নারাযণীযং দশক 16 – নরনারাযণাবতারং তথা দক্ষযাগঃ

narayaniyam dashaka 16 in assamese

দক্ষো বিরিংচতনযোঽথ মনোস্তনূজাং
লব্ধ্বা প্রসূতিমিহ ষোডশ চাপ কন্যাঃ ।
ধর্মে ত্রযোদশ দদৌ পিতৃষু স্বধাং চ
স্বাহাং হবির্ভুজি সতীং গিরিশে ত্বদংশে ॥1॥

মূর্তির্হি ধর্মগৃহিণী সুষুবে ভবংতং
নারাযণং নরসখং মহিতানুভাবম্ ।
যজ্জন্মনি প্রমুদিতাঃ কৃততূর্যঘোষাঃ
পুষ্পোত্করান্ প্রববৃষুর্নুনুবুঃ সুরৌঘাঃ ॥2॥

দৈত্যং সহস্রকবচং কবচৈঃ পরীতং
সাহস্রবত্সরতপস্সমরাভিলব্যৈঃ ।
পর্যাযনির্মিততপস্সমরৌ ভবংতৌ
শিষ্টৈককংকটমমুং ন্যহতাং সলীলম্ ॥3॥

অন্বাচরন্নুপদিশন্নপি মোক্ষধর্মং
ত্বং ভ্রাতৃমান্ বদরিকাশ্রমমধ্যবাত্সীঃ ।
শক্রোঽথ তে শমতপোবলনিস্সহাত্মা
দিব্যাংগনাপরিবৃতং প্রজিঘায মারম্ ॥4॥

কামো বসংতমলযানিলবংধুশালী
কাংতাকটাক্ষবিশিখৈর্বিকসদ্বিলাসৈঃ ।
বিধ্যন্মুহুর্মুহুরকংপমুদীক্ষ্য চ ত্বাং
ভীরুস্ত্বযাঽথ জগদে মৃদুহাসভাজা ॥5॥

ভীত্যাঽলমংগজ বসংত সুরাংগনা বো
মন্মানসং ত্বিহ জুষধ্বমিতি ব্রুবাণঃ ।
ত্বং বিস্মযেন পরিতঃ স্তুবতামথৈষাং
প্রাদর্শযঃ স্বপরিচারককাতরাক্ষীঃ ॥6॥

সম্মোহনায মিলিতা মদনাদযস্তে
ত্বদ্দাসিকাপরিমলৈঃ কিল মোহমাপুঃ ।
দত্তাং ত্বযা চ জগৃহুস্ত্রপযৈব সর্ব-
স্বর্বাসিগর্বশমনীং পুনরুর্বশীং তাম্ ॥7॥

দৃষ্ট্বোর্বশীং তব কথাং চ নিশম্য শক্রঃ
পর্যাকুলোঽজনি ভবন্মহিমাবমর্শাত্ ।
এবং প্রশাংতরমণীযতরাবতারা-
ত্ত্বত্তোঽধিকো বরদ কৃষ্ণতনুস্ত্বমেব ॥8॥

দক্ষস্তু ধাতুরতিলালনযা রজোঽংধো
নাত্যাদৃতস্ত্বযি চ কষ্টমশাংতিরাসীত্ ।
যেন ব্যরুংধ স ভবত্তনুমেব শর্বং
যজ্ঞে চ বৈরপিশুনে স্বসুতাং ব্যমানীত্ ॥9॥

ক্রুদ্ধেশমর্দিতমখঃ স তু কৃত্তশীর্ষো
দেবপ্রসাদিতহরাদথ লব্ধজীবঃ ।
ত্বত্পূরিতক্রতুবরঃ পুনরাপ শাংতিং
স ত্বং প্রশাংতিকর পাহি মরুত্পুরেশ ॥10॥

narayaniyam dashaka 16 in assamese