ଶ୍ରୀ ହୟଗ୍ରୀଵ ସ୍ତୋତ୍ରମ୍

sri hayagriva stotram in odia

ଜ୍ଞାନାନଂଦମୟଂ ଦେଵଂ ନିର୍ମଲସ୍ଫଟିକାକୃତିଂ
ଆଧାରଂ ସର୍ଵଵିଦ୍ୟାନାଂ ହୟଗ୍ରୀଵମୁପାସ୍ମହେ ॥1॥

ସ୍ଵତସ୍ସିଦ୍ଧଂ ଶୁଦ୍ଧସ୍ଫଟିକମଣିଭୂ ଭୃତ୍ପ୍ରତିଭଟଂ
ସୁଧାସଧ୍ରୀଚୀଭିର୍ଦ୍ୟୁତିଭିରଵଦାତତ୍ରିଭୁଵନଂ
ଅନଂତୈସ୍ତ୍ରୟ୍ୟଂତୈରନୁଵିହିତ ହେଷାହଲହଲଂ
ହତାଶେଷାଵଦ୍ୟଂ ହୟଵଦନମୀଡେମହିମହଃ ॥2॥

ସମାହାରସ୍ସାମ୍ନାଂ ପ୍ରତିପଦମୃଚାଂ ଧାମ ୟଜୁଷାଂ
ଲୟଃ ପ୍ରତ୍ୟୂହାନାଂ ଲହରିଵିତତିର୍ବୋଧଜଲଧେଃ
କଥାଦର୍ପକ୍ଷୁଭ୍ୟତ୍କଥକକୁଲକୋଲାହଲଭଵଂ
ହରତ୍ଵଂତର୍ଧ୍ଵାଂତଂ ହୟଵଦନହେଷାହଲହଲଃ ॥3॥

ପ୍ରାଚୀ ସଂଧ୍ୟା କାଚିଦଂତର୍ନିଶାୟାଃ
ପ୍ରଜ୍ଞାଦୃଷ୍ଟେ ରଂଜନଶ୍ରୀରପୂର୍ଵା
ଵକ୍ତ୍ରୀ ଵେଦାନ୍ ଭାତୁ ମେ ଵାଜିଵକ୍ତ୍ରା
ଵାଗୀଶାଖ୍ୟା ଵାସୁଦେଵସ୍ୟ ମୂର୍ତିଃ ॥4॥

ଵିଶୁଦ୍ଧଵିଜ୍ଞାନଘନସ୍ଵରୂପଂ
ଵିଜ୍ଞାନଵିଶ୍ରାଣନବଦ୍ଧଦୀକ୍ଷଂ
ଦୟାନିଧିଂ ଦେହଭୃତାଂ ଶରଣ୍ୟଂ
ଦେଵଂ ହୟଗ୍ରୀଵମହଂ ପ୍ରପଦ୍ୟେ ॥5॥

ଅପୌରୁଷେୟୈରପି ଵାକ୍ପ୍ରପଂଚୈଃ
ଅଦ୍ୟାପି ତେ ଭୂତିମଦୃଷ୍ଟପାରାଂ
ସ୍ତୁଵନ୍ନହଂ ମୁଗ୍ଧ ଇତି ତ୍ଵୟୈଵ
କାରୁଣ୍ୟତୋ ନାଥ କଟାକ୍ଷଣୀୟଃ ॥6॥

ଦାକ୍ଷିଣ୍ୟରମ୍ୟା ଗିରିଶସ୍ୟ ମୂର୍ତିଃ-
ଦେଵୀ ସରୋଜାସନଧର୍ମପତ୍ନୀ
ଵ୍ୟାସାଦୟୋଽପି ଵ୍ୟପଦେଶ୍ୟଵାଚଃ
ସ୍ଫୁରଂତି ସର୍ଵେ ତଵ ଶକ୍ତିଲେଶୈଃ ॥7॥

ମଂଦୋଽଭଵିଷ୍ୟନ୍ନିୟତଂ ଵିରିଂଚଃ
ଵାଚାଂ ନିଧେର୍ଵାଂଛିତଭାଗଧେୟଃ
ଦୈତ୍ୟାପନୀତାନ୍ ଦୟୟୈନ ଭୂୟୋଽପି
ଅଧ୍ୟାପୟିଷ୍ୟୋ ନିଗମାନ୍ନଚେତ୍ତ୍ଵମ୍ ॥8॥

