ଶ୍ରୀମଦ୍ଭଗଵଦ୍ଗୀତା ପାରାୟଣ – ଦ୍ଵାଦଶୋଽଧ୍ୟାୟଃ

bhagavadgita parayana chapter 12 in odia

ଓଂ ଶ୍ରୀ ପରମାତ୍ମନେ ନମଃ
ଅଥ ଦ୍ଵାଦଶୋଽଧ୍ୟାୟଃ
ଭକ୍ତିୟୋଗଃ

ଅର୍ଜୁନ ଉଵାଚ
ଏଵଂ ସତତୟୁକ୍ତା ୟେ ଭକ୍ତାସ୍ତ୍ଵାଂ ପର୍ୟୁପାସତେ ।
ୟେ ଚାପ୍ୟକ୍ଷରମଵ୍ୟକ୍ତଂ ତେଷାଂ କେ ୟୋଗଵିତ୍ତମାଃ ॥1॥

ଶ୍ରୀ ଭଗଵାନୁଵାଚ
ମୟ୍ୟାଵେଶ୍ୟ ମନୋ ୟେ ମାଂ ନିତ୍ୟୟୁକ୍ତା ଉପାସତେ ।
ଶ୍ରଦ୍ଧୟା ପରୟୋପେତାଃ ତେ ମେ ୟୁକ୍ତତମା ମତାଃ ॥2॥

ୟେ ତ୍ଵକ୍ଷରମନିର୍ଦେଶ୍ୟମ୍ ଅଵ୍ୟକ୍ତଂ ପର୍ୟୁପାସତେ ।
ସର୍ଵତ୍ରଗମଚିଂତ୍ୟଂ ଚ କୂଟସ୍ଥମଚଲଂ ଧ୍ରୁଵମ୍ ॥3॥

ସନ୍ନିୟମ୍ୟେଂଦ୍ରିୟଗ୍ରାମଂ ସର୍ଵତ୍ର ସମବୁଦ୍ଧୟଃ ।
ତେ ପ୍ରାପ୍ନୁଵଂତି ମାମେଵ ସର୍ଵଭୂତହିତେ ରତାଃ ॥4॥

କ୍ଲେଶୋଽଧିକତରସ୍ତେଷାମ୍ ଅଵ୍ୟକ୍ତାସକ୍ତଚେତସାମ୍ ।
ଅଵ୍ୟକ୍ତା ହି ଗତିର୍ଦୁଃଖଂ ଦେହଵଦ୍ଭିରଵାପ୍ୟତେ ॥5॥

ୟେ ତୁ ସର୍ଵାଣି କର୍ମାଣି ମୟି ସନ୍ନ୍ୟସ୍ୟ ମତ୍ପରାଃ ।
ଅନନ୍ୟେନୈଵ ୟୋଗେନ ମାଂ ଧ୍ୟାୟଂତ ଉପାସତେ ॥6॥

ତେଷାମହଂ ସମୁଦ୍ଧର୍ତା ମୃତ୍ୟୁସଂସାରସାଗରାତ୍ ।
ଭଵାମି ନଚିରାତ୍ପାର୍ଥ ମୟ୍ୟାଵେଶିତଚେତସାମ୍ ॥7॥

ମୟ୍ୟେଵ ମନ ଆଧତ୍ସ୍ଵ ମୟି ବୁଦ୍ଧିଂ ନିଵେଶୟ ।
ନିଵସିଷ୍ୟସି ମୟ୍ୟେଵ ଅତ ଊର୍ଧ୍ଵଂ ନ ସଂଶୟଃ ॥8॥

ଅଥ ଚିତ୍ତଂ ସମାଧାତୁଂ ନ ଶକ୍ନୋଷି ମୟି ସ୍ଥିରମ୍ ।
ଅଭ୍ୟାସୟୋଗେନ ତତଃ ମାମିଚ୍ଛାପ୍ତୁଂ ଧନଂଜୟ ॥9॥

ଅଭ୍ୟାସେଽପ୍ୟସମର୍ଥୋଽସି ମତ୍କର୍ମପରମୋ ଭଵ ।
ମଦର୍ଥମପି କର୍ମାଣି କୁର୍ଵନ୍ସିଦ୍ଧିମଵାପ୍ସ୍ୟସି ॥10॥

