ଅର୍ଜୁନ କୃତ ଶ୍ରୀ ଦୁର୍ଗା ସ୍ତୋତ୍ରମ୍

arjuna kruta durga stotram in odia

ଅର୍ଜୁନ ଉଵାଚ ।
ନମସ୍ତେ ସିଦ୍ଧସେନାନି ଆର୍ୟେ ମଂଦରଵାସିନି ।
କୁମାରି କାଳି କାପାଲି କପିଲେ କୃଷ୍ଣପିଂଗଳେ ॥ 1 ॥

ଭଦ୍ରକାଳି ନମସ୍ତୁଭ୍ୟଂ ମହାକାଳି ନମୋଽସ୍ତୁ ତେ ।
ଚଂଡି ଚଂଡେ ନମସ୍ତୁଭ୍ୟଂ ତାରିଣି ଵରଵର୍ଣିନି ॥ 2 ॥

କାତ୍ୟାୟନି ମହାଭାଗେ କରାଳି ଵିଜୟେ ଜୟେ ।
ଶିଖିପିଂଛଧ୍ଵଜଧରେ ନାନାଭରଣଭୂଷିତେ ॥ 3 ॥

ଅଟ୍ଟଶୂଲପ୍ରହରଣେ ଖଡ୍ଗଖେଟକଧାରିଣି ।
ଗୋପେଂଦ୍ରସ୍ୟାନୁଜେ ଜ୍ୟେଷ୍ଠେ ନଂଦଗୋପକୁଲୋଦ୍ଭଵେ ॥ 4 ॥

ମହିଷାସୃକ୍ପ୍ରିୟେ ନିତ୍ୟଂ କୌଶିକି ପୀତଵାସିନି ।
ଅଟ୍ଟହାସେ କୋକମୁଖେ ନମସ୍ତେଽସ୍ତୁ ରଣପ୍ରିୟେ ॥ 5 ॥

ଉମେ ଶାକଂଭରି ଶ୍ଵେତେ କୃଷ୍ଣେ କୈଟଭନାଶିନି ।
ହିରଣ୍ୟାକ୍ଷି ଵିରୂପାକ୍ଷି ସୁଧୂମ୍ରାକ୍ଷି ନମୋଽସ୍ତୁ ତେ ॥ 6 ॥

ଵେଦଶ୍ରୁତିମହାପୁଣ୍ୟେ ବ୍ରହ୍ମଣ୍ୟେ ଜାତଵେଦସି ।
ଜଂବୂକଟକଚୈତ୍ୟେଷୁ ନିତ୍ୟଂ ସନ୍ନିହିତାଲୟେ ॥ 7 ॥

ତ୍ଵଂ ବ୍ରହ୍ମଵିଦ୍ୟା ଵିଦ୍ୟାନାଂ ମହାନିଦ୍ରା ଚ ଦେହିନାମ୍ ।
ସ୍କଂଦମାତର୍ଭଗଵତି ଦୁର୍ଗେ କାଂତାରଵାସିନି ॥ 8 ॥

ସ୍ଵାହାକାରଃ ସ୍ଵଧା ଚୈଵ କଲା କାଷ୍ଠା ସରସ୍ଵତୀ ।
ସାଵିତ୍ରୀ ଵେଦମାତା ଚ ତଥା ଵେଦାଂତ ଉଚ୍ୟତେ ॥ 9 ॥

ସ୍ତୁତାସି ତ୍ଵଂ ମହାଦେଵି ଵିଶୁଦ୍ଧେନାଂତରାତ୍ମନା ।
ଜୟୋ ଭଵତୁ ମେ ନିତ୍ୟଂ ତ୍ଵତ୍ପ୍ରସାଦାଦ୍ରଣାଜିରେ ॥ 10 ॥

କାଂତାରଭୟଦୁର୍ଗେଷୁ ଭକ୍ତାନାଂ ଚାଲୟେଷୁ ଚ ।
ନିତ୍ୟଂ ଵସସି ପାତାଳେ ୟୁଦ୍ଧେ ଜୟସି ଦାନଵାନ୍ ॥ 11 ॥

ତ୍ଵଂ ଜଂଭନୀ ମୋହିନୀ ଚ ମାୟା ହ୍ରୀଃ ଶ୍ରୀସ୍ତଥୈଵ ଚ ।
ସଂଧ୍ୟା ପ୍ରଭାଵତୀ ଚୈଵ ସାଵିତ୍ରୀ ଜନନୀ ତଥା ॥ 12 ॥

ତୁଷ୍ଟିଃ ପୁଷ୍ଟିର୍ଧୃତିର୍ଦୀପ୍ତିଶ୍ଚଂଦ୍ରାଦିତ୍ୟଵିଵର୍ଧିନୀ ।
ଭୂତିର୍ଭୂତିମତାଂ ସଂଖ୍ୟେ ଵୀକ୍ଷ୍ୟସେ ସିଦ୍ଧଚାରଣୈଃ ॥ 13 ॥

ଇତି ଶ୍ରୀମନ୍ମହାଭାରତେ ଭୀଷ୍ମପର୍ଵଣି ତ୍ରୟୋଵିଂଶୋଽଧ୍ୟାୟେ ଅର୍ଜୁନ କୃତ ଶ୍ରୀ ଦୁର୍ଗା ସ୍ତୋତ୍ରମ୍ ।

arjuna kruta durga stotram in odia