ଵିତର୍କଡୋଲାଂ ଵ୍ୟଵଧୂୟ ସତ୍ତ୍ଵେ
ବୃହସ୍ପତିଂ ଵର୍ତୟସେ ୟତସ୍ତ୍ଵଂ
ତେନୈଵ ଦେଵ ତ୍ରିଦେଶେଶ୍ଵରାଣା
ଅସ୍ପୃଷ୍ଟଡୋଲାୟିତମାଧିରାଜ୍ୟମ୍ ॥9॥

ଅଗ୍ନୌ ସମିଦ୍ଧାର୍ଚିଷି ସପ୍ତତଂତୋଃ
ଆତସ୍ଥିଵାନ୍ମଂତ୍ରମୟଂ ଶରୀରଂ
ଅଖଂଡସାରୈର୍ହଵିଷାଂ ପ୍ରଦାନୈଃ
ଆପ୍ୟାୟନଂ ଵ୍ୟୋମସଦାଂ ଵିଧତ୍ସେ ॥10॥

ୟନ୍ମୂଲ ମୀଦୃକ୍ପ୍ରତିଭାତତ୍ତ୍ଵଂ
ୟା ମୂଲମାମ୍ନାୟମହାଦ୍ରୁମାଣାଂ
ତତ୍ତ୍ଵେନ ଜାନଂତି ଵିଶୁଦ୍ଧସତ୍ତ୍ଵାଃ
ତ୍ଵାମକ୍ଷରାମକ୍ଷରମାତୃକାଂ ତ୍ଵାମ୍ ॥11॥

ଅଵ୍ୟାକୃତାଦ୍ଵ୍ୟାକୃତଵାନସି ତ୍ଵଂ
ନାମାନି ରୂପାଣି ଚ ୟାନି ପୂର୍ଵଂ
ଶଂସଂତି ତେଷାଂ ଚରମାଂ ପ୍ରତିଷ୍ଠାଂ
ଵାଗୀଶ୍ଵର ତ୍ଵାଂ ତ୍ଵଦୁପଜ୍ଞଵାଚଃ ॥12॥

ମୁଗ୍ଧେଂଦୁନିଷ୍ୟଂଦଵିଲୋଭନୀୟାଂ
ମୂର୍ତିଂ ତଵାନଂଦସୁଧାପ୍ରସୂତିଂ
ଵିପଶ୍ଚିତଶ୍ଚେତସି ଭାଵୟଂତେ
ଵେଲାମୁଦାରାମିଵ ଦୁଗ୍ଧ ସିଂଧୋଃ ॥13॥

ମନୋଗତଂ ପଶ୍ୟତି ୟସ୍ସଦା ତ୍ଵାଂ
ମନୀଷିଣାଂ ମାନସରାଜହଂସଂ
ସ୍ଵୟଂପୁରୋଭାଵଵିଵାଦଭାଜଃ
କିଂକୁର୍ଵତେ ତସ୍ୟ ଗିରୋ ୟଥାର୍ହମ୍ ॥14॥

ଅପି କ୍ଷଣାର୍ଧଂ କଲୟଂତି ୟେ ତ୍ଵାଂ
ଆପ୍ଲାଵୟଂତଂ ଵିଶଦୈର୍ମୟୂଖୈଃ
ଵାଚାଂ ପ୍ରଵାହୈରନିଵାରିତୈସ୍ତେ
ମଂଦାକିନୀଂ ମଂଦୟିତୁଂ କ୍ଷମଂତେ ॥15॥

ସ୍ଵାମିନ୍ଭଵଦ୍ଦ୍ୟାନସୁଧାଭିଷେକାତ୍
ଵହଂତି ଧନ୍ୟାଃ ପୁଲକାନୁବଂଦଂ
ଅଲକ୍ଷିତେ କ୍ଵାପି ନିରୂଢ ମୂଲଂ
ଅଂଗ୍ଵେଷ୍ଵି ଵାନଂଦଥୁମଂକୁରଂତମ୍ ॥16॥

