ଗଣେଶ ଵଜ୍ର ପଂଜର ସ୍ତୋତ୍ରମ୍

ganesha vajra panjara stotram in odia

ଧ୍ୟାନମ୍ ।
ତ୍ରିନେତ୍ରଂ ଗଜାସ୍ୟଂ ଚତୁର୍ବାହୁଧାରଂ
ପରଶ୍ଵାଦିଶସ୍ତ୍ରୈର୍ୟୁତଂ ଭାଲଚଂଦ୍ରମ୍ ।
ନରାକାରଦେହଂ ସଦା ୟୋଗଶାଂତଂ
ଗଣେଶଂ ଭଜେ ସର୍ଵଵଂଦ୍ୟଂ ପରେଶମ୍ ॥ 1 ॥

ବିଂଦୁରୂପୋ ଵକ୍ରତୁଂଡୋ ରକ୍ଷତୁ ମେ ହୃଦି ସ୍ଥିତଃ ।
ଦେହାଂଶ୍ଚତୁର୍ଵିଧାଂସ୍ତତ୍ତ୍ଵାଂସ୍ତତ୍ତ୍ଵାଧାରଃ ସନାତନଃ ॥ 2 ॥

ଦେହମୋହୟୁତଂ ହ୍ୟେକଦଂତଃ ସୋଽହଂ ସ୍ଵରୂପଧୃକ୍ ।
ଦେହିନଂ ମାଂ ଵିଶେଷେଣ ରକ୍ଷତୁ ଭ୍ରମନାଶକଃ ॥ 3 ॥

ମହୋଦରସ୍ତଥା ଦେଵୋ ନାନାବୋଧାନ୍ ପ୍ରତାପଵାନ୍ ।
ସଦା ରକ୍ଷତୁ ମେ ବୋଧାନଂଦସଂସ୍ଥୋ ହ୍ୟହର୍ନିଶମ୍ ॥ 4 ॥

ସାଂଖ୍ୟାନ୍ ରକ୍ଷତୁ ସାଂଖ୍ୟେଶୋ ଗଜାନନଃ ସୁସିଦ୍ଧିଦଃ ।
ଅସତ୍ୟେଷୁ ସ୍ଥିତଂ ମାଂ ସ ଲଂବୋଦରଶ୍ଚ ରକ୍ଷତୁ ॥ 5 ॥

ସତ୍ସୁ ସ୍ଥିତଂ ସୁମୋହେନ ଵିକଟୋ ମାଂ ପରାତ୍ପରଃ ।
ରକ୍ଷତୁ ଭକ୍ତଵାତ୍ସଲ୍ୟାତ୍ ସଦୈକାମୃତଧାରକଃ ॥ 6 ॥

ଆନଂଦେଷୁ ସ୍ଥିତଂ ନିତ୍ୟଂ ମାଂ ରକ୍ଷତୁ ସମାତ୍ମକଃ ।
ଵିଘ୍ନରାଜୋ ମହାଵିଘ୍ନୈର୍ନାନାଖେଲକରଃ ପ୍ରଭୁଃ ॥ 7 ॥

ଅଵ୍ୟକ୍ତେଷୁ ସ୍ଥିତଂ ନିତ୍ୟଂ ଧୂମ୍ରଵର୍ଣଃ ସ୍ଵରୂପଧୃକ୍ ।
ମାଂ ରକ୍ଷତୁ ସୁଖାକାରଃ ସହଜଃ ସର୍ଵପୂଜିତଃ ॥ 8 ॥

ସ୍ଵସଂଵେଦ୍ୟେଷୁ ସଂସ୍ଥଂ ମାଂ ଗଣେଶଃ ସ୍ଵସ୍ଵରୂପଧୃକ୍ ।
ରକ୍ଷତୁ ୟୋଗଭାଵେନ ସଂସ୍ଥିତୋ ଭଵନାୟକଃ ॥ 9 ॥

ଅୟୋଗେଷୁ ସ୍ଥିତଂ ନିତ୍ୟଂ ମାଂ ରକ୍ଷତୁ ଗଣେଶ୍ଵରଃ ।
ନିଵୃତ୍ତିରୂପଧୃକ୍ ସାକ୍ଷାଦସମାଧିସୁଖେ ରତଃ ॥ 10 ॥

ୟୋଗଶାଂତିଧରୋ ମାଂ ତୁ ରକ୍ଷତୁ ୟୋଗସଂସ୍ଥିତମ୍ ।
ଗଣାଧୀଶଃ ପ୍ରସନ୍ନାତ୍ମା ସିଦ୍ଧିବୁଦ୍ଧିସମନ୍ଵିତଃ ॥ 11 ॥

ପୁରୋ ମାଂ ଗଜକର୍ଣଶ୍ଚ ରକ୍ଷତୁ ଵିଘ୍ନହାରକଃ ।
ଵାହ୍ନ୍ୟାଂ ୟାମ୍ୟାଂ ଚ ନୈରୃତ୍ୟାଂ ଚିଂତାମଣିର୍ଵରପ୍ରଦଃ ॥ 12 ॥

