વિષ્ણુ પાદાદિ કેશાંત વર્ણન સ્તોત્રં

vishnu padadi keshanta varnana stotram in gujarati

લક્ષ્મીભર્તુર્ભુજાગ્રે કૃતવસતિ સિતં યસ્ય રૂપં વિશાલં
નીલાદ્રેસ્તુંગશૃંગસ્થિતમિવ રજનીનાથબિંબં વિભાતિ ।
પાયાન્નઃ પાંચજન્યઃ સ દિતિસુતકુલત્રાસનૈઃ પૂરયન્સ્વૈ-
-ર્નિધ્વાનૈર્નીરદૌઘધ્વનિપરિભવદૈરંબરં કંબુરાજઃ ॥ 1 ॥

આહુર્યસ્ય સ્વરૂપં ક્ષણમુખમખિલં સૂરયઃ કાલમેતં
ધ્વાંતસ્યૈકાંતમંતં યદપિ ચ પરમં સર્વધામ્નાં ચ ધામ ।
ચક્રં તચ્ચક્રપાણેર્દિતિજતનુગલદ્રક્તધારાક્તધારં
શશ્વન્નો વિશ્વવંદ્યં વિતરતુ વિપુલં શર્મ ધર્માંશુશોભમ્ ॥ 2 ॥

અવ્યાન્નિર્ઘાતઘોરો હરિભુજપવનામર્શનાધ્માતમૂર્તે-
-રસ્માન્વિસ્મેરનેત્રત્રિદશનુતિવચઃસાધુકારૈઃ સુતારઃ ।
સર્વં સંહર્તુમિચ્છોરરિકુલભુવન સ્ફારવિષ્ફારનાદઃ
સંયત્કલ્પાંતસિંધૌ શરસલિલઘટાવાર્મુચઃ કાર્મુકસ્ય ॥ 3 ॥

જીમૂતશ્યામભાસા મુહુરપિ ભગવદ્બાહુના મોહયંતી
યુદ્ધેષૂદ્ધૂયમાના ઝટિતિ તટિદિવાલક્ષ્યતે યસ્ય મૂર્તિઃ ।
સોઽસિસ્ત્રાસાકુલાક્ષત્રિદશરિપુવપુઃશોણિતાસ્વાદતૃપ્તો
નિત્યાનંદાય ભૂયાન્મધુમથનમનોનંદનો નંદકો નઃ ॥ 4 ॥

કમ્રાકારા મુરારેઃ કરકમલતલેનાનુરાગાદ્ગૃહીતા
સમ્યગ્વૃત્તા સ્થિતાગ્રે સપદિ ન સહતે દર્શનં યા પરેષામ્ ।
રાજંતી દૈત્યજીવાસવમદમુદિતા લોહિતાલેપનાર્દ્રા
કામં દીપ્તાંશુકાંતા પ્રદિશતુ દયિતેવાસ્ય કૌમોદકી નઃ ॥ 5 ॥

યો વિશ્વપ્રાણભૂતસ્તનુરપિ ચ હરેર્યાનકેતુસ્વરૂપો
યં સંચિંત્યૈવ સદ્યઃ સ્વયમુરગવધૂવર્ગગર્ભાઃ પતંતિ ।
ચંચચ્ચંડોરુતુંડત્રુટિતફણિવસારક્તપંકાંકિતસ્યં
વંદે છંદોમયં તં ખગપતિમમલસ્વર્ણવર્ણં સુપર્ણમ્ ॥ 6 ॥

વિષ્ણોર્વિશ્વેશ્વરસ્ય પ્રવરશયનકૃત્સર્વલોકૈકધર્તા
સોઽનંતઃ સર્વભૂતઃ પૃથુવિમલયશાઃ સર્વવેદૈશ્ચ વેદ્યઃ ।
પાતા વિશ્વસ્ય શશ્વત્સકલસુરરિપુધ્વંસનઃ પાપહંતા
સર્વજ્ઞઃ સર્વસાક્ષી સકલવિષભયાત્પાતુ ભોગીશ્વરો નઃ ॥ 7 ॥

