ଶ୍ରୀମଦ୍ଭଗଵଦ୍ଗୀତା ପାରାୟଣ – ଅଷ୍ଟାଦଶୋଽଧ୍ୟାୟଃ

bhagavadgita parayana chapter 18 in odia

ଓଂ ଶ୍ରୀ ପରମାତ୍ମନେ ନମଃ
ଅଥ ଅଷ୍ଟାଦଶୋଽଧ୍ୟାୟଃ
ମୋକ୍ଷସନ୍ନ୍ୟାସୟୋଗଃ

ଅର୍ଜୁନ ଉଵାଚ
ସନ୍ନ୍ୟାସସ୍ୟ ମହାବାହୋ ତତ୍ତ୍ଵମିଚ୍ଛାମି ଵେଦିତୁମ୍ ।
ତ୍ୟାଗସ୍ୟ ଚ ହୃଷୀକେଶ ପୃଥକ୍କେଶିନିଷୂଦନ ॥1॥

ଶ୍ରୀ ଭଗଵାନୁଵାଚ
କାମ୍ୟାନାଂ କର୍ମଣାଂ ନ୍ୟାସଂ ସନ୍ନ୍ୟାସଂ କଵୟୋ ଵିଦୁଃ ।
ସର୍ଵକର୍ମଫଲତ୍ୟାଗଂ ପ୍ରାହୁସ୍ତ୍ୟାଗଂ ଵିଚକ୍ଷଣାଃ ॥2॥

ତ୍ୟାଜ୍ୟଂ ଦୋଷଵଦିତ୍ୟେକେ କର୍ମ ପ୍ରାହୁର୍ମନୀଷିଣଃ ।
ୟଜ୍ଞଦାନତପଃକର୍ମ ନ ତ୍ୟାଜ୍ୟମିତି ଚାପରେ ॥3॥

ନିଶ୍ଚୟଂ ଶୃଣୁ ମେ ତତ୍ର ତ୍ୟାଗେ ଭରତସତ୍ତମ ।
ତ୍ୟାଗୋ ହି ପୁରୁଷଵ୍ୟାଘ୍ର ତ୍ରିଵିଧଃ ସଂପ୍ରକୀର୍ତିତଃ ॥4॥

ୟଜ୍ଞଦାନତପଃକର୍ମ ନ ତ୍ୟାଜ୍ୟଂ କାର୍ୟମେଵ ତତ୍ ।
ୟଜ୍ଞୋ ଦାନଂ ତପଶ୍ଚୈଵ ପାଵନାନି ମନୀଷିଣାମ୍ ॥5॥

ଏତାନ୍ୟପି ତୁ କର୍ମାଣି ସଂଗଂ ତ୍ୟକ୍ତ୍ଵା ଫଲାନି ଚ ।
କର୍ତଵ୍ୟାନୀତି ମେ ପାର୍ଥ ନିଶ୍ଚିତଂ ମତମୁତ୍ତମମ୍ ॥6॥

ନିୟତସ୍ୟ ତୁ ସନ୍ନ୍ୟାସଃ କର୍ମଣୋ ନୋପପଦ୍ୟତେ ।
ମୋହାତ୍ତସ୍ୟ ପରିତ୍ୟାଗଃ ତାମସଃ ପରିକୀର୍ତିତଃ ॥7॥

ଦୁଃଖମିତ୍ୟେଵ ୟତ୍କର୍ମ କାୟକ୍ଲେଶଭୟାତ୍ତ୍ୟଜେତ୍ ।
ସ କୃତ୍ଵା ରାଜସଂ ତ୍ୟାଗଂ ନୈଵ ତ୍ୟାଗଫଲଂ ଲଭେତ୍ ॥8॥

କାର୍ୟମିତ୍ୟେଵ ୟତ୍କର୍ମ ନିୟତଂ କ୍ରିୟତେଽର୍ଜୁନ ।
ସଂଗଂ ତ୍ୟକ୍ତ୍ଵା ଫଲଂ ଚୈଵ ସ ତ୍ୟାଗଃ ସାତ୍ତ୍ଵିକୋ ମତଃ ॥9॥

