೨ (ವಿಷ್ಣುಯಾಮಲೇ)

ಧ್ಯಾನಮ್ –
ಸೌವರ್ಣಾಸನಸಂಸ್ಥಿತಾಂ ತ್ರಿನಯನಾಂ ಪೀತಾಂಶುಕೋಲ್ಲಾಸಿನೀಂ
ಹೇಮಾಭಾಂಗರುಚಿಂ ಶಶಾಂಕಮುಕುಟಾಂ ಸಚ್ಚಂಪಕಸ್ರಗ್ಯುತಾಮ್ |
ಹಸ್ತೈರ್ಮುದ್ಗರಪಾಶವಜ್ರರಸನಾಃ ಸಂಬಿಭ್ರತೀಂ ಭೂಷಣೈಃ
ವ್ಯಾಪ್ತಾಂಗೀಂ ಬಗಳಾಮುಖೀಂ ತ್ರಿಜಗತಾಂ ಸಂಸ್ತಂಭಿನೀಂ ಚಿಂತಯೇತ್ ||

ಶ್ರೀನಾರದ ಉವಾಚ |
ಭಗವನ್ ದೇವದೇವೇಶ ಸೃಷ್ಟಿಸ್ಥಿತಿಲಯಾತ್ಮಕ |
ಶತಮಷ್ಟೋತ್ತರಂ ನಾಮ್ನಾಂ ಬಗಳಾಯಾ ವದಾಽಧುನಾ || ೧ ||

ಶ್ರೀಭಗವಾನುವಾಚ |
ಶೃಣು ವತ್ಸ ಪ್ರವಕ್ಷ್ಯಾಮಿ ನಾಮ್ನಾಮಷ್ಟೋತ್ತರಂ ಶತಮ್ |
ಪೀತಾಂಬರ್ಯಾ ಮಹಾದೇವ್ಯಾಃ ಸ್ತೋತ್ರಂ ಪಾಪಪ್ರಣಾಶನಮ್ || ೨ ||

ಯಸ್ಯ ಪ್ರಪಠನಾತ್ ಸದ್ಯೋ ವಾದೀ ಮೂಕೋ ಭವೇತ್ ಕ್ಷಣಾತ್ |
ರಿಪೂಣಾಂ ಸ್ತಂಭನಂ ಯಾತಿ ಸತ್ಯಂ ಸತ್ಯಂ ವದಾಮ್ಯಹಮ್ || ೩ ||

ಅಸ್ಯ ಶ್ರೀಪೀತಾಂಬರ್ಯಷ್ಟೋತ್ತರಶತನಾಮಸ್ತೋತ್ರಸ್ಯ ಸದಾಶಿವ ಋಷಿಃ ಅನುಷ್ಟುಪ್ ಛಂದಃ ಶ್ರೀಪೀತಾಂಬರೀ ದೇವತಾ ಶ್ರೀಪೀತಾಂಬರೀ ಪ್ರೀತಯೇ ಜಪೇ ವಿನಿಯೋಗಃ ||

ಸ್ತೋತ್ರಮ್ –
ಓಂ | ಬಗಳಾ ವಿಷ್ಣುವನಿತಾ ವಿಷ್ಣುಶಂಕರಭಾಮಿನೀ |
ಬಹುಳಾ ವೇದಮಾತಾ ಚ ಮಹಾವಿಷ್ಣುಪ್ರಸೂರಪಿ || ೪ ||

ಮಹಾಮತ್ಸ್ಯಾ ಮಹಾಕೂರ್ಮಾ ಮಹಾವಾರಾಹರೂಪಿಣೀ |
ನರಸಿಂಹಪ್ರಿಯಾ ರಮ್ಯಾ ವಾಮನಾ ಬಟುರೂಪಿಣೀ || ೫ ||

ಜಾಮದಗ್ನ್ಯಸ್ವರೂಪಾ ಚ ರಾಮಾ ರಾಮಪ್ರಪೂಜಿತಾ |
ಕೃಷ್ಣಾ ಕಪರ್ದಿನೀ ಕೃತ್ಯಾ ಕಲಹಾ ಕಲಕಾರಿಣೀ || ೬ ||

ಬುದ್ಧಿರೂಪಾ ಬುದ್ಧಭಾರ್ಯಾ ಬೌದ್ಧಪಾಖಂಡಖಂಡಿನೀ |
ಕಲ್ಕಿರೂಪಾ ಕಲಿಹರಾ ಕಲಿದುರ್ಗತಿನಾಶಿನೀ || ೭ ||

ಕೋಟಿಸೂರ್ಯಪ್ರತೀಕಾಶಾ ಕೋಟಿಕಂದರ್ಪಮೋಹಿನೀ |
ಕೇವಲಾ ಕಠಿನಾ ಕಾಳೀ ಕಳಾ ಕೈವಲ್ಯದಾಯಿನೀ || ೮ ||

ಕೇಶವೀ ಕೇಶವಾರಾಧ್ಯಾ ಕಿಶೋರೀ ಕೇಶವಸ್ತುತಾ |
ರುದ್ರರೂಪಾ ರುದ್ರಮೂರ್ತೀ ರುದ್ರಾಣೀ ರುದ್ರದೇವತಾ || ೯ ||