વાગ્ભૂગૈર્યાદિભેદૈર્વિદુરિહ મુનયો યાં યદીયૈશ્ચ પુંસાં
કારુણ્યાર્દ્રૈઃ કટાક્ષૈઃ સકૃદપિ પતિતૈઃ સંપદઃ સ્યુઃ સમગ્રાઃ ।
કુંદેંદુસ્વચ્છમંદસ્મિતમધુરમુખાંભોરુહાં સુંદરાંગીં
વંદે વંદ્યામશેષૈરપિ મુરભિદુરોમંદિરામિંદિરાં તામ્ ॥ 8 ॥

યા સૂતે સત્ત્વજાલં સકલમપિ સદા સંનિધાનેન પુંસો
ધત્તે યા તત્ત્વયોગાચ્ચરમચરમિદં ભૂતયે ભૂતજાતમ્ ।
ધાત્રીં સ્થાત્રીં જનિત્રીં પ્રકૃતિમવિકૃતિં વિશ્વશક્તિં વિધાત્રીં
વિષ્ણોર્વિશ્વાત્મનસ્તાં વિપુલગુણમયીં પ્રાણનાથાં પ્રણૌમિ ॥ 9 ॥

યેભ્યોઽસૂયદ્ભિરુચ્ચૈઃ સપદિ પદમુરુ ત્યજ્યતે દૈત્યવર્ગૈ-
-ર્યેભો ધર્તું ચ મૂર્ધ્ના સ્પૃહયતિ સતતં સર્વગીર્વાણવર્ગઃ ।
નિત્યં નિર્મૂલયેયુર્નિચિતતરમમી ભક્તિનિઘ્નાત્મનાં નઃ
પદ્માક્ષસ્યાંઘ્રિપદ્મદ્વયતલનિલયાઃ પાંસવઃ પાપપંકમ્ ॥ 10 ॥

રેખા લેખાદિવંદ્યાશ્ચરણતલગતાશ્ચક્રમત્સ્યાદિરૂપાઃ
સ્નિગ્ધાઃ સૂક્ષ્માઃ સુજાતા મૃદુલલિતતરક્ષૌમસૂત્રાયમાણાઃ ।
દદ્યુર્નો મંગળાનિ ભ્રમરભરજુષા કોમલેનાબ્ધિજાયાઃ
કમ્રેણામ્રેડ્યમાનાઃ કિસલયમૃદુના પાણિના ચક્રપાણેઃ ॥ 11 ॥

યસ્માદાક્રામતો દ્યાં ગરુડમણિશિલાકેતુદંડાયમાના
દાશ્ચ્યોતંતી બભાસે સુરસરિદમલા વૈજયંતીવ કાંતા ।
ભૂમિષ્ઠો યસ્તથાન્યો ભુવનગૃહબૃહત્‍સ્તંભશોભાં દધૌ નઃ
પાતામેતૌ પાયોજોદરલલિતતલૌ પંકજાક્ષસ્ય પાદૌ ॥ 12 ॥

આક્રામદ્ભ્યાં ત્રિલોકીમસુરસુરપતી તત્ક્ષણાદેવ નીતૌ
યાભ્યાં વૈરોચનીંદ્રૌ યુગપદપિ વિપત્સંપદોરેકધામઃ ।
તાભ્યાં તામ્રોદરાભ્યાં મુહુરહમજિતસ્યાંચિતાભ્યામુભાભ્યાં
પ્રાજ્યૈશ્વર્યપ્રદાભ્યાં પ્રણતિમુપગતઃ પાદપંકેરુહાભ્યામ્ ॥ 13 ॥

યેભ્યો વર્ણશ્ચતુર્થશ્ચરમત ઉદભૂદાદિસર્ગે પ્રજાનાં
સાહસ્રી ચાપિ સંખ્યા પ્રકટમભિહિતા સર્વવેદેષુ યેષામ્ ।
પ્રાપ્તા વિશ્વંભરા યૈરતિવિતતતનોર્વિશ્વમૂર્તેર્વિરાજો
વિષ્ણોસ્તેભ્યો મહદ્ભ્યઃ સતતમપિ નમોઽસ્ત્વંઘ્રિપંકેરુહેભ્યઃ ॥ 14 ॥

વિષ્ણોઃ પાદદ્વયાગ્રે વિમલનખમણિભ્રાજિતા રાજતે યા
રાજીવસ્યેવ રમ્યા હિમજલકણિકાલંકૃતાગ્રા દલાલી ।
અસ્માકં વિસ્મયાર્હાણ્યખિલજનમન પ્રાર્થનીયા હિ સેયં
દદ્યાદાદ્યાનવદ્યા તતિરતિરુચિરા મંગળાન્યંગુળીનામ્ ॥ 15 ॥