ସ୍ଵାମିନ୍ପ୍ରତୀଚା ହୃଦୟେନ ଧନ୍ୟାଃ
ତ୍ଵଦ୍ଧ୍ୟାନଚଂଦ୍ରୋଦୟଵର୍ଧମାନଂ
ଅମାଂତମାନଂଦପୟୋଧିମଂତଃ
ପୟୋଭି ରକ୍ଷ୍ଣାଂ ପରିଵାହୟଂତି ॥17॥

ସ୍ଵୈରାନୁଭାଵାସ୍ ତ୍ଵଦଧୀନଭାଵାଃ
ସମୃଦ୍ଧଵୀର୍ୟାସ୍ତ୍ଵଦନୁଗ୍ରହେଣ
ଵିପଶ୍ଚିତୋନାଥ ତରଂତି ମାୟାଂ
ଵୈହାରିକୀଂ ମୋହନପିଂଛିକାଂ ତେ ॥18॥

ପ୍ରାଙ୍ନିର୍ମିତାନାଂ ତପସାଂ ଵିପାକାଃ
ପ୍ରତ୍ୟଗ୍ରନିଶ୍ଶ୍ରେୟସସଂପଦୋ ମେ
ସମେଧିଷୀରଂ ସ୍ତଵ ପାଦପଦ୍ମେ
ସଂକଲ୍ପଚିଂତାମଣୟଃ ପ୍ରଣାମାଃ ॥19॥

ଵିଲୁପ୍ତମୂର୍ଧନ୍ୟଲିପିକ୍ରମାଣା
ସୁରେଂଦ୍ରଚୂଡାପଦଲାଲିତାନାଂ
ତ୍ଵଦଂଘ୍ରି ରାଜୀଵରଜଃକଣାନାଂ
ଭୂୟାନ୍ପ୍ରସାଦୋ ମୟି ନାଥ ଭୂୟାତ୍ ॥20॥

ପରିସ୍ଫୁରନ୍ନୂପୁରଚିତ୍ରଭାନୁ –
ପ୍ରକାଶନିର୍ଧୂତତମୋନୁଷଂଗା
ପଦଦ୍ଵୟୀଂ ତେ ପରିଚିନ୍ମହେଽଂତଃ
ପ୍ରବୋଧରାଜୀଵଵିଭାତସଂଧ୍ୟାମ୍ ॥21॥

ତ୍ଵତ୍କିଂକରାଲଂକରଣୋଚିତାନାଂ
ତ୍ଵୟୈଵ କଲ୍ପାଂତରପାଲିତାନାଂ
ମଂଜୁପ୍ରଣାଦଂ ମଣିନୂପୁରଂ ତେ
ମଂଜୂଷିକାଂ ଵେଦଗିରାଂ ପ୍ରତୀମଃ ॥22॥

ସଂଚିଂତୟାମି ପ୍ରତିଭାଦଶାସ୍ଥାନ୍
ସଂଧୁକ୍ଷୟଂତଂ ସମୟପ୍ରଦୀପାନ୍
ଵିଜ୍ଞାନକଲ୍ପଦ୍ରୁମପଲ୍ଲଵାଭଂ
ଵ୍ୟାଖ୍ୟାନମୁଦ୍ରାମଧୁରଂ କରଂ ତେ ॥23॥

ଚିତ୍ତେ କରୋମି ସ୍ଫୁରିତାକ୍ଷମାଲଂ
ସଵ୍ୟେତରଂ ନାଥ କରଂ ତ୍ଵଦୀୟଂ
ଜ୍ଞାନାମୃତୋଦଂଚନଲଂପଟାନାଂ
ଲୀଲାଘଟୀୟଂତ୍ରମିଵାଽଽଶ୍ରିତାନାମ୍ ॥24॥

ପ୍ରବୋଧସିଂଧୋରରୁଣୈଃ ପ୍ରକାଶୈଃ
ପ୍ରଵାଳସଂଘାତମିଵୋଦ୍ଵହଂତଂ
ଵିଭାଵୟେ ଦେଵ ସ ପୁସ୍ତକଂ ତେ
ଵାମଂ କରଂ ଦକ୍ଷିଣମାଶ୍ରିତାନାମ୍ ॥25॥