ନ ଦ୍ଵେଷ୍ଟ୍ୟକୁଶଲଂ କର୍ମ କୁଶଲେ ନାନୁଷଜ୍ଜତେ ।
ତ୍ୟାଗୀ ସତ୍ତ୍ଵସମାଵିଷ୍ଟଃ ମେଧାଵୀ ଛିନ୍ନସଂଶୟଃ ॥10॥

ନ ହି ଦେହଭୃତା ଶକ୍ୟଂ ତ୍ୟକ୍ତୁଂ କର୍ମାଣ୍ୟଶେଷତଃ ।
ୟସ୍ତୁ କର୍ମଫଲତ୍ୟାଗୀ ସ ତ୍ୟାଗୀତ୍ୟଭିଧୀୟତେ ॥11॥

ଅନିଷ୍ଟମିଷ୍ଟଂ ମିଶ୍ରଂ ଚ ତ୍ରିଵିଧଂ କର୍ମଣଃ ଫଲମ୍ ।
ଭଵତ୍ୟତ୍ୟାଗିନାଂ ପ୍ରେତ୍ୟ ନ ତୁ ସନ୍ନ୍ୟାସିନାଂ କ୍ଵଚିତ୍ ॥12॥

ପଂଚୈତାନି ମହାବାହୋ କାରଣାନି ନିବୋଧ ମେ ।
ସାଂଖ୍ୟେ କୃତାଂତେ ପ୍ରୋକ୍ତାନି ସିଦ୍ଧୟେ ସର୍ଵକର୍ମଣାମ୍ ॥13॥

ଅଧିଷ୍ଠାନଂ ତଥା କର୍ତା କରଣଂ ଚ ପୃଥଗ୍ଵିଧମ୍ ।
ଵିଵିଧାଶ୍ଚ ପୃଥକ୍ଚେଷ୍ଟାଃ ଦୈଵଂ ଚୈଵାତ୍ର ପଂଚମମ୍ ॥14॥

ଶରୀରଵାଙ୍ମନୋଭିର୍ୟତ୍ କର୍ମ ପ୍ରାରଭତେ ନରଃ ।
ନ୍ୟାୟ୍ୟଂ ଵା ଵିପରୀତଂ ଵା ପଂଚୈତେ ତସ୍ୟ ହେତଵଃ ॥15॥

ତତ୍ରୈଵଂ ସତି କର୍ତାରମ୍ ଆତ୍ମାନଂ କେଵଲଂ ତୁ ୟଃ ।
ପଶ୍ୟତ୍ୟକୃତବୁଦ୍ଧିତ୍ଵାତ୍ ନ ସ ପଶ୍ୟତି ଦୁର୍ମତିଃ ॥16॥

ୟସ୍ୟ ନାହଂକୃତୋ ଭାଵଃ ବୁଦ୍ଧିର୍ୟସ୍ୟ ନ ଲିପ୍ୟତେ ।
ହତ୍ଵାଽପି ସ ଇମାଁଲ୍ଲୋକାନ୍ ନ ହଂତି ନ ନିବଧ୍ୟତେ ॥17॥

ଜ୍ଞାନଂ ଜ୍ଞେୟଂ ପରିଜ୍ଞାତା ତ୍ରିଵିଧା କର୍ମଚୋଦନା ।
କରଣଂ କର୍ମ କର୍ତେତି ତ୍ରିଵିଧଃ କର୍ମସଂଗ୍ରହଃ ॥18॥

ଜ୍ଞାନଂ କର୍ମ ଚ କର୍ତା ଚ ତ୍ରିଧୈଵ ଗୁଣଭେଦତଃ ।
ପ୍ରୋଚ୍ୟତେ ଗୁଣସଂଖ୍ୟାନେ ୟଥାଵଚ୍ଛୃଣୁ ତାନ୍ୟପି ॥19॥