યસ્યાં દૃષ્ટ્વામલાયાં પ્રતિકૃતિમમરાઃ સંભવંત્યાનમંતઃ
સેંદ્રાઃ સાંદ્રીકૃતેર્ષ્યાસ્ત્વપરસુરકુલાશંકયાતંકવંતઃ ।
સા સદ્યઃ સાતિરેકાં સકલસુખકરીં સંપદં સાધયેન્ન-
-શ્ચંચચ્ચાર્વંશુચક્રા ચરણનળિનયોશ્ચક્રપાણેર્નખાલી ॥ 16 ॥

પાદાંભોજન્મસેવાસમવનતસુરવ્રાતભાસ્વત્કિરીટ-
-પ્રત્યુપ્તોચ્ચાવચાશ્મપ્રવરકરગણૈશ્ચિંતિતં યદ્વિભાતિ ।
નમ્રાંગાનાં હરેર્નો હરિદુપલમહાકૂર્મસૌંદર્યહારિ-
-ચ્છાયં શ્રેયઃપ્રદાયિ પ્રપદયુગમિદં પ્રાપયેત્પાપમંતમ્ ॥ 17 ॥

શ્રીમત્યૌ ચારુવૃત્તે કરપરિમલનાનંદહૃષ્ટે રમાયાઃ
સૌંદર્યાઢ્યેંદ્રનીલોપલરચિતમહાદંડયોઃ કાંતિચોરે ।
સૂરીંદ્રૈઃ સ્તૂયમાને સુરકુલસુખદે સૂદિતારાતિસંઘે
જંઘે નારાયણીયે મુહુરપિ જયતામસ્મદંહો હરંત્યૌ ॥ 18 ॥

સમ્યક્સાહ્યં વિધાતું સમમિવ સતતં જંઘયોઃ ખિન્નયોર્યે
ભારીભૂતોરુદંડદ્વયભરણકૃતોત્તંભભાવં ભજેતે ।
ચિત્તાદર્શં નિધાતું મહિતમિવ સતાં તે સમુદ્રાયમાને
વૃત્તાકારે વિધત્તાં હ્યદિ મુદમજિતસ્યાનિશં જાનુની નઃ ॥ 19 ॥

દેવો ભીતિં વિધાતુઃ સપદિ વિદધતૌ કૈટભાખ્યં મધું ચા-
-પ્યારોપ્યારૂઢગર્વાવધિજલધિ યયોરાદિદૈત્યૌ જઘાન ।
વૃત્તાવન્યોન્યતુલ્યૌ ચતુરમુપચયં બિભ્રતાવભ્રનીલા-
-વૂરૂ ચારૂ હરેસ્તૌ મુદમતિશયિનીં માનસે નો વિધત્તામ્ ॥ 20 ॥

પીતેન દ્યોતતે યચ્ચતુરપરિહિતેનાંબરેણાત્યુદારં
જાતાલંકારયોગં જલમિવ જલધેર્બાડબાગ્નિપ્રભાભિઃ ।
એતત્પાતિત્યદાન્નો જઘનમતિઘનાદેનસો માનનીયં
સાતત્યેનૈવ ચેતોવિષયમવતરત્પાતુ પીતાંબરસ્ય ॥ 21 ॥

યસ્યા દામ્ના ત્રિધામ્નો જઘનકલિતયા ભ્રાજતેઽંગં યથાબ્ધે-
-ર્મધ્યસ્થો મંદરાદ્રિર્ભુજગપતિમહાભોગસંનદ્ધમધ્યઃ ।
કાંચી સા કાંચનાભા મણિવરકિરણૈરુલ્લસદ્ભિઃ પ્રદીપ્તા
કલ્યાં કળ્યાણદાત્રીં મમ મતિમનિશં કમ્રરૂપાં કરોતુ ॥ 22 ॥

ઉન્નમ્રં કમ્રમુચ્ચૈરુપચિતમુદભૂદ્યત્ર પત્રૈર્વિચિત્રૈઃ
પૂર્વં ગીર્વાણપૂજ્યં કમલજમધુપસ્યાસ્પદં તત્પયોજમ્ ।
યસ્મિન્નીલાશ્મનીલૈસ્તરલરુચિજલૈઃ પૂરિતે કેલિબુદ્ધ્યા
નાલીકાક્ષસ્ય નાભીસરસિ વસતુ નશ્ચિત્તહંસશ્ચિરાય ॥ 23 ॥