ତମାଂ ସିଭିତ୍ତ୍ଵାଵିଶଦୈର୍ମୟୂଖୈଃ
ସଂପ୍ରୀଣୟଂତଂ ଵିଦୁଷଶ୍ଚକୋରାନ୍
ନିଶାମୟେ ତ୍ଵାଂ ନଵପୁଂଡରୀକେ
ଶରଦ୍ଘନେଚଂଦ୍ରମିଵ ସ୍ଫୁରଂତମ୍ ॥26॥

ଦିଶଂତୁ ମେ ଦେଵ ସଦା ତ୍ଵଦୀୟାଃ
ଦୟାତରଂଗାନୁଚରାଃ କଟାକ୍ଷାଃ
ଶ୍ରୋତ୍ରେଷୁ ପୁଂସାମମୃତଂକ୍ଷରଂତୀଂ
ସରସ୍ଵତୀଂ ସଂଶ୍ରିତକାମଧେନୁମ୍ ॥27॥

ଵିଶେଷଵିତ୍ପାରିଷଦେଷୁ ନାଥ
ଵିଦଗ୍ଧଗୋଷ୍ଠୀ ସମରାଂଗଣେଷୁ
ଜିଗୀଷତୋ ମେ କଵିତାର୍କିକେଂଦ୍ରାନ୍
ଜିହ୍ଵାଗ୍ରସିଂହାସନମଭ୍ୟୁପେୟାଃ ॥28॥

ତ୍ଵାଂ ଚିଂତୟନ୍ ତ୍ଵନ୍ମୟତାଂ ପ୍ରପନ୍ନଃ
ତ୍ଵାମୁଦ୍ଗୃଣନ୍ ଶବ୍ଦମୟେନ ଧାମ୍ନା
ସ୍ଵାମିନ୍ସମାଜେଷୁ ସମେଧିଷୀୟ
ସ୍ଵଚ୍ଛଂଦଵାଦାହଵବଦ୍ଧଶୂରଃ ॥29॥

ନାନାଵିଧାନାମଗତିଃ କଲାନାଂ
ନ ଚାପି ତୀର୍ଥେଷୁ କୃତାଵତାରଃ
ଧ୍ରୁଵଂ ତଵାଽନାଧ ପରିଗ୍ରହାୟାଃ
ନଵ ନଵଂ ପାତ୍ରମହଂ ଦୟାୟାଃ ॥30॥

ଅକଂପନୀୟାନ୍ୟପନୀତିଭେଦୈଃ
ଅଲଂକୃଷୀରନ୍ ହୃଦୟଂ ମଦୀୟମ୍
ଶଂକା କଳଂକା ପଗମୋଜ୍ଜ୍ଵଲାନି
ତତ୍ତ୍ଵାନି ସମ୍ୟଂଚି ତଵ ପ୍ରସାଦାତ୍ ॥31॥

ଵ୍ୟାଖ୍ୟାମୁଦ୍ରାଂ କରସରସିଜୈଃ ପୁସ୍ତକଂ ଶଂଖଚକ୍ରେ
ଭିଭ୍ରଦ୍ଭିନ୍ନ ସ୍ଫଟିକରୁଚିରେ ପୁଂଡରୀକେ ନିଷଣ୍ଣଃ ।
ଅମ୍ଲାନଶ୍ରୀରମୃତଵିଶଦୈରଂଶୁଭିଃ ପ୍ଲାଵୟନ୍ମାଂ
ଆଵିର୍ଭୂୟାଦନଘମହିମାମାନସେ ଵାଗଧୀଶଃ ॥32॥

ଵାଗର୍ଥସିଦ୍ଧିହେତୋଃପଠତ ହୟଗ୍ରୀଵସଂସ୍ତୁତିଂ ଭକ୍ତ୍ୟା
କଵିତାର୍କିକକେସରିଣା ଵେଂକଟନାଥେନ ଵିରଚିତାମେତାମ୍ ॥33॥

sri hayagriva stotram in odia