ସର୍ଵଭୂତେଷୁ ୟେନୈକଂ ଭାଵମଵ୍ୟୟମୀକ୍ଷତେ ।
ଅଵିଭକ୍ତଂ ଵିଭକ୍ତେଷୁ ତଜ୍ଜ୍ଞାନଂ ଵିଦ୍ଧି ସାତ୍ତ୍ଵିକମ୍ ॥20॥

ପୃଥକ୍ତ୍ଵେନ ତୁ ୟଜ୍ଜ୍ଞାନଂ ନାନାଭାଵାନ୍ପୃଥଗ୍ଵିଧାନ୍ ।
ଵେତ୍ତି ସର୍ଵେଷୁ ଭୂତେଷୁ ତଜ୍ଜ୍ଞାନଂ ଵିଦ୍ଧି ରାଜସମ୍ ॥21॥

ୟତ୍ତୁ କୃତ୍ସ୍ନଵଦେକସ୍ମିନ୍ କାର୍ୟେ ସକ୍ତମହୈତୁକମ୍ ।
ଅତତ୍ତ୍ଵାର୍ଥଵଦଲ୍ପଂ ଚ ତତ୍ତାମସମୁଦାହୃତମ୍ ॥22॥

ନିୟତଂ ସଂଗରହିତମ୍ ଅରାଗଦ୍ଵେଷତଃ କୃତମ୍ ।
ଅଫଲପ୍ରେପ୍ସୁନା କର୍ମ ୟତ୍ତତ୍ସାତ୍ତ୍ଵିକମୁଚ୍ୟତେ ॥23॥

ୟତ୍ତୁ କାମେପ୍ସୁନା କର୍ମ ସାହଂକାରେଣ ଵା ପୁନଃ ।
କ୍ରିୟତେ ବହୁଲାୟାସଂ ତଦ୍ରାଜସମୁଦାହୃତମ୍ ॥24॥

ଅନୁବଂଧଂ କ୍ଷୟଂ ହିଂସାମ୍ ଅନପେକ୍ଷ୍ୟ ଚ ପୌରୁଷମ୍ ।
ମୋହାଦାରଭ୍ୟତେ କର୍ମ ୟତ୍ତତ୍ତାମସମୁଚ୍ୟତେ ॥25॥

ମୁକ୍ତସଂଗୋଽନହଂଵାଦୀ ଧୃତ୍ୟୁତ୍ସାହସମନ୍ଵିତଃ ।
ସିଦ୍ଧ୍ୟସିଦ୍ଧ୍ୟୋର୍ନିର୍ଵିକାରଃ କର୍ତା ସାତ୍ତ୍ଵିକ ଉଚ୍ୟତେ ॥26॥

ରାଗୀ କର୍ମଫଲପ୍ରେପ୍ସୁଃ ଲୁବ୍ଧୋ ହିଂସାତ୍ମକୋଽଶୁଚିଃ ।
ହର୍ଷଶୋକାନ୍ଵିତଃ କର୍ତା ରାଜସଃ ପରିକୀର୍ତିତଃ ॥27॥

ଅୟୁକ୍ତଃ ପ୍ରାକୃତଃ ସ୍ତବ୍ଧଃ ଶଠୋ ନୈଷ୍କୃତିକୋଽଲସଃ ।
ଵିଷାଦୀ ଦୀର୍ଘସୂତ୍ରୀ ଚ କର୍ତା ତାମସ ଉଚ୍ୟତେ ॥28॥

ବୁଦ୍ଧେର୍ଭେଦଂ ଧୃତେଶ୍ଚୈଵ ଗୁଣତସ୍ତ୍ରିଵିଧଂ ଶୃଣୁ ।
ପ୍ରୋଚ୍ୟମାନମଶେଷେଣ ପୃଥକ୍ତ୍ଵେନ ଧନଂଜୟ ॥29॥

