ನಾರಾಯಣೀಯಂ ದಶಕ 77 – ಜರಾಸಂಧಾದಿಭಿಃ ಸಹ ಯುದ್ಧಂ

narayaniyam dashaka 77 in kannada

ಸೈರಂಧ್ರ್ಯಾಸ್ತದನು ಚಿರಂ ಸ್ಮರಾತುರಾಯಾ
ಯಾತೋಽಭೂಃ ಸುಲಲಿತಮುದ್ಧವೇನ ಸಾರ್ಧಮ್ ।
ಆವಾಸಂ ತ್ವದುಪಗಮೋತ್ಸವಂ ಸದೈವ
ಧ್ಯಾಯಂತ್ಯಾಃ ಪ್ರತಿದಿನವಾಸಸಜ್ಜಿಕಾಯಾಃ ॥1॥

ಉಪಗತೇ ತ್ವಯಿ ಪೂರ್ಣಮನೋರಥಾಂ ಪ್ರಮದಸಂಭ್ರಮಕಂಪ್ರಪಯೋಧರಾಮ್ ।
ವಿವಿಧಮಾನನಮಾದಧತೀಂ ಮುದಾ ರಹಸಿ ತಾಂ ರಮಯಾಂಚಕೃಷೇ ಸುಖಮ್ ॥2॥

ಪೃಷ್ಟಾ ವರಂ ಪುನರಸಾವವೃಣೋದ್ವರಾಕೀ
ಭೂಯಸ್ತ್ವಯಾ ಸುರತಮೇವ ನಿಶಾಂತರೇಷು ।
ಸಾಯುಜ್ಯಮಸ್ತ್ವಿತಿ ವದೇತ್ ಬುಧ ಏವ ಕಾಮಂ
ಸಾಮೀಪ್ಯಮಸ್ತ್ವನಿಶಮಿತ್ಯಪಿ ನಾಬ್ರವೀತ್ ಕಿಮ್ ॥3॥

ತತೋ ಭವಾನ್ ದೇವ ನಿಶಾಸು ಕಾಸುಚಿನ್ಮೃಗೀದೃಶಂ ತಾಂ ನಿಭೃತಂ ವಿನೋದಯನ್ ।
ಅದಾದುಪಶ್ಲೋಕ ಇತಿ ಶ್ರುತಂ ಸುತಂ ಸ ನಾರದಾತ್ ಸಾತ್ತ್ವತತಂತ್ರವಿದ್ಬಬಭೌ ॥4॥

ಅಕ್ರೂರಮಂದಿರಮಿತೋಽಥ ಬಲೋದ್ಧವಾಭ್ಯಾ-
ಮಭ್ಯರ್ಚಿತೋ ಬಹು ನುತೋ ಮುದಿತೇನ ತೇನ ।
ಏನಂ ವಿಸೃಜ್ಯ ವಿಪಿನಾಗತಪಾಂಡವೇಯ-
ವೃತ್ತಂ ವಿವೇದಿಥ ತಥಾ ಧೃತರಾಷ್ಟ್ರ್ಚೇಷ್ಟಾಮ್ ॥5॥

ವಿಘಾತಾಜ್ಜಾಮಾತುಃ ಪರಮಸುಹೃದೋ ಭೋಜನೃಪತೇ-
ರ್ಜರಾಸಂಧೇ ರುಂಧತ್ಯನವಧಿರುಷಾಂಧೇಽಥ ಮಥುರಾಮ್ ।
ರಥಾದ್ಯೈರ್ದ್ಯೋರ್ಲಬ್ಧೈಃ ಕತಿಪಯಬಲಸ್ತ್ವಂ ಬಲಯುತ-
ಸ್ತ್ರಯೋವಿಂಶತ್ಯಕ್ಷೌಹಿಣಿ ತದುಪನೀತಂ ಸಮಹೃಥಾಃ ॥6॥

ಬದ್ಧಂ ಬಲಾದಥ ಬಲೇನ ಬಲೋತ್ತರಂ ತ್ವಂ
ಭೂಯೋ ಬಲೋದ್ಯಮರಸೇನ ಮುಮೋಚಿಥೈನಮ್ ।
ನಿಶ್ಶೇಷದಿಗ್ಜಯಸಮಾಹೃತವಿಶ್ವಸೈನ್ಯಾತ್
ಕೋಽನ್ಯಸ್ತತೋ ಹಿ ಬಲಪೌರುಷವಾಂಸ್ತದಾನೀಮ್ ॥7॥