પાતાલં યસ્ય નાલં વલયમપિ દિશાં પત્રપંક્તીર્નગેંદ્રા-
-ન્વિદ્વાંસઃ કેસરાલીર્વિદુરિહ વિપુલાં કર્ણિકાં સ્વર્ણશૈલમ્ ।
ભૂયાદ્ગાયત્સ્વયંભૂમધુકરભવનં ભૂમયં કામદં નો
નાલીકં નાભિપદ્માકરભવમુરુ તન્નાગશય્યસ્ય શૌરેઃ ॥ 24 ॥

આદૌ કલ્પસ્ય યસ્માત્પ્રભવતિ વિતતં વિશ્વમેતદ્વિકલ્પૈઃ
કલ્પાંતે યસ્ય ચાંત પ્રવિશતિ સકલં સ્થાવરં જંગમં ચ ।
અત્યંતાચિંત્યમૂર્તેશ્ચિરતરમજિતસ્યાંતરિક્ષસ્વરૂપે
તસ્મિન્નસ્માકમંતઃકરણમતિમુદા ક્રીડતાત્ક્રોડભાગે ॥ 25 ॥

કાંત્યંભઃપૂરપૂર્ણે લસદસિતવલીભંગભાસ્વત્તરંગે
ગંભીરાકારનાભીચતુરતરમહાવર્તશોભિન્યુદારે ।
ક્રીડત્વાનદ્વહેમોદરનહનમહાબાડબાગ્નિપ્રભાઢ્યે
કામં દામોદરીયોદરસલિલનિધૌ ચિત્તમત્સ્યશ્ચિરં નઃ ॥ 26 ॥

નાભીનાલીકમૂલાદધિકપરિમળોન્મોહિતાનામલીનાં
માલા નીલેવ યાંતી સ્ફુરતિ રુચિમતી વક્ત્રપદ્મોન્મુખી યા ।
રમ્યા સા રોમરાજિર્મહિતરુચિકરી મધ્યભાગસ્ય વિષ્ણો-
-શ્ચિત્તસ્થા મા વિરંસીચ્ચિરતરમુચિતાં સાધયંતી શ્રિયં નઃ ॥ 27 ॥

સંસ્તીર્ણં કૌસ્તુભાંશુપ્રસરકિસલયૈર્મુગ્ધમુક્તાફલાઢ્યં
શ્રીવત્સોલ્લાસિ ફુલ્લપ્રતિનવવનમાલાંકિ રાજદ્ભુજાંતમ્ ।
વક્ષઃ શ્રીવૃક્ષકાંતં મધુકરનિકરશ્યામલં શાર્ઙ્ગપાણેઃ
સંસારાધ્વશ્રમાર્તૈરુપવનમિવ યત્સેવિતં તત્પ્રપદ્યે ॥ 28 ॥

કાંતં વક્ષો નિતાંતં વિદધદિવ ગલં કાલિમા કાલશત્રો-
-રિંદોર્બિંબં યથાંકો મધુપ ઇવ તરોર્મંજરીં રાજતે યઃ ।
શ્રીમાન્નિત્યં વિધેયાદવિરલમિલિતઃ કૌસ્તુભશ્રીપ્રતાનૈઃ
શ્રીવત્સઃ શ્રીપતેઃ સ શ્રિય ઇવ દયિતો વત્સ ઉચ્ચૈઃશ્રિયં નઃ ॥ 29 ॥

સંભૂયાંભોધિમધ્યાત્સપદિ સહજયા યઃ શ્રિયા સંનિધત્તે
નીલે નારાયણોરઃસ્થલગગનતલે હારતારોપસેવ્યે ।
આશાઃ સર્વાઃ પ્રકાશા વિદધદપિદધચ્ચાત્મભાસાન્યતેજા-
-સ્યાશ્ચર્યસ્યાકરો નો દ્યુમણિરિવ મણિઃ કૌસ્તુભઃ સોઽસ્તુભૂત્યૈ ॥ 30 ॥