ପ୍ରଵୃତ୍ତିଂ ଚ ନିଵୃତ୍ତିଂ ଚ କାର୍ୟାକାର୍ୟେ ଭୟାଭୟେ ।
ବଂଧଂ ମୋକ୍ଷଂ ଚ ୟା ଵେତ୍ତି ବୁଦ୍ଧିଃ ସା ପାର୍ଥ ସାତ୍ତ୍ଵିକୀ ॥30॥

ୟୟା ଧର୍ମମଧର୍ମଂ ଚ କାର୍ୟଂ ଚାକାର୍ୟମେଵ ଚ ।
ଅୟଥାଵତ୍ପ୍ରଜାନାତି ବୁଦ୍ଧିଃ ସା ପାର୍ଥ ରାଜସୀ ॥31॥

ଅଧର୍ମଂ ଧର୍ମମିତି ୟା ମନ୍ୟତେ ତମସାଽଽଵୃତା ।
ସର୍ଵାର୍ଥାନ୍ଵିପରୀତାଂଶ୍ଚ ବୁଦ୍ଧିଃ ସା ପାର୍ଥ ତାମସୀ ॥32॥

ଧୃତ୍ୟା ୟୟା ଧାରୟତେ ମନଃ ପ୍ରାଣେଂଦ୍ରିୟକ୍ରିୟାଃ ।
ୟୋଗେନାଵ୍ୟଭିଚାରିଣ୍ୟା ଧୃତିଃ ସା ପାର୍ଥ ସାତ୍ତ୍ଵିକୀ ॥33॥

ୟୟା ତୁ ଧର୍ମକାମାର୍ଥାନ୍ ଧୃତ୍ୟା ଧାରୟତେଽର୍ଜୁନ ।
ପ୍ରସଂଗେନ ଫଲାକାଂକ୍ଷୀ ଧୃତିଃ ସା ପାର୍ଥ ରାଜସୀ ॥34॥

ୟୟା ସ୍ଵପ୍ନଂ ଭୟଂ ଶୋକଂ ଵିଷାଦଂ ମଦମେଵ ଚ ।
ନ ଵିମୁଂଚତି ଦୁର୍ମେଧାଃ ଧୃତିଃ ସା ତାମସୀ ମତା ॥35॥

ସୁଖଂ ତ୍ଵିଦାନୀଂ ତ୍ରିଵିଧଂ ଶୃଣୁ ମେ ଭରତର୍ଷଭ ।
ଅଭ୍ୟାସାଦ୍ରମତେ ୟତ୍ର ଦୁଃଖାଂତଂ ଚ ନିଗଚ୍ଛତି ॥36॥

ୟତ୍ତଦଗ୍ରେ ଵିଷମିଵ ପରିଣାମେଽମୃତୋପମମ୍ ।
ତତ୍ସୁଖଂ ସାତ୍ତ୍ଵିକଂ ପ୍ରୋକ୍ତମ୍ ଆତ୍ମବୁଦ୍ଧିପ୍ରସାଦଜମ୍ ॥37॥

ଵିଷୟେଂଦ୍ରିୟସଂୟୋଗାତ୍ ୟତ୍ତଦଗ୍ରେଽମୃତୋପମମ୍ ।
ପରିଣାମେ ଵିଷମିଵ ତତ୍ସୁଖଂ ରାଜସଂ ସ୍ମୃତମ୍ ॥38॥

ୟଦଗ୍ରେ ଚାନୁବଂଧେ ଚ ସୁଖଂ ମୋହନମାତ୍ମନଃ ।
ନିଦ୍ରାଲସ୍ୟପ୍ରମାଦୋତ୍ଥଂ ତତ୍ତାମସମୁଦାହୃତମ୍ ॥39॥

ନ ତଦସ୍ତି ପୃଥିଵ୍ୟାଂ ଵା ଦିଵି ଦେଵେଷୁ ଵା ପୁନଃ ।
ସତ୍ତ୍ଵଂ ପ୍ରକୃତିଜୈର୍ମୁକ୍ତଂ ୟଦେଭିଃ ସ୍ୟାତ୍ତ୍ରିଭିର୍ଗୁଣୈଃ ॥40॥

