নারাযণীযং দশক 37 – শ্রীকৃষ্ণাবতারোপক্রমম্

narayaniyam dashaka 37 in assamese

সাংদ্রানংদতনো হরে ননু পুরা দৈবাসুরে সংগরে
ত্বত্কৃত্তা অপি কর্মশেষবশতো যে তে ন যাতা গতিম্ ।
তেষাং ভূতলজন্মনাং দিতিভুবাং ভারেণ দূরার্দিতা
ভূমিঃ প্রাপ বিরিংচমাশ্রিতপদং দেবৈঃ পুরৈবাগতৈঃ ॥1॥

হা হা দুর্জনভূরিভারমথিতাং পাথোনিধৌ পাতুকা-
মেতাং পালয হংত মে বিবশতাং সংপৃচ্ছ দেবানিমান্ ।
ইত্যাদিপ্রচুরপ্রলাপবিবশামালোক্য ধাতা মহীং
দেবানাং বদনানি বীক্ষ্য পরিতো দধ্যৌ ভবংতং হরে ॥2॥

ঊচে চাংবুজভূরমূনযি সুরাঃ সত্যং ধরিত্র্যা বচো
নন্বস্যা ভবতাং চ রক্ষণবিধৌ দক্ষো হি লক্ষ্মীপতিঃ ।
সর্বে শর্বপুরস্সরা বযমিতো গত্বা পযোবারিধিং
নত্বা তং স্তুমহে জবাদিতি যযুঃ সাকং তবাকেতনম্ ॥3॥

তে মুগ্ধানিলশালিদুগ্ধজলধেস্তীরং গতাঃ সংগতা
যাবত্ত্বত্পদচিংতনৈকমনসস্তাবত্ স পাথোজভূঃ ।
ত্বদ্বাচং হৃদযে নিশম্য সকলানানংদযন্নূচিবা-
নাখ্যাতঃ পরমাত্মনা স্বযমহং বাক্যং তদাকর্ণ্যতাম্ ॥4॥

জানে দীনদশামহং দিবিষদাং ভূমেশ্চ ভীমৈর্নৃপৈ-
স্তত্ক্ষেপায ভবামি যাদবকুলে সোঽহং সমগ্রাত্মনা ।
দেবা বৃষ্ণিকুলে ভবংতু কলযা দেবাংগনাশ্চাবনৌ
মত্সেবার্থমিতি ত্বদীযবচনং পাথোজভূরূচিবান্ ॥5॥

শ্রুত্বা কর্ণরসাযনং তব বচঃ সর্বেষু নির্বাপিত-
স্বাংতেষ্বীশ গতেষু তাবককৃপাপীযূষতৃপ্তাত্মসু ।
বিখ্যাতে মধুরাপুরে কিল ভবত্সান্নিধ্যপুণ্যোত্তরে
ধন্যাং দেবকনংদনামুদবহদ্রাজা স শূরাত্মজঃ ॥6॥

উদ্বাহাবসিতৌ তদীযসহজঃ কংসোঽথ সম্মানয-
ন্নেতৌ সূততযা গতঃ পথি রথে ব্যোমোত্থযা ত্বদ্গিরা ।
অস্যাস্ত্বামতিদুষ্টমষ্টমসুতো হংতেতি হংতেরিতঃ
সংত্রাসাত্ স তু হংতুমংতিকগতাং তন্বীং কৃপাণীমধাত্ ॥7॥

গৃহ্ণানশ্চিকুরেষু তাং খলমতিঃ শৌরেশ্চিরং সাংত্বনৈ-
র্নো মুংচন্ পুনরাত্মজার্পণগিরা প্রীতোঽথ যাতো গৃহান্ ।
আদ্যং ত্বত্সহজং তথাঽর্পিতমপি স্নেহেন নাহন্নসৌ
দুষ্টানামপি দেব পুষ্টকরুণা দৃষ্টা হি ধীরেকদা ॥8॥

তাবত্ত্বন্মনসৈব নারদমুনিঃ প্রোচে স ভোজেশ্বরং
যূযং নন্বসুরাঃ সুরাশ্চ যদবো জানাসি কিং ন প্রভো ।
মাযাবী স হরির্ভবদ্বধকৃতে ভাবী সুরপ্রার্থনা-
দিত্যাকর্ণ্য যদূনদূধুনদসৌ শৌরেশ্চ সূনূনহন্ ॥9॥

প্রাপ্তে সপ্তমগর্ভতামহিপতৌ ত্বত্প্রেরণান্মাযযা
নীতে মাধব রোহিণীং ত্বমপি ভোঃসচ্চিত্সুখৈকাত্মকঃ ।
দেবক্যা জঠরং বিবেশিথ বিভো সংস্তূযমানঃ সুরৈঃ
স ত্বং কৃষ্ণ বিধূয রোগপটলীং ভক্তিং পরাং দেহি মে ॥10॥

narayaniyam dashaka 37 in assamese