યા વાયાવાનુકૂલ્યાત્સરતિ મણિરુચા ભાસમાના સમાના
સાકં સાકંપમંસે વસતિ વિદધતી વાસુભદ્રં સુભદ્રમ્ ।
સારં સારંગસંઘૈર્મુખરિતકુસુમા મેચકાંતા ચ કાંતા
માલા માલાલિતાસ્માન્ન વિરમતુ સુખૈર્યોજયંતી જયંતી ॥ 31 ॥

હારસ્યોરુપ્રભાભિઃ પ્રતિનવવનમાલાશુભિઃ પ્રાંશુરૂપૈઃ
શ્રીભિશ્ચાપ્યંગદાનાં કબલિતરુચિ યન્નિષ્કભાભિશ્ચ ભાતિ ।
બાહુલ્યેનૈવ બદ્ધાંજલિપુટમજિતસ્યાભિયાચામહે ત-
-દ્વંધાર્તિં બાધતાં નો બહુવિહતિકરીં બંધુરં બાહુમૂલમ્ ॥ 32 ॥

વિશ્વત્રાણૈકદીક્ષાસ્તદનુગુણગુણક્ષત્રનિર્માણદક્ષાઃ
કર્તારો દુર્નિરૂપસ્ફુટગુણયશસા કર્મણામદ્ભુતાનામ્ ।
શાર્ઙ્ગં બાણં કૃપાણં ફલકમરિગદે પદ્મશંખૌ સહસ્રં
બિભ્રાણાઃ શસ્ત્રજાલં મમ દધતુ હરેર્બાહવો મોહહાનિમ્ ॥ 33 ॥

કંઠાકલ્પોદ્ગતૈર્યઃ કનકમયલસત્કુંડલોત્થૈરુદારૈ-
-રુદ્યોતૈઃ કૌસ્તુભસ્યાપ્યુરુભિરુપચિતશ્ચિત્રવર્ણો વિભાતિ ।
કંઠાશ્લેષે રમાયાઃ કરવલયપદૈર્મુદ્રિતે ભદ્રરૂપે
વૈકુંઠીયેઽત્ર કંઠે વસતુ મમ મતિઃ કુંઠભાવં વિહાય ॥ 34 ॥

પદ્માનંદપ્રદાતા પરિલસદરુણશ્રીપરીતાગ્રભાગઃ
કાલે કાલે ચ કંબુપ્રવરશશધરાપૂરણે યઃ પ્રવીણઃ ।
વક્ત્રાકાશાંતરસ્થસ્તિરયતિ નિતરાં દંતતારૌઘશોભાં
શ્રીભર્તુર્દંતવાસોદ્યુમણિરઘતમોનાશનાયાસ્ત્વસૌ નઃ ॥ 35 ॥

નિત્યં સ્નેહાતિરેકાન્નિજકમિતુરલં વિપ્રયોગાક્ષમા યા
વક્ત્રેંદોરંતરાલે કૃતવસતિરિવાભાતિ નક્ષત્રરાજિઃ ।
લક્ષ્મીકાંતસ્ય કાંતાકૃતિરતિવિલસન્મુગ્ધમુક્તાવલિશ્રી-
-ર્દંતાલી સંતતં સા નતિનુતિનિરતાનક્ષતાન્રક્ષતાન્નઃ ॥ 36 ॥

બ્રહ્મન્બ્રહ્મણ્યજિહ્માં મતિમપિ કુરુષે દેવ સંભાવયે ત્વાં
શંભો શક્ર ત્રિલોકીમવસિ કિમમરૈર્નારદાદ્યાઃ સુખં વઃ ।
ઇત્થં સેવાવનમ્રં સુરમુનિનિકરં વીક્ષ્ય વિષ્ણોઃ પ્રસન્ન-
-સ્યાસ્યેંદોરાસ્રવંતી વરવચનસુધાહ્લાદયેન્માનસં નઃ ॥ 37 ॥

કર્ણસ્થસ્વર્ણકમ્રોજ્જ્વલમકરમહાકુંડલપ્રોતદીપ્ય-
-ન્માણિક્યશ્રીપ્રતાનૈઃ પરિમિલિતમલિશ્યામલં કોમલં યત્ ।
પ્રોદ્યત્સૂર્યાંશુરાજન્મરકતમુકુરાકારચોરં મુરારે-
-ર્ગાઢામાગામિનીં નઃ શમયતુ વિપદં ગંડયોર્મંડલં તત્ ॥ 38 ॥