ବ୍ରାହ୍ମଣକ୍ଷତ୍ରିୟଵିଶାଂ ଶୂଦ୍ରାଣାଂ ଚ ପରଂତପ ।
କର୍ମାଣି ପ୍ରଵିଭକ୍ତାନି ସ୍ଵଭାଵପ୍ରଭଵୈର୍ଗୁଣୈଃ ॥41॥

ଶମୋ ଦମସ୍ତପଃ ଶୌଚଂ କ୍ଷାଂତିରାର୍ଜଵମେଵ ଚ ।
ଜ୍ଞାନଂ ଵିଜ୍ଞାନମାସ୍ତିକ୍ୟଂ ବ୍ରହ୍ମକର୍ମ ସ୍ଵଭାଵଜମ୍ ॥42॥

ଶୌର୍ୟଂ ତେଜୋ ଧୃତିର୍ଦାକ୍ଷ୍ୟଂ ୟୁଦ୍ଧେ ଚାପ୍ୟପଲାୟନମ୍ ।
ଦାନମୀଶ୍ଵରଭାଵଶ୍ଚ କ୍ଷାତ୍ରଂ କର୍ମ ସ୍ଵଭାଵଜମ୍ ॥43॥

କୃଷିଗୌରକ୍ଷ୍ୟଵାଣିଜ୍ୟଂ ଵୈଶ୍ୟକର୍ମ ସ୍ଵଭାଵଜମ୍ ।
ପରିଚର୍ୟାତ୍ମକଂ କର୍ମ ଶୂଦ୍ରସ୍ୟାପି ସ୍ଵଭାଵଜମ୍ ॥44॥

ସ୍ଵେ ସ୍ଵେ କର୍ମଣ୍ୟଭିରତଃ ସଂସିଦ୍ଧିଂ ଲଭତେ ନରଃ ।
ସ୍ଵକର୍ମନିରତଃ ସିଦ୍ଧିଂ ୟଥା ଵିଂଦତି ତଚ୍ଛୃଣୁ ॥45॥

ୟତଃ ପ୍ରଵୃତ୍ତିର୍ଭୂତାନାଂ ୟେନ ସର୍ଵମିଦଂ ତତମ୍ ।
ସ୍ଵକର୍ମଣା ତମଭ୍ୟର୍ଚ୍ୟ ସିଦ୍ଧିଂ ଵିଂଦତି ମାନଵଃ ॥46॥

ଶ୍ରେୟାନ୍ସ୍ଵଧର୍ମୋ ଵିଗୁଣଃ ପରଧର୍ମାତ୍ସ୍ଵନୁଷ୍ଠିତାତ୍ ।
ସ୍ଵଭାଵନିୟତଂ କର୍ମ କୁର୍ଵନ୍ନାପ୍ନୋତି କିଲ୍ବିଷମ୍ ॥47॥

ସହଜଂ କର୍ମ କୌଂତେୟ ସଦୋଷମପି ନ ତ୍ୟଜେତ୍ ।
ସର୍ଵାରଂଭା ହି ଦୋଷେଣ ଧୂମେନାଗ୍ନିରିଵାଵୃତାଃ ॥48॥

ଅସକ୍ତବୁଦ୍ଧିଃ ସର୍ଵତ୍ର ଜିତାତ୍ମା ଵିଗତସ୍ପୃହଃ ।
ନୈଷ୍କର୍ମ୍ୟସିଦ୍ଧିଂ ପରମାଂ ସନ୍ନ୍ୟାସେନାଧିଗଚ୍ଛତି ॥49॥

ସିଦ୍ଧିଂ ପ୍ରାପ୍ତୋ ୟଥା ବ୍ରହ୍ମ ତଥାଽଽପ୍ନୋତି ନିବୋଧ ମେ ।
ସମାସେନୈଵ କୌଂତେୟ ନିଷ୍ଠା ଜ୍ଞାନସ୍ୟ ୟା ପରା ॥50॥