ଅଥୈତଦପ୍ୟଶକ୍ତୋଽସି କର୍ତୁଂ ମଦ୍ୟୋଗମାଶ୍ରିତଃ ।
ସର୍ଵକର୍ମଫଲତ୍ୟାଗଂ ତତଃ କୁରୁ ୟତାତ୍ମଵାନ୍ ॥11॥

ଶ୍ରେୟୋ ହି ଜ୍ଞାନମଭ୍ୟାସାତ୍ ଜ୍ଞାନାଦ୍ଧ୍ୟାନଂ ଵିଶିଷ୍ୟତେ ।
ଧ୍ୟାନାତ୍କର୍ମଫଲତ୍ୟାଗଃ ତ୍ୟାଗାଚ୍ଛାଂତିରନଂତରମ୍ ॥12॥

ଅଦ୍ଵେଷ୍ଟା ସର୍ଵଭୂତାନାଂ ମୈତ୍ରଃ କରୁଣ ଏଵ ଚ ।
ନିର୍ମମୋ ନିରହଂକାରଃ ସମଦୁଃଖସୁଖଃ କ୍ଷମୀ ॥13॥

ସଂତୁଷ୍ଟଃ ସତତଂ ୟୋଗୀ ୟତାତ୍ମା ଦୃଢନିଶ୍ଚୟଃ ।
ମୟ୍ୟର୍ପିତମନୋବୁଦ୍ଧିଃ ୟୋ ମଦ୍ଭକ୍ତଃ ସ ମେ ପ୍ରିୟଃ ॥14॥

ୟସ୍ମାନ୍ନୋଦ୍ଵିଜତେ ଲୋକଃ ଲୋକାନ୍ନୋଦ୍ଵିଜତେ ଚ ୟଃ ।
ହର୍ଷାମର୍ଷଭୟୋଦ୍ଵେଗୈଃ ମୁକ୍ତୋ ୟଃ ସ ଚ ମେ ପ୍ରିୟଃ ॥15॥

ଅନପେକ୍ଷଃ ଶୁଚିର୍ଦକ୍ଷଃ ଉଦାସୀନୋ ଗତଵ୍ୟଥଃ ।
ସର୍ଵାରଂଭପରିତ୍ୟାଗୀ ୟୋ ମଦ୍ଭକ୍ତଃ ସ ମେ ପ୍ରିୟଃ ॥16॥

ୟୋ ନ ହୃଷ୍ୟତି ନ ଦ୍ଵେଷ୍ଟି ନ ଶୋଚତି ନ କାଂକ୍ଷତି ।
ଶୁଭାଶୁଭପରିତ୍ୟାଗୀ ଭକ୍ତିମାନ୍ୟଃ ସ ମେ ପ୍ରିୟଃ ॥17॥

ସମଃ ଶତ୍ରୌ ଚ ମିତ୍ରେ ଚ ତଥା ମାନାପମାନୟୋଃ ।
ଶୀତୋଷ୍ଣସୁଖଦୁଃଖେଷୁ ସମଃ ସଂଗଵିଵର୍ଜିତଃ ॥18॥

ତୁଲ୍ୟନିଂଦାସ୍ତୁତିର୍ମୌନୀ ସଂତୁଷ୍ଟୋ ୟେନ କେନଚିତ୍ ।
ଅନିକେତଃ ସ୍ଥିରମତିଃ ଭକ୍ତିମାନ୍ମେ ପ୍ରିୟୋ ନରଃ ॥19॥

ୟେ ତୁ ଧର୍ମ୍ୟାମୃତମିଦଂ ୟଥୋକ୍ତଂ ପର୍ୟୁପାସତେ ।
ଶ୍ରଦ୍ଦଧାନା ମତ୍ପରମାଃ ଭକ୍ତାସ୍ତେଽତୀଵ ମେ ପ୍ରିୟାଃ ॥20॥

॥ ଓଂ ତତ୍ସଦିତି ଶ୍ରୀମଦ୍ଭଗଵଦ୍ଗୀତାସୁ ଉପନିଷତ୍ସୁ ବ୍ରହ୍ମଵିଦ୍ୟାୟାଂ ୟୋଗଶାସ୍ତ୍ରେ
ଶ୍ରୀକୃଷ୍ଣାର୍ଜୁନସଂଵାଦେ ଭକ୍ତିୟୋଗୋ ନାମ ଦ୍ଵାଦଶୋଽଧ୍ୟାୟଃ ॥

bhagavadgita parayana chapter 12 in odia