વક્ત્રાંભોજે લસંતં મુહુરધરમણિં પક્વબિંબાભિરામં
દૃષ્ટ્વા દ્રષ્ટું શુકસ્ય સ્ફુટમવતરતસ્તુંડદંડાયતે યઃ ।
ઘોણઃ શોણીકૃતાત્મા શ્રવણયુગળસત્કુંડલોસ્રૈર્મુરારેઃ
પ્રાણાખ્યસ્યાનિલસ્ય પ્રસરણસરણિઃ પ્રાણદાનાય નઃ સ્યાત્ ॥ 39 ॥

દિક્કાલૌ વેદયંતૌ જગતિ મુહુરિમૌ સંચરંતૌ રવીંદૂ
ત્રૈલોક્યાલોકદીપાવભિદધતિ યયોરેવ રૂપં મુનીંદ્રાઃ ।
અસ્માનબ્જપ્રભે તે પ્રચુરતરકૃપાનિર્ભરં પ્રેક્ષમાણે
પાતામાતામ્રશુક્લાસિતરુચિરુચિરે પદ્મનેત્રસ્ય નેત્રે ॥ 40 ॥

પાતાત્પાતાલપાતાત્પતગપતિગતેર્ભ્રૂયુગં ભુગ્નમધ્યં
યેનેષચ્ચાલિતેન સ્વપદનિયમિતાઃ સાસુરા દેવસંઘાઃ ।
નૃત્યલ્લાલાટરંગે રજનિકરતનોરર્ધખંડાવદાતે
કાલવ્યાલદ્વયં વા વિલસતિ સમયા વાલિકામાતરં નઃ ॥ 41 ॥

લક્ષ્માકારાલકાલિસ્ફુરદલિકશશાંકાર્ધસંદર્શમીલ-
-ન્નેત્રાંભોજપ્રબોધોત્સુકનિભૃતતરાલીનભૃંગચ્છટાભે ।
લક્ષ્મીનાથસ્ય લક્ષ્યીકૃતવિબુધગણાપાંગબાણાસનાર્ધ-
-ચ્છાયે નો ભૂરિભૂતિપ્રસવકુશલતે ભ્રૂલતે પાલયેતામ્ ॥ 42 ॥

રૂક્ષસ્મારેક્ષુચાપચ્યુતશરનિકરક્ષીણલક્ષ્મીકટાક્ષ-
-પ્રોત્ફુલ્લત્પદ્મમાલાવિલસિતમહિતસ્ફાટિકૈશાનલિંગમ્ ।
ભૂયાદ્ભૂયો વિભૂત્યૈ મમ ભુવનપતેર્ભ્રૂલતાદ્વંદ્વમધ્યા-
-દુત્થં તત્પુંડ્રમૂર્ધ્વં જનિમરણતમઃખંડનં મંડનં ચ ॥ 43 ॥

પીઠીભૂતાલકાંતે કૃતમકુટમહાદેવલિંગપ્રતિષ્ઠે
લાલાટે નાટ્યરંગે વિકટતરતટે કૈટભારેશ્ચિરાય ।
પ્રોદ્ધાટ્યૈવાત્મતંદ્રીપ્રકટપટકુટીં પ્રસ્ફુરંતીં સ્ફુટાંગં
પટ્વીયં ભાવનાખ્યાં ચટુલમતિનટી નાટિકાં નાટયેન્નઃ ॥ 44 ॥

માલાલીવાલિધામ્નઃ કુવલયકલિતા શ્રીપતેઃ કુંતલાલી
કાલિંદ્યારુહ્ય મૂર્ધ્નો ગલતિ હરશિરઃસ્વર્ધુનીસ્પર્ધયા નુ ।
રાહુર્વા યાતિ વક્ત્રં સકલશશિકલાભ્રાંતિલોલાંતરાત્મા
લોકૈરાલોક્યતે યા પ્રદિશતુ સતતં સાખિલં મંગળં નઃ ॥ 45 ॥

