ନାରାୟଣୀୟଂ ଦଶକ 88 – ସଂତାନଗୋପାଲମ୍

narayaniyam dashaka 88 in odia

ପ୍ରାଗେଵାଚାର୍ୟପୁତ୍ରାହୃତିନିଶମନୟା ସ୍ଵୀୟଷଟ୍ସୂନୁଵୀକ୍ଷାଂ
କାଂକ୍ଷଂତ୍ୟା ମାତୁରୁକ୍ତ୍ୟା ସୁତଲଭୁଵି ବଲିଂ ପ୍ରାପ୍ୟ ତେନାର୍ଚିତସ୍ତ୍ଵମ୍ ।
ଧାତୁଃ ଶାପାଦ୍ଧିରଣ୍ୟାନ୍ଵିତକଶିପୁଭଵାନ୍ ଶୌରିଜାନ୍ କଂସଭଗ୍ନା-
ନାନୀୟୈନାନ୍ ପ୍ରଦର୍ଶ୍ୟ ସ୍ଵପଦମନୟଥାଃ ପୂର୍ଵପୁତ୍ରାନ୍ ମରୀଚେଃ ॥1॥

ଶ୍ରୁତଦେଵ ଇତି ଶ୍ରୁତଂ ଦ୍ଵିଜେଂଦ୍ରଂ
ବହୁଲାଶ୍ଵଂ ନୃପତିଂ ଚ ଭକ୍ତିପୂର୍ଣମ୍ ।
ୟୁଗପତ୍ତ୍ଵମନୁଗ୍ରହୀତୁକାମୋ
ମିଥିଲାଂ ପ୍ରାପିଥଂ ତାପସୈଃ ସମେତଃ ॥2॥

ଗଚ୍ଛନ୍ ଦ୍ଵିମୂର୍ତିରୁଭୟୋର୍ୟୁଗପନ୍ନିକେତ-
ମେକେନ ଭୂରିଵିଭଵୈର୍ଵିହିତୋପଚାରଃ ।
ଅନ୍ୟେନ ତଦ୍ଦିନଭୃତୈଶ୍ଚ ଫଲୌଦନାଦ୍ୟୈ-
ସ୍ତୁଲ୍ୟଂ ପ୍ରସେଦିଥ ଦଦଥ ଚ ମୁକ୍ତିମାଭ୍ୟାମ୍ ॥3॥

ଭୂୟୋଽଥ ଦ୍ଵାରଵତ୍ୟାଂ ଦ୍ଵିଜତନୟମୃତିଂ ତତ୍ପ୍ରଲାପାନପି ତ୍ଵମ୍
କୋ ଵା ଦୈଵଂ ନିରୁଂଧ୍ୟାଦିତି କିଲ କଥୟନ୍ ଵିଶ୍ଵଵୋଢାପ୍ୟସୋଢାଃ ।
ଜିଷ୍ଣୋର୍ଗର୍ଵଂ ଵିନେତୁଂ ତ୍ଵୟି ମନୁଜଧିୟା କୁଂଠିତାଂ ଚାସ୍ୟ ବୁଦ୍ଧିଂ
ତତ୍ତ୍ଵାରୂଢାଂ ଵିଧାତୁଂ ପରମତମପଦପ୍ରେକ୍ଷଣେନେତି ମନ୍ୟେ ॥4॥

ନଷ୍ଟା ଅଷ୍ଟାସ୍ୟ ପୁତ୍ରାଃ ପୁନରପି ତଵ ତୂପେକ୍ଷୟା କଷ୍ଟଵାଦଃ
ସ୍ପଷ୍ଟୋ ଜାତୋ ଜନାନାମଥ ତଦଵସରେ ଦ୍ଵାରକାମାପ ପାର୍ଥଃ ।
ମୈତ୍ର୍ୟା ତତ୍ରୋଷିତୋଽସୌ ନଵମସୁତମୃତୌ ଵିପ୍ରଵର୍ୟପ୍ରରୋଦଂ
ଶ୍ରୁତ୍ଵା ଚକ୍ରେ ପ୍ରତିଜ୍ଞାମନୁପହୃତସୁତଃ ସନ୍ନିଵେକ୍ଷ୍ୟେ କୃଶାନୁମ୍ ॥5॥

ମାନୀ ସ ତ୍ଵାମପୃଷ୍ଟ୍ଵା ଦ୍ଵିଜନିଲୟଗତୋ ବାଣଜାଲୈର୍ମହାସ୍ତ୍ରୈ
ରୁଂଧାନଃ ସୂତିଗେହଂ ପୁନରପି ସହସା ଦୃଷ୍ଟନଷ୍ଟେ କୁମାରେ ।
ୟାମ୍ୟାମୈଂଦ୍ରୀଂ ତଥାଽନ୍ୟାଃ ସୁରଵରନଗରୀର୍ଵିଦ୍ୟୟାଽଽସାଦ୍ୟ ସଦ୍ୟୋ
ମୋଘୋଦ୍ୟୋଗଃ ପତିଷ୍ୟନ୍ ହୁତଭୁଜି ଭଵତା ସସ୍ମିତଂ ଵାରିତୋଽଭୂତ୍ ॥6॥

