নারাযণীযং দশক 36 – পরশুরামাবতারম্

narayaniyam dashaka 36 in assamese

অত্রেঃ পুত্রতযা পুরা ত্বমনসূযাযাং হি দত্তাভিধো
জাতঃ শিষ্যনিবংধতংদ্রিতমনাঃ স্বস্থশ্চরন্ কাংতযা ।
দৃষ্টো ভক্ততমেন হেহযমহীপালেন তস্মৈ বরা-
নষ্টৈশ্বর্যমুখান্ প্রদায দদিথ স্বেনৈব চাংতে বধম্ ॥1॥

সত্যং কর্তুমথার্জুনস্য চ বরং তচ্ছক্তিমাত্রানতং
ব্রহ্মদ্বেষি তদাখিলং নৃপকুলং হংতুং চ ভূমের্ভরম্ ।
সংজাতো জমদগ্নিতো ভৃগুকুলে ত্বং রেণুকাযাং হরে
রামো নাম তদাত্মজেষ্ববরজঃ পিত্রোরধাঃ সম্মদম্ ॥2॥

লব্ধাম্নাযগণশ্চতুর্দশবযা গংধর্বরাজে মনা-
গাসক্তাং কিল মাতরং প্রতি পিতুঃ ক্রোধাকুলস্যাজ্ঞযা ।
তাতাজ্ঞাতিগসোদরৈঃ সমমিমাং ছিত্বাঽথ শাংতাত্ পিতু-
স্তেষাং জীবনযোগমাপিথ বরং মাতা চ তেঽদাদ্বরান্ ॥3॥

পিত্রা মাতৃমুদে স্তবাহৃতবিযদ্ধেনোর্নিজাদাশ্রমাত্
প্রস্থাযাথ ভৃগোর্গিরা হিমগিরাবারাধ্য গৌরীপতিম্ ।
লব্ধ্বা তত্পরশুং তদুক্তদনুজচ্ছেদী মহাস্ত্রাদিকং
প্রাপ্তো মিত্রমথাকৃতব্রণমুনিং প্রাপ্যাগমঃ স্বাশ্রমম্ ॥4॥

আখেটোপগতোঽর্জুনঃ সুরগবীসংপ্রাপ্তসংপদ্গণৈ-
স্ত্বত্পিত্রা পরিপূজিতঃ পুরগতো দুর্মংত্রিবাচা পুনঃ ।
গাং ক্রেতুং সচিবং ন্যযুংক্ত কুধিযা তেনাপি রুংধন্মুনি-
প্রাণক্ষেপসরোষগোহতচমূচক্রেণ বত্সো হৃতঃ ॥5॥

শুক্রোজ্জীবিততাতবাক্যচলিতক্রোধোঽথ সখ্যা সমং
বিভ্রদ্ধ্যাতমহোদরোপনিহিতং চাপং কুঠারং শরান্ ।
আরূঢঃ সহবাহযংতৃকরথং মাহিষ্মতীমাবিশন্
বাগ্ভির্বত্সমদাশুষি ক্ষিতিপতৌ সংপ্রাস্তুথাঃ সংগরম্ ॥6॥

পুত্রাণামযুতেন সপ্তদশভিশ্চাক্ষৌহিণীভির্মহা-
সেনানীভিরনেকমিত্রনিবহৈর্ব্যাজৃংভিতাযোধনঃ ।
সদ্যস্ত্বত্ককুঠারবাণবিদলন্নিশ্শেষসৈন্যোত্করো
ভীতিপ্রদ্রুতনষ্টশিষ্টতনযস্ত্বামাপতত্ হেহযঃ ॥7॥

লীলাবারিতনর্মদাজলবলল্লংকেশগর্বাপহ-
শ্রীমদ্বাহুসহস্রমুক্তবহুশস্ত্রাস্ত্রং নিরুংধন্নমুম্ ।
চক্রে ত্বয্যথ বৈষ্ণবেঽপি বিফলে বুদ্ধ্বা হরিং ত্বাং মুদা
ধ্যাযংতং ছিতসর্বদোষমবধীঃ সোঽগাত্ পরং তে পদম্ ॥8॥

ভূযোঽমর্ষিতহেহযাত্মজগণৈস্তাতে হতে রেণুকা-
মাঘ্নানাং হৃদযং নিরীক্ষ্য বহুশো ঘোরাং প্রতিজ্ঞাং বহন্ ।
ধ্যানানীতরথাযুধস্ত্বমকৃথা বিপ্রদ্রুহঃ ক্ষত্রিযান্
দিক্চক্রেষু কুঠারযন্ বিশিখযন্ নিঃক্ষত্রিযাং মেদিনীম্ ॥9॥

তাতোজ্জীবনকৃন্নৃপালককুলং ত্রিস্সপ্তকৃত্বো জযন্
সংতর্প্যাথ সমংতপংচকমহারক্তহৃদৌঘে পিতৃন্
যজ্ঞে ক্ষ্মামপি কাশ্যপাদিষু দিশন্ সাল্বেন যুধ্যন্ পুনঃ
কৃষ্ণোঽমুং নিহনিষ্যতীতি শমিতো যুদ্ধাত্ কুমারৈর্ভবান্ ॥10॥

ন্যস্যাস্ত্রাণি মহেংদ্রভূভৃতি তপস্তন্বন্ পুনর্মজ্জিতাং
গোকর্ণাবধি সাগরেণ ধরণীং দৃষ্ট্বার্থিতস্তাপসৈঃ ।
ধ্যাতেষ্বাসধৃতানলাস্ত্রচকিতং সিংধুং স্রুবক্ষেপণা-
দুত্সার্যোদ্ধৃতকেরলো ভৃগুপতে বাতেশ সংরক্ষ মাম্ ॥11॥

narayaniyam dashaka 36 in assamese