵଳାପାଂଗଵୀକ୍ଷଣୈଃ ।
ସର୍ଵାନ୍ସତ୍ତ୍ଵସମାଵିଷ୍ଟାନ୍ ଚକ୍ରେ ହୃଷ୍ଟା ଵରଂ ଦଦୌ ॥ 3 ॥

ମହାଲକ୍ଷ୍ମୀରୁଵାଚ-
ନାମ୍ନାଂ ସାଷ୍ଟସହସ୍ରଂ ମେ ପ୍ରମାଦାଦ୍ଵାପି ୟସ୍ସକୃତ୍ ।
କୀର୍ତୟେତ୍ତତ୍କୁଲେ ସତ୍ୟଂ ଵସାମ୍ୟାଚଂଦ୍ରତାରକମ୍ ॥ 4 ॥

କିଂ ପୁନର୍ନିୟମାଜ୍ଜପ୍ତୁର୍ମଦେକଶରଣସ୍ୟ ଚ ।
ମାତୃଵତ୍ସାନୁକଂପାହଂ ପୋଷକୀ ସ୍ୟାମହର୍ନିଶମ୍ ॥ 5 ॥

ମନ୍ନାମ ସ୍ତଵତାଂ ଲୋକେ ଦୁର୍ଲଭଂ ନାସ୍ତି ଚିଂତିତମ୍ ।
ମତ୍ପ୍ରସାଦେନ ସର୍ଵେଽପି ସ୍ଵସ୍ଵେଷ୍ଟାର୍ଥମଵାପ୍ସ୍ୟଥ ॥ 6 ॥

ଲୁପ୍ତଵୈଷ୍ଣଵଧର୍ମସ୍ୟ ମଦ୍ଵ୍ରତେଷ୍ଵଵକୀର୍ଣିନଃ ।
ଭକ୍ତିପ୍ରପତ୍ତିହୀନସ୍ୟ ଵଂଦ୍ୟୋ ନାମ୍ନାଂ ସ୍ତଵୋଽପି ମେ ॥ 7 ॥

ତସ୍ମାଦଵଶ୍ୟଂ ତୈର୍ଦୋଷୈର୍ଵିହୀନଃ ପାପଵର୍ଜିତଃ ।
ଜପେତ୍ସାଷ୍ଟସହସ୍ରଂ ମେ ନାମ୍ନାଂ ପ୍ରତ୍ୟହମାଦରାତ୍ ॥ 8 ॥

ସାକ୍ଷାଦଲକ୍ଷ୍ମୀପୁତ୍ରୋଽପି ଦୁର୍ଭାଗ୍ୟୋଽପ୍ୟଲସୋଽପି ଵା ।
ଅପ୍ରୟତ୍ନୋଽପି ମୂଢୋଽପି ଵିକଲଃ ପତିତୋଽପି ଚ ॥ 9 ॥

ଅଵଶ୍ୟଂ ପ୍ରାପ୍ନୁୟାଦ୍ଭାଗ୍ୟଂ ମତ୍ପ୍ରସାଦେନ କେଵଲମ୍ ।
ସ୍ପୃହେୟମଚିରାଦ୍ଦେଵା ଵରଦାନାୟ ଜାପିନଃ ।
ଦଦାମି ସର୍ଵମିଷ୍ଟାର୍ଥଂ ଲକ୍ଷ୍ମୀତି ସ୍ମରତାଂ ଧ୍ରୁଵମ୍ ॥ 10 ॥

ସନତ୍କୁମାର ଉଵାଚ-
ଇତ୍ୟୁକ୍ତ୍ଵାଽଂତର୍ଦଧେ ଲକ୍ଷ୍ମୀର୍ଵୈଷ୍ଣଵୀ ଭଗଵତ୍କଲା ।
ଇଷ୍ଟାପୂର୍ତଂ ଚ ସୁକୃତଂ ଭାଗଧେୟଂ ଚ ଚିଂତିତମ୍ ॥ 11 ॥

ସ୍ଵଂ ସ୍ଵଂ ସ୍ଥାନଂ ଚ ଭୋଗଂ ଚ ଵିଜୟଂ ଲେଭିରେ ସୁରାଃ ।
ତଦେତତ୍ ପ୍ରଵଦାମ୍ୟଦ୍ୟ ଲକ୍ଷ୍ମୀନାମସହସ୍ରକମ୍ ।
ୟୋଗିନଃ ପଠତ କ୍ଷିପ୍ରଂ ଚିଂତିତାର୍ଥାନଵାପ୍ସ୍ୟଥ ॥ 12 ॥

ଗାର୍ଗ୍ୟ ଉଵାଚ-
ସନତ୍କୁମାରୋୟୋଗୀଂଦ୍ର ଇତ୍ୟୁକ୍ତ୍ଵା ସ ଦୟାନିଧିଃ ।
ଅନୁଗୃହ୍ୟ ୟୟୌ କ୍ଷିପ୍ରଂ ତାଂଶ୍ଚ ଦ୍ଵାଦଶୟୋଗିନଃ ॥ 13 ॥

ତସ୍ମାଦେତଦ୍ରହସ୍ୟଂ ଚ ଗୋପ୍ୟଂ ଜପ୍ୟଂ ପ୍ରୟତ୍ନତଃ ।
ଅଷ୍ଟମ୍ୟାଂ ଚ ଚତୁର୍ଦଶ୍ୟାଂ ନଵମ୍ୟାଂ ଭୃଗୁଵାସରେ ॥ 14 ॥

ପୌର୍ଣମାସ୍ୟାମମାୟାଂ ଚ ପର୍ଵକାଲେ ଵିଶେଷତଃ ।
ଜପେଦ୍ଵା ନିତ୍ୟକାର୍ୟେଷୁ ସର୍ଵାନ୍କାମାନଵାପ୍ନୁୟାତ୍ ॥ 15 ॥

ଇତି ଶ୍ରୀସ୍କଂଦପୁରାଣେ ସନତ୍କୁମାରସଂହିତାୟାଂ ଲକ୍ଷ୍ମୀସହସ୍ରନାମସ୍ତୋତ୍ରଂ ସଂପୂର୍ଣମ୍ ॥

sri lakshmi sahasra nama stotram in odia