સુપ્તાકારાઃ પ્રસુપ્તે ભગવતિ વિબુધૈરપ્યદૃષ્ટસ્વરૂપા
વ્યાપ્તવ્યોમાંતરાલાસ્તરલમણિરુચા રંજિતાઃ સ્પષ્ટભાસઃ ।
દેહચ્છાયોદ્ગમાભા રિપુવપુરગુરુપ્લોષરોષાગ્નિધૂમ્યાઃ
કેશાઃ કેશિદ્વિષો નો વિદધતુ વિપુલક્લેશપાશપ્રણાશમ્ ॥ 46 ॥

યત્ર પ્રત્યુપ્તરત્નપ્રવરપરિલસદ્ભૂરિરોચિષ્પ્રતાન-
-સ્ફૂર્ત્યાં મૂર્તિર્મુરારેર્દ્યુમણિશતચિતવ્યોમવદ્દુર્નિરીક્ષ્યા ।
કુર્વત્પારેપયોધિ જ્વલદકૃશશિખાભાસ્વદૌર્વાગ્નિશંકાં
શશ્વન્નઃ શર્મ દિશ્યાત્કલિકલુષતમઃપાટનં તત્કિરીટમ્ ॥ 47 ॥

ભ્રાંત્વા ભ્રાંત્વા યદંતસ્ત્રિભુવનગુરુરપ્યબ્દકોટીરનેકા
ગંતું નાંતં સમર્થો ભ્રમર ઇવ પુનર્નાભિનાલીકનાલાત્ ।
ઉન્મજ્જન્નૂર્જિતશ્રીસ્ત્રિભુવનમપરં નિર્મમે તત્સદૃક્ષં
દેહાંભોધિઃ સ દેયાન્નિરવધિરમૃતં દૈત્યવિદ્વેષિણો નઃ ॥ 48 ॥

મત્સ્યઃ કૂર્મો વરાહો નરહરિણપતિર્વામનો જામદગ્ન્યઃ
કાકુત્સ્થઃ કંસઘાતી મનસિજવિજયી યશ્ચ કલ્કિર્ભવિષ્યન્ ।
વિષ્ણોરંશાવતરા ભુવનહિતકરા ધર્મસંસ્થાપનાર્થાઃ
પાયાસુર્માં ત એતે ગુરુતરકરુણાભારખિન્નાશયા યે ॥ 49 ॥

યસ્માદ્વાચો નિવૃત્તાઃ સમમપિ મનસા લક્ષણામીક્ષમાણાઃ
સ્વાર્થાલાભાત્પરાર્થવ્યપગમકથનશ્લાઘિનો વેદવાદાઃ ।
નિત્યાનંદં સ્વસંવિન્નિરવધિવિમલસ્વાંતસંક્રાંતબિંબ-
-ચ્છાયાપત્યાપિ નિત્યં સુખયતિ યમિનો યત્તદવ્યાન્મહો નઃ ॥ 50 ॥

આપાદાદા ચ શીર્ષાદ્વપુરિદમનઘં વૈષ્ણવં યઃ સ્વચિત્તે
ધત્તે નિત્યં નિરસ્તાખિલકલિકલુષ સંતતાંતઃ પ્રમોદમ્ ।
જુહ્વજ્જિહ્વાકૃશાનૌ હરિચરિતહવિઃ સ્તોત્રમંત્રાનુપાઠૈ-
-સ્તત્પાદાંભોરુહાભ્યાં સતતમપિ નમસ્કુર્મહે નિર્મલાભ્યામ્ ॥ 51 ॥

મોદાત્પાદાદિકેશસ્તુતિમિતિરચિતા કીર્તયિત્વા ત્રિધામ્ન
પાદાબ્જદ્વંદ્વસેવાસમયનતમતિર્મસ્તકેનાનમેદ્ય ।
ઉન્મુચ્યૈવાત્મનૈનોનિચયકવચક પંચતામેત્ય ભાનો-
-ર્બિંબાંતર્ગોચર સ પ્રવિશતિ પરમાનંદમાત્મસ્વરૂપમ્ ॥ 52 ॥

ઇતિ શ્રીમત્પરમહંસપરિવ્રાજકાચાર્યસ્ય શ્રીગોવિંદભગવત્પૂજ્યપાદશિષ્યસ્ય શ્રીમચ્છંકરભગવતઃ કૃતૌ શ્રી વિષ્ણુ પાદાદિકેશાંતવર્ણણ સ્તોત્રં સંપૂર્ણમ્ ।

vishnu padadi keshanta varnana stotram in gujarati