ବୁଦ୍ଧ୍ୟା ଵିଶୁଦ୍ଧୟା ୟୁକ୍ତଃ ଧୃତ୍ୟାଽଽତ୍ମାନଂ ନିୟମ୍ୟ ଚ ।
ଶବ୍ଦାଦୀନ୍ଵିଷୟାଂସ୍ତ୍ୟକ୍ତ୍ଵା ରାଗଦ୍ଵେଷୌ ଵ୍ୟୁଦସ୍ୟ ଚ ॥51॥

ଵିଵିକ୍ତସେଵୀ ଲଘ୍ଵାଶୀ ୟତଵାକ୍କାୟମାନସଃ ।
ଧ୍ୟାନୟୋଗପରୋ ନିତ୍ୟଂ ଵୈରାଗ୍ୟଂ ସମୁପାଶ୍ରିତଃ ॥52॥

ଅହଂକାରଂ ବଲଂ ଦର୍ପଂ କାମଂ କ୍ରୋଧଂ ପରିଗ୍ରହମ୍ ।
ଵିମୁଚ୍ୟ ନିର୍ମମଃ ଶାଂତଃ ବ୍ରହ୍ମଭୂୟାୟ କଲ୍ପତେ ॥53॥

ବ୍ରହ୍ମଭୂତଃ ପ୍ରସନ୍ନାତ୍ମା ନ ଶୋଚତି ନ କାଂକ୍ଷତି ।
ସମଃ ସର୍ଵେଷୁ ଭୂତେଷୁ ମଦ୍ଭକ୍ତିଂ ଲଭତେ ପରାମ୍ ॥54॥

ଭକ୍ତ୍ୟା ମାମଭିଜାନାତି ୟାଵାନ୍ୟଶ୍ଚାସ୍ମି ତତ୍ତ୍ଵତଃ ।
ତତୋ ମାଂ ତତ୍ତ୍ଵତୋ ଜ୍ଞାତ୍ଵା ଵିଶତେ ତଦନଂତରମ୍ ॥55॥

ସର୍ଵକର୍ମାଣ୍ୟପି ସଦା କୁର୍ଵାଣୋ ମଦ୍ଵ୍ୟପାଶ୍ରୟଃ ।
ମତ୍ପ୍ରସାଦାଦଵାପ୍ନୋତି ଶାଶ୍ଵତଂ ପଦମଵ୍ୟୟମ୍ ॥56॥

ଚେତସା ସର୍ଵକର୍ମାଣି ମୟି ସନ୍ନ୍ୟସ୍ୟ ମତ୍ପରଃ ।
ବୁଦ୍ଧିୟୋଗମୁପାଶ୍ରିତ୍ୟ ମଚ୍ଚିତ୍ତଃ ସତତଂ ଭଵ ॥57॥

ମଚ୍ଚିତ୍ତଃ ସର୍ଵଦୁର୍ଗାଣି ମତ୍ପ୍ରସାଦାତ୍ତରିଷ୍ୟସି ।
ଅଥ ଚେତ୍ତ୍ଵମହଂକାରାତ୍ ନ ଶ୍ରୋଷ୍ୟସି ଵିନଂକ୍ଷ୍ୟସି ॥58॥

ୟଦହଂକାରମାଶ୍ରିତ୍ୟ ନ ୟୋତ୍ସ୍ୟ ଇତି ମନ୍ୟସେ ।
ମିଥ୍ୟୈଷ ଵ୍ୟଵସାୟସ୍ତେ ପ୍ରକୃତିସ୍ତ୍ଵାଂ ନିୟୋକ୍ଷ୍ୟତି ॥59॥

ସ୍ଵଭାଵଜେନ କୌଂତେୟ ନିବଦ୍ଧଃ ସ୍ଵେନ କର୍ମଣା ।
କର୍ତୁଂ ନେଚ୍ଛସି ୟନ୍ମୋହାତ୍ କରିଷ୍ୟସ୍ୟଵଶୋଽପି ତତ୍ ॥60॥