ସାର୍ଧଂ ତେନ ପ୍ରତୀଚୀଂ ଦିଶମତିଜଵିନା ସ୍ୟଂଦନେନାଭିୟାତୋ
ଲୋକାଲୋକଂ ଵ୍ୟତୀତସ୍ତିମିରଭରମଥୋ ଚକ୍ରଧାମ୍ନା ନିରୁଂଧନ୍ ।
ଚକ୍ରାଂଶୁକ୍ଲିଷ୍ଟଦୃଷ୍ଟିଂ ସ୍ଥିତମଥ ଵିଜୟଂ ପଶ୍ୟ ପଶ୍ୟେତି ଵାରାଂ
ପାରେ ତ୍ଵଂ ପ୍ରାଦଦର୍ଶଃ କିମପି ହି ତମସାଂ ଦୂରଦୂରଂ ପଦଂ ତେ ॥7॥

ତତ୍ରାସୀନଂ ଭୁଜଂଗାଧିପଶୟନତଲେ ଦିଵ୍ୟଭୂଷାୟୁଧାଦ୍ୟୈ-
ରାଵୀତଂ ପୀତଚେଲଂ ପ୍ରତିନଵଜଲଦଶ୍ୟାମଲଂ ଶ୍ରୀମଦଂଗମ୍ ।
ମୂର୍ତୀନାମୀଶିତାରଂ ପରମିହ ତିସୃଣାମେକମର୍ଥଂ ଶ୍ରୁତୀନାଂ
ତ୍ଵାମେଵ ତ୍ଵଂ ପରାତ୍ମନ୍ ପ୍ରିୟସଖସହିତୋ ନେମିଥ କ୍ଷେମରୂପମ୍ ॥8॥

ୟୁଵାଂ ମାମେଵ ଦ୍ଵାଵଧିକଵିଵୃତାଂତର୍ହିତତୟା
ଵିଭିନ୍ନୌ ସଂଦ୍ରଷ୍ଟୁଂ ସ୍ଵୟମହମହାର୍ଷଂ ଦ୍ଵିଜସୁତାନ୍ ।
ନୟେତଂ ଦ୍ରାଗେତାନିତି ଖଲୁ ଵିତୀର୍ଣାନ୍ ପୁନରମୂନ୍
ଦ୍ଵିଜାୟାଦାୟାଦାଃ ପ୍ରଣୁତମହିମା ପାଂଡୁଜନୁଷା ॥9॥

ଏଵଂ ନାନାଵିହାରୈର୍ଜଗଦଭିରମୟନ୍ ଵୃଷ୍ଣିଵଂଶଂ ପ୍ରପୁଷ୍ଣ-
ନ୍ନୀଜାନୋ ୟଜ୍ଞଭେଦୈରତୁଲଵିହୃତିଭିଃ ପ୍ରୀଣୟନ୍ନେଣନେତ୍ରାଃ ।
ଭୂଭାରକ୍ଷେପଦଂଭାତ୍ ପଦକମଲଜୁଷାଂ ମୋକ୍ଷଣାୟାଵତୀର୍ଣଃ
ପୂର୍ଣଂ ବ୍ରହ୍ମୈଵ ସାକ୍ଷାଦ୍ୟଦୁଷୁ ମନୁଜତାରୂଷିତସ୍ତ୍ଵଂ ଵ୍ୟଲାସୀଃ ॥10॥

ପ୍ରାୟେଣ ଦ୍ଵାରଵତ୍ୟାମଵୃତଦୟି ତଦା ନାରଦସ୍ତ୍ଵଦ୍ରସାର୍ଦ୍ର-
ସ୍ତସ୍ମାଲ୍ଲେଭେ କଦାଚିତ୍ଖଲୁ ସୁକୃତନିଧିସ୍ତ୍ଵତ୍ପିତା ତତ୍ତ୍ଵବୋଧମ୍ ।
ଭକ୍ତାନାମଗ୍ରୟାୟୀ ସ ଚ ଖଲୁ ମତିମାନୁଦ୍ଧଵସ୍ତ୍ଵତ୍ତ ଏଵ
ପ୍ରାପ୍ତୋ ଵିଜ୍ଞାନସାରଂ ସ କିଲ ଜନହିତାୟାଧୁନାଽଽସ୍ତେ ବଦର୍ୟାମ୍ ॥11॥

ସୋଽୟଂ କୃଷ୍ଣାଵତାରୋ ଜୟତି ତଵ ଵିଭୋ ୟତ୍ର ସୌହାର୍ଦଭୀତି-
ସ୍ନେହଦ୍ଵେଷାନୁରାଗପ୍ରଭୃତିଭିରତୁଲୈରଶ୍ରମୈର୍ୟୋଗଭେଦୈଃ ।
ଆର୍ତିଂ ତୀର୍ତ୍ଵା ସମସ୍ତାମମୃତପଦମଗୁସ୍ସର୍ଵତଃ ସର୍ଵଲୋକାଃ
ସ ତ୍ଵଂ ଵିଶ୍ଵାର୍ତିଶାଂତ୍ୟୈ ପଵନପୁରପତେ ଭକ୍ତିପୂର୍ତ୍ୟୈ ଚ ଭୂୟାଃ ॥12॥

narayaniyam dashaka 88 in odia