ಶ್ರೀ ತ್ರಿಪುರಸುಂದರೀ ಪಂಚರತ್ನ ಸ್ತೋತ್ರಂ

ನೀಲಾಲಕಾಂ ಶಶಿಮುಖೀಂ ನವಪಲ್ಲವೋಷ್ಠೀಂ
ಚಾಂಪೇಯಪುಷ್ಪಸುಷಮೋಜ್ಜ್ವಲದಿವ್ಯನಾಸಾಮ್ |
ಪದ್ಮೇಕ್ಷಣಾಂ ಮುಕುರಸುಂದರಗಂಡಭಾಗಾಂ
ತ್ವಾಂ ಸಾಂಪ್ರತಂ ತ್ರಿಪುರಸುಂದರಿ ದೇವಿ ವಂದೇ || ೧ ||

ಶ್ರೀಕುಂದಕುಡ್ಮಲಶಿಖೋಜ್ಜ್ವಲದಂತಬೃಂದ-
-ಮಂದಸ್ಮಿತದ್ಯುತಿತಿರೋಹಿತಚಾರುವಾಣೀಮ್ |
ನಾನಾಮಣಿಸ್ಥಗಿತಹಾರಸುಚಾರುಕಂಠೀಂ
ತ್ವಾಂ ಸಾಂಪ್ರತಂ ತ್ರಿಪುರಸುಂದರಿ ದೇವಿ ವಂದೇ || ೨ ||

ಪೀನಸ್ತನೀಂ ಘನಭುಜಾಂ ವಿಪುಲಾಬ್ಜಹಸ್ತಾಂ
ಭೃಂಗಾವಲೀಜಿತಸುಶೋಭಿತರೋಮರಾಜಿಮ್ |
ಮತ್ತೇಭಕುಂಭಕುಚಭಾರಸುನಮ್ರಮಧ್ಯಾಂ
ತ್ವಾಂ ಸಾಂಪ್ರತಂ ತ್ರಿಪುರಸುಂದರಿ ದೇವಿ ವಂದೇ || ೩ ||

ರಂಭೋಜ್ಜ್ವಲೋರುಯುಗಲಾಂ ಮೃಗರಾಜಪತ್ರಾ-
-ಮಿಂದ್ರಾದಿದೇವಮಕುಟೋಜ್ಜ್ವಲಪಾದಪದ್ಮಾಮ್ |
ಹೇಮಾಂಬರಾಂ ಘನಘೃತಾಂಚಿತಖಡ್ಗವಲ್ಲೀಂ
ತ್ವಾಂ ಸಾಂಪ್ರತಂ ತ್ರಿಪುರಸುಂದರಿ ದೇವಿ ವಂದೇ || ೪ ||

ಮತ್ತೇಭವಕ್ತ್ರಜನನೀಂ ಮೃಡದೇಹಯುಕ್ತಾಂ
ಶೈಲಾಗ್ರಮಧ್ಯನಿಲಯಾಂ ವರಸುಂದರಾಂಗೀಮ್ |
ಕೋಟೀಶ್ವರಾಖ್ಯಹೃದಿಸಂಸ್ಥಿತಪಾದಪದ್ಮಾಂ
ತ್ವಾಂ ಸಾಂಪ್ರತಂ ತ್ರಿಪುರಸುಂದರಿ ದೇವಿ ವಂದೇ || ೫ ||

ಬಾಲೇ ತ್ವತ್ಪಾದಯುಗಲಂ ಧ್ಯಾತ್ವಾ ಸಂಪ್ರತಿ ನಿರ್ಮಿತಮ್ |
ನವೀನಂ ಪಂಚರತ್ನಂ ಚ ಧಾರ್ಯತಾಂ ಚರಣದ್ವಯೇ || ೬ ||

ಇತಿ ಶ್ರೀ ತ್ರಿಪುರಸುಂದರೀ ಪಂಚರತ್ನ ಸ್ತೋತ್ರಮ್ |