ଈଶ୍ଵରଃ ସର୍ଵଭୂତାନାଂ ହୃଦ୍ଦେଶେଽର୍ଜୁନ ତିଷ୍ଠତି ।
ଭ୍ରାମୟନ୍ସର୍ଵଭୂତାନି ୟଂତ୍ରାରୂଢାନି ମାୟୟା ॥61॥

ତମେଵ ଶରଣଂ ଗଚ୍ଛ ସର୍ଵଭାଵେନ ଭାରତ ।
ତତ୍ପ୍ରସାଦାତ୍ପରାଂ ଶାଂତିଂ ସ୍ଥାନଂ ପ୍ରାପ୍ସ୍ୟସି ଶାଶ୍ଵତମ୍ ॥62॥

ଇତି ତେ ଜ୍ଞାନମାଖ୍ୟାତଂ ଗୁହ୍ୟାଦ୍ଗୁହ୍ୟତରଂ ମୟା ।
ଵିମୃଶ୍ୟୈତଦଶେଷେଣ ୟଥେଚ୍ଛସି ତଥା କୁରୁ ॥63॥

ସର୍ଵଗୁହ୍ୟତମଂ ଭୂୟଃ ଶୃଣୁ ମେ ପରମଂ ଵଚଃ ।
ଇଷ୍ଟୋଽସି ମେ ଦୃଢମିତି ତତୋ ଵକ୍ଷ୍ୟାମି ତେ ହିତମ୍ ॥64॥

ମନ୍ମନା ଭଵ ମଦ୍ଭକ୍ତଃ ମଦ୍ୟାଜୀ ମାଂ ନମସ୍କୁରୁ ।
ମାମେଵୈଷ୍ୟସି ସତ୍ୟଂ ତେ ପ୍ରତିଜାନେ ପ୍ରିୟୋଽସି ମେ ॥65॥

ସର୍ଵଧର୍ମାନ୍ପରିତ୍ୟଜ୍ୟ ମାମେକଂ ଶରଣଂ ଵ୍ରଜ ।
ଅହଂ ତ୍ଵା ସର୍ଵପାପେଭ୍ୟଃ ମୋକ୍ଷୟିଷ୍ୟାମି ମା ଶୁଚଃ ॥66॥

ଇଦଂ ତେ ନାତପସ୍କାୟ ନାଭକ୍ତାୟ କଦାଚନ ।
ନ ଚାଶୁଶ୍ରୂଷଵେ ଵାଚ୍ୟଂ ନ ଚ ମାଂ ୟୋଽଭ୍ୟସୂୟତି ॥67॥

ୟ ଇମଂ ପରମଂ ଗୁହ୍ୟଂ ମଦ୍ଭକ୍ତେଷ୍ଵଭିଧାସ୍ୟତି ।
ଭକ୍ତିଂ ମୟି ପରାଂ କୃତ୍ଵା ମାମେଵୈଷ୍ୟତ୍ୟସଂଶୟଃ ॥68॥

ନ ଚ ତସ୍ମାନ୍ମନୁଷ୍ୟେଷୁ କଶ୍ଚିନ୍ମେ ପ୍ରିୟକୃତ୍ତମଃ ।
ଭଵିତା ନ ଚ ମେ ତସ୍ମାତ୍ ଅନ୍ୟଃ ପ୍ରିୟତରୋ ଭୁଵି ॥69॥

ଅଧ୍ୟେଷ୍ୟତେ ଚ ୟ ଇମଂ ଧର୍ମ୍ୟଂ ସଂଵାଦମାଵୟୋଃ ।
ଜ୍ଞାନୟଜ୍ଞେନ ତେନାହମ୍ ଇଷ୍ଟଃ ସ୍ୟାମିତି ମେ ମତିଃ ॥70॥

