ଶରଭେଶାଷ୍ଟକମ୍

sharabhesha ashtakam in odia

ଶ୍ରୀ ଶିଵ ଉଵାଚ

ଶୃଣୁ ଦେଵି ମହାଗୁହ୍ୟଂ ପରଂ ପୁଣ୍ୟଵିଵର୍ଧନଂ .
ଶରଭେଶାଷ୍ଟକଂ ମଂତ୍ରଂ ଵକ୍ଷ୍ୟାମି ତଵ ତତ୍ତ୍ଵତଃ ॥

ଋଷିନ୍ୟାସାଦିକଂ ୟତ୍ତତ୍ସର୍ଵପୂର୍ଵଵଦାଚରେତ୍ .
ଧ୍ୟାନଭେଦଂ ଵିଶେଷେଣ ଵକ୍ଷ୍ୟାମ୍ୟହମତଃ ଶିଵେ ॥

ଧ୍ୟାନଂ

ଜ୍ଵଲନକୁଟିଲକେଶଂ ସୂର୍ୟଚଂଦ୍ରାଗ୍ନିନେତ୍ରଂ
ନିଶିତତରନଖାଗ୍ରୋଦ୍ଧୂତହେମାଭଦେହମ୍ ।
ଶରଭମଥ ମୁନୀଂଦ୍ରୈଃ ସେଵ୍ୟମାନଂ ସିତାଂଗଂ
ପ୍ରଣତଭୟଵିନାଶଂ ଭାଵୟେତ୍ପକ୍ଷିରାଜମ୍ ॥

ଅଥ ସ୍ତୋତ୍ରଂ

ଦେଵାଦିଦେଵାୟ ଜଗନ୍ମୟାୟ ଶିଵାୟ ନାଲୀକନିଭାନନାୟ ।
ଶର୍ଵାୟ ଭୀମାୟ ଶରାଧିପାୟ ନମୋଽସ୍ତୁ ତୁଭ୍ୟଂ ଶରଭେଶ୍ଵରାୟ ॥ 1 ॥

ହରାୟ ଭୀମାୟ ହରିପ୍ରିୟାୟ ଭଵାୟ ଶାଂତାୟ ପରାତ୍ପରାୟ ।
ମୃଡାୟ ରୁଦ୍ରାୟ ଵିଲୋଚନାୟ ନମୋଽସ୍ତୁ ତୁଭ୍ୟଂ ଶରଭେଶ୍ଵରାୟ ॥ 2 ॥

ଶୀତାଂଶୁଚୂଡାୟ ଦିଗଂବରାୟ ସୃଷ୍ଟିସ୍ଥିତିଧ୍ଵଂସନକାରଣାୟ ।
ଜଟାକଲାପାୟ ଜିତେଂଦ୍ରିୟାୟ ନମୋଽସ୍ତୁ ତୁଭ୍ୟଂ ଶରଭେଶ୍ଵରାୟ ॥ 3 ॥

କଲଂକକଂଠାୟ ଭଵାଂତକାୟ କପାଲଶୂଲାତ୍ତକରାଂବୁଜାୟ ।
ଭୁଜଂଗଭୂଷାୟ ପୁରାଂତକାୟ ନମୋଽସ୍ତୁ ତୁଭ୍ୟଂ ଶରଭେଶ୍ଵରାୟ ॥ 4 ॥

ଶମାଦିଷଟ୍କାୟ ୟମାଂତକାୟ ୟମାଦିୟୋଗାଷ୍ଟକସିଦ୍ଧିଦାୟ ।
ଉମାଧିନାଥାୟ ପୁରାତନାୟ ନମୋଽସ୍ତୁ ତୁଭ୍ୟଂ ଶରଭେଶ୍ଵରାୟ ॥ 5 ॥

ଘୃଣାଦିପାଶାଷ୍ଟକଵର୍ଜିତାୟ ଖିଲୀକୃତାସ୍ମତ୍ପଥି ପୂର୍ଵଗାୟ ।
ଗୁଣାଦିହୀନାୟ ଗୁଣତ୍ରୟାୟ ନମୋଽସ୍ତୁ ତୁଭ୍ୟଂ ଶରଭେଶ୍ଵରାୟ ॥ 6 ॥

କାଲାୟ ଵେଦାମୃତକଂଦଲାୟ କଲ୍ୟାଣକୌତୂହଲକାରଣାୟ ।
ସ୍ଥୂଲାୟ ସୂକ୍ଷ୍ମାୟ ସ୍ଵରୂପଗାୟ ନମୋଽସ୍ତୁ ତୁଭ୍ୟଂ ଶରଭେଶ୍ଵରାୟ ॥ 7 ॥

ପଂଚାନନାୟାନିଲଭାସ୍କରାୟ ପଂଚାଶଦର୍ଣାଦ୍ୟପରାକ୍ଷୟାୟ ।
ପଂଚାକ୍ଷରେଶାୟ ଜଗଦ୍ଧିତାୟ ନମୋଽସ୍ତୁ ତୁଭ୍ୟଂ ଶରଭେଶ୍ଵରାୟ ॥ 8 ॥

ଇତି ଶ୍ରୀ ଶରଭେଶାଷ୍ଟକମ୍ ॥

sharabhesha ashtakam in odia