ನಕ್ಷತ್ರರೂಪಾ ನಕ್ಷತ್ರಾ ನಕ್ಷತ್ರೇಶಪ್ರಪೂಜಿತಾ |
ನಕ್ಷತ್ರೇಶಪ್ರಿಯಾ ನಿತ್ಯಾ ನಕ್ಷತ್ರಪತಿವಂದಿತಾ || ೧೦ ||

ನಾಗಿನೀ ನಾಗಜನನೀ ನಾಗರಾಜಪ್ರವಂದಿತಾ |
ನಾಗೇಶ್ವರೀ ನಾಗಕನ್ಯಾ ನಾಗರೀ ಚ ನಗಾತ್ಮಜಾ || ೧೧ ||

ನಗಾಧಿರಾಜತನಯಾ ನಗರಾಜಪ್ರಪೂಜಿತಾ |
ನವೀನಾ ನೀರದಾ ಪೀತಾ ಶ್ಯಾಮಾ ಸೌಂದರ್ಯಕಾರಿಣೀ || ೧೨ ||

ರಕ್ತಾ ನೀಲಾ ಘನಾ ಶುಭ್ರಾ ಶ್ವೇತಾ ಸೌಭಾಗ್ಯದಾಯಿನೀ |
ಸುಂದರೀ ಸೌಭಗಾ ಸೌಮ್ಯಾ ಸ್ವರ್ಣಭಾ ಸ್ವರ್ಗತಿಪ್ರದಾ || ೧೩ ||

ರಿಪುತ್ರಾಸಕರೀ ರೇಖಾ ಶತ್ರುಸಂಹಾರಕಾರಿಣೀ |
ಭಾಮಿನೀ ಚ ತಥಾ ಮಾಯಾ ಸ್ತಂಭಿನೀ ಮೋಹಿನೀ ಶುಭಾ || ೧೪ ||

ರಾಗದ್ವೇಷಕರೀ ರಾತ್ರೀ ರೌರವಧ್ವಂಸಕಾರಿಣೀ |
ಯಕ್ಷಿಣೀ ಸಿದ್ಧನಿವಹಾ ಸಿದ್ಧೇಶಾ ಸಿದ್ಧಿರೂಪಿಣೀ || ೧೫ ||

ಲಂಕಾಪತಿಧ್ವಂಸಕರೀ ಲಂಕೇಶರಿಪುವಂದಿತಾ |
ಲಂಕಾನಾಥಕುಲಹರಾ ಮಹಾರಾವಣಹಾರಿಣೀ || ೧೬ ||

ದೇವದಾನವಸಿದ್ಧೌಘಪೂಜಿತಾ ಪರಮೇಶ್ವರೀ |
ಪರಾಣುರೂಪಾ ಪರಮಾ ಪರತಂತ್ರವಿನಾಶಿನೀ || ೧೭ ||

ವರದಾ ವರದಾರಾಧ್ಯಾ ವರದಾನಪರಾಯಣಾ |
ವರದೇಶಪ್ರಿಯಾ ವೀರಾ ವೀರಭೂಷಣಭೂಷಿತಾ || ೧೮ ||

ವಸುದಾ ಬಹುದಾ ವಾಣೀ ಬ್ರಹ್ಮರೂಪಾ ವರಾನನಾ |
ಬಲದಾ ಪೀತವಸನಾ ಪೀತಭೂಷಣಭೂಷಿತಾ || ೧೯ ||

ಪೀತಪುಷ್ಪಪ್ರಿಯಾ ಪೀತಹಾರಾ ಪೀತಸ್ವರೂಪಿಣೀ |
ಇತಿ ತೇ ಕಥಿತಂ ವಿಪ್ರ ನಾಮ್ನಾಮಷ್ಟೋತ್ತರಂ ಶತಮ್ || ೨೦ ||

ಯಃ ಪಠೇತ್ ಪಾಠಯೇದ್ವಾಪಿ ಶೃಣುಯಾದ್ವಾ ಸಮಾಹಿತಃ |
ತಸ್ಯ ಶತ್ರುಃ ಕ್ಷಯಂ ಸದ್ಯೋ ಯಾತಿ ನೈವಾತ್ರ ಸಂಶಯಃ || ೨೧ ||

ಪ್ರಭಾತಕಾಲೇ ಪ್ರಯತೋ ಮನುಷ್ಯಃ
ಪಠೇತ್ ಸುಭಕ್ತ್ಯಾ ಪರಿಚಿಂತ್ಯ ಪೀತಾಮ್ |
ದ್ರುತಂ ಭವೇತ್ತಸ್ಯ ಸಮಸ್ತವೃದ್ಧಿ-
-ರ್ವಿನಾಶಮಾಯಾತಿ ಚ ತಸ್ಯ ಶತ್ರುಃ || ೨೨ ||

ಇತಿ ಶ್ರೀವಿಷ್ಣುಯಾಮಲೇ ನಾರದವಿಷ್ಣುಸಂವಾದೇ ಶ್ರೀ ಪೀತಾಂಬರ್ಯಷ್ಟೋತ್ತರಶತನಾಮ ಸ್ತೋತ್ರಮ್ ||