ଶ୍ରଦ୍ଧାଵାନନସୂୟଶ୍ଚ ଶୃଣୁୟାଦପି ୟୋ ନରଃ ।
ସୋଽପି ମୁକ୍ତଃ ଶୁଭାఁଲ୍ଲୋକାନ୍ ପ୍ରାପ୍ନୁୟାତ୍ପୁଣ୍ୟକର୍ମଣାମ୍ ॥71॥

କଚ୍ଚିଦେତଚ୍ଛ୍ରୁତଂ ପାର୍ଥ ତ୍ଵୟୈକାଗ୍ରେଣ ଚେତସା ।
କଚ୍ଚିଦଜ୍ଞାନସମ୍ମୋହଃ ପ୍ରଣଷ୍ଟସ୍ତେ ଧନଂଜୟ ॥72॥

ଅର୍ଜୁନ ଉଵାଚ
ନଷ୍ଟୋ ମୋହଃ ସ୍ମୃତିର୍ଲବ୍ଧା ତ୍ଵତ୍ପ୍ରସାଦାନ୍ମୟାଽଚ୍ୟୁତ ।
ସ୍ଥିତୋଽସ୍ମି ଗତସଂଦେହଃ କରିଷ୍ୟେ ଵଚନଂ ତଵ ॥73॥

ସଂଜୟ ଉଵାଚ
ଇତ୍ୟହଂ ଵାସୁଦେଵସ୍ୟ ପାର୍ଥସ୍ୟ ଚ ମହାତ୍ମନଃ ।
ସଂଵାଦମିମମଶ୍ରୌଷମ୍ ଅଦ୍ଭୁତଂ ରୋମହର୍ଷଣମ୍ ॥74॥

ଵ୍ୟାସପ୍ରସାଦାଚ୍ଛ୍ରୁତଵାନ୍ ଇମଂ ଗୁହ୍ୟତମଂ ପରମ୍ ।
ୟୋଗଂ ୟୋଗେଶ୍ଵରାତ୍କୃଷ୍ଣାତ୍ ସାକ୍ଷାତ୍କଥୟତଃ ସ୍ଵୟମ୍ ॥75॥

ରାଜନ୍ସଂସ୍ମୃତ୍ୟ ସଂସ୍ମୃତ୍ୟ ସଂଵାଦମିମମଦ୍ଭୁତମ୍ ।
କେଶଵାର୍ଜୁନୟୋଃ ପୁଣ୍ୟଂ ହୃଷ୍ୟାମି ଚ ମୁହୁର୍ମୁହୁଃ ॥76॥

ତଚ୍ଚ ସଂସ୍ମୃତ୍ୟ ସଂସ୍ମୃତ୍ୟ ରୂପମତ୍ୟଦ୍ଭୁତଂ ହରେଃ ।
ଵିସ୍ମୟୋ ମେ ମହାନ୍ରାଜନ୍ ହୃଷ୍ୟାମି ଚ ପୁନଃ ପୁନଃ ॥77॥

ୟତ୍ର ୟୋଗେଶ୍ଵରଃ କୃଷ୍ଣଃ ୟତ୍ର ପାର୍ଥୋ ଧନୁର୍ଧରଃ ।
ତତ୍ର ଶ୍ରୀର୍ଵିଜୟୋ ଭୂତିଃ ଧ୍ରୁଵା ନୀତିର୍ମତିର୍ମମ ॥78॥

॥ ଓଂ ତତ୍ସଦିତି ଶ୍ରୀମଦ୍ଭଗଵଦ୍ଗୀତାସୁ ଉପନିଷତ୍ସୁ ବ୍ରହ୍ମଵିଦ୍ୟାୟାଂ
ୟୋଗଶାସ୍ତ୍ରେ ଶ୍ରୀକୃଷ୍ଣାର୍ଜୁନସଂଵାଦେ ମୋକ୍ଷସନ୍ନ୍ୟାସୟୋଗୋ ନାମ ଅଷ୍ଟାଦଶୋଽଧ୍ୟାୟଃ ॥

bhagavadgita parayana chapter 18 in odia