ରକ୍ଷତୁ ପଶ୍ଚିମେ ଢୁଂଢିର୍ହେରଂବୋ ଵାୟୁଦିକ୍ ସ୍ଥିତମ୍ ।
ଵିନାୟକଶ୍ଚୋତ୍ତରେ ତୁ ପ୍ରମୋଦଶ୍ଚେଶଦିକ୍ ସ୍ଥିତମ୍ ॥ 13 ॥

ଊର୍ଧ୍ଵଂ ସିଦ୍ଧିପତିଃ ପାତୁ ବୁଦ୍ଧୀଶୋଽଧଃ ସ୍ଥିତଂ ସଦା ।
ସର୍ଵାଂଗେଷୁ ମୟୂରେଶଃ ପାତୁ ମାଂ ଭକ୍ତିଲାଲସଃ ॥ 14 ॥

ୟତ୍ର ତତ୍ର ସ୍ଥିତଂ ମାଂ ତୁ ସଦା ରକ୍ଷତୁ ୟୋଗପଃ ।
ପୁରଶୁପାଶସଂୟୁକ୍ତୋ ଵରଦାଭୟଧାରକଃ ॥ 15 ॥

ଇଦଂ ଗଣପତେଃ ପ୍ରୋକ୍ତଂ ଵଜ୍ରପଂଜରକଂ ପରମ୍ ।
ଧାରୟସ୍ଵ ମହାଦେଵ ଵିଜୟୀ ତ୍ଵଂ ଭଵିଷ୍ୟସି ॥ 16 ॥

ୟ ଇଦଂ ପଂଜରଂ ଧୃତ୍ଵା ୟତ୍ର କୁତ୍ର ସ୍ଥିତୋ ଭଵେତ୍ ।
ନ ତସ୍ୟ ଜାୟତେ କ୍ଵାପି ଭୟଂ ନାନାସ୍ଵଭାଵଜମ୍ ॥ 17 ॥

ୟଃ ପଠେତ୍ ପଂଜରଂ ନିତ୍ୟଂ ସ ଈପ୍ସିତମଵାପ୍ନୁୟାତ୍ ।
ଵଜ୍ରସାରତନୁର୍ଭୂତ୍ଵା ଚରେତ୍ସର୍ଵତ୍ର ମାନଵଃ ॥ 18 ॥

ତ୍ରିକାଲଂ ୟଃ ପଠେନ୍ନିତ୍ୟଂ ସ ଗଣେଶ ଇଵାପରଃ ।
ନିର୍ଵିଘ୍ନଃ ସର୍ଵକାର୍ୟେଷୁ ବ୍ରହ୍ମଭୂତୋ ଭଵେନ୍ନରଃ ॥ 19 ॥

ୟଃ ଶୃଣୋତି ଗଣେଶସ୍ୟ ପଂଜରଂ ଵଜ୍ରସଂଜ୍ଞକମ୍ ।
ଆରୋଗ୍ୟାଦିସମାୟୁକ୍ତୋ ଭଵତେ ଗଣପପ୍ରିୟଃ ॥ 20 ॥

ଧନଂ ଧାନ୍ୟଂ ପଶୂନ୍ ଵିଦ୍ୟାମାୟୁଷ୍ୟଂ ପୁତ୍ରପୌତ୍ରକମ୍ ।
ସର୍ଵସଂପତ୍ସମାୟୁକ୍ତମୈଶ୍ଵର୍ୟଂ ପଠନାଲ୍ଲଭେତ୍ ॥ 21 ॥

ନ ଭୟଂ ତସ୍ୟ ଵଜ୍ରାତ୍ତୁ ଚକ୍ରାଚ୍ଛୂଲାଦ୍ଭଵେତ୍ କଦା ।
ଶଂକରାଦେର୍ମହାଦେଵ ପଠନାଦସ୍ୟ ନିତ୍ୟଶଃ ॥ 22 ॥

ୟଂ ୟଂ ଚିଂତୟତେ ମର୍ତ୍ୟସ୍ତଂ ତଂ ପ୍ରାପ୍ନୋତି ଶାଶ୍ଵତମ୍ ।
ପଠନାଦସ୍ୟ ଵିଘ୍ନେଶ ପଂଜରସ୍ୟ ନିରଂତରମ୍ ॥ 23 ॥

ଲକ୍ଷାଵୃତ୍ତିଭିରେଵଂ ସ ସିଦ୍ଧପଂଜରକୋ ଭଵେତ୍ ।
ସ୍ତଂଭୟେଦପି ସୂର୍ୟଂ ତୁ ବ୍ରହ୍ମାଂଡଂ ଵଶମାନୟେତ୍ ॥ 24 ॥

ଏଵମୁକ୍ତ୍ଵା ଗଣେଶାନୋଽଂତର୍ଦଧେ ମୁନିସତ୍ତମ ।
ଶିଵୋ ଦେଵାଦିଭିର୍ୟୁକ୍ତୋ ହର୍ଷିତଃ ସଂବଭୂଵ ହ ॥ 25 ॥

ଇତି ଶ୍ରୀମନ୍ମୁଦ୍ଗଲେ ମହାପୁରାଣେ ଧୂମ୍ରଵର୍ଣଚରିତେ ଵଜ୍ରପଂଜରକଥନଂ ନାମ ତ୍ରୟୋଵିଂଶୋଽଧ୍ୟାୟଃ ।

ganesha vajra panjara stotram in odia