ಭಗ್ನಃ ಸ ಲಗ್ನಹೃದಯೋಽಪಿ ನೃಪೈಃ ಪ್ರಣುನ್ನೋ
ಯುದ್ಧಂ ತ್ವಯಾ ವ್ಯಧಿತ ಷೋಡಶಕೃತ್ವ ಏವಮ್ ।
ಅಕ್ಷೌಹಿಣೀಃ ಶಿವ ಶಿವಾಸ್ಯ ಜಘಂಥ ವಿಷ್ಣೋ
ಸಂಭೂಯ ಸೈಕನವತಿತ್ರಿಶತಂ ತದಾನೀಮ್ ॥8॥

ಅಷ್ಟಾದಶೇಽಸ್ಯ ಸಮರೇ ಸಮುಪೇಯುಷಿ ತ್ವಂ
ದೃಷ್ಟ್ವಾ ಪುರೋಽಥ ಯವನಂ ಯವನತ್ರಿಕೋಟ್ಯಾ ।
ತ್ವಷ್ಟ್ರಾ ವಿಧಾಪ್ಯ ಪುರಮಾಶು ಪಯೋಧಿಮಧ್ಯೇ
ತತ್ರಾಽಥ ಯೋಗಬಲತಃ ಸ್ವಜನಾನನೈಷೀಃ ॥9॥

ಪದಭ್ಯಾಂ ತ್ವಾಂ ಪದ್ಮಮಾಲೀ ಚಕಿತ ಇವ ಪುರಾನ್ನಿರ್ಗತೋ ಧಾವಮಾನೋ
ಮ್ಲೇಚ್ಛೇಶೇನಾನುಯಾತೋ ವಧಸುಕೃತವಿಹೀನೇನ ಶೈಲೇ ನ್ಯಲೈಷೀಃ ।
ಸುಪ್ತೇನಾಂಘ್ರ್ಯಾಹತೇನ ದ್ರುತಮಥ ಮುಚುಕುಂದೇನ ಭಸ್ಮೀಕೃತೇಽಸ್ಮಿನ್
ಭೂಪಾಯಾಸ್ಮೈ ಗುಹಾಂತೇ ಸುಲಲಿತವಪುಷಾ ತಸ್ಥಿಷೇ ಭಕ್ತಿಭಾಜೇ ॥10॥

ಐಕ್ಷ್ವಾಕೋಽಹಂ ವಿರಕ್ತೋಽಸ್ಮ್ಯಖಿಲನೃಪಸುಖೇ ತ್ವತ್ಪ್ರಸಾದೈಕಕಾಂಕ್ಷೀ
ಹಾ ದೇವೇತಿ ಸ್ತುವಂತಂ ವರವಿತತಿಷು ತಂ ನಿಸ್ಪೃಹಂ ವೀಕ್ಷ್ಯ ಹೃಷ್ಯನ್ ।
ಮುಕ್ತೇಸ್ತುಲ್ಯಾಂ ಚ ಭಕ್ತಿಂ ಧುತಸಕಲಮಲಾಂ ಮೋಕ್ಷಮಪ್ಯಾಶು ದತ್ವಾ
ಕಾರ್ಯಂ ಹಿಂಸಾವಿಶುದ್ಧ್ಯೈ ತಪ ಇತಿ ಚ ತದಾ ಪ್ರಾತ್ಥ ಲೋಕಪ್ರತೀತ್ಯೈ ॥11॥

ತದನು ಮಥುರಾಂ ಗತ್ವಾ ಹತ್ವಾ ಚಮೂಂ ಯವನಾಹೃತಾಂ
ಮಗಧಪತಿನಾ ಮಾರ್ಗೇ ಸೈನ್ಯೈಃ ಪುರೇವ ನಿವಾರಿತಃ ।
ಚರಮವಿಜಯಂ ದರ್ಪಾಯಾಸ್ಮೈ ಪ್ರದಾಯ ಪಲಾಯಿತೋ
ಜಲಧಿನಗರೀಂ ಯಾತೋ ವಾತಾಲಯೇಶ್ವರ ಪಾಹಿ ಮಾಮ್ ॥12॥

narayaniyam dashaka 77 in kannada