নারাযণীযং দশক 92 – কর্মমিশ্রভক্তিঃ

narayaniyam dashaka 92 in assamese

বেদৈস্সর্বাণি কর্মাণ্যফলপরতযা বর্ণিতানীতি বুধ্বা
তানি ত্বয্যর্পিতান্যেব হি সমনুচরন্ যানি নৈষ্কর্ম্যমীশ ।
মা ভূদ্বেদৈর্নিষিদ্ধে কুহচিদপি মনঃকর্মবাচাং প্রবৃত্তি-
র্দুর্বর্জং চেদবাপ্তং তদপি খলু ভবত্যর্পযে চিত্প্রকাশে ॥1॥

যস্ত্বন্যঃ কর্মযোগস্তব ভজনমযস্তত্র চাভীষ্টমূর্তিং
হৃদ্যাং সত্ত্বৈকরূপাং দৃষদি হৃদি মৃদি ক্বাপি বা ভাবযিত্বা ।
পুষ্পৈর্গংধৈর্নিবেদ্যৈরপি চ বিরচিতৈঃ শক্তিতো ভক্তিপূতৈ-
র্নিত্যং বর্যাং সপর্যাং বিদধদযি বিভো ত্বত্প্রসাদং ভজেযম্ ॥2॥

স্ত্রীশূদ্রাস্ত্বত্কথাদিশ্রবণবিরহিতা আসতাং তে দযার্হা-
স্ত্বত্পাদাসন্নযাতান্ দ্বিজকুলজনুষো হংত শোচাম্যশাংতান্ ।
বৃত্ত্যর্থং তে যজংতো বহুকথিতমপি ত্বামনাকর্ণযংতো
দৃপ্তা বিদ্যাভিজাত্যৈঃ কিমু ন বিদধতে তাদৃশং মা কৃথা মাম্ ॥3॥

পাপোঽযং কৃষ্ণরামেত্যভিলপতি নিজং গূহিতুং দুশ্চরিত্রং
নির্লজ্জস্যাস্য বাচা বহুতরকথনীযানি মে বিঘ্নিতানি ।
ভ্রাতা মে বংধ্যশীলো ভজতি কিল সদা বিষ্ণুমিত্থং বুধাংস্তে
নিংদংত্যুচ্চৈর্হসংতি ত্বযি নিহিতমতীংস্তাদৃশং মা কৃথা মাম্ ॥4॥

শ্বেতচ্ছাযং কৃতে ত্বাং মুনিবরবপুষং প্রীণযংতে তপোভি-
স্ত্রেতাযাং স্রুক্স্রুবাদ্যংকিতমরুণতনুং যজ্ঞরূপং যজংতে ।
সেবংতে তংত্রমার্গৈর্বিলসদরিগদং দ্বাপরে শ্যামলাংগং
নীলং সংকীর্তনাদ্যৈরিহ কলিসমযে মানুষাস্ত্বাং ভজংতে ॥5॥

সোঽযং কালেযকালো জযতি মুররিপো যত্র সংকীর্তনাদ্যৈ-
র্নির্যত্নৈরেব মার্গৈরখিলদ ন চিরাত্ত্বত্প্রসাদং ভজংতে ।
জাতাস্ত্রেতাকৃতাদাবপি হি কিল কলৌ সংভবং কামযংতে
দৈবাত্তত্রৈব জাতান্ বিষযবিষরসৈর্মা বিভো বংচযাস্মান্ ॥6॥

ভক্তাস্তাবত্কলৌ স্যুর্দ্রমিলভুবি ততো ভূরিশস্তত্র চোচ্চৈ:
কাবেরীং তাম্রপর্ণীমনু কিল কৃতমালাং চ পুণ্যাং প্রতীচীম্ ।
হা মামপ্যেতদংতর্ভবমপি চ বিভো কিংচিদংচদ্রসং ত্ব-
য্যাশাপাশৈর্নিবধ্য ভ্রময ন ভগবন্ পূরয ত্বন্নিষেবাম্ ॥7॥

দৃষ্ট্বা ধর্মদ্রুহং তং কলিমপকরুণং প্রাঙ্মহীক্ষিত্ পরীক্ষিত্
হংতুং ব্যাকৃষ্টখড্গোঽপি ন বিনিহতবান্ সারবেদী গুণাংশাত্ ।
ত্বত্সেবাদ্যাশু সিদ্ধ্যেদসদিহ ন তথা ত্বত্পরে চৈষ ভীরু-
র্যত্তু প্রাগেব রোগাদিভিরপহরতে তত্র হা শিক্ষযৈনম্ ॥8॥

গংগা গীতা চ গাযত্র্যপি চ তুলসিকা গোপিকাচংদনং তত্
সালগ্রামাভিপূজা পরপুরুষ তথৈকাদশী নামবর্ণাঃ ।
এতান্যষ্টাপ্যযত্নান্যপি কলিসমযে ত্বত্প্রসাদপ্রবৃদ্ধ্যা
ক্ষিপ্রং মুক্তিপ্রদানীত্যভিদধুঃ ঋষযস্তেষু মাং সজ্জযেথাঃ ॥9॥

দেবর্ষীণাং পিতৃণামপি ন পুনঃ ঋণী কিংকরো বা স ভূমন্ ।
যোঽসৌ সর্বাত্মনা ত্বাং শরণমুপগতস্সর্বকৃত্যানি হিত্বা ।
তস্যোত্পন্নং বিকর্মাপ্যখিলমপনুদস্যেব চিত্তস্থিতস্ত্বং
তন্মে পাপোত্থতাপান্ পবনপুরপতে রুংধি ভক্তিং প্রণীযাঃ ॥10॥

narayaniyam dashaka 92 in assamese